Tjariman foe leti — Nanga sortoe marki?
„Mi ben poti oenoe na wroko leki wan leti foe den nâsi.” — TORI FOE DEN APOSTEL 13:47.
1. Fa a komando di den e sori go na en na Tori foe den Apostel 13:47, ben abi krakti na tapoe na apostel Paulus?
„JEHOVAH ben poti a komando na wi tapoe nanga den wortoe disi ’Mi ben poti oenoe na wroko leki wan leti foe den nâsi, so taki te na den kaba pisi foe grontapoe oenoe ben sa de leki wan froeloesoe’”, na apostel Paulus ben taki (Tori foe den Apostel 13:47). No wawan a ben taki dati, ma a ben erken a serjoesoefasi foe a wroko dati. Baka di Paulus ben kon tron wan kresten, a ben gi en libi foe doe a komando dati (Tori foe den Apostel 26:14-20). A komando dati ben poti na wi tapoe toe? Efoe dati de so, foe san ede a de prenspari ini a ten foe wi?
Di ’a leti ben kon dede’ gi a libisma famiri
2. (a) San ben pasa di ben abi foeroe krakti na tapoe a fasi fa sani ben waka na jeje fasi èn na moreel fasi, ala di grontapoe e doro en ten foe a kaba? (b) Fa wan Ingrisi tiriman ben doe di a ben si san ben pasa ini augustus 1914?
2 Bifo moro foeroe foe den sma di e libi ini a ten disi ben gebore, a grontapoe disi ben go na ini en ten foe a kaba. Prenspari sani ben pasa esi-esi baka makandra. Satan Didibri, a moro prenspari sma di e meki a jeje èn a moreel doengroe kon, ben trowe kon na grontapoe (Efeisesma 6:12; Openbaring 12:7-12). A libisma famiri ben dompoe kaba go na ini en fosi grontapoe feti. Froekoe ini augustus 1914, di a ben sori taki na orlokoe ben tron wan seiker sani, Sir Edward Grey, na Ingrisi minister foe dorosei afersi, ben tanapoe na a kantoro fensre foe en na Londen èn a ben taki: „Na heri Europa den lampoe e dede; ini wi libiten, wi no sa si taki den e leti agen.”
3. Sortoe boen bakapisi grontapoe tiriman ben abi di den ben proeberi foe meki a froewakti foe a libisma famiri kon krin?
3 Ini wan moeiti foe meki den lampoe disi kon leti baka, den ben poti a Folkoebontoe na wroko na ini 1920. Ma wawantron so den leti ben e leti èn ben e dede baka. Na a kaba foe a di foe Toe Grontapoefeti, den grontapoe tiriman ben proeberi baka, a leisi disi nanga na organisâsi foe den Verenigde Nâsi. Wantron moro, den leti no ben bron krin. Ma te wi e loekoe den sani di no pasa so langa ete, dan grontapoe tiriman ben taki foe „wan njoen grontapoe ordroe”. Ma pikinmoro wi no kan taki, dati iniwan „njoen grontapoe” disi ben tjari troe vrede nanga seikerfasi kon. Kontrari foe dati, feti nanga fetisani, feti na mindri ras, ogridoe, wroko di no de foe feni, pina libi, a doti foe a kontren pe sma e libi èn siki, alamala e go doro foe pori a prisiri foe libi di sma abi.
4, 5. (a) Oten èn fa a doengroe ben kon na tapoe a libisma famiri? (b) San de fanowdoe foe man kisi froelekti?
4 Te joe e loekoe en boen, dan a ben de langa ten bifo 1914 taki den leti ben dede gi a libisma famiri. Dati ben pasa kaba so wan 6.000 jari na fesi, na Eden, di wi fosi papa nanga mama ben froekisi foe teki den eigi bosroiti sondro foe si a wani foe Gado, di Gado ben tjari kon na doro. Den toemoesi ogri ondrofeni foe a libisma ras sensi a ten dati, na soso pisi foe sani di bijbel e sori na tapoe leki „a tirimakti foe doengroe” (Kolosesma 1:13). A ben de Satan Didibri di ben meki taki a fosi man, Adam, ben dompoe a grontapoe na ini sondoe; èn foe Adam, sondoe nanga dede ben panja go na a heri libisma famiri (Genesis 3:1-6; Romesma 5:12). Na so wan fasi a libisma ras ben lasi a feni di Jehovah, a Fonten foe leti nanga libi, ben feni den boen. — Psalm 36:9.
