„Na leti ben kon na ini grontapoe”
„Disi na a fondamenti gi a kroetoe, taki na leti ben kon na ini grontapoe, ma libisma ben lobi na doengroe moro leki na leti.” — JOHANES 3:19.
1. Foe san-ede ala sma moesoe broko den ede nanga a kroetoe foe Gado?
MORO foeroe sma na ini a ten disi no e broko den ede toemoesi foeroe nanga a kroetoe foe Gado. Sonwan e teki en leki a e kon foe ensrefi, taki Gado sa kroetoe den boen efoe den e go na kerki doronomo èn no e doe den sma na den sei ogri. Gi foeroe sma, den leri foe na krestenhèit, di e go foe hèlfaja nanga vagevuur, ben meki taki sma no e poti bribi ini na heri prakseri foe wan kroetoe foe Gado. Ma na mi-no-kefasi di de foe si na ala sei èn den lei foe na krestenhèit, no kan kenki a troe tori taki te foe kaba Gado sa kroetoe ibri libisma (Romesma 14:12; 2 Timoteus 4:1; Openbaring 20:13). Èn foeroe sa anga foe na kroetoe disi. Den sma di kisi wan boen kroetoe, sa kisi na presenti foe Gado foe têgo libi, ala di den sma di no kisi wan boen kroetoe, sa kisi a heri paiman foe sondoe: dede. — Romesma 6:23.
2. San na a fondamenti foe a kroetoe foe Gado?
2 Foe dati-ede meki opregti kresten e broko den ede nanga a kroetoe foe Gado, èn den wani foe plisi en na wan serjoesoe fasi. Fa den kan doe disi? Jesus e gi wi na sroto na ini Johanes 3:19. A e taki: „Disi now na a fondamenti gi a kroetoe, taki na leti ben kon na ini grontapoe, ma libisma ben lobi na doengroe moro leki na leti, bika den wroko foe den ben ogri.” Ija, a kroetoe foe Gado sa abi en fondamenti tapoe na aksi efoe wi lobi na leti na presi foe na doengroe.
„Gado na leti”
3. San na a doengroe, èn san na a leti?
3 Na jeje fasi, doengroe abi foe doe nanga a de di sma de ini don èn a firi foe de sondro howpoe di de foe feni ini a grontapoe foe Satan — ala di Satan e doe foeroetron neleki a de „wan engel foe leti” (2 Korentesma 4:4; 11:14; Efesiasma 6:12). Na a tra sei, leti abi foe doe nanga a froestan èn a kisi krin foe sani di e kon foe Jehovah Gado. Paulus ben taki foe na leti di a ben skrifi: „Bika a de Gado di ben taki: ’Leti moesoe skèin komoto foe doengroe’, èn en skèin na tapoe wi ati foe gi [den] leti nanga na glori sabi foe Gado nanga jepi foe na fesi foe Krestes” (2 Korentesma 4:6). Leti na jeje fasi abi so foeroe foe doe nanga Jehovah Gado, taki na apostel Johanes ben skrifi: ’Gado na leti.’ — 1 Johanes 1:5; Openbaring 22:5.
4. (a) Fa Jehovah ben meki sma ben man foe kisi na leti? (b) Na sortoe fasi wi kan sori lobi gi na leti?
4 Jehovah ben meki taki sma ben kisi na leti nanga jepi foe en wortoe, di de foe kisi fri ini a ten disi ini skrififasi na ini a Santa Bijbel (Psalm 119:105; 2 Petrus 1:19). Foe dati-ede meki na psalm-singiman troetroe ben sori en lobi gi na leti di a ben skrifi: „Fa mi lobi joe wèt! Na heri dei a abi mi belangstelling. Mi sili ben ondrow den froemane foe joe, èn mi lobi den toemoesi” (Psalm 119:97, 167). Joe lobi na leti netso foeroe leki fa na psalm singiman ben lobi en, so leki fa a sori krin? Joe e leisi na Wortoe foe Gado doronomo, joe e prakseri dipi foe en, èn joe e proeberi tranga foe doe san a e taki? (Psalm 1:1-3) Efoe disi de so, dan joe e soekoe foe kisi wan boen kroetoe foe Jehovah.
