Yepi den fu dini Yehovah baka
1 Fu di na apostel Paulus ben si wan sani di ben kan de wan kefar gi den brada nanga sisa fu en, meki a ben skrifi: „A yuru doro kaba fu unu wiki na sribi, bika now a frulusu fu wi de moro krosibei leki na a ten di wi ben tron bribiman” (Rom. 13:11). Paulus ben broko en ede nanga den brada fu en di ben dyonko na yeye fasi; a ben de klariklari fu gi den krakti fu bigin wroko baka.
2 Wi kan taki trutru dati a neti fu na owru grontapu disi pasa moi kaba èn a deibroko fu a nyun grontapu no de fara moro (Rom. 13:12). Wi abi bun reide fu broko wi ede nanga den brada fu wi di tapu fu abi demakandra nanga wi leki preikiman fu a bun nyunsu. A dienstyari di pasa, na ini Sranan 20 preikiman ben kisi yepi fu preiki baka. Fa wi kan yepi trawan di no e preiki moro fu dini Yehovah baka?
3 San owruman kan du: Furu sma di no e preiki moro no drai baka gi waarheid; den no e preiki moro bika den lasi-ati, den abi problema, den e feti na baka gudu, noso den abi tra broko-ede fu a libi (Luk. 21:34-36). Efu a kan, a de moro bun fu yepi den bifo den no e preiki moro. A gemeente sekretarsi musu taigi a Gemeente Bukustudie opziener te wan preikiman no e gi en preikiwroko raportu ala mun. Den skapuman kan seti sani fu go luku a sma disi. Den owruman musu meki muiti fu kon sabi san na a reide fu a problema èn fa den kan yepi a sma disi.—Luku De Wachttoren fu 15 september 1993, bladzijde 20-23.
4 Fa trawan kan gi yepi: Furu fu wi sabi wan sma di no e preiki moro. A kan de wan sma nanga suma wi ben abi wan bun matifasi na ini a ten di pasa. San wi kan du fu yepi en? Kande wi kan tyari wan syatu fisiti go na en oso. Taigi en taki yu e misi a matifasi fu en. Taki nanga prisiri èn gi en deki-ati. Taki fu a broko di yu e broko yu ede nanga en sondro fu taigi en dati a siki na yeye fasi. Fruteri en ondrofenitori di e gi deki-ati noso tra bun sani di den sma na ini a gemeente e du. Fruteri en fayafaya fu den gemeente konmakandra èn gi en deki-ati fu go na den tu. Fu abi demakandra baka nanga a gemeente kan yepi en moro leki iniwan tra sani. Taigi en taki yu wani go nanga en na den konmakandra. Fruteri den owruman fa sani waka di yu ben taki nanga en.
5 Te wan sma di no e preiki moro e kon baka na den konmakandra, kande a kan firi syen te a e miti sma di a ben sabi na ini a ten di pasa. No aksi a sma: „Pe yu ben de?” Na presi fu dati, meki a sma firi dati yu breiti dati a kon. Meki a teki prati na a takimakandra. Meki a miti den wan di a no sabi. Sidon nanga en na a konmakandra, sorgu taki a abi wan singibuku nanga a publikâsi di wi e studeri. Gi en deki-ati fu kon baka, èn taigi en taki yu wani yepi en efu dati de fanowdu.
6 Fu di Yehovah nanga Yesus abi lobi gi den wan di lasi pasi, meki den e prisiri te den sma disi e kon tranga baka na yeye fasi (Mal. 3:7; Mat. 18:12-14). Wi kan kisi a srefi prisiri te wi e du muiti fu yepi trawan fu dini Yehovah baka.