5 A wan enkri fasi taki den ben kan meki a leti skèin baka gi wan toe sma foe a libisma famiri ben sa de efoe Jehovah Gado, a Mekiman foe a libisma famiri, ben sa feni den boen baka. Dan „a sani dati di e tapoe ala den pipel”, a kroetoe di sma kisi foe a sondoe ede, ben sa kan poeroe. Fa disi ben sa man? — Jesaja 25:7.
A sma di den gi „leki wan leti foe den nâsi”
6. Sortoe bigi froewakti Jehovah ben meki taki a man gi wi nanga jepi foe Jesus Krestes?
6 Srefi bifo Jehovah ben seni Adam nanga Eva komoto na a Paradijs, A ben taki na fesi foe wan „siri” di ben sa de a froeloesoeman foe sma di lobi retidoe (Genesis 3:15). Baka di a pramisi Siri dati ben gebore leki wan libisma, dan, na a tempel na Jerusalem, Jehovah ben meki na owroe Simeon meki sma kon sabi en leki „wan leti di sa poeroe a doekoe foe den nâsi” (Lukas 2:29-32). Nanga jepi foe bribi na ini na ofrandi foe Jesus en volmaakti libisma libi, sma ben kan kon fri foe a kroetoe di de a bakapisi foe a sondoe di den kisi foe den papa nanga mama (Johanes 3:36). Ini akroederi nanga a wani foe Jehovah, den ben kan froewakti now foe kisi têgo libi ini volmaakti fasi efoe a ben de now leki wan pisi foe a hemel Kownoekondre noso leki borgroe foe en na wan paradijs grontapoe. Fa dati de wan toemoesi boen seti!
7. Foe san ede den pramisi na Jesaja 42:1-4 nanga a kontroe foe den ini a fosi jarihondro, e foeroe wi nanga howpoe?
7 Jesus Krestes srefi de a djaranti foe a kontroe foe den gran froewakti disi. Na apostel Mateus ben fiti san skrifi na Jesaja 42:1-4 tapoe Jesus ini a tori foe a meki di a meki sma kon betre di ben kisi kwinsi. Wan pisi foe a tekst dati e taki: „Loekoe! Mi knekti, di mi e hori steifi na en! A wan di mi ben froekisi, di mi sili feni boen! Mi poti mi jeje ini en. Retidoe a sa tjari kon gi den nâsi”. Èn a no disi na san pipel foe ala den nâsi abi fanowdoe? A profeitori e go doro: „A no sa bari èn a no sa opo en sten, èn a strati a no sa meki sma jere en sten. Wan kentiki di beni kaba a no sa broko; èn wan kandra di abi pikinso faja ete, a no sa bro dati kiri”. Ini akroederi nanga disi, Jesus no ben handri na wan grofoefasi nanga pipel di ben e kisi kwinsi kaba. A ben sori sari gi den, a ben gi den leri foe den prakseri foe Jehovah èn ben dresi den. — Mateus 12:15-21.
8. Na sortoe fasi Jehovah ben gi Jesus „leki wan froebontoe foe a pipel” èn „leki wan leti foe den nâsi”?
8 A Sma di gi a profeititori disi e bigin taki nanga a Foetoeboi foe en, nanga Jesus, èn a e taki: „Misrefi, Jehovah, kari joe ini regtfardikifasi èn baka dati mi ben teki joe na joe anoe. Èn mi sa kibri joe èn gi joe leki wan froebontoe gi a pipel, leki wan leti foe den nâsi, foe opo den ai foe a breniwan, foe tjari a strafoeman poeroe foe a doengroe-oso, foe poeroe den wan di e sidon na ini doengroe, foe a strafoe-oso” (Jesaja 42:6, 7). Ija, Jehovah ben gi Jesus Krestes, leki wan froebontoe, leki wan serjoesoe djaranti di abi wan pramisi na ini. Fa dati e gi deki-ati! Jesus ben sori taki a ben broko en ede troetroe nanga a libisma famiri di a ben de na grontapoe; a ben gi en libi srefi gi a libisma famiri. Disi na a sma di Jehovah ben froetrow a tiriwroko tapoe ala den nâsi na ini en anoe. A no de foe froewondroe taki Jehovah ben sori go na en leki a leti foe den nâsi. Jesus srefi ben taki: „Mi na a leti foe grontapoe.” — Johanes 8:12.
