Waka na baka a leti foe grontapoe
„A sma di e waka kon na mi baka . . . sa abi a leti foe a libi.” — JOHANES 8:12.
1. O prenspari leti de?
SAN wi ben sa doe sondro leti? Go prakseri fa a ben sa de efoe wi ben sa wiki ibri dei foe a jari 24 joeroe langa na ini doengroe. Go prakseri fa wan grontapoe sondro kloroe ben sa de, bika sondro leti kloroe no de. Ija, efoe leti no ben de, wi no ben sa de toe! Foe san ede? Foe di ini a fasi fa fotosynthese e wroko, groen bon e gebroiki leti foe meki a njanjan di wi e njan — aleisi, groentoe nanga froktoe. A troe taki sontron wi e njan a meti foe den meti. Ma den meti dati ben njan wiwiri foe den bon noso tra meti di ben libi foe wiwiri. So boen wi libi na skin fasi e anga dorodoro foe leti.
2. Sortoe krakti fonten foe leti de èn san disi e froeteri wi foe Jehovah?
2 A leti foe wi e kon foe son, di de wan stari. Ala di a son foe wi e gi wan heri ipi leti, a de wan stari di tokoe no bigi so. Foeroe stari moro bigi. Èn a groepoe foe stari di wi e libi na ini, a Merki Pasi, abi moro leki wan hondro miljard stari na ini. Boiti dati, na universum abi miljardmiljard groepoe foe stari di sma no man teri. Fa dati na kefarlek bigi groepoe foe stari di skeki na wan ordefasi! Fa dati na wan heri ipi leti di e komoto foe den! Fa Jehovah na wan krakti fonten foe leti di meki ala den sani dati! Jesaja 40:26 e meki bekènti: „Opo joe ai go na tapoe èn loekoe. Soema ben meki den sani disi? Disi na a Sma di e tjari a legre foe den go na doro srefi akroederi a nomroe, e kari srefi alamala na den nen. Foe a foeroe pasa marki foe dinamis energie ede èn foe di a de tranga na ini krakti, meki no wan e mankeri.”
Wan tra sortoe leti
3. O prenspari Jehovah en leti na jeje fasi de?
3 Jehovah de a Fonten foe wan tra sortoe leti toe, wán di e meki taki wi man si na jeje fasi, abi froelekti na jeje fasi. Wan wortoeboekoe e taki foe „kon kisi leti” na a fasi disi: „Foe gi sabi: foe gi leri; foe gi inzicht na jeje fasi na.” A e taki foe den wortoe „kon kisi leti” leki: „kon fri foe a de di wan sma de na ini don èn foe a fowtoe leri di wan sma kisi.” A froelekti na jeje fasi di e kon foe Jehovah wi e kisi nanga jepi foe soifri sabi foe a Wortoe foe en, bijbel. Dati na san e meki wi sabi soema na Gado èn san na den prakseri foe en. „Na Gado na a sma di taki: ’Meki a leti skèin komoto na a doengroe’, èn a ben skèin na den ati foe wi tapoe foe meki den kon kisi leti nanga a glori sabi foe Gado nanga jepi foe a fesi foe Krestes” (2 Korentesma 4:6). So boen, den waarheid ini Gado Wortoe e fri wi foe a de di wan sma de na ini don èn foe a leri di wi leri fowtoe sani. Jesus ben taki: „Oenoe sa sabi waarheid èn waarheid sa meki oenoe kon fri.” — Johanes 8:32.
4, 5. Fa sabi foe Jehovah de leki wan leti ini wi libi?
