Soema e waka na baka a leti foe grontapoe?
„Oenoe e skèin leki sma di e gi leti ini grontapoe.” — FILIPISMA 2:15.
1. San bijbel e taki foe den falsi leti foe relisi?
NA WAN krin fasi bijbel e meki sma kon sabi Jesus leki „wan bigi leti”, „a leti foe grontapoe” (Jesaja 9:2; Johanes 8:12). Tokoe pikinso sma nomo ben waka na en baka di a ben de na grontapoe. Moro foeroe foe den sma ben wani foe waka baka falsi leti di, te joe e loekoe en boen, ben de tjariman foe doengroe. Foe den sma disi a Wortoe foe Gado e taki: „Den sortoe sma dati na falsi apostel, bidrigi wrokoman, di e kenki densrefi na ini apostel foe Krestes. Èn dati no de foe froewondroe, bika Satan srefi lobi kenki ensrefi, na ini wan engel foe leti. Foe dati ede a no de wan bigi sani taki den dinari foe en toe e tan kenki densrefi na ini dinari foe regtfardikifasi. Ma a kaba foe den sa de akroederi den wroko foe den.” — 2 Korentesma 11:13-15.
2. San Jesus ben taki ben sa de a fondamenti foe a kroetoe di a ben e kroetoe sma?
2 So boen, a no ala sma wani a leti, awansi o moi a de. Jesus ben taki: „Disi na a fondamenti foe a kroetoe, taki a leti kon na ini grontapoe, ma libisma lobi a doengroe moro leki a leti, bika den wroko foe den ben takroe. Bika a sma di e doe doti sani no wan si a leti na ai èn a no e kon na a leti, so taki den wroko foe en no kisi piri-ai.” — Johanes 3:19, 20.
Sma di lobi doengroe
3, 4. Fa den kerki tiriman ini Jesus dei ben sori taki den no ben wani waka na baka a leti?
3 Go prakseri fa dati ben de a kefal di Jesus ben de na grontapoe. Gado ben gi Jesus a krakti foe doe toemoesi span wondroe leki wan fasi foe sori taki en ben de a Mesias. Foe eksempel, na wan Sabadei, a ben meki wan man di ben gebore breni kon si baka. Fa dati ben de wan toemoesi moi fasi foe sori sari-ati! Fa a man dati ben de grantangi! Fositron a ben man si! Ma san den kerki tiriman ben doe? Johanes 9:16 e froeteri: „Sonwan foe den Fariseiman bigin taki [foe Jesus]: ’Disi a no wan man foe Gado, bika a no e hori Sabadei.’” Fa na ati foe den ben de kroektoe! Djaso wan sma ben meki kon betre na wan kefarlek moi fasi, ma na presi foe den sori fa den ben prisiri gi a man di ben breni fosi èn abi warderi gi a sma di ben meki en kon betre, den ben kroetoe Jesus! Foe di den ben doe disi, dan sondro degedege den ben sondoe kontrari a si di sma ben kan si fa a santa jeje foe Gado e wroko, wan sondoe di no abi pardon. — Mateus 12:31, 32.
4 Baka ten di den hoigriman disi ben aksi-aksi a man di ben breni fosi, sani foe Jesus, a man ben taki: „Foe troe a de wan wondroe, taki oenoe no sabi pe a [Jesus] komoto èn tokoe na en ben opo mi ai. Wi sabi taki Gado no e arki sondoeman, ma efoe wan sma e frede Gado èn e doe en wani a e arki a sma disi. Sensi owroeten noiti wi jere taki wan sma ben opo na ai foe wan sma di gebore breni. Efoe a man disi [Jesus] no ben komoto foe Gado, a no ben kan doe notinoti.” San den kerki tiriman ben doe? „Leki wan piki den ben taigi en: ’Joe ben gebore na ini sondoe èn tokoe joe e gi wi leri?’ Èn den ben trowe en na doro!” Fa den ben misi foe sori sari-ati! Na ati foe den ben tranga leki ston. Foe dati ede Jesus ben taigi den taki, ala di den ben kan si nanga den ai na skin fasi, den ben breni na jeje fasi. — Johanes 9:30-41.
5, 6. Sortoe sani den kerki tiriman foe a fosi jarihondro ben doe foe sori taki den ben lobi doengroe?