’Mi na a leti foe grontapoe’
5. Na tapoe soema a leti foe Gado e sori go?
5 Leti di e gi libi èn di komoto foe Jehovah e sori go tapoe a sma di Jesus Krestes de. Na a bigin foe na evangelium foe Johanes wi e leisi: „Nanga jepi foe [Jesus] libi ben de, èn na libi ben de na leti foe libisma. Èn na leti e skèin go ini a doengroe ma a doengroe no ben wini en” (Johanes 1:4, 5). Ija, Jesus tjari kon so krosibei nanga a leti, taki den e kari en „na troe leti di e gi leti na ala sortoe libisma” (Johanes 1:9). Jesus srefi ben taki: „So langa mi de na ini grontapoe, mi na a leti foe grontapoe.” — Johanes 9:5.
6. San wan sma moesoe doe foe kan kisi wan boen kroetoe di sa tjari en go na a têgo libi?
6 Foe dati-ede, den sma di lobi na leti, lobi Jesus èn e bribi na ini en. Sma no man kisi wan boen kroetoe sondro foe hori Jesus na ini prakseri. Ija, a de, soso te wi e loekoe go na en leki a jepisani di Gado poti foe kisi froeloesoe, taki wi man kisi wan boen kroetoe. Jesus ben taki: „Na sma di e poti bribi na ini a Manpikin, abi têgo libi; a sma di no e gi jesi na a Manpikin, no sa si na libi, ma na atibron foe Gado e tan na en tapoe” (Johanes 3:36). Ma san a wani taki foe poti bribi na ini Jesus?
7. Bribi na ini Jesus, wani taki bribi na ini soema moro?
7 Na a fosi presi, Jesus srefi ben taki: „Na sma di e poti bribi na ini mi, no e poti bribi na ini mi [wawan], ma [so srefi] na ini a sma di seni mi kon; èn a sma di e si mi, e si [so srefi] na sma di seni mi kon. Mi kon leki wan leti na ini grontapoe, so taki ibriwan sma di e poti bribi na ini mi, no sa tan na ini a doengroe” (Johanes 12:44-46). Den sma di lobi Jesus èn e sori bribi na ini en, moesoe abi so srefi dipi lobi gi a Gado èn a Tata foe Jesus, Jehovah èn bribi na ini en (Mateus 22:37; Johanes 20:17). Ibriwan sma di e gebroiki a nen foe Jesus na ini na anbegi foe den, ma e misi foe gi a moro bigi grani na Jehovah, no e sori wan troe lobi gi a leti. — Psalm 22:27; Romesma 14:7, 8; Filipisma 2:10, 11.
„A Moro Prenspari Wrokoman” foe Gado
8. Fa a leti di e kon foe Gado ben sori go tapoe Jesus, srefi bifo a ben gebore leki libisma?
8 Foe sori bribi na ini Jesus wani taki toe, foe teki dorodoro a ròl foe en ini den prakseri foe Gado. Na prenspari fasi foe na ròl disi ben tjari kon a krin, di wan engel ben taigi Johanes: „Na a gi foe kotoigi foe Jesus e meki profeititori doe kon” (Openbaring 19:10; Tori foe den Apostel 10:43; 2 Korentesma 1:20). Foe sensi na fosi profeititori na ini Eden, ala den profeititori di Gado ben taki nanga jepi foe en santa jeje, ben abi te foe kaba foe doe nanga Jesus èn en presi na ini a kontroe foe Gado prakseri. Na a srefi fasi, Paulus ben taigi den kresten foe Galasia, taki na Wet froebontoe ben de wan ’leriman di e tjari den go na Krestes’ (Galasiasma 3:24). Na owroe Wet froebontoe dati ben de foe meki na nâsi de klariklari gi na kon foe Jesus leki Mesias. So boen, srefi bifo Jesus ben gebore leki libisma na leti foe Jehovah ben sori go na en tapoe.
9. San a lobi foe na leti ben wani taki foe sensi 33 G. T.?
9 Na ini 29 G. T., Jesus ben pristeri ensrefi foe kisi dopoe èn a ben kisi salfoe nanga santa jeje, èn ben tron na so fasi na pramisi Mesias. Na ini 33 G. T. a dede leki wan volmaakti man, a ben kisi wan opobaka, ben opo go na hemel èn drape a ben pristeri a waarde foe en libi foe a boen foe wi sondoe (Hebrewsma 9:11-14, 24). Den sani disi di ben feni presi a wan baka a trawan, ben marki wan bigi kenki ini a fasi fa Gado ben handri nanga libisma. Jesus ben de now „na Moro Prenspari Wrokoman foe a libi”, ’na Moro Prenspari Wrokoman foe kan kisi froeloesoe’, „na Moro Prenspari Wrokoman èn a Sma di e meki wi bribi kon boen dorodoro” (Tori foe den Apostel 3:15; Hebrewsma 2:10; 12:2; Romesma 3:23, 24). Bigin foe 33 G. T., dan den sma di lobi a leti erken èn teki, taki aparti foe Jesus „froeloesoe no de ini no wan tra sma, bika no wan tra nen de na ondro hemel di gi na mindri libisma di wi moesoe kisi froeloesoe nanga jepi foe en.” — Tori foe den Apostel 4:12.
