’Weri a njoen persoonlijkheid’
1 Kresten e warderi en taki den sabi a waarheid! Wi leri fa wi moesoe libi, so taki wi kan wai pasi gi a waka nanga libi foe den sma foe grontapoe. Foe di den sma disi „drifi komoto foe a libi di de foe Gado”, meki den „de na doengroe na froestan sei” (Ef. 4:18). Wi kisi leri foe no denki moro leki fa grontapoe e denki, foe di wi e poeroe na owroe persoonlijkheid èn e weri a njoen wan.—Ef. 4:22-24.
2 Na owroe persoonlijkheid e meki taki doronomo boen gwenti nanga wet e go na baka, èn dati e tjari dotifasi nanga dede kon. Foe dati ede, wi e begi den wan di sa arki a Kownoekondre boskopoe foe poeroe ala bitafasi, atibron, takroedoe, doti taki nanga morsoe taki. Den wan di wani kisi a boen-ati foe Gado moesoe poeroe na owroe persoonlijkheid krinkrin èn sondro draidrai—neleki fa den ben sa poeroe wan doti krosi.—Kol. 3:8, 9.
3 Wan njoen krakti di e poesoe a prakseri: A weri di wi e weri a njoen persoonlijkheid wani taki dati wi moesoe meki kon njoen na ini a krakti di e poesoe a prakseri foe wi (Ef. 4:23). Fa wan sma e meki a krakti dati noso a fasi fa a e denki, kon njoen, so taki a sa go prakseri den joisti sani? A kan doe disi foe di a e studeri Gado Wortoe doronomo èn fajafaja, èn foe di a e denki dipi san dati wani taki. Dan, safrisafri wan njoen fasi foe denki e gro na ini en, èn a sma e si sani leki fa Gado nanga Krestes e si sani. A libi foe wan sma e kenki foe di a e teki foeroe kresten eigifasi, weri den leki wan krosi, so srefi sari-ati, switifasi, sakafasi foe jeje, safri-atifasi, langa pasensi, nanga lobi.—Kol. 3:10, 12-14.
4 Foe di wi weri a njoen persoonlijkheid, meki wi e poti wisrefi aparti foe grontapoe. A fasi fa wi e libi e meki wi de tra fasi. Wi e taki waarheid èn wi e gebroiki gosontoe wortoe foe bow trawan. Wi e dwengi wi atibron, nanga bita-atifasi, babari, skempi taki nanga ala takroedoe, èn na ini a presi foe dati wi e poti den regtfardiki eigifasi foe Gado. Te wi e gi sma pardon, dan wi e doe moro leki san sma e froewakti foe wi. Ala den sani disi wi e doe wantewante foe na ati.—Ef. 4:25-32.
5 Noiti no poeroe a njoen persoonlijkheid. Wi no kan dini Jehovah na wan boen fasi, efoe wi no weri a persoonlijkheid disi. Sorgoe taki a njoen persoonlijkheid e hari sma kon na a waarheid, èn meki a gi glori na Jehovah, a Kriaman foe wi moi njoen persoonlijkheid.—Ef. 4:24.