5 Taki den kerki hoigriman disi ben sondoe kontrari Gado jeje ben de krin foe si na wan tra okasi, di Jesus ben opo Lasarus baka foe dede. Foe a wondroe dati, foeroe gewoon sma ben sori bribi ini Jesus. Ma loekoe san den kerki tiriman ben doe. „Den ede-priester nanga den Fariseiman ben tjari a Sanhedrin kon makandra èn ben bigin taki: ’San wi sa doe, foe di a man disi e doe foeroe wondroe? Efoe wi e meki a go so doro, ala sma sa poti bribi ini en èn den Romesma sa kon èn poeroe a presi foe wi èn a nâsi foe wi’” (Johanes 11:47, 48). Den ben broko den ede nanga a posisi nanga hei nen foe den. Awansi san ben o de a bakapisi, den ben wani foe plisi den Romesma, no Gado. So boen, san den ben doe? „Sensi a dei dati den ben bosroiti foe kiri [Jesus].” — Johanes 11:53.
6 Na dati ben de ala? Nôno. San den ben doe baka dati e sori o foeroe den ben lobi a doengroe: „Den ede-priester ben bosroiti foe kiri Lasarus toe, bika foe en ede foeroe djoe ben go drape, èn ben poti bribi ini Jesus” (Johanes 12:10, 11). Fa dati ben takroe srefisrefi! Ala di den ben doe ala den sani disi foe kibri a posisi foe den, dan san ben pasa? Ini a srefi geslakti dati, den ben opo densrefi kontrari den Romesma, di ben kon feti nanga den ini 70 G.T. èn ben teki a presi foe den, a nâsi foe den nanga a libi foe den toe! — Jesaja 5:20; Lukas 19:41-44.
A sari-ati foe Jesus
7. Foe san ede sma di lobi waarheid ben go ipi-ipi na Jesus?
7 So a de toe ini a ten foe wi, taki a no ala sma wani froelekti na jeje fasi. Ma den sma di lobi waarheid wani kon na a leti. Den wani Gado leki den Soeverein èn den e angri foe drai go na Jesus, di Gado ben seni foe froeklari san na a leti, èn den e waka na en baka. Dati na san sma di abi sakafasi ben doe di Jesus ben de na grontapoe. Den ben go ipi-ipi na en. Srefi den Fariseiman ben moesoe erken dati. Den ben kragi: „Grontapoe go na en baka” (Johanes 12:19). Sma di gersi skapoe ben lobi Jesus, bika a ben de tra fasi leki den kerki tiriman di ben prakseri densrefi nomo, ben abi heimemre èn ben gridi gi makti. Foe den Jesus ben taki: „Den e tai hebi lai èn e poti den na tapoe den skowroe foe libisma, ma densrefi no de klariklari foe meri den nanga den finga. Ala den wroko di den e doe den e doe foe sma si den.” — Mateus 23:4, 5.
8. Sortoe fasi Jesus ben abi, di ben de heri tra fasi leki den relisi hoigriman?
8 Heri tra fasi leki dati, dan loekoe Jesus fasi foe sori sari-ati: „Di a si na ipi a ben firi sari gi den, bika den ben foefoeroe den èn panja den leki skapoe sondro herder” (Mateus 9:36). Èn san a ben doe na dati? A ben taigi den sma di Satan en seti foe sani ben soigi den: „Kon na mi, oenoe alamala di weri èn di moesoe tjari hebi lai, èn mi sa gi oenoe kowroe-ati. Teki mi tjatjari na oen tapoe èn leri foe mi, bika mi abi safoe-ati èn oenoe sa feni kowroe-ati gi oen sili. Bikasi a tjatjari foe mi safoe èn a lai foe mi lekti” (Mateus 11:28-30). Jesus ben doe foe san den ben taki foe en na fesi na Jesaja 61:1, 2, pe skrifi: „Jehovah salfoe mi foe froeteri boen njoensoe na den safoe-ati sma. A ben seni mi foe gi den sma di ati broko, foe meki fri bekènti na denwan di den ben teki poti na strafoe èn na opo di ben sa opo den ai bradi srefi gi den strafoeman; foe meki bekènti a jari foe boen wani foe a sei foe Jehovah èn a dei foe atibron foe a sei foe wi Gado; foe gi trowstoe na ala den wan di e sari.”