9. Foe san ede Jesus no ben gi ensrefi foe meki a seti foe sani di ben de ini a ten dati, kon moro boen?
9 Nanga sortoe marki Jesus ben dini leki a leti foe grontapoe? Seiker a no ben de foe wan grontapoe marki noso gridi foe moni. A ben weigri foe proeberi foe kenki den politiek sistema di ben de ini a ten dati èn meki den kon moro boen foe di a no ben sa teki kownoewroko di komoto na Satan, a tiriman foe grontapoe, noso na den libisma (Lukas 4:5-8; Johanes 6:15; 14:30). Jesus ben sori bigi sari-ati gi den sma di ben e kisi kwinsi èn a ben tjari froelekti gi den, na fasi di tra sma no ben man. Ma a ben sabi taki froelekti di ben o tan, no ben man kon na ini a situwâsi foe a libisma libimakandra, di ben de na ondro a kroetoe foe Gado, foe di den ben abi a sondoe na ini den, di den ogri jeje krakti, di sma no man si, ben boeweigi foe den kan doe kroektoe sani. Nanga a froestan foe sani, di komopo na Gado, Jesus ben seti a heri libi foe en lontoe a doe foe a wani foe Gado. — Hebrewsma 10:7.
10. Na sortoe fasi èn nanga sortoe marki Jesus ben dini leki a leti foe grontapoe?
10 Na sortoe fasi èn nanga sortoe marki dan, Jesus ben dini leki wan leti foe grontapoe? A ben gi ensrefi na a preiki foe a boen njoensoe foe a Kownoekondre foe Gado (Lukas 4:43; Johanes 18:37). Foe di Jesus ben gi kotoigi foe a waarheid foe Jehovah en prakseri, a ben gi glori na a nen foe en hemel Tata (Johanes 17:4, 6). Boiti dati, leki a leti foe grontapoe, Jesus ben meki sma kon si den falsi fasi foe relisi èn na so fasi a ben gi denwan di den ben hori ini relisi katibo fri na jeje fasi; a ben poeroe Satan bere kon na doro leki a sma, di sma no man si, di ben boeweigi denwan di ben gi en pasi foe a gebroiki den. Jesus ben meki sma kon si den wroko di de foe doengroe krinkrin (Mateus 15:3-9; Johanes 3:19-21; 8:44). Na wan fasi di ben de krin foe si, a ben boeweisi taki a de a leti foe grontapoe di a ben gi en volmaakti libisma libi ini dede leki wan froeloesoe paiman, na so fasi a ben opo a pasi gi denwan di e sori bribi ini a seti disi foe kisi pardon foe sondoe, wan matifasi nanga Gado di A feni boen èn a froewakti foe têgo libi leki wan pisi foe a famiri foe Jehovah na hemel èn na grontapoe (Mateus 20:28; Johanes 3:16). Èn te foe kaba, foe di Jesus ben hori wan volmaakti fasi foe gi ensrefi ini a dini foe Gado en heri libi langa, meki a ben hori a soevereiniteit foe Gado hei èn ben boeweisi taki Didibri na wan leiman, èn na so fasi a ben meki taki a kan taki sma di lobi regtfardikifasi kisi têgo libi. Ma Jesus ben o de na wan enkri tjariman foe leti?
