„Preiki a wortu fu Gado dorodoro”
1 Te yu e warderi wan bun sani di wan sma ben gi yu trutru, dan a no de fu taki dati yu e sori dati nanga a fasi fa yu e tyari yusrefi, a no so? Luku san na apostel Paulus ben taki fu a bunfasi nanga a bun-ati di Yehovah e sori libisma. A ben taki nanga tranga sten: „Tangi fu Gado fu a fri presenti fu en di pasa san wi man taki fu en”! Sortu sani Gado gi wi di de wan pisi fu a „fri presenti” dati? A presenti disi abi fu du nanga ala den fasi fa ’Gado sori a bun-ati fu en di e pasa ala sani’. A moro bigi fasi fa a sori dati ben de di a ben gi en eigi manpikin leki wan lusu-paiman gi den sondu fu wi.—2 Kor. 9:14, 15; Yoh. 3:16.
2 Paulus no ben taki nomo, dati a de nanga tangi na ati. Ma a ben sori a bigi warderi di a ben abi na furu fasi. A ben e broko en ede srefisrefi nanga a yeye fasi fu den Kresten brada nanga sisa fu en. A ben wani du ala san a man fu yepi den fu kisi wini dorodoro fu a bun-ati fu Gado. Fu den sma disi Paulus ben taki: „Fu di wi abi safu firi fu lobi gi unu, meki nanga ala prisiri wi ben prati no wawan a bun nyunsu fu Gado nanga unu, ma sosrefi wi eigi sili, bika unu ben kon de sma di wi lobi” (1 Tes. 2:8). Paulus ben yepi den wan di ben de memre fu a gemeente kaba so taki den ben kan kisi frulusu. Boiti dati a ben e preiki a bun nyunsu fayafaya tu. A ben e teki waka someni dusun kilometer na tapu drei gron èn na tapu se fu kan feni „den sma di ben abi a yoisti denki fu a têgo libi” (Tori. 13:48). A bigi warderi di Paulus ben abi gi ala den sani di Yehovah ben du gi en, ben pusu en „fu preiki a wortu fu Gado dorodoro”.—Kol. 1:25.
3 A no de so taki a warderi di wi abi gi ala den sani di Yehovah du gi wi, e pusu wi fu yepi den wan di abi yepi fanowdu na ini wi gemeente? (Gal. 6:10). A no de so tu taki wi e angri fu teki prati dorodoro na a preiki di wi e preiki a bun nyunsu fu a Kownukondre na ini a heri kontren pe wi e preiki? We, a no de fu taki!—Mat. 24:14.
4 Wan moi okasi fu sori warderi: Ala yari a de so taki a Memrefesa fu Krestes dede e gi wi na okasi fu sori na wan spesrutu fasi taki wi e warderi san Yehovah nanga Yesus du gi wi. Disi a no wan alawiki konmakandra nomo, noso wan okasi nomo pe wi o memre wan sani di pasa wan leisi. Yesus ben taki: „Tan du disi fu memre mi” (Luk. 22:19). A Memrefesa fu a dede fu Krestes na wan okasi fu prakseri dipi fu suma Yesus de trutru. Dati na a ten fu prakseri taki Yesus de na libi èn taki a e wroko fayafaya na ini a ten disi. A ben kisi bigi glori nanga kownumakti, fu di a ben tyari ensrefi na wan getrow fasi èn fu di a ben gi ensrefi leki wan srakti-ofrandi. Krestes de na edeman fu a Kresten gemeente èn a e tiri den afersi nanga a wroko fu a gemeente. Fu dati ede, a fesa disi na wan moi okasi tu fu sori taki wi e saka wisrefi na ondro Krestes leki edeman (Kol. 1:17-20). A heri pipel fu Gado musu sori lespeki gi na okasi disi, fu di den o de na a Memrefesa fu a dede fu Krestes. A yari disi a sa hori baka te son dongo tapu fodewroko 28 maart 2002.
5 A yari di pasa, tranga muiti ben meki bifo a Memrefesa fu gi sma wan kari. Dati meki wi ben abi a moro hei nomru fu sma di oiti ben kon na a fesa disi. Na ini heri Sranan dati ben de sowan 6550 sma. Omeni sma sa de na a Memrefesa a yari disi? Dati o didon na a fasi fa „wi e wroko tranga èn e du tranga muiti” fu yepi so furu sma leki wi man fu de na a fesa disi.—1 Tim. 4:10.