Tjari den tjariman foe leti kon makandra
9. Sortoe prenspari sani ben feni presi ini 1914?
9 Baka di Jesus ben go na hemel baka, a ben moesoe wakti te leki a ten ben kon gi Gado foe gi en Kownoekondre makti. Baka dati a ben sa prati „den skapoe” foe „den bokoboko” (Mateus 25:31-33; Psalm 110:1, 2). A ten dati ben kon di „den lasti dei” ben bigin ini 1914 (2 Timoteus 3:1-5). Jesus, di ben kisi makti leki Kownoe foe Gado en hemel Kownoekondre, ben bigin tjari den sma, di ben wani waka baka a leti, kon makandra na en reti anoe foe a feni di a e feni sma boen. Baka a Fosi Grontapoefeti, a wroko dati foe tjari sma kon makandra ben go doro moro esi.
10. Sortoe aksi sma kan aksi di abi foe doe nanga den sma di Jesus e gebroiki ini a wroko foe tjari sma kon makandra?
10 Ondro a tiri foe Krestes Jesus, a wroko foe tjari sma kon na ini ben kisi foeroe boen bakapisi. Noiti ini a historia someni sma foe ala nâsi ben kon makandra ini a troe anbegi di kisi a leti. Èn soema ini a ten disi na den sma di e waka na baka a leti di e kon foe Gado nanga Krestes? Soema e doe san Filipisma 2:15 e taki, dati den e „skèin leki sma di e gi leti ini grontapoe”, e kari trawan foe ’kon èn teki a watra foe libi foe soso’? — Openbaring 22:17.
11. San na a posisi foe a krestenhèit te joe e teki en gersi nanga leti na jeje fasi?
11 A krestenhèit e doe dati? A krestenhèit nanga den kerki foe en di e tjari pratifasi kon, seiker no e skèin leki wan sani di e gi leti. Foe taki en leti, den kerki fesiman de neleki den kerki tiriman ini Jesus dei. Den no e skèin a troe leti foe Gado nanga Krestes kon baka. Dritentinadri jari pasa, a tijdschrift Theology Today ben taki: „A de wan sari sani taki wi moesoe erken taki a leti disi no e skèin ini a Kerki nanga wan brenki di e naki sma ati. . . . A sori leki a Kerki e teki moro nanga moro a pasi foe de neleki den libisma demakandra di de lontoe en. A no de so foeroe a leti foe grontapoe, ma moro foeroe a de a sani di e meki den leti di e skèin ini grontapoe srefi skèin kon baka.” Èn a kondisi foe krestenhèit de moro takroe srefi ini a ten disi. A sokari leti foe grontapoe di a e skèin kon baka de, te joe e loekoe en boen, doengroe bika dati na ala sani di Satan nanga a grontapoe foe en abi foe gi. Nôno, no wan leti foe waarheid e kon foe den kerki foe a krestenhèit di no e kroederi nanga makandra èn di de dorodoro leki grontapoe.
12. Soema na den sma di de na organisâsi di e tjari leti ini a ten disi?
12 Nanga froetrow wi kan taki dati a njoen grontapoe libimakandra foe Jehovah Kotoigi na a troe, organisâsi di e tjari leti ini a ten disi. Leki wán man, ala den memre foe en — man, oema, nanga jongoewan — e meki a leti foe den di den kisi foe Jehovah nanga Krestes, skèin gi a heri libisma famiri. A jari di pasa, ini pikinmoro 70.000 gemeente foe Jehovah Kotoigi na heri grontapoe, moro leki fo miljoen tjariman foe leti ben taki fajafaja nanga tra sma foe Gado nanga den prakseri foe en. Èn ibri jari now, wi e si wan bigi tjari di den e tjari sma kon na ini di wani kisi leti toe na jeje fasi. Hondro doesoendoesoen sma e kisi dopoe baka te den studeri bijbel èn kon kisi wan soifri sabi foe a waarheid. Foe troe, Gado en „wani de taki ala sortoe sma moesoe kisi kibri èn kon kisi wan soifri sabi foe waarheid”. — 1 Timoteus 2:4.