10. Foe san-ede a de so prenspari foe arki den wortoe foe Jesus èn foe gi jesi na den?
10 Sori bribi na ini Jesus wani taki toe foe teki en leki „na Wortoe” èn na ’Wondroe Raiman’ (Johanes 1:1; Jesaja 9:6). San Jesus e taki, e sori ala ten a waarheid foe Gado (Johanes 8:28; Openbaring 1:1, 2). Arki en na wan sani foe libi noso dede. Jesus ben taigi den djoe foe en ten: „A sma di e jere a wortoe foe mi èn e bribi a sma di seni mi kon, abi têgo libi, èn a no e kon ini na kroetoe, ma komoto foe dede go abra na libi” (Johanes 5:24). Na ini a fosi jarihondro G. T., den sma di ben doe akroederi den wortoe foe Jesus, ben froeloesoe poeroe foe na doengroe foe Satan grontapoe èn foe taki en so, ben kon a libi. Den ben froeklari den regtfardiki, foe de erfgenaam makandra nanga Jesus na ini en hemel Kownoekondre (Efesiasma 1:1; 2:1, 4-7). Gi jesi na den wortoe foe Jesus e meki a pasi e kon opo gi foeroe sma na ini a ten disi foe den froeklari den regtfardiki foe pasa Armagedon libilibi èn foe den kisi volmaakti libisma libi na ini a njoen grontapoe. — Openbaring 21:1-4; Teki gersi Jakobus 2:21, 25.
„Edeman foe ala sani”
11. Sortoe hei makti ben gi na Jesus ini 33 G. T.?
11 Baka en opobaka, Jesus ben tjari wan tra sei foe na leti kon a krin gi en bakaman. A ben taki: „Ala makti na ini hemel èn na grontapoe gi na mi” (Mateus 28:18). Na so fasi den ben meki Jesus kon moro hei èn gi en wan toemoesi boen posisi na ini a universeel organisâsi foe Jehovah. Paulus e taki moro fini foe a tori te a e taki: „[Gado] ben gi [Jesus] wan opobaka foe dede èn ben poti en na en reti anoe na ini den hemel kontren, hei krinkrin moro ibri lanti èn makti èn krakti èn tiri èn ibri nen di sma e kari, no wawan ini a seti foe sani disi, ma so srefi ini a wan di e kon. A ben poti ala sani toe na ondro en foetoe èn ben poti en leki edeman foe ala sani di abi foe doe nanga a gemeente, di de en skin” (Efesiasma 1:20-23; Filipisma 2:9-11). Sensi 33 G. T., lobi na leti ben abi na ini toe foe erken a hei posisi disi foe Jesus.
12. San salfoe kresten ben teki nanga prisiri foe sensi na bigin, èn fa den ben sori disi na wan praktis fasi?
12 Te foe kaba, a heri libisma famiri sa abi foe erken na makti foe Jesus (Mateus 24:30; Openbaring 1:7). Ma lobiman foe na leti ben erken disi nanga prisiri foe sensi na bigin. Salfoe memre foe na kresten gemeente ben teki Jesus leki „na ede foe na skin, na gemeente” (Kolosesma 1:18; Efesiasma 5:23). Te den e tron wan pisi foe na skin dati, den e ’meki den kon fri foe na makti foe doengroe èn poti den go abra na ini a kownoekondre foe na Manpikin foe Gado en lobi’ (Kolosesma 1:13). Foe bigin foe na ten dati, den e waka serjoesoe baka a tiri foe Jesus na ini ibri pisi foe den libi, èn na ini wi ten den ben leri den „tra skapoe” foe doe a srefi (Johanes 10:16). Erken na tiri foe Jesus na a moro prenspari sani di de fanowdoe foe kisi wan boen kroetoe.