6 Boiti taki wi wani de na a Memrefesa, wi kan meki muiti tu fu du moro na ini a preikiwroko. A no de fu taki, dati dusundusun brada nanga sisa sa teki wan, noso tu mun fu dini leki yepipionier. Na ini ibriwan fu den feifi yari di pasa, sowan 752 sma ben dini leki yepipionier na a pisi ten fu a Memrefesa, fu a mun maart te go miti a mun mei. Yu kan seti sani na so wan fasi taki yu kan nyan bun fu a grani fu de na ini a yepi-pionierwroko a yari disi? A sa de wan moi okasi fu sori taki yu e warderi den sani di Gado ben seti na wan lobi-ati fasi nanga yepi fu a srakti-ofrandi fu Krestes. Leki fa den ondrofenitori di e kon now e sori, dan yusrefi o kisi a blesi fu Yehovah.
7 Wan sisa na ini Amerkankondre di abi wan wroko pe a musu wroko heri dei, ben fruteri fa a ben feni en fu dini leki wan yepipionier na ini a mun maart: „Wi Kownukondre Diniwroko fu februari 2001 ben gi wi alamala deki-ati fu meki muiti efu wi man, fu dini leki yepipionier na a ten fu a Memrefesa. Fu di a mun maart ben abi feifi satra, meki a ben makriki gi mi fu seti sani fu dini leki pionier a mun dati. Sobun, mi ben teki a bosroiti fu gi mi nen fu go na ini a yepi-pionierwroko.” Na a bigin fu a mun a ben poti wan marki gi ensrefi taki a wani bigin wan oso-bijbelstudie. A ben abi bun bakapisi? Iya, baka di a ben preiki 52 yuru, dan a ben feni wan oso-bijbelstudie a mun dati! San a ben taki te fu kaba? „Wi e kisi tumusi moi blesi te wi e meki tranga muiti fu du moro leki san wi musu fu du.”
8 San na den winimarki te wan osofamiri e pionier makandra? We, na ini Amerkankondre wan osofamiri fu fo sma ben du dati na ini a mun april. Den ben taki dati den no sa frigiti a mun dati. A mama ben taki: „Nanga prisiri wi ben e luku go na a tra dei, fu di wi ben de makandra na ini a diniwroko! Te wi ben e nyan makandra te neti, dan dati ben de wan prisiri ten gi wi. Wi ben e taki fu den sani di wi ben du na ini a preikiwroko a mamanten dati.” A manpikin fu na osofamiri ben taki: „A ben switi gi mi fu man de na ini a preikiwroko nanga mi papa na den mindriwiki dei, spesrutu fu di dati na a ten di a gwenti fu de na en wrokope.” A papa srefi e taki moro fara: „Leki famiri edeman mi ben breiti taki wi ben e wroko makandra fu du a moro prenspari wroko di wan sma kan du na ini a ten disi.” Yu denki taki yu osofamiri kan pionier makandra tu? Fu san ede unu no ben sa taki a tori disi makandra? Unu denki taki unu alamala kan de na ini a yepi-pionierwroko na pisi ten fu a Memrefesa?
9 Yu denki taki wi kan meki maart tron a moro bun mun di wi oiti ben abi? Na a bigin fu a yari 2000, Wi Kownukondre Dienst ben poti na aksi: „Wi Kan Meki April 2000 Tron a Moro Bun Mun Di Wi Oiti Ben Abi?” Fa sma ben piki tapu a kari dati? Wi ben doro difrenti nyun heimarki. Wi ben doro wan heimarki fu 629 yepipionier na ini a mun dati, wan nomru di wi noiti no doro ete. Boiti dati wi ben doro nyun heimarki na ini a nomru fu yuru di wi ben wroko, den tijdschrift di wi ben prati, èn na ini a nomru fu gobaka di wi ben tyari. Kande yu kan memre ete fa a ben de na ini yu gemeente a yari di pasa na ini a spesrutu mun dati. Ala sma ben de fayafaya fu teki prati na a wroko disi makandra nanga a gemeente, a no so? Yu denki taki wi kan doro noso pasa den heimarki dati a yari disi? Efu wi span anu makandra, dan wi kan meki maart 2002 tron a „moro bun mun di wi oiti ben abi”. Ma fu san ede wi teki a mun maart?