13. Nanga san wi kan agersi a leti di e kon foe Jehovah?
13 Wi kan teki a froelekti di e kon now foe Jehovah gersi nanga san ben pasa di Gado en pipel foe owroeten ben gowe libi Egipti: „Jehovah ben waka na den fesi na deiten ini wan wolkoe postoe foe tjari den na a pasi èn na neti wan faja postoe foe gi den leti foe waka na deiten èn na neti” (Exodus 13:21, 22). A wolkoe na deiten èn a faja na neti di ben kon foe Gado, ben de tiriman di sma ben kan bow na tapoe. Den ben de sani di sma ben kan bow na tapoe neleki son di Gado ben meki foe gi wi leti na deiten joeroe. Na so toe, wi kan bow na tapoe Jehovah taki a e tan gi a pasi leti na jeje fasi gi sma di e soekoe waarheid ini den ogri dei disi. Odo 4:18 e gi wi a djaranti: „A pasi foe den regtfardikiwan de leki a brenki leti di e kon moro nanga moro krin te leki a dei kon de faste.”
Skèin a Kownoekondre leti kon baka
14. San moesoe de a moro prenspari sani di tjariman foe leti abi na prakseri?
14 Ala di Jehovah na a Fonten foe leti, èn Krestes na a Moro Prenspari Sma di e skèin a leti dati kon baka, den bakaman foe Jesus moesoe skèin a leti dati kon baka toe. Foe den a ben taki: „Oenoe na a leti foe grontapoe. . . . Meki oen leti skèin gi den sma, so taki den sa si den toemoesi boen wroko foe oenoe èn gi glori na oen Tata di de na hemel” (Mateus 5:14, 16). Èn san ben de a moro prenspari edeprakseri foe a leti disi di den bakaman foe en ben moesoe skèin gi a libisma famiri? San den ben moesoe leri sma na a heimarki foe a historia foe grontapoe? Jesus no ben taki dati den bakaman foe en ben sa preiki foe demokrasia, a diktator tirifasi (tiri sma na wan krasi fasi), wánfasi foe kerki nanga lanti noso iniwan tra grontapoe dren. Na presi foe dati a ben taki na fesi na Mateus 24:14, taki ala di den ben o kisi gens na ala sei foe grontapoe, „a boen njoensoe disi foe a kownoekondre [ben] moesoe preiki na heri grontapoe pe sma e libi, leki wan kotoigi gi ala nâsi èn dan a kaba [ben sa] kon”. So boen, tjariman foe leti ini a ten disi e froeteri tra sma foe Gado Kownoekondre, di sa tjari wan kaba kon na a grontapoe foe Satan èn sa bariwroko gi wan regtfardiki njoen grontapoe. — 1 Petrus 2:9.
15. Pe sma di wani a leti sa drai go?
15 Den sma di lobi a leti no sa meki den plan nanga prakseri foe a grontapoe disi meki den komoto go waka tapoe wan seipasi. Ala den plan nanga prakseri dati heri esi no sa de moro, foe di a grontapoe disi e doro en kaba. Na presi foe dati, sma di lobi regtfardikifasi sa wani foe drai go na a boen njoensoe di den sma di e meki a leti foe Gado en Kownoekondre skèin go na den fara oekoe foe grontapoe e meki bekènti. Den sma disi na denwan di den ben taki na fesi foe den na Openbaring 7:9, 10, pe skrifi: „Mi si èn loekoe! wan bigi ipi di no wan sma ben man teri foe ala nâsi nanga lo nanga pipel nanga tongo e tanapoe na fesi a kownoestoeroe [foe Gado] èn na fesi foe a Pikin Skapoe [Krestes] . . . Èn den e tan bari nanga wan tranga sten, taki: ’Froeloesoe wi abi foe taki tangi na wi Gado di sidon tapoe a kownoestoeroe èn na a Pikin Skapoe.’” Vers 14 e taki: „Disi na denwan di komoto foe a bigi banawtoe.” Ija, den e pasa a kaba foe a grontapoe disi libilibi èn e go na ini wan njoen grontapoe di no abi wan kaba na ondro a Kownoekondre foe Gado.
A njoen grontapoe di kisi leti
16. San sa pasa nanga a grontapoe foe Satan ini a bigi banawtoe?
16 A brenki leti foe waarheid sa skèin na a heri njoen grontapoe. Ija, go prakseri fa a situwâsi sa de a dei baka te Gado tjari a seti foe sani disi kon na en kaba. Satan, den ogri jeje foe en, nanga a politiek, bisnis, nanga kerki seti foe en no sa de moro — den alamala! Satan en heri wrokosani foe panja den prakseri foe en no sa de moro toe. So boen, baka a bigi banawtoe noiti moro no wán koranti, tijdschrift, boekoe, pikin boekoe noso pikin koranti sa druk moro, di e hori baka gi a takroe grontapoe disi. No wán grontapoe telefisi noso radio station sa bariwroko foe kroektoe sani di abi krakti na tapoe sma. A heri kontren foe Satan grontapoe di e gi sma sani di no boen sa figi poeroe nanga wán bigi slag! — Mateus 24:21; Openbaring 7:14; 16:14-16; 19:11-21.
