A Mun April—Wan Ten fu ’Wroko Tranga èn fu Span Wisrefi’
1 Den wiki na a pisi ten fu a Memrefesa, na wiki na san ini a pipel fu Yehovah e denki dipi fu sani. Disi na wan ten fu denki dipi san a dede fu Krestes wani taki gi wi. A de so srefi wan ten fu denki dipi fu a howpu di Yehovah gi wi nanga yepi fu a brudu di Yesus trowe gi wi. Te yu e denki baka fu 19 april a yari di pasa, dan san yu e prakseri? Yu man memre den sma di yu ben si a neti dati? Yu sabi ete o prisiri a demakandra disi na a Memrefesa ben de gi den na yeye fasi? Yu man memre a seryusu Bijbel takimakandra nanga den opregti begi? Kande yu ben teki a bosroiti fu sori moro bun o furu yu e warderi a lobi di Yehovah nanga Yesus sori gi yu. Sortu krakti a denki di yu denki dipi fu den sani disi, abi na yu tapu?
2 A krin taki Yehovah en pipel no abi nofo wortu fu sori o bigi a tangi fu den de (Kol. 3:15, 17). Spesrutu ini a mun april di pasa, wi ben du moro muiti fu sori taki wi e warderi den sani di Yehovah seti fu frulusu wi. Wi ben sori disi fu di wi ben du moro na ini a Kresten diniwroko. Na ini Sranan a nomru fu den yepipionier ben de 629; dati na 21 procent moro leki a heimarki na fesi. A muiti di den ben meki, makandra nanga den muiti fu ala den tra Kownukondre preikiman, ben abi leki bakapisi taki wi ben kisi nyun heimarki fu yuru, tijdschrift di ben prati, nanga gobaka di ben tyari. Wi prisiri ben kon moro bigi di wi ben si taki dusundusun nyun bijbelstudie ben opo èn taki wan nyun heimarki fu sma ben kon na a Memrefesa!
3 Fu tru, fu di wi no e tweifri na a howpu fu wi, meki wi e du wan sani. A de neleki fa na apostel Paulus ben skrifi: „Fu disi ede wi e wroko tranga èn e du tranga muiti, bika wi poti wi howpu tapu wan Gado di e libi, di de wan Frulusuman fu ala sortu sma, spesrutu fu den getrow wan.”—1 Tim. 4:10.
4 Fa yu o sori na a pisi ten fu a Memrefesa taki yu e bribi na ini den sani di Yehovah seti fu sma kan kisi libi? Na ini a mun april di pasa, wi ben si a moro hei nomru fu Kownukondre preikiman di wi ben doro oiti na ini Sranan, namku 2022. Wi kan pasa a nomru dati na ini a mun april disi? Iya, wi kan du dati. Ma ibriwan preikiman, den wan di dopu nanga den wan di no teki dopu ete, musu teki prati. A kan taki furu nyunwan doro den markitiki tu fu teki prati. So bun, te yu e sreka sani fu wroko tranga èn fu span yusrefi na ini april, dan luku fa yu kan gi trawan deki-ati, so srefi den moro nyunwan nanga den wan di no abi so furu ondrofeni fu kon preiki makandra nanga yu.
5 Yepi Wan Tu Sma fu Bigin Preiki Baka: Efu yu sabi wan tu sma di no ben preiki wan noso tu mun langa, dan kande yu kan gi den deki-ati èn aksi den fu kon nanga yu ini a preikiwroko. Efu wan tu sma ini a gemeente no e preiki moro, dan den owruman o meki spesrutu muiti fu go luku den èn fu gi den deki-ati fu bigin baka na ini april.