10 Tu sani de fu san ede maart musu de wan spesrutu mun gi wi. Na a fosi presi, a de so taki a Memrefesa o hori na a kaba fu a mun dati. Disi e gi wan moi okasi fu wroko tranga na a bigin fu a mun, fu kari so furu sma leki wi man fu kon na a fesa dati. Na a di fu tu presi, a de so taki a yari disi a mun maart abi feifi satra nanga feifi sonde. Disi e meki taki a moro makriki gi den wan di e du grontapuwroko, èn gi den wan di e go na skoro, fu de leki yepipionier tu. Fu san ede yu no ben sa teki a ten nownowde fu luku a kalender di de na ini na inlegvel disi fu si fa yu kan seti sani fu go na ini a yepi-pionierwroko? Kande yu sa si taki a yepi-pionierwroko no hebi soleki fa yu prakseri. Fu eksempre, efu yu wroko 8 yuru na a kaba fu ibri wiki fu a mun dati, dan den tra dei fu a mun yu ben sa abi fu wroko soso 10 yuru moro fu doro den 50 yuru.
11 San den owruman kan du fu yepi ala sma na ini a gemeente fu „preiki a wortu fu Gado dorodoro”? Den owruman kan taki fayafaya fu a yepi-pionierwroko te den abi wan prati na den konmakandra. Den kan taki sosrefi na wan fasi di e gi den brada nanga sisa deki-ati fu du a yepi-pionierwroko te den abi takimakandra nanga den. Den owruman di e du a Gemeente Bukustudie, nanga den brada di e yepi den, kan taki nanga den brada nanga sisa fu a bukustudie, so taki den kan gi ibriwan fu den deki-ati nanga a yepi di den abi fanowdu fu go na ini a pionierwroko. Kande den brada nanga sisa abi soso bun rai nanga deki-ati fanowdu (Odo 25:11). Furu fu den sa si taki efu den tyari wan pikin kenki kon na ini a fasi fa den seti sani, den kan nyan bun fu a grani fu dini leki wan yepipionier. Na ini son gemeente a de so taki wan tu, efu a no ala srefi, fu den owruman, den dinari ini a diniwroko, nanga den wefi fu den e gi wan bun eksempre ini a tori disi. Den e go makandra na ini a yepi-pionierwroko na a pisi ten fu a Memrefesa. Disi ben gi furu preikiman deki-ati fu du a srefi sani. A kan taki son preikiman no sa man teki prati na a pionierwroko, fu di den abi problema nanga a gosontu fu den noso kande fu tra sani ede. Ma wi kan gi den deki-ati fu sori taki den abi warderi gi den sani di Gado du gi wi, fu di den o meki muiti fu du a preikiwroko so furu leki den man, makandra nanga den tra memre fu a gemeente.
12 Ala sani sa waka bun? We, dati abi fu du moro furu nanga a fasi fa den owruman e sreka sani. A heri wiki yu musu abi preikiwroko konmakandra di e hori tapu wan yuru di bun gi den brada nanga sisa. Efu a kan, dan a dienstopziener musu taki na fesi sortuwan fu den brada o kisi a frantwortu fu hori ibriwan fu den preikiwroko konmakandra dati. Sani musu sreka bun so taki den konmakandra disi no pasa 10 te go miti 15 miniti. Na ini a ten dati a brada di abi a frantwortu musu prati a grupu, taigi den pe den musu go wroko, èn a brada musu begi. (Luku na Aksi Boksu na ini Wi Kownukondre Diniwroko fu september 2001.) Unu musu fruteri a gemeente krinkrin fa sani seti gi a preikiwroko a mun dati èn unu musu skrifi den sani du unu seti poti na tapu a bord pe yu kan leisi tori fu a gemeente.
13 Nofo gebied musu de fu wroko. A dienstopziener musu sidon makandra nanga a brada di e luku den gebiedkarta, so taki den kan seti sani fu wroko den kontren di no e wroko so furu. Den brada musu poti krakti tapu a wroko fu go na den adres pe den no feni sma na oso, sosrefi stratiwroko, a wroko fu go wenkri fu wenkri, noso fu preiki na mofoneti. Pe a fiti, dan wan tu preikiman kan kisi yepi fu preiki nanga yepi fu telefon.