4 Jehovah, a Fonten foe troe froelekti na jeje fasi, de „volmaakti ini sabi” (Job 37:16). Psalm 119:105 e meki bekènti toe foe Gado: „Joe wortoe na wan lampoe gi mi foetoe èn wan leti na mi pasi.” So boen a kan gi leti na jeje fasi no wawan na sani di wi o doe now ini wi libi, ma so srefi na a pasi di de na wi fesi. Sondro dati, libi ben sa de neleki te wi e rèi wan oto na tapoe wan pasi di lai boktoe na wan doengroe neti, sondro faja na a oto noso na no wan tra presi foe na pasi. Leti na jeje fasi di e kon foe Gado wi kan agersi nanga a leti di den bigi faja foe wan oto e gi. A leti e skèin tapoe na otopasi so taki wi kan si krin pe wi e go.
5 A profeititori na Jesaja 2:2-5 e sori taki ini a ten foe wi Gado e tjari sma kon makandra, di komoto foe ala nâsi èn di wani froelekti na jeje fasi so taki den kan leri a troe anbegi èn doe en toe. Vers 3 e taki: „A sa leri wi foe en pasi èn wi sa waka den pasi foe en.” Vers 5 e kari sma di e soekoe waarheid: „Kon èn meki wi waka ini a leti foe Jehovah.”
6. Pe a leti foe Jehovah sa tjari wi te foe kaba?
6 So boen, Jehovah na a fonten foe toe sortoe leti di de prenspari gi libi: leti na skin fasi èn na jeje fasi. A leti na skin fasi e jepi wi skin foe tan na libi now, kande so wan 70 noso 80 jari. Ma a leti na jeje fasi e tjari wi go na têgo libi na wan paradijs grontapoe. A de leki fa Jesus ben taigi Gado ini begi: „Disi wani taki têgo libi, taki den teki ala ten sabi ini den foe joe, na wan enkri troe Gado èn foe en di joe ben seni kon, Jesus Krestes.” — Johanes 17:3.
Grontapoe na ini doengroe na jeje fasi
7. Foe san ede wi abi froelekti na jeje fasi fanowdoe moro leki no wan ten na fesi?
7 Ini a ten disi wi abi leti na jeje fasi fanowdoe moro leki no wan ten na fesi. Profeititori so leki Mateus kapitel 24 nanga 2 Timoteus kapitel 3 e sori taki wi de krosibei foe a kaba foe a seti foe sani disi. Den profeititori disi nanga trawan ben froeteri na fesi foe den toemoesi takroe sani di ben pasa ini a ten foe wi èn ben meki wi sabi taki wi de ini „den lasti dei”. Neleki fa den sortoe profeititori disi e taki, dan ini a jarihondro disi wi ben ondrofeni a wan rampoe baka a trawan. Ogridoe nanga ogri di sma e doe nanga tranga kon de so foeroe taki den e frede sma. Orlokoe ben teki moro leki wanhondro miljoen libi. Siki, so leki a takroe siki AIDS (SIDA), e soekoe foe kiri miljoenmiljoen sma, so wan 160.000 sma ben dede kaba foe AIDS (SIDA) ini Verenigde Staten foe Amerkankondre wawan. Osofamiri libi e broko èn sma e si na abi foe seks na wan joisti fasi leki wan sani di no de na modo moro.
8. Na fesi sortoe situwâsi a libisma famiri e tanapoe now èn foe san ede?
8 Javier Pérez de Cuéllar di fosi ben de sekretarsi-generaal foe den Verenigde Nâsi, ben taki: „A situwâsi na grontapoe e gi boeweisi pasa marki taki pôtifasi e njan a wánfasi foe libisma libimakandra na ondro.” A ben taki dati „moro leki wán miljard sma pôti srefisrefi” èn taki „disi ben meki den krakti di e tjari ogridoe, kon moro tranga”. Den „hebi kwinsi disi”, a ben taki, „de wan boen bigi tjalensi gi ala den sani di tirimakti e doe foe loesoe a problema disi”. Èn na edeman foe wan makti organisâsi ben taki: „A moro prenspari problema di a libisma libimakandra e tanapoe na fesi de taki sma no man tiri en moro.” O troe den wortoe foe Psalm 146:3 de: „No poti joe froetrow na tapoe bigi man, no tapoe a manpikin foe libisma foe grontapoe di no abi froeloesoe.”
