Tan fruteri sma fu den wondruwroko fu Yehovah

1. San na wan tu spesrutu wondruwroko fu Yehovah di yu e warderi?

¹ Nowan sma de leki wi bigi Gado Yehovah! David ben skrifi: „Yusrefi du furu wondruwroko gi wi, o Yehovah, mi Gado, èn yu e prakseri wi trutru; nowan sma de leki yu” (Ps. 40:5). Wan tu fu den wondruwroko fu Yehovah na a hemel nanga grontapu di a meki, a Mesias Kownukondre, den sani di a du gi libisma fu di a lobi den, èn a preikiwroko di e du na heri grontapu (Ps. 17:7, 8; 139:14; Dan. 2:44; Mat. 24:14). A lobi di wi abi gi Yehovah nanga a warderi di wi abi gi ala den sani di a du gi wi, e meki taki wi wani fruteri trawan fu en (Ps. 145:5-7). Na ini den mun maart, april, nanga mei wi sa abi na okasi fu du disi moro ete.

2. Fa wisrefi e kisi wini te wi e go na ini a yepi-pionierwroko?

² Dini leki wan yepipionier: Yu man seti sani na ini a schema fu yu so taki yu man go 50 yuru na ini a spesrutu preikiwroko na ini wán noso moro fu den mun disi? Den kenki di yu e tyari na ini yu schema trutru no sa de fu soso (Ef. 5:16). Furu sma ondrofeni taki te den e go na ini a yepi-pionierwroko, dan dati e yepi den fu go na fesi na ini a diniwroko fu den. Te den e go oso fu oso dan den no e frede so furu moro èn den e gebroiki Bijbel moro furu. Te wan sma de moro na ini a preikiwroko, dan a moro makriki gi en fu go baka na den wan di wani sabi moro. Son sma di no ben abi wan bijbelstudie ete, bigin studeri nanga wan sma di den ben de na ini a yepi-pionierwroko. A yepi-pionierwroko na wan wroko di e gi prisiri fu di wi e gi wisrefi so taki wi kan yepi trawan.—Tori. 20:35.

3. Fa son sma ben man go na ini a yepi-pionierwroko aladi den ben de na ini muilek situwâsi?

³ No denki wantewante taki a situwâsi fu yu no e gi yu pasi fu go na ini a yepi-pionierwroko. Wan owruman di ben de na ini a yepi-pionierwroko a yari di pasa, abi tu pikin èn a abi wan furuten wroko. Fa a brada disi di abi so furu fu du ben man pionier? Fu di a e wroko fu munde te go miti freida, meki a ben sreka sani so taki tapu satra nanga sonde a ben man tan langa na ini a preikiwroko. Tapu satra a ben e bigin 7 yuru mamanten nanga a stratiwroko. Wan tu tra sma na ini a gemeente di ben de na ini a srefi sortu situwâsi leki a brada disi, ben go na ini a yepi-pionierwroko sosrefi, èn na so wan fasi den ben horibaka gi makandra èn den ben gi makandra deki-ati. Na ini wan tra gemeente, wan sisa di abi 99 yari, ben bosroiti fu go pionier sosrefi na ini mei fu di en umapikin ben gi en wan kari fu wroko makandra nanga en. Trawan na ini a gemeente ben yepi na owru sisa, fu di den ben tyari en na ini en rolsturu go oso fu oso èn na bijbelstudie. Boiti dati, a ben gi kotoigi nanga yepi fu telefon, a ben go na ini a stratiwroko, èn a ben gi kotoigi nanga yepi fu brifi di a ben skrifi. A sisa abi na overtoigi taki a no nanga en eigi krakti a ben man du disi, ma nanga yepi fu Yehovah wawan.—Yes. 40:29-31.

4. San wi musu hori na prakseri te wi e meki wan schema fu go na ini a yepi-pionierwroko?

⁴ Pruberi fu meki wan schema di e fiti moro bun na a situwâsi fu yu. Kande yu kan gebroiki den schema di gi leki eksempre na ini a Kownukondre diniwroko disi. Yu e wroko a heri wiki noso yu e go na skoro? Kande a moro bun schema gi yu na te yu e go satra nanga sonde na ini a preikiwroko. Efu yu abi problema nanga a gosontu fu yu èn efu yu no abi so furu krakti fu wroko langa na ini a diniwroko, dan kande yu kan meki wan schema pe yu e preiki wan syatu pisi ten ibri dei. Fruteri trawan taki yu wani go na ini a yepi-pionierwroko. Kande den sa poti a marki fu du a srefi sani tu.