6 Wi alamala musu tan aksi Yehovah fu a gi wi en yeye fu gi wi krakti na ini a diniwroko fu en (Luk. 11:13). San wi musu du fu kisi a yeye dati? Leisi Gado Wortu di skrifi nanga santa yeye (2 Tim. 3:16, 17). Wi musu „yere san a yeye e taigi den gemeente” so srefi, fu di wi e kon na ala den feifi konmakandra di e hori ibri wiki (Openb. 3:6). Now na wan bun ten fu yepi preikiman di no e preiki doronomo èn so srefi den wan di no e preiki moro, fu studeri na wan moro bun fasi èn fu yepi den fu go na den konmakandra doronomo (Ps. 50:23). Ala di wi e du disi, wi e luku taki sani e go bun nanga wi eigi yeyefasi. Ma ete wan tra sani de fanowdu.
7 Na apostel Petrus ben fruklari taki Gado e gi en santa yeye „na den wan di e gi yesi na en leki tiriman” (Tori. 5:32). So wan fasi fu gi yesi wani taki fu poti prakseri na a komando „fu preiki gi a pipel èn fu gi kotoigi dorodoro” (Tori. 1:8; 10:42). A tru taki wi abi Gado en yeye fanowdu fu gi wi krakti fu man preiki. Ma san tru so srefi na taki, te wi e bigin fu sori taki wi wani plisi Yehovah, dan A e yepi wi moro fara srefi. Wi no musu denki noiti taki den fosi sani di wi e du fu sori taki wi wani gi yesi, na pikin sani!
8 Yepi Yonguwan: Papa nanga mama, yu si taki den pikin fu unu wani taki nanga trawan fu a waarheid? Den e go nanga yu na ini a preikiwroko? Den de wan eksempre na ini a fasi fa den e tyari densrefi? Efu dati de so, dan fu san ede yu e draidrai? Go na wan fu den memre fu a Dienstkomte, èn taki nanga den fu si efu yu pikin e doro den markitiki fu kan de wan preikiman na ini april. (Luku a Bediening-buku, bladzijde 102.) Hori na prakseri taki den pikin fu yu kan yepi na wan tumusi moi fasi fu prèise Yehovah na ini a pisi ten disi fu a Memrefesa.—Mat. 21:15, 16.
9 Wan Kresten mama na ini Georgia, Amerkankondre, ben gi en yongu umapikin deki-ati ala ten fu taki nanga trawan fu Yehovah. Di na umapikin ben teki prati na a diniwroko nanga en mama a yari di pasa, a ben prati a San Gado e aksi-brochure gi wan man èn a ben sori en syatu sortu tori a ben man feni na ini a brochure. A man ben aksi en: „Omeni yari yu abi?” A piki: „Seibi.” A man ben fruwondru fu si fa a ben taki na so wan bun fasi. We, a man ben sabi waarheid di a ben yongu, ma noiti a ben si en leki wan seryusu fasi fu libi. Na ini wan syatu pisi ten, a man, en uma, nanga na umapikin fu en ben e studeri Bijbel makandra.
10 Furu yonguwan na preikiman kaba èn wi e prisiri te den e wroko makandra nanga wi na ini a preikiwroko. Den yonguwan disi kan gi den speri fu den deki-ati. Ma a mun april na wan bun ten tu gi ibriwan osofamiri fu tranga den famiribanti èn fu bow densrefi na yeye fasi fu di den e wroko makandra na ini a santa diniwroko. Osofamiri edeman musu teki fesi na ini a tori disi.—Odo 24:27.
11 Yepi den Nyunwan: Fa a de nanga den nyunwan di yu e studeri Bijbel nanga den? Densrefi ben kan du spesrutu muiti tu ini a mun april disi? Kande den sori taki den wani fruteri trawan san den leri, di yu ben studeri kapitel 2, paragraaf 22 noso kapitel 11 paragraaf 14 fu a Sabi-buku nanga den. Efu yu de fu kaba a buku, dan sreka yusrefi fu taki krinkrin fu a tori disi na kapitel 18, paragraaf 8 pe skrifi: „Kande joe de fajafaja foe froeteri joe famiri, joe mati, nanga tra sma san joe e leri. Te joe loekoe en boen, dan kande joe e doe disi kaba neleki fa Jesus ben prati a boen njoensoe nanga trawan te na okasi ben de (Lukas 10:38, 39; Johanes 4:6-15). Kande joe wani doe moro now.” Disi de so nanga den wan di yu e studeri nanga den?
