Meki wi de sma di de fayafaya fu du san bun!
1 Fu di wi e doro a ten fu a Memrefesa, dan furu sani de di e meki taki wi musu de „fayafaya fu du san bun” (1 Petr. 3:13). A moro prenspari sani di meki taki wi musu de fayafaya, na taki Yesus Krestes gi en libi leki wan lusu-paiman gi wi (Mat. 20:28; Yoh. 3:16). Nanga a tori disi na prakseri na apostel Petrus ben skrifi: „A no ben de nanga sani di e pori gowe, nanga solfru noso gowtu, taki unu ben kon fri fu a soso fasi fa unu ben tyari unsrefi. . . . Ma a ben de nanga diri brudu, leki a di fu wan pikin skapu di no doti èn di no flaka, iya, a brudu fu Krestes srefi” (1 Petr. 1:18, 19). A warderi di wi abi gi a bigi lobi di Yesus sori wi, e meki taki wi e du san bun. Dati de so, fu di wi e erken taki Yesus „gi ensrefi gi wi so taki a ben kan frulusu wi fu ibri sortu kruktudu èn krin wan pipel di sa de gi en wawan, èn di de fayafaya gi tumusi bun wroko”.—Tit. 2:14; 2 Kor. 5:14, 15.
2 Te wi e du san Gado feni bun, dan wi e kisi wan bun banti nanga en èn a sa sorgu wi bun. Petrus ben skrifi moro fara: „A sma di wani lobi a libi èn wani si bun dei, . . . meki a kaba du ogri èn meki a du bun; meki a suku vrede èn du muiti fu kisi en. Bika den ai fu Yehovah de na tapu den regtfardikiwan, èn den yesi fu en e arki den tranga begi fu den” (1 Petr. 3:10-12). Na ini den muilek ten disi a de wan blesi fu sabi taki Yehovah e luku wi èn taki a de klariklari fu du sani gi a bun fu wi ’fu kibri wi neleki wi de a popki fu en ai’.—Deut. 32:10; 2 Kron. 16:9.
3 Aladi den fosi Kresten, di Petrus ben skrifi go na den, ben abi fu kakafutu gi tesi di ben miti den, toku den ben de fayafaya èn den ben meki a bun nyunsu bekènti te o fara leki den ben man (1 Petr. 1:6; 4:12). Na so a de tu nanga a pipel fu Gado na ini a ten disi. Aladi wi e libi na ini ’muilek ten di tranga fu pasa,’ toku a warderi di wi abi gi a bunfasi fu Yehovah e meki taki wi wani du a wani fu En nanga faya (2 Tim. 3:1; Ps. 145:7). Meki wi poti prakseri na wan tu fu den bun wroko di wi kan du na a ten fu a Memrefesa.
4 Kari trawan kon na a Memrefesa: Wan fasi fa wi kan sori taki wi e warderi a moi presenti fu a lusu-paiman, na fu de na a Memrefesa fu a dede fu Yesus di o hori a yari disi tapu dridewroko 16 april baka sondongo (Luk 22:19, 20). A yari di pasa, ala nanga ala sowan 15.597.746 sma ben kon makandra na ini 94.600 gemeente na heri grontapu fu hori a Memrefesa! Dati ben de 220.000 sma moro leki a yari na fesi.
5 Omeni sma sa go na a Memrefesa a yari disi? Dati e anga moro furu fu a muiti di wi e du fu gi sma deki-ati fu kon na den konmakandra fu wi. Fosi yu kan skrifi na tapu wan pisi papira suma yu wani gi wan kari fu kon na a Memrefesa. Den moro prenspari sma di yu musu kari na den krosibei famiri fu yu. Efu yu masra noso yu wefi no abi a srefi bribi leki yu, sori den na wan lobi-ati fasi taki yu wani den fu kon nanga yu na a konmakandra disi. Wan masra di no ben abi a srefi bribi leki en wefi, ben taki dati a go na a Memrefesa a yari na fesi bika a ben si fa dati ben gi a wefi fu en prisiri. Tra sma di wi kan kari na famiriman, birtisma, noso skoromati. Sorgu taki yu e gi den bijbelstudenti fu yu wan kari tu.