13. Oten Jesus ben bigin wroko nanga en Kownoekondre makti, èn san ben pasa baka dati djaso na grontapoe?
13 Di Jesus ben opo go na hemel na ini 33 G. T., a no ben sori ala en makti wantewante. Ala di a ben de na Ede foe na kresten gemeente, tokoe a ben wakti a reti ten foe sori ala en makti abra a libisma famiri ini algemeen (Psalm 110:1; Tori foe den Apostel 2:33-35). Na ten dati ben doro na ini 1914, di den ben poti Jesus a tapoe na kownoestoeroe leki Kownoe foe Gado Kownoekondre èn „den lasti dei” foe na grontapoe disi ben bigin (2 Timoteus 3:1). Sensi 1919, a tjari di den tjari na lasti pisi foe den salfoewan kon makandra, ben doro en kaba. Spesroetoe foe sensi 1935, Jesus ben prati na libisma famiri na ini „den skapoe”, di no sa kisi ’na kownoekondre di ben seti gi [den]’, èn „den bokoboko”, di sa „go na ini a têgo koti poeroe.” — Mateus 25:31-34, 41, 46.
14. Fa a bigi ipi ben sori wan lobi gi a leti èn san sa de a bakapisi gi den?
14 Kolokoe taki den skapoe sori taki den de foeroe na ini den lasti dei disi. Wan bigi ipi foe den di a nomroe foe den de ini den miljoenmiljoen, de foe si na grontapoe èn den „komoto foe ala nâsi èn lo èn pipel èn tongo.” Neleki den kompe foe den, den salfoewan, na so den sma disi di gersi skapoe lobi na leti. Den ben „wasi den krosi foe den èn ben meki den kon weti na ini a broedoe foe na Pikin Skapoe”, èn den e bari nanga wan tranga sten: „Froeloesoe wi abi foe taki tangi na Gado, di sidon na tapoe a kownoestoeroe èn na a Pikin Skapoe.” Foe dati-ede, meki na bigi ipi leki groepoe sa kisi wan boen kroetoe. Den memre foe en e „komoto na ini a bigi banawtoe”, èn e pasa libilibi na pori ini Armagedon foe den wan di lobi na doengroe. — Openbaring 7:9, 10, 14.
„Pikin foe na leti”
15. Na sortoe fasi den wroko foe wi e sori taki wi e saka wisrefi na ondro a Kownoe, Jesus Krestes?
15 Ma fa lobiman foe na leti, efoe den de salfoewan noso tra skapoe, e saka densrefi na wan praktis fasi na ondro Jesus leki a sma di Gado poti a tapoe na kownoestoeroe leki Kownoe èn di e doe wroko leki Kroetoeman? Wán fasi de foe proeberi foe de na sortoe sma di Jesus e feni boen. Ala di Jesus ben de na grontapoe, a ben sori warderi gi den sortoe eigifasi leki opregtifasi, foe doe sani nanga joe heri ati, èn foe abi faja gi na waarheid, èn ensrefi ben tjari den eigifasi disi kon a krin (Markus 12:28-34, 41-44; Lukas 10:17, 21). Efoe wi wani foe kisi wan boen kroetoe, wi moesoe kweki den sortoe eigifasi disi.
16. Foe san-ede a de prenspari foe poeroe den wroko di de foe na doengroe poti na wan sei?
16 Disi de spesroetoe troe, foe di na doengroe foe a grontapoe foe Satan e kon deki moro nanga moro, ala di a kaba e kon moro krosibei (Openbaring 16:10). Den wortoe di Paulus ben skrifi gi den Romesma, e fiti boen foe dati ede: „Na neti pasa moi; na dei broko kaba. Meki foe dati-ede wi poeroe den wroko foe doengroe poti na wan sei èn meki wi weri den fetisani foe na leti. Meki wi waka leki fa a fiti neleki na deiten, no nanga njan èn dringi pasa marki èn dringi te foe droengoe, no na ini sekslibi di no mag èn loesoefasi foe libi, no ini trobi èn djaroesoe” (Romesma 13:12, 13). Ala di têgo libi na wan presenti foe Gado, dan tokoe na opregtifasi foe wi bribi èn wi lobi gi na leti, de foe si ini wi doe (Jakobus 2:26). Foe dati-ede na kroetoe di wi e kisi, sa anga moro foeroe foe o fara wi e doe toemoesi boen wroko èn tan farawe foe ogri wroko.
17. San a wani taki foe „teki weri Masra Jesus Krestes”?
17 Baka di na apostel Paulus ben gi rai na ini Romesma 13:12, 13, a e bosroiti foe di a e taki: „Oenoe teki weri Masra Jesus Krestes èn no meki plan na fesi foe den lostoe foe na skin” (Romesma 13:14). San a wani taki foe ’teki weri Masra Jesus Krestes’? A wani taki, dati kresten moesoe waka krosibei baka Jesus, e weri gi densrefi, foe taki en so, na eksempel foe en èn na fasi fa a ben denki, èn doe moeiti foe de leki Krestes. „Foe disi den ben kari oenoe”, Petrus ben taki, „bika srefi Krestes ben njanpina gi oenoe, èn a libi wan model gi oenoe a baka foe waka soifri ini en foetoemarki.” — 1 Petrus 2:21.