12 A studenti fu yu e bribi a Wortu fu Gado? A e fiti Bijbel gronprakseri? A e libi soleki fa den markitiki fu Gado e taki? A e kon na den gemeente konmakandra? A wani dini Yehovah Gado? Dan fu san ede yu no e gi en deki-ati fu taki nanga den owruman so taki den kan luku efu a doro den markitiki fu kon tron wan preikiman di no dopu ete so taki a kan wroko makandra nanga yu na ini april? (Luku a Bediening-buku, bladzijde 99-102.) Na a fasi disi a kan bigin firi fa na organisâsi fu Yehovah o yepi en na ini den muiti di a e meki fu dini Yehovah.
13 A tru taki son studenti e go na fesi moro esi leki trawan. Fu dati ede, akruderi den tirilin di gi na ini Wi Kownukondre Dienst fu yuni 2000, bladzijde 4, paragraaf 5 nanga 6, dan furu preikiman ben e studeri wan di fu tu buku nanga sma. Den sma disi ben sori biginbigin taki den wani sabi moro, ma den ben abi moro yepi fanowdu fu kon tron sma di de fayafaya èn di abi bun demakandra nanga wi. Noiti wi e lasi howpu taki den opregti-ati sma disi o kon tron opregti disipel fu Krestes, „awansi a no o teki langa noso awansi a o teki langa” (Tori. 26:29). Ma efu yu e taki dati yu e studeri „langa” kaba nanga den sortu sma disi, dan a ten fu a Memrefesa disi kan de wan bun okasi gi a studenti fu yu, fu bigin sori omeni warderi a abi gi a lusu-paiman fu Krestes.
14 Fa fu Yepi Den fu Teki Prati: Te wi e ondrosuku fa Yesus ben gi trawan leri, dan wi e leri furu fu a fasi fa wi kan yepi den wan di doro den markitiki fu bigin nanga a diniwroko. Yesus no ben teki wan grupu sma nomo èn taigi den apostel fu en fu bigin preiki. A sori den fosi o prenspari a preikiwroko de, a ben gi den deki-ati fu de sma di e begi ala ten, èn baka dati a ben gi den dri prenspari sani di den ben o abi fanowdu: wan patna, wan kontren fu wroko, nanga wan boskopu (Mat. 9:35-38; 10:5-7; Mark. 6:7; Luk. 9:2, 6). Yu kan du densrefi sani. Efu yu o yepi yu eigi pikin noso wan nyun studenti noso wan sma di no ben preiki wan pisi ten, dan a ben o de wan bun sani fu meki spesrutu muiti fu du den sani di e kon now.
15 Sori O Prenspari A De: Meki a sma frustan o prenspari a preikiwroko de. Taki bun fu a wroko. Fruteri ondrofenitori di e sori san a gemeente e du na ini a preikiwroko. Sori taki yu abi a srefi denki fu Yesus di e kon na krin ini Mateus 9:36-38. Gi a sma di kan kon tron wan preikiman noso a sma di no e preiki moro deki-ati fu begi fu a prati di ensrefi o abi na a diniwroko, èn so srefi taki ala sani e waka bun nanga a preikiwroko na heri grontapu.