9. Soema na den sma di abi a moro bigi frantiwortoe foe a doengroe di e kon leki wan skwala na tapoe a libisma famiri èn soema kan poeroe a krakti di a sani disi abi na wi tapoe?
9 A situwâsi ini a ten disi de neleki fa Jesaja 60:2 ben taki na fesi: „Loekoe! doengroe srefi sa tapoe grontapoe èn deki doengroe den nationaal groepoe.” A doengroe disi di e tapoe a moro bigi pisi foe den sma di e libi na grontapoe, de foe di den no e teki Jehovah en leti na jeje fasi. Èn a moro prenspari fonten di e meki a doengroe na jeje fasi kon, na Satan Didibri nanga den ogri jeje foe en, den moro prenspari feanti foe a Gado foe leti. Den na „den grontapoe tiriman foe a doengroe disi” (Efeisesma 6:12). So leki 2 Korentesma 4:4 e taki, dan „a gado foe a seti foe sani disi” na Didibri, di „ben breni a froestan foe den sma di no e bribi, so taki a glori boen njoensoe foe a Krestes, di de a prenki foe Gado, no ben sa skèin pasa”. No wan libisma tiri kan poeroe a krakti di Satan abi na tapoe sma. Soso Gado kan doe dati.
„Wan bigi leti”
10. Fa Jesaja ben froeteri na fesi taki ini a ten foe wi leti ben sa skèin na tapoe a libisma famiri?
10 Tokoe, ala di wan bigi doengroe e tapoe moro foeroe foe a libisma famiri, a Wortoe foe Gado ben taki na fesi toe na Jesaja 60:2, 3: „Na tapoe joe, Jehovah sa go skèin èn na tapoe joe sma sa si en glori. Èn nâsi seiker sa go na a leti foe joe.” Disi de ini akroederi nanga Jesaja kapitel 2, di ben pramisi taki a troe waarheid foe Jehovah, di kon kisi leti, ben sa poti steifi ini den lasti dei disi èn so leki fa vers 2 nanga 3 e taki, „na drape ala den nâsi moesoe lon go. Èn foeroe folkoe sa go troetroe èn taki: ’Kon, èn meki wi go na a bergi foe Jehovah’”, dati wani taki, na a glori troe anbegi foe en. So boen, ala di Satan e tiri grontapoe, leti foe Gado e skèin èn e meki ipi-ipi sma fri foe doengroe.
11. Soema ben sa de a moro prenspari sma di ben sa skèin a leti foe Jehovah kon baka èn fa Simeon ben meki sma kon sabi en?
11 A profeititori na Jesaja 9:2 ben taki na fesi taki Gado ben sa seni wan sma na ini grontapoe foe skèin a leti foe en kon baka. A tekst e taki: „A pipel di ben waka ini doengroe, si wan bigi leti. Èn den sma di ben libi ini a kondre foe dipi doengroe — leti srefi ben skèin na den tapoe.” A „bigi leti” disi na Jesus Krestes, a Sma di e taki gi Jehovah. Jesus ben taki: „Mi na a leti foe grontapoe. A sma di e waka kon na mi baka kwetikweti no sa waka ini doengroe, ma sa abi a leti foe a libi” (Johanes 8:12). Wan toe sma ben sabi disi, srefi di Jesus ben de wan jongoe pikin. Lukas 2:25 e taki dati wan sma di ben nen Simeon, ben de „regtfardiki èn nanga lespeki” èn taki „santa jeje ben de na en tapoe”. Di Simeon si a jongoe pikin Jesus, a ben taigi Gado na ini begi: „Den ai foe mi ben si a jepi foe gi froeloesoe di joe ben sreka na fesi foe ala den pipel, wan leti di o poeroe a doekoe di e tapoe den nâsi.” — Lukas 2:30-32.