6 Baka di yu skrifi ala den nen na tapu papira, teki ten fu go na ibriwan fu den sma disi fu gi den wan kari. Gebroiki den karta di druk spesrutu fu gi sma wan kari fu kon na a Memrefesa. Fu yepi den sma fu no frigiti o ten èn pe a Memrefesa sa hori, dan skrifi a ten nanga a presi pe a Memrefesa sa hori na ondrosei fu den karta. Te 16 april e kon moro krosibei, dan memre den sma di yu ben gi wan kari taki a dei fu a Memrefesa e doro dyonsro. Yu kan go na den fu memre den, noso yu kan taigi den nanga yepi fu telefon. Meki wi yepi o furu sma leki wi man fu de na a moro santa okasi disi.
7 Yepi den wan di e go na a Memrefesa: A neti te a Memrefesa e hori ala leisi na wan prisiri okasi. Wi abi na okasi fu gi den sma, di no gwenti fu kon na den konmakandra fu wi, wan switikon. Seti sani fu go fruku na a konmakandra èn fu tan moro lati baka a konmakandra, efu yu man. Teki na okasi fu kon leri sabi den nyun sma di de drape. Ontfanga den sma bun èn sori switifasi gi den.—Rom. 12:13.
8 A kan taki son sma di kon na a Memrefesa kan kisi yepi fu go na fesi na yeye fasi, fu di iniwan fu wi e bigin studeri Bijbel nanga den? Meki muiti fu kisi den nen nanga den adres fu iniwan sma di kon èn di nowan fu wi ben meki gobaka na den ete, so taki wi kan yepi den moro fara. Te den sma disi e kisi yepi na wan lobi-ati fasi, dan kande wan tu fu den kan doro a marki fu tron wan preikiman di no dopu ete bifo a Memrefesa fu a yari di e kon. Te wi e go baka na den sma disi di kon na a Memrefesa, dan wi kan gi den wan kari fu kon arki a spesrutu lezing di sa hori tapu 27 april.
9 Yu kan dini leki yepipionier na ini maart, april nanga mei? Ibri yari a dini di wi e dini Yehovah fayafaya, e meki taki wi e du muiti fu gi wisrefi dorodoro na ini a preikiwroko na ini den mun pe wi sa du spesrutu diniwroko. Na ini Sranan, a yari di pasa, dan 134 preikiman ben dini leki yepipionier na ini maart èn 584 na ini april. Dati wani taki dati sowan 359 sma ben dini leki yepipionier na ini ibriwan fu den tu mun disi. Te heri gemeente e du tranga muiti fu preiki a bun nyunsu fayafaya na a ten fu a Memrefesa, dan den sa kisi bun bakapisi.
10 Na ini Amerkankondre, den owruman fu wan gemeente di abi 107 preikiman nanga 9 gewoon pionier ben skrifi dati den ben abi wan „tumusi bun mun” na ini a mun april di pasa, bika den ben abi 53 preikiman di ben dini leki yepipionier. Ala den owruman nanga dinari ini a diniwroko fu a gemeente ben de ini a nomru disi tu. Fa den owruman gi trawan a deki-ati fu dini leki yepipionier a mun dati? Fosi a mun dati doro, dan den ben gi a gemeente a deki-ati fu gi den nen fu dini leki yepipionier. Den ben hori konmakandra fu go na ini a preikiwroko na difrenti ten tapu wan dei, so taki ala sma na ini a gemeente ben kan kisi na okasi fu preiki. Den ben poti prakseri spesrutu na a preikiwroko nanga yepi fu telefon, so taki den sikiwan ben kan preiki tu.
11 Wan sisa di ben abi 86 yari èn di no man waka moro fu di a siki, ben gi en nen fu dini leki yepipionier. Mamanten a ben e bigin fu preiki wan tu yuru nanga yepi fu telefon aladi a ben e sidon na a kukru tafra. Baka di a ben rostu wan tu yuru a ben go doro nanga en preikiwroko nanga yepi fu telefon. Wan sma di a ben gi kotoigi na telefon, taigi en taki a ben lasi en masra nanga den tu tini manpikin fu en na ini den tu yari di pasa èn a no ben man frustan fu san ede Gado meki a takru sani disi pasa. A sisa disi ben gi na uma wan bun kotoigi èn a bigin wan bijbelstudie nanga en. Fu gi kotoigi nanga yepi fu telefon te mofoneti noso na wan tra ten fu a dei, na wan bun fasi fu gi kotoigi na sma di e libi na ini oso, noso kontren pe yu no kan go. A e gi preikiman na okasi tu fu gi kotoigi na sma di no de na oso te deiten.
