Joe e memre disi ete?

Joe prakseri boen foe den tijdschrift A Waktitoren foe den moen di pasa? Efoe dati de so, dan sondro degedege joe sa feni en wan moi sani foe memre san e kon now:

▫ San na „a marki di wani taki boen-ati” di Jehovah e gi na den bakaman foe Jesus di e waka na ini en foetoemarki? (Psalm 86:17)

A ben de „a prisiri foe santa jeje” di ben gi den fosi kresten krakti foe horidoro na ondro froefolgoe (1 Tesalonikasma 1:6). So a de toe ini a ten disi, èn Jehovah, a Giman foe „ibri boen presenti nanga ibri volmaakti kado”, e prisiri foe „gi santa jeje na den sma di e aksi en dati” (Jakobus 1:17; Lukas 11:13). So boen a de a prisiri foe santa jeje di e gi na den bakaman foe Jesus „wan marki di wani taki boen-ati”. — 1/12, bladzijde 28.

▫ Na sortoe fasi Jesus ben dini leki wan tjariman foe leti? (Johanes 8:12)

Jesus ben gi ensrefi na a preiki foe a boen njoensoe foe a Kownoekondre foe Gado (Lukas 4:43; Johanes 18:37). A ben meki sma kon si toe den falsi fasi foe relisi èn na so fasi a ben gi denwan di den ben hori na ini relisi katibo, fri na jeje fasi (Mateus 15:3-9). Na wan fasi di ben de krin foe si, a ben boeweisi taki a de a leti foe grontapoe di ben gi en volmaakti libisma libi ini dede leki wan froeloesoe paiman (Mateus 20:28; Johanes 3:16) — 1/1, bladzijde 20.

▫ San na wan toe reide foe san ede wi moesoe saka wisrefi na Jehovah Gado ondro?

Jehovah na a Universeel Soeverein èn foe a reide disi wi moesoe saka wisrefi na en ondro. So srefi, foe di Jehovah de almakti, no wan sma kan gens en èn abi boen bakapisi, so boen wi no kan weigri foe si taki wi moesoe saka wisrefi na en ondro. Gado ben meki ala mekisani di abi froestan foe de gi a prakseri foe a Mekiman foe den èn disi e poti ala sma na ondro a froeplekti foe saka densrefi na en ondro. — 1/2, bladzijde 10, 11.

▫ San ben jepi Josef foe kakafoetoe foe no doe hoeroedoe nanga a wefi foe Potifar?

Josef ben abi wan tranga krakti di ben meki en froestan wroko. En matifasi nanga Jehovah ben de wan troetroe serjoesoe sani gi en èn a ben froestan taki efoe a ben doe hoeroedoe wan leisi, taki a ben sa de wan sondoe no wawan na a trowmasra foe en, ma moro prenspari na Gado. — 1/2, bladzijde 29.

▫ San Jesus ben wani taki di a ben taki: „Mi na . . . a waarheid”? (Johanes 14:6)

Jesus no ben taki èn leri sma a waarheid nomo; a ben libi akroederi dati èn ben meki a kon de leki na ensrefi ben de dati. So boen, krestendom a no soso wan prakseri; a de wan fasi foe libi. — 1/3, bladzijde 15.

▫ Sortoe leri, di e gi trowstoe, de foe feni ini Psalm 51?

A psalm disi e meki wi froestan taki, efoe wi e naki foetoe fadon èn e sondoe ma abi troetroe berow, taki wi lobi hemel Tata sa jere a babari foe wi foe kisi sari-ati èn a sa kibri wi foe no lasi-ati. Ma wi moesoe broko wi ede na a fosi presi nanga ala sjen di wi ben tjari kon na a nen foe Jehovah tapoe. — 1/3, bladzijde 29.

▫ San a dopoe nanga watra e agersi?

A dopoe na wan simbôl na dorosei foe a gi di wan sma e sori taki a e gi ensrefi abra na Gado. Te den e poesoe wi go na ondro a watra, dati e sori taki den sma di e kisi dopoe e dede ini a tori foe wan fasi foe libi di ben poti na prakseri na densrefi tapoe. Na opo di sma e opo kon foe a watra e agersi taki den de na libi now foe doe a wani foe Gado, foe di den e poti dati na a fosi presi ini den libi (Mateus 16:24) — 1/4, bladzijde 5.