Aladi den malengri—Toku den abi bun bakapisi
1 Efu yu na wan malengrisma di de wan fu den someni Kotoigi fu Yehovah, dan toku yu kan du yu diniwroko nanga bun bakapisi. Fu taki en leti, yu situwâsi kan gi yu spesrutu okasi fu gi kotoigi èn fu gi trawan deki-ati.
2 Okasi fu gi kotoigi: Furu sma di malengri e du furu na ini a preikiwroko. Teki leki eksempre wan sisa di no ben man waka bun èn di no ben man taki bun sosrefi, fu di a ben du wan operâsi di no ben abi bun bakapisi. A sisa ben kon si taki a ben o man teki prati na a tijdschriftwroko efu a masra fu en ben e poti a wagi fu den na sei strati pe furu sma e koiri pasa. Na wán okasi, a sisa prati 80 tijdschrift na ini tu yuru nomo! Efu yu na wan malengrisma dan yu kan kisi na okasi fu miti sma di wi no e miti so makriki. Disi kan de sma di e wroko na ati-oso, tra malengrisma èn sosrefi den famiri fu den. Efu disi de so, si den sma disi leki wan spesrutu grupu sma na suma yu musu go.
3 A preikiwroko di yu e du kan du furu bun! Te trawan e si a fasti bosroiti di yu teki èn te den si fa a waarheid fu Bijbel tyari bun bakapisi kon gi yu, dan a Kownukondre boskopu kan hari den tu. Boiti dati, te yu e miti sma di abi problema, dan fu di yu abi ondrofeni meki yu man gi den sma disi trowstu nanga yepi fu a Wortu fu Gado.—2 Kor. 1:4.
4 Yu kan gi trawan deki-ati: Yu no kisi deki-ati di yu leisi na ondrofenitori fu Laurel Nisbet di ben didon 37 yari na ini wan isri masyin di ben yepi en fu bro. Ma toku a yepi 17 sma fu kon leri sabi a soifri waarheid fu Bijbel. Na eksempre fu yu kan gi den brada nanga sisa fu yu a deki-ati tu fu du ala san den man na ini a diniwroko fu Yehovah.—gO93 22/1 blz. 18-21.
5 Srefi te a situwâsi fu yu no e gi yu na okasi fu preiki so furu leki yu wani, toku yu kan tranga tra sma. Wan brada ben taki: „Mi leri taki srefi te wan sma malengri hebi, toku a kan de wan bigi yepi gi trawan. Mi nanga mi wefi de leki wan ankra gi difrenti sma na ini a gemeente. Fu di wi na malengrisma, meki wi de dyaso doronomo, èn wi de klariklari fu yepi trawan.” Ma fu di yu malengri, a no de fu taki dati a no ala ten yu sa man du sani di yu wani du. Toku nanga yepi fu trawan yu man teki prati na a preikiwroko. Fu dati ede, efu yu abi yepi fanowdu, no draidrai fu taigi den owruman noso tra sma na ini a gemeente di kan yepi yu.
6 Yehovah e si ala sani di yu e du soso fu dini en, èn a e prisiri srefisrefi nanga a diniwroko di yu e du nanga yu heri ati (Ps. 139:1-4). Efu yu e frutrow na en tapu, dan a kan gi yu a krakti fu du a diniwroko fu yu na wan bun fasi èn nanga bun bakapisi.—2 Kor. 12:7-10.