16 Gi a Sma Deki-ati fu Prakseri den Furu Okasi Di A Abi fu Gi Kotoigi: Fruteri a sma fu na okasi di a abi fu kon makandra nanga a bukustudie grupu fu gi kotoigi oso fu oso. Sori en dati a kan taki nanga famiriman èn nanga sma di a sabi bun, noso nanga tra wrokoman èn nanga skoromati ini a pauze. Te wan sma e teki bus, dan furutron a kan bigin wan takimakandra na wan makriki fasi, fu di a e poti prakseri na tra sma di de na ini a bus. Te wi fosi e bigin wan takimakandra, dan furutron dati e gi wi na okasi fu gi wan bun kotoigi. Fu tru, furu okasi de fu taki fu a howpu fu wi nanga trawan „ibri dei”.—Ps. 96:2, 3.
17 Ma toku a kan taki a ben o moro bun te yu nanga a nyun preikiman e wroko makandra oso fu oso so esi leki a kan. Efu yu abi na prakseri fu du moro na ini april, dan aksi a dinari di e sorgu gi gebied efu wan gebied de pe yu kan wroko. Efu dati de so, dan yu e kisi na okasi fu wroko a gebied finifini. Fu eksempre, efu yu kaba nanga yu diniwroko noso efu yu e go na konmakandra noso na tra presi, dan a kan taki yu e si taki wan sma di no ben de na oso noso wan sma di ben wani sabi moro, de na oso now. Efu a kan, go na a moro bun ten fu taki syatu nanga a sma. Dati o meki taki yu e firi taki yu doro wan marki èn a o gi yu moro prisiri ini a diniwroko.
18 Sreka wan Boskopu Di E Hari Sma Prakseri: A kan de so, taki wan sma wani preiki a Kownukondre boskopu. Ma a de wan heri tra sani fu a taki nanga overtoigi fu a boskopu disi. Disi de spesrutu so efu a sma disi na wan nyunsma noso efu a no preiki wan langa ten. Te wi e yepi nyunwan nanga den wan di no e preiki moro, fu sreka densrefi, dan wi sa kisi bun bakapisi. A Diniwroko Konmakandra nanga den preikiwroko konmakandra kan gi wi bun idea, ma no wan enkri tra sani kan teki a presi fu a sreka di wi musu sreka wisrefi.
19 Fa yu kan yepi nyunwan fu sreka densrefi gi a diniwroko? Bigin nanga a pristeri fu wan tijdschrift, du dati na wan makriki fasi èn hori en syatu! Aksi den fu denki sortu tori di bari na nyunsu kan de wan sani di sma na ini a gebied e prakseri fu en. Suku wan penti di abi fu du nanga dati na ini wan fu den nyun tijdschrift. Oefen a pristeri disi makandra, èn gebroiki en na ini a diniwroko so esi leki a kan.
20 Wroko So Taki Wi Kan Kisi Moro Preikiman na ini a Ten Di E Kon: A yari di pasa, moro leki 14,8 milyun sma kon na a Memrefesa na heri grontapu. Pikinso moro leki siksi milyun preikiman ben de. Disi wani taki dati so wan 8,8 milyun sma ben wani sabi moro, so taki den ben kon na a spesrutu programa disi, pe den ben yere fa den brada ben fruklari wan fu den moro prenspari sani di Bijbel e leri. Den ben kon sabi wan tu fu wi moro bun, èn kande dati ben abi wan bun krakti na den tapu. Furu fu den e taki bun fu wi, e gi moni gi a wroko fu wi di e du na heri grontapu, èn e opo taki gi wi fesi trawan. A bigi grupu disi na sma di kan tron preikiman, so taki wi abi moro preikiman na ini a ten di e kon. San wi kan du fu yepi den fu go na fesi moro fara?