5. Sortu marki yonguwan kan poti na ini den mun maart, april, nanga mei?

⁵ Difrenti fasi fa yonguwan kan teki prati: Yehovah e prisiri te yonguwan e fruteri trawan fu den wondruwroko fu en (Ps. 71:17; Mat. 21:16). Efu yu na wan yonguwan di teki dopu, dan kande yu kan go na ini a yepi-pionierwroko te yu abi fakansi. Efu yu no man dini leki yepipionier, dan yu kan poti spesrutu marki so taki yu kan teki prati èn kon moro bun na ini a diniwroko fu yu na ini den mun disi. Efu yu ben e go na ini a preikiwroko nanga yu papa nanga mama, ma yu no de wan preikiman di no dopu ete, dan a pisi ten disi ben o de wan bun ten fu pruberi fu doro den markitiki. No denki taki yu musu piki ala aksi fu Bijbel noso taki yu musu sabi so furu leki den bigisma di dopu kaba. Yu e frustan den moro prenspari leri fu Bijbel? Yu e tyari yusrefi akruderi den markitiki fu Bijbel? Yu wani taki sma sabi yu leki wan Kotoigi fu Yehovah? Efu dati de so, dan taki nanga yu papa nanga mama fu a tori disi. Den kan seti sani so taki makandra nanga yu den kan taki nanga den owruman fu si efu yu e doro den markitiki.—Luku a Bediening-buku, bladzijde 100, 101.

6. Fa wi kan yepi den bijbelstudenti fu tron preikiman fu a bun nyunsu?

⁶ Yepi trawan fu preiki: Bijbelstudenti di e go na fesi, kande doro den markitiki so taki makandra nanga wi leki preikiman den sa du a spesrutu wroko disi na ini den mun di e kon. Efu yu abi wan bijbelstudenti di e go na fesi, dan suku yepi na a Bukustudie opziener fu yu, noso a dienstopziener. Wán fu den kan go makandra nanga yu na a studie fu man si efu a studenti go na fesi. Efu a studenti doro den markitiki èn efu a wani tron wan preikiman, dan a fesiman opziener kan seti sani so taki tu owruman kan taki nanga yu èn nanga a studenti (Luku De Wachttoren fu 15 november 1988, bladzijde 16, 17). Te a studenti tron preikiman, dan bigin wantewante fu leri en fa fu du a preikiwroko.

7. Fa den sma di no e preiki moro, nanga den wan di no e preiki ibri mun, kan kisi yepi?

⁷ Den Bukustudie opziener sa wani poti spesrutu prakseri na iniwan sma na ini a grupu fu den di no e preiki moro noso di no e preiki ibri mun. Yusrefi kan aksi den fu wroko makandra nanga den na ini a preikiwroko. Efu den no preiki fu wan langa pisi ten, dan a sa de wan bun sani taki tu owruman e taki nanga den fosi, fu si efu den kan de preikiman ete (Luku na Aksi boksu fu Wi Kownukondre Dienst fu november 2000). Te den sma disi e si taki a gemeente de fayafaya na ini den mun disi te wi sa du a spesrutu wroko, dan dati kan gi den deki-ati fu teki prati doronomo na a diniwroko leki fa den ben du dati fosi.

8, 9. San den owruman kan du fu gi deki-ati fu go na ini a yepi-pionierwroko?

⁸ Sreka yusrefi now fu du moro: Owruman, nownow kaba unu kan bigin fu gi a gemeente deki-ati fu go na ini a yepi-pionierwroko. Unu kan du furu te unu e gi deki-ati èn te unu e gi wan bun eksempre (1 Petr. 5:3). San ben de a heimarki fu yepipionier na ini a gemeente na ini a yari di pasa? Unu man kisi moro yepipionier a yari disi? Den Bukustudie opziener nanga den assistent fu den, musu luku na sortu fasi den kan gi ala sma na ini a grupu a deki-ati fu du moro na ini a diniwroko fu den. A dienstopziener kan seti sani fu hori moro preikiwroko konmakandra. Taigi a gemeente na fesi sortu sani seti. Sorgu taki preikiman di abi ondrofeni e teki fesi na ini a seti disi èn taki den preikiwroko konmakandra e bigin èn kaba biten (Luku na Aksi boksu fu Wi Kownukondre Diniwroko fu september 2001). A dienstopziener musu seti sani sosrefi taki nofo presi de fu preiki, taki nofo tijdschrift de, èn taki nofo buku de.