12. Oten èn fa Jesus ben bigin poeroe a doekoe foe doengroe di e tapoe sma?
12 Jesus ben bigin poeroe a doekoe foe doengroe foe a libisma famiri no langa baka di a dopoe. Mateus 4:12-16 e froeteri wi taki disi ben meki Jesaja 9:1, 2 kon troe, di ben taki foe a „bigi leti” di ben sa bigin skèin na tapoe sma di ben waka ini doengroe na jeje fasi. Mateus 4:17 e taki: „Sensi a ten dati Jesus ben bigin preiki èn ben taki: ’Abi berow, bika a kownoekondre foe hemel kon krosibei.’” Foe di Jesus ben e preiki foe a boen njoensoe foe Gado en Kownoekondre, a ben leri sma foe a prakseri foe Gado. A „ben skèin leti na tapoe libi èn na tapoe a fasi foe no kisi pori nanga jepi foe a boen njoensoe”. — 2 Timoteus 1:10.
13. Fa Jesus ben taki foe ensrefi, èn foe san ede a ben kan doe disi nanga so wan fasti overtoigi?
13 Na wan getrowfasi Jesus ben skèin a leti foe Gado kon baka. A ben taki: „Mi ben kon leki wan leti na ini grontapoe, so taki ibri sma di e poti bribi ini mi no sa tan ini doengroe. . . . Mi no ben taki foe di misrefi ben wani, ma a Tata srefi di ben seni mi ben gi mi a komando san mi moesoe froeteri èn san mi moesoe taki. So srefi, mi sabi taki a komando foe en wani taki têgo libi.” — Johanes 12:44-50.
„Nanga jepi foe en libi ben de”
14. Fa Johanes 1:1, 2 e meki sma kon sabi Jesus?
14 Ija, Jehovah ben seni en Manpikin kon na grontapoe foe de wan leti foe sori sma a pasi foe go na têgo libi. Loekoe fa den ben sori tapoe disi na Johanes 1:1-16. Vers 1 nanga 2 e taki: „Ini a bigin a Wortoe ben de èn a Wortoe ben de nanga Gado èn a Wortoe ben de wan gado. A wan disi ben de ini a bigin nanga Gado.” Djaso Johanes e kari Jesus, bifo a ben de wan libisma, na a nen „Wortoe”. Disi e meki sma sabi a wroko di a ben abi leki a Sma di e taki gi Jehovah Gado. Èn di Johanes ben taki dati „ini a bigin a Wortoe ben de”, a ben wani taki dati a Wortoe ben de a bigin foe den sani di Jehovah ben meki, „a bigin foe den mekisani foe Gado” (Openbaring 3:14). A hei posisi foe en na mindri den mekisani foe Gado, e gi wan troetroe fondamenti foe a kari di den e kari en „wan gado”, wan makti wan. Jesaja 9:6 e kari en „Makti Gado”, ma no Almakti Gado.
15. Sortoe ekstra leri Johanes 1:3-5 e gi wi foe Jesus?
15 Johanes 1:3 e taki: „Ala sani ben kon foe de nanga jepi foe en èn aparti foe en no wán sani srefi ben kon foe de.” Kolosesma 1:16 e taki dati „nanga jepi foe en ala tra sani ben meki ini hemel èn na grontapoe”. Johanes 1:4 e taki dati „nanga jepi foe en ala libi ben de èn a libi ben de a leti foe libisma”. So boen nanga jepi foe a Wortoe, ala tra fasi foe libi ben meki; so srefi nanga jepi foe en Manpikin, Gado meki taki na onvolmaakti, libisma famiri di e dede, ben man kisi têgo libi. Foe troe Jesus na a makti sma di Jesaja 9:2 e kari „wan bigi leti”. Èn Johanes 1:5 e taki: „A leti e skèin ini doengroe, ma a doengroe no man wini en.” Leti e prenki waarheid nanga regtfardikifasi, kontrari foe doengroe, di e prenki sondoe nanga onregtfardikifasi. So boen Johanes e sori taki a doengroe no sa wini a leti.