„Oenoe na a leti foe grontapoe”
11. San den disipel foe Jesus moesoe doe, so taki den ben kan de tjariman foe leti?
11 Na Mateus 5:14, Jesus ben taigi den disipel foe en: „Oenoe na a leti foe grontapoe”. Den ben moesoe waka ini den foetoestap foe en. Nanga a fasi fa den e libi so boen leki a fasi fa den e preiki, den ben moesoe tjari tra sma na Jehovah leki a Fonten di e gi troe leti. Leki sma di e waka na Jesus baka, den ben moesoe meki a nen foe Jehovah bekènti èn ben moesoe hori En soevereiniteit hei. Den ben moesoe meki a Kownoekondre foe Gado bekènti leki a wan enkri howpoe gi a libisma famiri neleki fa Jesus ben doe. Den ben moesoe meki den falsi relisi fasi kon na krin toe, den wroko di de foe doengroe èn na ogriwan di de na baka den sortoe ogridoe disi. Bakaman foe Krestes ben moesoe froeteri sma na ala sei foe Jehovah en lobi seti foe froeloesoe sma nanga jepi foe Jesus Krestes. Èn fa den fosi kresten ben doe a wroko dati di den ben kisi nanga faja, foe bigin na Jerusalem nanga Judea èn dan den ben go doro te na ini Samaria, so leki fa Jesus ben komanderi den! — Tori foe den Apostel 1:8.
12. (a) O fara a leti na jeje fasi ben moesoe go? (b) San a jeje foe Jehovah ben meki Paulus si krin foe Jesaja 42:6 èn fa a profeititori dati moesoe abi krakti na tapoe a libi foe wi?
12 Ma a preiki foe a boen njoensoe disi no ben skotoe foe doe na ini a kontren dati wawan. Jesus ben gi den bakaman foe en rai foe „meki disipel foe sma foe ala nâsi” (Mateus 28:19). Na a ten di Saulus foe Tarsus ben drai en libi teki a krestendom, Masra ben sori spesroetoe taki Saulus (di ben tron na apostel Paulus) ben moesoe preiki no soso gi den djoe ma gi den hèidensma toe (Tori foe den Apostel 9:15). Nanga a jepi foe santa jeje, Paulus ben kon froestan san dati ben wani taki. So boen, a ben kon si taki a profeititori na Jesaja 42:6 di ben kon troe wantewante na ini Jesus Krestes, de so srefi wan komando, di no taki nanga wortoe, gi ala sma di e sori bribi na ini Krestes. Foe dati ede na ini Tori foe den Apostel 13:47, di Paulus ben teki den wortoe foe Jesaja taki, dan a ben taki: „Jehovah gi oenoe a gebod nanga den wortoe disi: ’Mi poti oenoe leki wan leti foe den nâsi, so taki oenoe ben sa de leki wan froeloesoe te na den kaba pisi foe grontapoe.’” Ma fa a de nanga joe? Joe teki a plekti dati foe de wan tjariman foe leti na ati? Joe seti joe libi lontoe a doe foe a wani foe Gado neleki Jesus nanga Paulus?
Leti nanga waarheid di komoto na Gado foe tjari wi
13. San na wi moro tranga begi di de ini akroederi nanga Psalm 43:3 èn gi san a e kibri wi?
13 Efoe nanga jepi foe wi eigi wani, wi wani proeberi foe ’meki a leti kon skèin baka’, foe meki a tamara loekoe moro moi gi a libisma famiri, dan na wan serjoesoefasi wi ben sa misi san a Wortoe foe Gado, di skrifi nanga jepi foe santa jeje, wani taki. Ma, awansi san grontapoe e doe moro foeroe, opregti kresten e loekoe go na Jehovah leki a troetroe Fonten foe leti. A begi foe den de leki di foe Psalm 43:3, di e taki: „Seni joe leti èn joe waarheid go. Meki den dati tjari mi. Meki den tjari mi go na joe santa bergi èn na joe bigi tabernakel.”
14, 15. (a) Na sortoe fasi Jehovah e seni a leti nanga a waarheid foe en now? (b) Fa wi kan sori taki a leti foe Gado nanga waarheid e tjari wi troetroe?
14 Jehovah e go doro foe gi piki na tapoe a begi dati foe en loyaal foetoeboi. A e seni leti go foe di a e meki en prakseri bekènti, foe di a e jepi den foetoeboi foe en foe froestan a prakseri disi èn baka dati foe di a e tjari san e meki bekènti kon troe. Te wi e begi Gado, a no de soso wan sani di wi moesoe doe, di e doe nomo foe sori na dorosei leki wi de santa. A serjoesoe winsi foe wi de, taki a leti di e kon foe Jehovah sa tjari wi, so leki fa psalm e taki. Wi e teki a frantiwortoe di e go makandra nanga a kisi di wi e kisi a leti di Gado e gi. Leki na apostel Paulus, wi e si taki a kontroe foe a Wortoe foe Jehovah e tjari nanga en wan komando di no gi nanga wortoe na ala denwan di e sori bribi na ini en. Wi e firi neleki wi abi wan paiman na tra sma te leki wi gi den a boen njoensoe di Gado froetrow na wi nanga a marki dati. — Romesma 1:14, 15.