⁹ A yari di pasa, den owruman fu wan gemeente ben bigin wan langa pisi ten na fesi fu gi sma deki-ati fu go na ini a yepi-pionierwroko, èn wan tu fu den owruman ben gi den nen sosrefi gi a pionierwroko. Den ben seti sani fu hori moro preikiwroko konmakandra, namku gi a stratiwroko 5.30 mamanten, gi den wan di ben komoto fu skoro 3.00 bakadina, èn a di fu dri preikiwroko konmakandra gi den wan di e komoto fu wroko 6.00 mofoneti. Boiti dati, sani ben seti so taki dri preikiwroko konmakandra ben hori tapu satra. Sma na ini a gemeente ben teki a kari disi èn 66 sma ben go na ini a yepi-pionierwroko na ini a mun april!

10. Fa den osofamiri kan sreka sani na fesi so taki den kan du moro na ini a preikiwroko fu den?

¹⁰ Fu san ede yu no e seti wan schema na a osofamiri studie di e kon, so taki unu kan poti marki di un kan doro na ini den mun di e kon? Te ala sma e wroko makandra èn te ala sani seti na fesi, dan kande wan tu sma, noso ala sma na ini na osofamiri kan go na ini a yepi-pionierwroko. Efu un no man du disi, dan poti leki marki fu wroko moro langa na ini a preikiwroko leki san yu gwenti noso fu go na ini a preikiwroko na tra okasi. Begi fu a tori disi makandra nanga yu osofamiri. Yu kan de seiker taki Yehovah sa blesi a muiti di unu e du.—1 Yoh. 3:22.

11. (a) Sortu kefalek moi sani pasa fu di Krestes gi en libi leki srakti-ofrandi? (b) O lati èn pe a Memrefesa fu wi sa hori?

¹¹ A moro bigi wondruwroko fu Gado: A moro moi fasi fa Yehovah sori lobi na di a gi en Manpikin leki wan lusu-paiman gi wi (1 Yoh. 4:9, 10). A frulusu-ofrandi na a wan-enkri fasi fa a libisma famiri kan kisi frulusu fu sondu nanga dede (Rom. 3:23, 24). A brudu fu Yesus ben meki a nyun frubontu abi krakti, èn disi meki taki sondu libisma ben kan tron manpikin fu Gado di abi a howpu fu tiri na ini a Kownukondre na hemel (Yer. 31:31-34; Mark. 14:24). San de moro prenspari na taki Yesus gi yesi na wan volmaakti fasi so taki a nen fu Yehovah kan kon santa (Deut. 32:4; Odo 27:11). Tapu sonde 4 april, baka te son dongo, dan a Memrefesa fu a dede fu Krestes sa hori na heri grontapu.

12. Fa den sma di wani sabi moro kan kisi wini te den e kon na a Memrefesa?

¹² Wi e gi den wondruwroko fu Yehovah glori te wi e hori a Memrefesa. A lezing sa meki wi frustan èn warderi san Yehovah du di a gi a lusu-paiman. Den sma di de drape di wani sabi moro sa man frustan tra wondruwroko fu Gado. Den sa man si a wánfasi nanga a lobi di Yehovah leri a pipel fu en (Ef. 4:16, 22-24; Yak. 3:17, 18). Te wan sma e kon na a tumusi prenspari okasi disi dan dati kan abi furu krakti tapu a fasi fa a sma e denki. Fu dati ede wi wani taki so furu sma leki a kan kon na a Memrefesa.—2 Kor. 5:14, 15.

13, 14. Suma wi musu gi wan kari fu kon na a Memrefesa èn fa wi kan du dati?