12 Den owruman tapu a tori di den ben fruteri nanga den wortu disi: „Wi ben abi wan tumusi moi ten èn wi breiti nanga den grani nanga blesi di Yehovah gi wi alamala.” Te yu sreka sani bun, dan a gemeente fu yu kan kisi den blesi disi sosrefi.
13 Meki muiti nanga ala yu krakti fu teki prati na a preikiwroko: A lobi di wi abi gi Gado èn sosrefi gi sma, e meki taki ibri mun wi e bai ten gi wisrefi fu prati a bun nyunsu nanga trawan (Mat. 22:37-39). Den Gemeente Bukustudie opziener nanga den yepiman fu den, musu meki muiti fu yepi den sma di de na ini a grupu fu den fu teki prati na ini a diniwroko ibri mun. Wan moi fasi fu du disi na fu sreka sani na fesi fu wroko nanga spesrutu sma fu a grupu na ini a diniwroko. Na presi fu du disi na a kaba fu a mun, dan a moro bun fu bigin fruku na ini a mun. Disi sa gi yu moro okasi fu gi yepi na wan lobi-ati fasi.
14 Yu abi preikiman di siki, di no man du a diniwroko so makriki moro na ini a grupu fu yu bukustudie ? A de krin fu frustan dati te sonwan fu den sma disi e tan na ini wan oso pe den e luku owrusma noso te den swaki tumusi so taki den no man komoto fu den oso moro, dan den no sa abi furu okasi fu preiki. Ma te den e gebroiki den wanwan okasi di den abi fu meki den leti skèin, dan den kan naki den ati fu sma di e si a bun wroko di den e du so taki den wani kon sabi moro fu a waarheid (Mat. 5:16). A Bukustudie opziener musu de seiker taki den brada nanga sisa disi sabi taki den kan skrifi ibri 15 miniti di den ben preiki na tapu den preikiwroko raportu na a kaba fu a mun. Te den kan skrifi a ten di den gebroiki na ini a preikiwroko, dan den getrow preikiman disi e kisi deki-ati èn den e prisiri. Disi e yepi sosrefi fu meki taki a raportu fu a wroko di a pipel fu Gado e du na heri grontapu, de soifri.
15 Yonguwan di e du furu bun wroko! A de moi fu si fa Kresten yonguwan e gi den krakti na ini a diniwroko fu Yehovah! (Odo 20:29) Efu yu na wan yonguwan, fa yu kan sori taki yu wani dini Yehovah fayafaya na ini den spesrutu mun disi?
16 Efu yu a no wan preikiman di dopu ete na ini a gemeente, dan yu kan du muiti fu kisi a grani dati? Aksi yusrefi den aksi disi: ’Mi abi nofo sabi fu Bijbel? Mi wani teki prati na a Kownukondre diniwroko? Mi de wan eksempre gi tra sma fu di mi e tyari misrefi na wan bun fasi? Mi man taki nanga trawan fu a bun nyunsu di misrefi e bribi? Mi wani taki nanga tra sma fu di mi ati e pusu mi fu du dati?’ Efu yu kan piki iya tapu den aksi disi, dan yu kan taki nanga yu papa nanga yu mama fu taigi den taki yu wani tron wan preikiman. Yu papa nanga yu mama kan taki nanga wan fu den owruman fu a dienstkomte.