21 Moro furu fu den nyunwan di e kon na a Memrefesa, e du dati fu di wan fu wi gi den wan kari. Furutron disi wani taki, dati na mindri den arkiman, seiker wan sma de di den sabi. Efu wan sma e kon fu di wi gi en wan kari, dan wi abi a frantwortu fu meki a firi taki wi breiti taki a kon èn wi musu yepi en fu nyan bun fu a programa dorodoro. Fu di a zaal o lai sma, yepi en fu feni wan sidonpresi. Leni en wan Bijbel èn aksi en fu singi makandra nanga yu ini yu singibuku. Piki iniwan sani di a e aksi yu kande. Te yu e poti prakseri na en tapu na wan switi fasi, dan dati kan yepi en fu de wan sma di wani sabi moro. A no de fu taki dati wi alamala abi a frantwortu disi. Efu wi e si wan sma di wi no sabi, gi en wan switikon èn taki syatu nanga en fu kon leri sabi en.
22 Te wan sma kon na a Memrefesa, dan dati kan abi krakti trutru tapu a fasi fa a e denki. Kande a kon na a konmakandra fu di a no feni san a e suku na wan tra presi, èn fu di a feni taki wi abi wan sani di a musu luku moro fini. A kan de so taki wan sma no sabi srefisrefi o furu Yehovah lobi wi. Ma te so wan sma e yere fu a tumusi moi seti fu a lusu-paiman, dan dati kan de wan kefalek bigi sani gi en. A kan si wantewante taki wi de heri tra fasi leki tra sma — wi opregti, wi abi switifasi, wi e sori taki wi lobi trawan èn taki wi e lespeki den. Wi zaal no e gersi san a si kande ini den kerki di abi popki èn di e du seremonia di de fu soso. Sondro tweifri nyunwan sa si taki den arkiman na sma fu ala grupu fu a libimakandra èn taki moni no e piki. Den sani disi di den si kan de wan bun reide gi den fu drai kon baka.
23 Baka a Memrefesa, wan sma musu de srekasreka fu gi ibriwan nyun sma di kon moro yepi. Efu yu ben gi nyunwan wan kari, dan yu abi wan spesrutu frantwortu. Bifo den e gowe, fruteri den fu den tra konmakandra di e hori na a Kownukondre zaal. Fruteri den a nen fu a publikitaki di sa hori a wiki di e kon. Meki den kon sabi a presi nanga a ten fu a Gemeente Bukustudie di de moro krosibei fu na oso fu den. Baka ten yu kan gi den wan Osofamiri-buku, èn taigi den taki a takimakandra fu a wiki fu 30 april na: „Kibri joe osofamiri gi krakti di e tjari pori kon”. Fruteri en fu san ede a heri gemeente e seti sani fu go na a moro krosibei distrikt kongres di o hori heri esi.
24 Seti sani fu go luku den na oso. Sorgu taki den abi a San Gado e aksi-brochure nanga a Sabi-buku, san o yepi den fu kon sabi moro fu den prenspari Bijbel leri. Efu den no e studeri ete, dan pristeri den wan bijbelstudie. Gi den a rai fu leisi a Jehovah’s Getuigen-brochure, san e fruteri krin fa wi leki organisâsi e wroko. Gi den deki-ati fu luku den video fu wi soleki a wan di nen Onze gehele gemeenschap van broeders. Seti sani so taki den kan miti trawan na ini a gemeente. Na ini den mun di e kon, sorgu taki yu abi kontakti nanga den nyunwan; gi den wan kari fu kon na den konmakandra te a kringopziener e kon na a gemeente noso te yu abi wan kring konmakandra noso wan spesrutu dei-konmakandra. Gi den ala okasi fu sori efu den na sma „di ben abi a yoisti yeye gi a têgo libi”!—Tori. 13:48.
25 San den Owruman Kan Du: O furu muiti o du ini a diniwroko na ini a mun april, o anga moro furu fu den owruman. Efu yu na wan bukustudie fesiman, dan skrifi den sani di yu kan du fu yepi ibriwan sma ini yu bukustudie grupu fu teki prati na den spesrutu sani di o du. Yu abi yonguwan, nyunwan, sma di no e kon doronomo, noso sma di no e preiki moro na ini yu grupu? Luku efu papa nanga mama, pionier noso tra preikiman du wan sani fu yepi den. Gi den a yepi di yusrefi man gi den. Wan sisa di no ben preiki doronomo tu yari langa ben wroko moro leki 50 yuru ini a diniwroko na ini april fu a yari di pasa. San ben yepi en fu du dati? A ben taki dati den owruman di ben kon luku en ben gi en deki-ati.