17, 18. Fa joe ben sa taki foe a kontren na jeje fasi di sa de baka a kaba foe a grontapoe foe Satan?
17 Fa dati sa de wan bigi froelekti gi sma! Foe bigin nanga a dei dati, soso a gesontoe leti na jeje fasi di e bow sma èn di e kon foe Jehovah nanga en Kownoekondre, sa abi krakti na tapoe a libisma famiri. Jesaja 54:13 e taki na fesi: „Ala oen manpikin sa de sma di kisi leri foe Jehovah èn a vrede foe den manpikin foe oenoe sa de pasa marki.” Nanga a tiri foe Gado di e tiri a heri grontapoe, a pramisi foe en de, so leki fa Jesaja 26:9 e taki, „retidoe na san den sma foe a fatoe gron seiker sa leri.”
18 Heri esi a heri situwâsi di abi makti tapoe sma na froestan èn na jeje sei sa kenki kon tron moro boen. Sani di e bow sma sa pasa ala dei na presi foe immoreel sani di e meki sma lasi-ati, èn di de foe si now na ala sei. Ala sma di e libi na a ten dati, den sa gi leri foe a waarheid foe Gado nanga den prakseri foe en. A profeititori foe Jesaja 11:9 sa kon troe dorodoro, di e taki: „Grontapoe foe troe sa foeroe nanga a sabi foe Jehovah neleki fa den watra e tapoe a se.”
A de tranga fanowdoe foe waka na baka a leti
19, 20. Foe san ede den sma di wani waka na baka a leti moesoe tan na ai?
19 Now ini den lasti jari foe na ogri seti disi, a de tranga fanowdoe foe waka na baka a leti foe grontapoe. Èn wi moesoe tan na ai, foe di wan boen bigi orlokoe e feti foe meki wi no waka ini a leti. A gens disi e kon foe den makti foe doengroe — foe Satan, den ogri jeje foe en, nanga en grontapoe organisâsi. Dati meki na apostel Petrus e warskow: „Hori oen prakseri na wan, de na ai. Oen gensman, Didibri, e waka lontoe leki wan krasi lew, di e soekoe foe njan wan sma.” — 1 Petrus 5:8.
20 Satan sa poti ibri sani na a pasi foe den sma di e kisi foe doe nanga a leti, bika a wani taki den tan ini doengroe. A kan de kwinsi foe famiri noso mati di den ben abi fosi èn di e gens a waarheid. A kan de tweifri di abi foe doe nanga bijbel foe di wan sma kon breni nanga jepi foe den leri foe falsi kerki noso a panja di sma e panja prakseri foe den atheïstsma nanga agnostis-sma di no abi bribi. A kan de wan sma en eigi sondoe firi di e gi en problema foe libi akroederi den sani di Gado e aksi.
21. Sortoe sani ala sma di wani libi ini Gado njoen grontapoe, moesoe doe?
21 Awansi sortoe hendri sa de kande, joe wani foe njanboen foe libi ini wan njoen grontapoe sondro pôtifasi, ogridoe, onregtfardikifasi, nanga orlokoe? Joe wani foe njanboen foe wan volmaakti gesontoe nanga libi foe têgo na wan paradijs grontapoe? Dan teki Jesus èn waka na en baka leki a leti foe grontapoe èn arki a boskopoe foe den sma di e hori steifi na „a wortoe foe libi” èn di e „skèin leki sma di e gi a leti ini grontapoe”. — Filipisma 2:15, 16.
Fa joe ben sa piki?
◻ Fa den kerki tiriman ben sori taki den de sma di ben lobi doengroe?
◻ Fa Jesus ben handri nanga sma?
◻ Fa a ben go nanga a wroko foe tjari sma kon na inisei di tjariman foe leti ben e doe?
◻ Sortoe prenspari kenki sa feni presi heri esi?
◻ Foe san ede a de tranga fanowdoe foe waka na baka a leti foe grontapoe ini a ten disi?
[Prenki na tapoe bladzijde 14, 15]
Den tranga-ati Fariseiman ben trowe a man, di Jesus ben opo den ai foe en, na doro