16. Fa Johanes a Dopoeman ben sori o bigi a wroko foe Jesus de?
16 Now Johanes e taki na vers 6 te nanga vers 9: „Wan man ben opo di den ben seni kon leki wan sma di e teki presi gi Gado: a ben nen Johanes [a Dopoeman]. A man disi ben kon foe gi wan kotoigi, so taki a ben kan gi kotoigi foe a leti, taki ala sortoe sma moesoe bribi nanga jepi foe en. En [Johanes] no ben de a leti dati, ma a ben moesoe gi kotoigi foe a leti dati [Jesus]. A troe leti di e gi leti na ibri sortoe sma, ben de foe kon ini grontapoe.” Johanes ben sori go na a Mesias di ben o kon èn a ben meki den bakaman foe en drai go na a Mesias. Ini a pisi ten dati, ala sortoe sma ben kisi na okasi foe teki a leti. So boen Jesus no ben kon nomo gi a boen foe den djoe, ma gi a boen foe a heri libisma famiri — goedoewan noso pôtiwan, awansi sortoe ras den abi toe.
17. San Johanes 1:10, 11 e froeteri wi foe a kondisi na jeje fasi foe den djoe ini den dei foe Jesus?
17 Vers 10 nanga 11 e go doro: „A ben de ini grontapoe èn grontapoe ben kon nanga jepi foe en, ma grontapoe no ben sabi en. A ben kon na en eigi oso, ma en eigi sma no ben teki en.” Jesus, bifo a ben de wan libisma, ben de a sma di nanga jepi foe en a grontapoe foe a libisma famiri ben meki. Ma di a ben de na grontapoe, moro foeroe foe en eigi sma, den djoe, ben trowe en. Den no ben wani taki a takroe nanga a hoigrifasi foe den ben moesoe tjari kon na krin. Den ben wani doengroe na presi foe leti.
18. Fa Johanes 1:12, 13 e sori taki son sma ben kan tron pikin foe Gado nanga wan spesroetoe famiri goedoe?
18 Johanes e taki na vers 12 nanga 13: „Ma den sma di ben teki en, na den a ben gi a makti foe tron pikin foe Gado, bikasi den ben sori bribi ini a nen foe en; èn den ben gebore, no foe broedoe noso foe a wani foe libisma fasi noso foe a wani foe wan man, ma foe Gado.” Den vers disi e sori taki biginbigin, den bakaman foe Jesus no ben de manpikin foe Gado. Bifo a kon foe Krestes na grontapoe, a pasi no ben opo gi libisma foe de manpikin foe Gado èn no foe abi wan hemel howpoe. Ma nanga jepi foe a waarde foe Krestes en froeloesoe ofrandi, di den ben sori bribi na ini, Gado ben teki son libisma leki manpikin èn den ben man abi a howpoe foe abi libi leki kownoe nanga Krestes ini Gado en hemel Kownoekondre.
19. Foe san ede Jesus de ini a moro boen posisi foe skèin a leti foe Gado so leki fa Johanes 1:14 e sori?
19 Vers 14 e taki-go-taki-kon: „A Wortoe now tron libisma skin èn libi na wi mindri èn wi ben si en glori, wan glori so leki di foe wan wan enkri gebore manpikin foe wan tata.” Di Jesus ben de na grontapoe, a ben sori a glori foe Gado so leki fa soso Gado en fosigebore Manpikin ben kan doe. Foe dati ede, na wan aparti fasi, a ben de a moro bekwaam sma foe tjari Gado nanga En prakseri kon na krin gi a pipel.