15 A leti nanga waarheid di Jehovah seni go ini den dei foe wi, meki kon na krin taki Jesus Krestes e tiri fajafaja komoto na en hemel kownoestoeroe (Psalm 2:6-8; Openbaring 11:15). Jesus ben taki na fesi taki na a ten foe en denoja ini kownoekondre makti, a boen njoensoe disi foe a Kownoekondre ben sa preiki na heri grontapoe pe libisma e libi foe gi wan kotoigi (Mateus 24:3, 14). A wroko dati e doe now èn fajafaja a e doe so, na heri grontapoe lontoe. Efoe wi e meki a wroko dati de a moro prenspari sani ini wi libi dan a leti nanga waarheid foe Gado e tjari wi, so leki a psalm singiman e taki.
Jehovah en eigi glori ben skèin go
16, 17. Fa Jehovah ben meki a glori foe en skèin kon na ini 1914 na tapoe en organisâsi di gersi wan oema èn sortoe komando a ben gi na oema?
16 Nanga wortoe di e tranga na ati, den Boekoe e froeteri foe a fasi, fa leti foe Gado e panja go na sma na ala presi. Jesaja 60:1-3, di e taki nanga Jehovah en „oema”, noso a hemel organisâsi foe loyaal foetoeboi, e taki: „Opo, o oema, skèin leti go, bika joe leti kon, èn na joe tapoe a glori foe Jehovah skèin go. Bika, loekoe! doengroe srefi sa tapoe grontapoe, èn wan krinkrin mankeri foe howpoe den nationaal groepoe; ma na joe tapoe Jehovah sa skèin go, èn na joe tapoe sma sa si en eigi glori. Èn nâsi seiker sa go na a leti foe joe, èn kownoe na a brenki foe a skèin di joe e skein go”.
17 Ini den jari 1914 a glori foe Jehovah ben skèin go tapoe en hemel organisâsi di gersi wan oema. Baka wan langa pisi ten foe wakti na oema ben meki wan pikin, a Mesian Kownoekondre, nanga Jesus Krestes leki Kownoe (Openbaring 12:1-5). Foe di Jehovah feni dati boen a glori leti foe En ben skèin tapoe a tiri dati, leki a retiwan gi a heri grontapoe.
18. (a) Foe san ede doengroe e tapoe grontapoe, so leki fa Jesaja 60:2 ben taki na fesi? (b) Fa aparti sma kan kisi froeloesoe foe a doengroe foe grontapoe?
18 Kontrari foe dati, doengroe èn wan krinkrin mankeri foe howpoe e tapoe grontapoe nanga den nationaal groepoe. Foe san ede? Bika den nâsi e weigri foe erken a tiri foe a lobi Manpikin foe Gado èn e teki na presi foe dati libisma tiri. Den e denki taki te den e kon fri foe wan fasi foe libisma tiri èn e teki wan trawan, den sa loesoe den problema foe den. Ma disi no e tjari a froelekti di den e howpoe foe kisi. Den e misi foe si soema na a sma ini a jeje kontren di kibrikibri, e boeweigi den nâsi (2 Korentesma 4:4). Den e weigri foe erken a Fonten foe troe leti èn foe dati ede den de na doengroe (Efeisesma 6:12). Ma awansi san den nâsi e doe, sma kan kon fri foe a doengroe dati. Na sortoe fasi? Foe di den e poti bribi dorodoro ini a Kownoekondre foe Gado èn e saka densrefi na disi ondro.
19, 20. (a) Foe san ede èn fa a glori foe Jehovah ben skèin na tapoe den salfoe bakaman foe Jesus? (b) Foe sortoe reide Jehovah ben meki den salfoewan foe en kon tron tjariman foe leti? (c) Fa „kownoe” nanga „nâsi” ben go moro krosibei foe a leti di Gado e gi, so leki fa den froeteri na fesi foe dati?