26 Den owruman nanga den dinari ini a diniwroko musu wroko makandra fu sorgu taki nofo gebied, tijdschrift nanga publikâsi de gi a mun di e kon. Unu kan seti moro preikiwroko konmakandra? Efu dati de so, dan meki den spesrutu seti bekènti. Na tapu fu dati, aksi Yehovah te yu e begi na publiki èn te yu e begi gi yusrefi, fu a gi en blesi gi a mun te wi o du moro na ini a Kownukondre diniwroko.—Rom. 15:30, 31; 2 Tes. 3:1.
27 Na ini a mun april di pasa, den owruman na ini wan gemeente na North Carolina ben gi furu deki-ati fu du moro ini a diniwroko. Ibri wiki na a konmakandra, den owruman ben gi den preikiman deki-ati fu aksi Yehovah na ini begi, efu den kan teki a yepipionier wroko. Na ibri okasi, ala den owruman nanga den dinari ben taki fayafaya fa fu meki april tron a moro bun mun di den ben abi oiti. Dati meki 58 procent fu den preikiman èn so srefi ala den owruman nanga den dinari ini a diniwroko, ben pionier a mun dati!
28 A Prisiri fu Abi Prati Dorodoro: Sortu blesi wi e kisi te wi e ’wroko tranga èn te wi e span wisrefi’ ini a diniwroko? (1 Tim. 4:10) Den owruman di kari na tapusei ben skrifi fu a fayafaya prati di a gemeente ben abi na ini a mun april di pasa: „Sensi den brada nanga sisa bigin wroko moro nanga makandra ini a diniwroko, den e taki furutron fa den lobi makandra moro èn fa den tron moro krosibei mati fu makandra.”
29 Wan yongu brada di no man du so furu fu di a siki, ben wani teki prati na a spesrutu wroko di ben du na ini a mun april di pasa. Fu di a sreka sani heri bun èn fu di en mama nanga den brada nanga sisa fu en na yeye fasi ben yepi en, dan a mun dati a ben man wroko na wan bun fasi na ini a yepi-pionierwroko. Fa a ben feni dati? A ben taki: „Fosi tron ini mi libi, mi ben firi taki mi ben de neleki wan sma di gosontu.”
30 Sondro tweifri Yehovah e gi bun furu blesi na den wan di e warderi a grani srefisrefi fu taki fu en kownumakti (Ps. 145:11, 12). Ala di wi e memre a dede fu wi Masra, wi e frustan taki den blesi di sma sa kisi di ben gi densrefi fu dini Gado, o de moro furu srefi na ini a tamara. Na apostel Paulus ben angri srefisrefi fu kisi a paiman fu têgo libi. Ma a ben sabi taki disi no ben de wan sani di a ben kan howpu fu kisi sondro fu du wan sani. A ben skrifi: „Fu dati ede meki mi e wroko tranga èn mi e span misrefi tranga, akruderi a fasi fa en e wroko, èn di e wroko na ini mi nanga krakti” (Kol. 1:29). Nanga yepi fu Yesus, Yehovah ben meki taki Paulus kon abi a krakti fu du wan diniwroko di e kibri sma libi, èn A kan du a srefi sani gi wi tide. Disi na wan sani di yusrefi o ondrofeni na ini a mun april disi?
[Prenspari pisi na tapu bladzijde 3]
Suma Yu Kan gi Deki-ati fu Preiki na ini a Mun April?
Yu pikin?
Wan bijbelstudenti?
Wan sma di no e preiki moro?