18. Sortoe bigi kenki kan de fanowdoe efoe wi wani foe kisi wan boen kroetoe?
18 Disi foeroetron ben tjari bigi kenki kon na ini a libi foe wan kresten. „Bika wan dei oenoe ben de doengroe”, Paulus ben taki, „ma now oenoe de leti di abi foe doe nanga Masra. Tan waka leki pikin foe leti, foe di na froktoe foe leti de ini ibri sortoe foe boen-ati èn regtfardikifasi èn waarheid” (Efesiasma 5:8, 9). Den sma di e doe wroko foe doengroe no de sma di lobi na leti èn den sa kisi wan boen kroetoe efoe den no tjari wan kenki kon.
„Oenoe na a leti foe grontapoe”
19. Na sortoe difrenti fasi wan kresten kan skèin na leti gowe baka?
19 Te foe kaba, lobi na leti wani taki, foe meki na leti skèin gowe baka, so taki trawan kan si en èn dati kan hari den kon. „Oenoe na a leti foe grontapoe”, Jesus ben taki. Èn a ben taki moro fara: „Meki a leti foe oen skèin gi libisma, so taki den man si den boen wroko foe oenoe èn gi glori na oen Tata di de na ini hemel” (Mateus 5:14, 16). Den boen wroko foe wan kresten abi na ini a sori foe ibri sortoe boen-ati èn regtfardikifasi èn waarheid, foe di so wan boen waka nanga libi e sorgoe foe wan krakti kotoigi foe a boen foe na waarheid (Galasiasma 6:10; 1 Petrus 3:1). Den boen wroko abi spesroetoe na ini, taki wi moesoe taki nanga trawan foe na waarheid. Na ini a ten disi, a wani taki foe teki prati na ini a grontapoe preikiwroko foe na „boen njoensoe disi foe na kownoekondre . . . na a heri grontapoe leki wan kotoigi gi ala nâsi.” A wani taki toe foe tjari go-baka nanga pasensi na den sma di sori belangstelling, studeri a bijbel nanga den, èn foe jepi den meki den foe den sei, doe den wroko di de foe na leti. — Mateus 24:14; 28:19, 20.
20. (a) O krin na leti e skèin na ini a ten disi? (b) Sortoe bigi blesi den sma, di e teki na leti na wan boen fasi, e njanboen foe en?
20 Na ini wi ten, tangi foe na fajafaja preikiwroko foe getrow kresten meki na boen njoensoe de foe jere na ini moro leki 200 kondre, èn na leti e skèin leki noiti a fesi. Jesus ben taki: „Mi na a leti foe grontapoe. A sma di e waka a mi baka no sa waka kwetikweti na ini doengroe, ma a sa abi na leti foe libi” (Johanes 8:12). Fa a de wan prisiri sani foe teki prati na a kontroe foe na pramisi disi! A libi foe wi kon moro foeroe nanga boen, now di wi no e soengoe gowe moro langa na ini a doengroe foe a grontapoe foe Satan. Èn san wi e froewakti de troetroe toemoesi moi, ala di wi e loekoe go na fesi foe kisi wan boen kroetoe foe a Kroetoeman di Jehovah poti (2 Timoteus 4:8). Fa a ben sa de wan rampoe efoe wi, now di wi kon na a leti, e drifi gowe baka na ini a doengroe èn ben sa kisi wan takroe kroetoe! Na ini na artikel di e kon wi sa taki foe na fasi fa wi kan tan fasti na ini bribi.
Joe kan froeklari disi?
◻ San na a fondamenti foe a kroetoe foe Gado?
◻ Sortoe prenspari ròl Jesus e prei ini a tori foe Gado prakseri?
◻ Fa wi e sori taki wi e saka wisrefi na ondro Jesus leki na sma di Jehovah poti a tapoe na kownoestoeroe leki Kownoe?
◻ Fa wi kan sori taki wi na „pikin foe na leti”?
◻ Na sortoe fasi na leti e skèin leki noiti a fesi na ini a grontapoe disi foe doengroe?
[Prenki na tapoe bladzijde 10]
Te foe kaba, a heri libisma famiri sa moesoe erken a tirimakti foe Jesus
[Prenki na tapoe bladzijde 12]
Wi e sori taki wi lobi na leti te wi e skèin en gowe gi trawan