19 A krestenhèit no ben poti bribi ini a Kownoekondre foe Gado èn den no ben saka densrefi na disi ondro. Ma den bakaman foe Jesus Krestes di salfoe nanga jeje, doe dati. Leki bakapisi foe dati Jehovah leti, foe a feni di a feni den boen, ben skèin na tapoe den sma disi, di sma ai kan si èn di e teki presi gi a hemel oema foe en èn a glori foe en de foe si na den tapoe (Jesaja 60:19-21). Den e njanboen foe leti na jeje fasi di no wan enkri kenki ini politiek noso ekonomia situwâsi kan poeroe. Den ondrofeni a fri di Jehovah fri den foe Babilon a Bigiwan (Openbaring 18:4). Den e njanboen foe a lafoefesi foe en, taki a e feni den boen bika den teki a tranga leri foe en èn ben hori na universeel soevereiniteit foe en hei na wan loyaalfasi. Den abi toemoesi moi froewakti foe a ten di e kon èn den e prisiri ini a howpoe di a poti na den fesi.
20 Ma nanga sortoe marki Jehovah ben handri nanga den na a fasi disi? So leki fa ensrefi e taki na ini Jesaja 60:21, dan a de so taki en ben sa kan kisi „glori”, so taki a nen foe en ben sa kisi grani èn trawan ben sa kan hari kon na en leki a wan enkri troe Gado — èn dati nanga leki bakapisi têgo boen gi densrefi. Ini akroederi nanga disi, dan ini 1931 den anbegiman disi foe a troe Gado ben teki a nen Jehovah Kotoigi. Leki wan bakapisi foe a kotoigiwroko foe den, „kownoe” ben hari kon na a leti di den ben skèin baka, so leki Jesaja ben froeteri na fesi? Ija! A no den politiekman foe grontapoe, ma a nomroe foe denwan di fika foe den sma di den feni boen foe tiri leki kownoe nanga Krestes ini en hemel Kownoekondre (Openbaring 1:5, 6; 21:24). Èn fa foe den „nâsi”? A leti disi ben hari den kon? Nôno, kwetikweti! No wan aparti politiek nâsi a ben hari kon, ma wan bigi ipi foe sma di komoto na ala nâsi, ben teki a bosroiti foe den na a sei foe a Kownoekondre foe Gado èn den e froewakti fajafaja fri na ini Gado njoen grontapoe. A sa de wan troetroe njoen grontapoe pe regtfardiki fasi sa de na ala sei. — 2 Petrus 3:13; Openbaring 7:9, 10.
21. Fa wi kan sori taki wi no ben misi a marki foe Jehovah en no-froedini boen-atifasi ini a gi di a e gi wi wan froestan foe en wani?
21 Joe na wan foe a groepoe dati foe tjariman foe leti, di e gro? Jehovah gi wi a froestan foe a wani foe en, so taki wi kan de tjariman foe leti neleki Jesus. Foe di wi e sori faja ini a wroko di Jehovah gi den foetoeboi foe en ini a ten foe wi, dan meki wi alamala sori taki wi no misi a marki foe a no-froedini boen-atifasi di Gado ben sori wi (2 Korentesma 6:1, 2). No wan wroko de di de moro prenspari ini a ten foe wi. Èn no wan moro bigi grani di de kan de foe wi, leki foe gi Jehovah glori foe di wi e sori trawan a glori leti di e kon foe en.
Fa joe ben sa piki?
◻ San na den sani di de a roetoe di meki den sari problema foe a libisma famiri kon?
◻ Na sortoe fasi Jesus nanga den bakaman foe en na „leti foe grontapoe”?
◻ Fa a leti foe Jehovah nanga en waarheid e tjari wi?
◻ Fa Jehovah ben meki a glori foe en skèin kon na tapoe en organisâsi?
◻ Nanga sortoe marki Jehovah ben meki en pipel kon tron tjariman foe leti?
[Prenki na tapoe bladzijde 19]
Wan sani di ben pasa na Eden e jepi wi foe froestan den sari problema foe a libisma famiri na ini a ten disi
[Sma di abi a reti foe den prenki]
Tom Haley/Sipa
Paringaux/Sipa