¹³ Gi trawan wan kari fu kon: Bigin wantewante fu skrifi den nen fu den sma di yu wani kari. Skrifi den nen sosrefi fu famiriman di no de na waarheid, birtisma, sma di yu sabi fu yu wrokope noso fu skoro, sma nanga suma yu ben studeri fosi èn den sma nanga suma yu e studeri now, èn a nen fu ala den gobaka fu yu. Den Bukustudie opziener musu skrifi sosrefi den nen fu den preikiman di no e preiki moro.

¹⁴ Gebroiki a papira pe a kari fu a Memrefesa skrifi èn gebroiki wan skrifimasyin noso skrifi na so wan fasi taki sma man leisi bun o lati èn pe a Memrefesa sa hori. Noso efu yu wani dan yu kan gebroiki a kari di skrifi na tapu a lasti bladzijde fu A Waktitoren fu 15 maart 2004, noso na Ontwaakt! fu 22 maart 2004. Te 4 april e kon moro krosibei, dan memre den sma di yu ben gi wan kari fu di yu e go na den, noso fu di yu e bel den.

15. Fa wi kan sori switifasi na a neti fu a Memrefesa?

¹⁵ Na a Memrefesa: Meki muiti fu kon fruku na a neti fu a Memrefesa. Sori switifasi fu di yu e gi den nyun sma wan switikon (Rom. 12:13). Yu abi wan spesrutu frantwortu na den fisitiman di yu ben gi wan kari. Meki den firi taki wi e prisiri fu si den drape èn meki den kon sabi trawan fu a gemeente. Kande yu kan yepi den fu feni wan sidonpresi krosibei fu yu. Efu iniwan fu den no abi wan Bijbel noso wan singibuku, dan seti sani so taki den kan luku makandra nanga yu, noso nanga wan tra sma. De klariklari fu piki iniwan fu den aksi di den o abi kande baka a Memrefesa. Efu sonwan fu den kon fu a fosi leisi, dan aksi den efu den wani kon leri sabi moro fu Gado Wortu nanga den marki fu en. Aksi den efu den wani wan bijbelstudie na den oso.

16. San kan yepi den wan di ben kon na a Memrefesa fu go na fesi na yeye fasi?

¹⁶ Tan yepi den wan di ben kon na a Memrefesa: Na ini den wiki baka a Memrefesa, dan kande den wan di ben kon, sa abi moro yepi fanowdu. Dati kan de sma di ben e kon doronomo na den konmakandra ma now den e kon wawan leisi nomo. Den owruman sa de na ai fu si taki den no e frigiti den sma disi, fu di den o pruberi fu luku san meki a sma tapu fu go na fesi na yeye fasi. Den o sori a sma na ini sortu prenspari ten wi e libi so taki dati kan naki en ati (1 Petr. 4:7). Yepi ala sma fu si sortu wini den o kisi te den e gi yesi na a frumane fu Bijbel di e taki fu kon makandra doronomo nanga a pipel fu Gado.—Hebr. 10:24, 25.

17. Fu san ede wi musu tan fruteri trawan fu den wondruwroko fu Yehovah?

¹⁷ Den wroko fu Yehovah meki na so wan wondru fasi taki wi no sa man frustan den dorodoro, awansi wi e libi fu têgo (Yob 42:2, 3; Preik. 3:11). Fu dati ede, wi sa abi wan reide ala ten fu san ede wi kan prèise en. Na a ten fu a Memrefesa disi, wi kan sori warderi gi den wondruwroko fu Yehovah fu di wi e meki spesrutu muiti fu du moro na ini a preikiwroko.

[Schema na tapu bladzijde 5 di e tyari sani kon na krin]

Yu kan gebroiki wán fu den schema disi fu kan teki prati na a yepi-pionierwroko?

Maart Mun* Tud* Drid* Fod Fre Sat Son Ini wán mun

Ibri dei 1 1 1 1 1 5 2 51

Tu dei 5 0 5 0 0 0 0 50

April Mun Tud Dri Fod* Fre* Sat Son Ini wán mun

Ibri dei 1 1 1 1 1 5 2 50

Tu dei 0 0 0 5 5 0 0 50

Mei Mun* Tud Dri Fod Fre Sat* Son* Ini wán mun

Ibri dei 1 1 1 1 1 4 2 51

Tu dei 5 0 0 0 0 5 0 50

* Feifi na ini a mun