14 Yepi den fu man dini baka: Yu abi sma na ini a kontren fu yu gemeente di lasi a faya di den ben abi fu preiki a bun nyunsu? Den sma disi na memre fu a gemeente ete èn den abi yepi fanowdu (Ps. 119:176). A grontapu disi o kisi pori heri esi èn a nyun grontapu de na pasi e kon. Fu dati ede wi wani meki muiti fu yepi den wan di no e preiki moro (Rom. 13:11, 12). Na ini den feifi yari di pasa, moro leki 105 sma ben kisi yepi èn ben tron fayafaya preikiman baka. San wi kan du fu yepi moro furu sma fu kisi a lobi baka di den ben abi fosi? Fa den kan kisi a frutrow baka di den ben abi na a ten di den bigin nanga a diniwroko fu den?—Hebr. 3:12-14.
15 Kande a skin fu owruman sa wani taki makandra fa den kan yepi den wan di no preiki moro na ini den wan tu yari di pasa (Mat. 18:12-14). A sekretarsi musu luku den karta fu den preikiman èn a musu skrifi suma no e preiki moro. Den owruman kan du spesrutu muiti fu go luku den skapu disi, so taki den kan yepi den. Wan owruman kan aksi wan preikiman fu yepi a preikiman di kon swaki, kande fu di a preikiman sabi a wan di musu kisi yepi. Ma a no de fu taki, dati na owruman kan aksi wan tra preikiman fu yepi tu. Kande a kan aksi wan preikiman di ben studeri nanga a wan di no e preiki moro fu yepi a sma èn kande a preikiman dati ben sa breiti fu man yepi a brada noso sisa dati, now di a abi yepi fanowdu. Wi e howpu taki ala den wan di no e preiki moro sa kisi deki-ati fu tron fayafaya preikiman fu a wortu fu Gado. Efu den doro den markitiki fu de wan preikiman baka, dan a pisi ten fu a Memrefesa na a moro bun ten gi den fu bigin baka!—Luku na Aksi Boksu na ini Wi Kownukondre Dienst fu november 2000 fu kisi moro fini rai.
16 Trawan de di doro den markitiki fu de wan preikiman? Yehovah e tan blesi en pipel fu di a e tyari „den warti sani fu ala den nâsi kon na inisei” (Hag. 2:7). Ibri yari dusundusun sma e doro den markitiki fu tron preikiman di no dopu. Suma na den sma disi? Den na pikin fu Kotoigi èn bijbelstudenti di e go na fesi. Fa wi sabi efu den doro den markitiki fu de wan preikiman fu a bun nyunsu?
17 Den pikin fu Yehovah Kotoigi: Furu pikin e go makandra nanga den papa nanga mama na ini a preikiwroko someni yari kaba, ma toku den no e dini ete leki preikiman di no dopu. A mun maart kan de wan bun ten fu meki den bigin leki preikiman di no dopu. Fa yu kan sabi efu a pikin fu yu doro den markitiki? Na tapu bladzijde 102 fu a buku Georganiseerd om onze bediening te volbrengen (Orga fu du wi diniwroko) wi e leisi taki wan pikin kan tron wan preikiman di no dopu ete „te a pikin de wan bun eksempre na ini a fasi fa a e tyari ensrefi èn efu a man fu taki nanga sma fu a bribi fu en. A musu man fu taki nanga tra sma fu a bun nyunsu èn a musu du dati nanga en heri ati.” Efu yu denki taki yu pikin doro den markitiki dati, dan taki nanga wan fu den owruman fu a Dienstkomte fu a gemeente.
18 Bijbelstudenti di doro a marki: Baka di wan bijbelstudenti teki nofo leri èn te a e kon na den konmakandra wan pisi ten kaba, dan a kan taki so wan studenti wani tron wan Kownukondre preikiman. Efu yu e studeri nanga so wan sma, dan aksi yusrefi: A e du ala san a man fu go na fesi nanga a studie fu en? A de so taki a e taki kaba nanga tra sma fu san a e leri, te a feni na okasi fu du dati? A e meki muiti fu weri „a nyun fasi fa [wan sma] musu de”? (Kol. 3:10) Bladzijde 100-102 fu a Bediening-buku e fruteri san na den markitiki fu tron wan preikiman di no dopu ete. A studenti doro den markitiki dati? Efu dati de so, dan yu musu taki nanga den brada fu a Dienstkomte fu a gemeente, so taki den kan seti sani fu meki tu owruman taki nanga yu èn nanga a studenti. Efu a doro den markitiki, dan den tu owruman sa taigi en taki a kan bigin nanga a preikiwroko.