17 Efu yu na wan preikiman fu a bun nyunsu kaba, yu kan gebroiki yu skoro fakansi fu du moro na ini a preikiwroko? Nanga yepi fu wan bun schema èn nanga yepi fu papa nanga mama èn fu trawan, furu yonguwan di dopu kaba ben man dini leki yepipionier. Efu dati no man, dan teki a fasti bosroiti fu du moro furu na ini a preikiwroko. Poti wan marki gi yusrefi. Boiti dati yu poti wan marki gi yusrefi omeni yuru yu o wroko na ini wan mun, yu kan poti srefi wan marki fu du a diniwroko fu yu moro bun. Kande yu kan du muiti fu leisi wan bijbeltekst na ibri doro te yu e miti sma, kande yu kan tyari moro bun gobaka, èn bigin wan bijbelstudie, noso kande yu kan du moro fu di yu e preiki nanga yepi fu telefon noso wan tra fasi fu du a diniwroko. Kande yu kan doro a marki fu aksi wan birtisma, wan skoromati, noso wan famiriman fu kon nanga yu na a Memrefesa a yari disi? Te yu e du furu na ini a diniwroko fu Gado, dan dati sa tyari bun bakapisi kon gi yu, èn yu e gi trawan ini a gemeente deki-ati sosrefi.—1 Tes. 5:11.
18 Yepi den nyunwan fu go na fesi: Na ini a dienstyari di pasa, sowan 2435 oso-bijbelstudie ben hori ibri mun na ini Sranan. Baka wan pisi ten, furu fu den sma di e studeri Bijbel nanga wi sa doro a ten pe den o gi densrefi abra na Gado èn teki dopu. Ma fosi den doro a marki dati, dan wi musu yepi den fu doro den markitiki fu tron wan preikiman fu a bun nyunsu. Disi na wan prenspari sani fu leri den nyunwan fu tron bakaman fu Yesus Krestes (Mat. 9:9; Luk. 6:40). Yu abi wan bijbelstudenti di de klariklari fu du dati?
19 Efu yu no de seiker taki a studenti fu yu e go na fesi, dan yu musu suku yepi fu a Bukustudie opziener noso fu a dienstopziener. Kande yu kan aksi en fu kon nanga yu na a studie. Den brada disi abi furu ondrofeni di de wan yepi gi yu fu man si krin efu a studenti fu yu e go na fesi na yeye fasi. Kande den abi rai di den kan gi a studenti fu yepi en fu tan go doro fu go na fesi na yeye fasi.
20 Te a studenti fu yu e sori taki a wani tron wan preikiman di no dopu ete èn yu sabi taki a doro den markitiki fu tron wan preikiman, dan yu kan taki nanga a fesiman opziener. A sa seti sani so, taki tu owruman abi wan takimakandra nanga yu nanga a studenti fu yu fu luku efu a doro den markitiki. Den sa gebroiki a rai di de fu feni na ini a Bediening-buku bladzijde 100, 101. (Luku De Wachttoren fu 15 november 1988 bladzijde 16, 17.) Te den owruman feni taki yu studenti kan tron wan preikiman, dan yu musu leri en wantewante fa fu du a preikiwroko. Te a gi en preikiwroko raportu, dan den owruman sa meki a gemeente kon sabi taki a studenti tron wan preikiman di no dopu ete. Wi e howpu taki dusundusun nyun preikiman, yonguwan nanga sosrefi owruwan, kan doro a prenspari markitiki disi na ini den spesrutu mun te wi o du furu diniwroko.
21 Fu man klari a wroko wi musu sreka bun: Te wi sreka wisrefi bun na fesi, dan wi sa abi bun bakapisi nanga wi preikiwroko na a ten fu a Memrefesa (Odo 21:5). Furu sani de di den owruman musu hori na prakseri.
22 Fu yepi a gemeente fu du furu na ini a preikiwroko, dan den owruman musu seti sani bun so taki na ini ala den dei fu a wiki èn sosrefi tapu satra nanga sonde, preikiwroko konmakandra kan hori. A dienstopziener musu teki fesi fu seti den sani disi. A de so taki moro konmakandra kan hori na ini a fruku mamanten, latilati bakadina, noso na mofoneti? Den owruman musu taigi a gemeente fu den sani disi di den seti. A kan de wan yepi te a schema fu den seti disi e poti na tapu a bord pe ala den tori fu a gemeente de.