20. San Johanes a Dopoeman e froeteri wi foe Jesus so leki fa skrifi na Johanes 1:15?
20 Baka dati, na apostel Johanes e skrifi na vers 15: „Johanes [a Dopoeman] ben gi kotoigi foe en, ija, foe troe a ben bari taki — disi na a wan di ben taki dati — èn ben taki: ’A sma di e kon na mi baka waka na mi fesi, bika a ben de bifo mi ben de.’” Johanes a Dopoeman ben gebore so wan siksi moen bifo Jesus ben gebore leki wan libisma. Ma Jesus ben doe boen foeroe moro wroko leki Johanes, so taki na ala fasi a ben waka na Johanes fesi. Èn Johanes ben erken taki Jesus ben de na libi bifo en, foe di Jesus ben libi kaba bifo Jesus ben tron wan libisma.
Presenti foe Jehovah
21. Foe san ede Johanes 1:16 e taki dati wi ben kisi „no-froedini boen-ati fasi na tapoe no-froedini boen-atifasi”?
21 Johanes 1:16 e taki-go-taki-kon: „Wi alamala ben kisi foe san a abi pasa marki, srefi no-froedini boen-atifasi na tapoe no-froedini boen-atifasi.” Ala di libisma gebore na ini sondoe, foe di den kisi dati foe Adam, Jehovah abi na prakseri foe pori na ogri seti foe sani disi, foe meki miljoenmiljoen sma go libilibi ini wan njoen grontapoe, foe opo den dedewan baka èn foe poeroe sondoe nanga dede, san sa abi têgo libi na wan paradijs grontapoe leki bakapisi. Ala den blesi disi na sani di sondoe libisma no e froedini noso abi reti na en tapoe. Den na presenti foe Jehovah nanga jepi foe Krestes.
22. (a) Sortoe sani a moro bigi presenti foe Gado ben sorgoe taki a kan? (b) Sortoe kari wi e kisi ini a lasti boekoe foe bijbel?
22 San na a moro bigi presenti di e meki taki ala den sani disi man? „Gado ben lobi grontapoe [foe a libisma famiri] so foeroe taki a ben gi en wan enkri gebore Manpikin, so taki ibriwan sma di e poti bribi ini en no sa kisi pori ma sa kisi têgo libi” (Johanes 3:16). So boen, joisti sabi foe Gado nanga en Manpikin, „a Moro Prenspari Sma di e meki sma kisi libi”, prenspari gi den sma di wani leti na jeje fasi èn têgo libi (Tori foe den Apostel 3:15). Dati na foe san ede a lasti boekoe foe bijbel e gi a kari di e kon now, gi ala sma di lobi waarheid èn di wani libi: „’Kon!’ Èn meki ibriwan sma di e jere taki: ’Kon!’ Èn meki ibriwan sma di e dreiwatra, kon; meki ibriwan sma di wani teki a watra foe libi foe soso.” — Openbaring 22:17.
23. San sma di gersi skapoe sa doe te den e kon ini a leti?
23 Sakafasi sma, di gersi skapoe no wawan sa kon na a leti foe grontapoe, ma den sa waka toe na baka a leti dati: „Den skapoe e waka na en baka bika den sabi [a babari foe waarheid ini] a sten foe en” (Johanes 10:4). Ija, den e prisiri „foe waka soifri ini en foetoemarki” bika den sabi taki te den e doe disi, dati sa wani taki têgo libi gi den. — 1 Petrus 2:21.
Fa joe ben sa piki?
◻ Sortoe toe leti e kon foe Jehovah?
◻ Foe san ede froelekti na jeje fasi de so prenspari ini a ten disi?
◻ Na sortoe fasi Jesus ben de „wan bigi leti”?
◻ San Johanes kapitel 1 e froeteri wi foe Jesus?
◻ Sortoe presenti e go na den sma di e waka na baka a leti foe grontapoe?
[Prenki na tapoe bladzijde 10]
Simeon ben kari Jesus „wan leti di o poeroe a doekoe di tapoe den nâsi”