19 Ma fa a de nanga april nanga mei? Den mun disi sa de spesrutu mun sosrefi, pe wi o du moro na ini a preikiwroko. Furu fu den sma di sa de na ini a yepi-pionierwroko na ini maart, kande man du a pionierwroko tu na ini april noso mei. Kande den kan du dati na ini ala tu mun srefi. Na ini april nanga mei, wi o meki muiti fu prati A Waktitoren nanga Ontwaakt! so furu leki wi man. Den sma di leisi den tijdschrift disi abi tumusi moi winimarki fu dati! Den tijdschrift disi na prenspari sani di meki taki a preikiwroko go na fesi so furu nownow na heri grontapu. Na ini april nanga mei wi sa du spesrutu muiti fu gi den tijdschrift na so furu sma leki wi man. Meki muiti fu seti sani nownow kaba fu teki prati dorodoro na a wroko dati.
20 Na a pisi ten dati wi o du moro na ini a diniwroko. Yu denki taki yu sa abi fu aksi na ini a gemeente efu yu kan kisi moro tijdschrift? Na ini a heri dienstyari wi e wroko ibri satra nanga A Waktitoren nanga Ontwaakt!, fu di dati na wi tijdschriftdei. Ma fu di furu fu wi sa de na ini a yepi-pionierwroko na a ten dati, meki taki tu mun langa wi alamala sa pristeri den tijdschrift dati na sma. Fu dati ede, a kan taki yu musu aksi efu yu kan kisi moro tijdschrift na ini a gemeente. Efu yu abi moro tijdschrift fanowdu, dan a bun fu go wantewante na a brada di abi a frantwortu fu sorgu gi tijdschrift fu taigi en. Na a srefi ten, a brada di abi a frantwortu na ini a gemeente fu sorgu gi den publikâsi, musu sorgu tu taki a abi nofo fu a traktaat Yu Ben Sa Wani Sabi Moro fu Bijbel? so taki wi alamala kan kisi en fu wroko nanga en.
21 Furu sma nyan bun fu a pisi na ini Wi Kownukondre diniwroko di nen „Sani di yu kan fruteri fu den tijdschrift”. Yu kisi wini fu a moi seti disi kaba, fu di yu leri fu pristeri den tijdschrift na a fasi disi? Fu san ede yu no sa teki pikinso ten fu yu osofamiri studie ibri wiki fu sreka den pristeri disi?
22 Du ala san yu man na a pisi ten fu a Memrefesa fu a yari disi: Meki wi de neleki na apostel Paulus fu di wi e sori taki wi e warderi „a fri presenti fu [Yehovah] di pasa san wi man taki fu en”. Wi kan du dati fu di wi o wroko fayafaya fu horibaka gi den sani di seti gi a ten fu a Memrefesa. Wan tu fu den sani disi na taki (1) wi o de na a moro prenspari fesa fu a yari disi, pe wi o memre a Neti-nyanyan fu Masra tapu 28 maart 2002; (2) wi e yepi den wan di no e preiki moro, so taki den kisi ’a lobi baka di den ben abi fosi’ (Openb. 2:4; Rom. 12:11); (3) wi e yepi den pikin fu wi nanga den bijbelstudenti fu wi di doro den markitiki fu de wan preikiman di no dopu ete; èn (4) wi e du so furu leki wi man fu teki prati dorodoro na a preikiwroko, èn efu a kan srefi fu dini leki wan yepipionier na ini maart èn kande srefi na ini den mun baka dati.—2 Tim. 4:5.
23 Wi e tan begi Gado fu yepi wi, so taki wi alamala kan teki prati dorodoro na a preiki di wi e preiki a bun nyunsu fu a Kownukondre, na a pisi ten fu a Memrefesa. Na so fasi, wi kan sori o bigi a warderi fu wi de gi ala den sani di Yehovah du gi wi.
[Faki na tapu bladzijde 6]
A fasi fa mi seti sani fu wroko na ini maart 2002
Sonde Munde Tudewroko Fodewroko Dridewroko Freida Satra
1 2
Tijdschriftdei
3 4 5 6 7 8 9
Tijdschriftdei
10 11 12 13 14 15 16
Tijdschriftdei
17 18 19 20 21 22 23
Tijdschriftdei
24 25 26 27 28 29 30
MEMREFESA Tijdschriftdei
BAKA TE
31 SON DONGO
Yu kan seti sani fu wroko 50 yuru leki yepipionier na ini a mun maart?