23 Den owruman musu luku efu ala sani gi a Memrefesa sreka fruku nofo fosi a dei 16 april doro. Den musu sreka sani makandra nanga tra gemeente di abi den konmakandra ini a srefi Kownukondre zaal. Den musu sreka sani so taki a Kownukondre zaal krin, taki den teki brada fu dini leki yepiman èn den musu kisi sosrefi a brede nanga a win. A gemeente musu kon sabi o lati èn pe a Memrefesa sa hori èn efu wan kenki kon na ini a konmakandra schema fu a wiki dati. Te ala den sani disi sreka na wan bun fasi, dan a Memrefesa sa „feni presi na wan fasi di fiti èn leki fa sani seti”.—1 Kor. 14:40.
24 Kande den famiri edeman kan gebroiki wan pisi fu den osofamiri studie fu taki san na osofamiri kan du fu teki prati na ini a bigi wroko di o du na a pisi ten fu a Memrefesa. A de so taki yu heri osofamiri kan dini leki yepipionier? Noso, a de so taki na osofamiri kan seti sani so taki wan noso moro sma kan dini leki yepipionier? Efu dati no man, dan poti spesrutu marki gi yu osofamiri fu du moro na ini a preikiwroko. A de so taki yu kan gi wan yonguwan na ini na osofamiri deki-ati fu tron wan preikiman di no dopu ete èn taki yu kan yepi en fu doro a marki dati? Omeni sma yu nanga yu osofamiri kan kari fu go na a Memrefesa a yari disi? Te yu sreka sani bun, dan yu nanga yu osofamiri sa kisi furu blesi nanga prisiri.
25 Gebroiki a ten di de ete na wan bun fasi: Di na apostel Petrus ben skrifi go na den Kresten fu a fosi yarihondro, a memre den taki den musu hori na prakseri taki a ten ben syatu fu di a kaba fu a Dyu seti fu sani e kon krosibei (1 Petr. 4:7). Tide furu buweisi de di e sori taki a kaba fu a disiten seti fu sani disi de krosibei. Ibri dei wi musu sori nanga a fasi fa wi e libi taki dati de so. Leki fayafaya dinari fu Yehovah, wi musu tan poti prakseri na a tumusi prenspari wroko fu meki a bun nyunsu bekènti.—Tit. 2:13, 14.
26 Now na a ten fu sori taki wi de fayafaya fu du a diniwroko disi! Denki dipi fu san Yehovah du gi yusrefi, yu osofamiri, nanga a gemeente. Aladi wi noiti no man pai en baka gi den furu bun sani di a gi wi, toku wi kan anbegi Yehovah nanga wi heri ati (Ps. 116:12-14). Te wi du tranga muiti dan wi sa kisi blesi fu Yehovah (Odo 10:22). Meki wi de sma di „fayafaya fu du san bun” na a spesrutu ten fu a Memrefesa pe wi e du furu diniwroko, „so taki na ini ala sani Gado kan kisi glori nanga yepi fu Yesus Krestes”.—1 Petr. 3:13; 4:11.
[Faki na tapu bladzijde 3]
Sma di ben go na a Memrefesa na ini heri grontapu
1999 14.088.751
2000 14.872.086
2001 15.374.986
2002 15.597.746
[Faki na tapu bladzijde 4]
Suma yu sa kari fu kon na a Memrefesa?
□ Krosibei famiriman
□ Birtisma nanga mati
□ Wrokokompe nanga skoromati
□ Gobaka nanga bijbelstudenti
[Faki na tapu bladzijde 5]
Yepi den sma di e go na a Memrefesa
□ Gi den sma wan waran switikon
□ Go baka na den sma di ben kon
□ Aksi den efu den wani wan bijbelstudie
□ Gi den wan kari fu kon na a spesrutu lezing
[Faki na tapu bladzijde 6]
Sortu marki yu poti gi yusrefi gi a ten fu a Memrefesa?
□ Yepi wan sma di yu gi wan kari fu kon na a Memrefesa
□ Doro den markitiki fu tron wan preikiman fu a bun nyunsu
□ Du muiti fu wroko moro yuru na ini a preikiwroko
□ Go na fesi na ini wan fu den difrenti fasi fa yu e du a preikiwroko
□ Dini leki wan yepipionier