¿Wi Kan Meki April 2000 Tron a Moro Bun Mun Di Wi Oiti Ben Abi?
1 Dridewroko mofoneti 19 april sa de a heimarki fu wi dienstyari. A dei dati, te son e dongo safrisafri na heri grontapu, dan ibri gemeente nanga grupu fu Yehovah Kotoigi na heri grontapu sa hori a Memrefesa fu memre a dede fu Krestes. Awansi sortu difrenti de na mindri a ten fu a kondre pe wi e tan èn a di fu tra kondre, toku a moro bigi heimarki fu a yari sa de taki wi e memre na ofrandi di Yesus Krestes ben tyari. A mun april e sori a datum fu a Memrefesa di marki na tapu a Kalender van Jehovah’s Getuigen 2000.
2 Na ini a heri mun april wi abi wan kefalek moi okasi fu sori nanga wi heri sili taki wi e warderi Yehovah en no-frudini bun-ati di a ben sori nanga yepi fu na ofrandi di en Manpikin ben tyari. Fa so? Na apostel Paulus ben skrifi: „A lobi di Krestes abi e pusu wi, bika disi na san wi krutu, taki wán man dede gi ala sma; so bun, ala sma dede; èn a dede gi ala sma, so taki den wan di e libi no musu libi gi densrefi moro, ma gi a sma di dede gi den èn di ben kisi wan opobaka” (2 Kor. 5:14, 15). Iya, na ini april wi kan sori taki wi no e libi gi wisrefi ma gi en di dede gi wi, fu di wi e meki disi kon tron a moro bun mun di wi leki dinari fu a Kownukondre oiti ben abi.
3 Gi Yu Nen fu Du a Yepi-pionierwroko na ini April: Na apostel Paulus ben poti wan eksempre gi wi di e gi deki-ati, di a ben taki: „Mi no e meki mi sili de fu iniwan waarde, neleki a ben sa de diri gi mi, efu soso mi ben sa man klari a libiwroko nanga a diniwroko fu mi di mi ben kisi fu Masra Yesus, fu gi kotoigi finifini fu a bun nyunsu fu a no-frudini bun-ati fu Gado” (Tori. 20:24). Wi abi a srefi grani taki wi kan gi kotoigi fu Yehovah Gado dorodoro. ¡Fu dati ede, wi wani meki april tron a moro bun mun di wi oiti ben abi na ini a yepi-pionierwroko!
4 April 2000 sa de wan mun di o de heri bun gi furu sma fu go pionier, fu di a abi feifi satra nanga feifi sonde. Na ini april 1998, di wi ben doro a moro bigi heimarki fu yepipionier, dan den 472 yepipionier di ben pionier ben de moro leki 25 procent fu ala preikiman. Wan yari baka dati, a nomru fu ala den preikiman di ben gi den bericht na ini april 1999 ben gro kon tron moro leki 2 procent. Disi wani taki dati moro okasi de fu pasa a heimarki fu yepipionier di wi ben abi fosi. Boiti dati, den yuru di pionier ben musu doro kon saka sensi a ten dati, èn dati meki moro furu sma na ini a gemeente kan teki prati na a fasi disi fu a diniwroko. Ibri preikiman di dopu musu luku na ini begi efu a man du a yepi-pionierwroko na ini april fu a yari disi.
5 Meki yu schema nownow gi a mun di e kon fu di yu e gebroiki a mun april di de na tapu a Kalender van Jehovah’s Getuigen 2000. Luku sortu dei yu sa man teki prati na a velddienst, èn teri ala den yuru di yu denki yu kan gi na a preikiwroko na ini a mun. Poti a ten tu di yu kan gebroiki fu gi tra sma kotoigi na wan formeel fasi èn so srefi na wan informeel fasi. ¿Ala den yuru makandra e suku fu doro den 50 yuru di den yepipionier musu meki? ¿Efu yu e mankeri den yuru di yu abi fanowdu, dan yu kan kenki yu schema pikinso so taki yu kan feni ten fu du a yepi-pionierwroko? Yu ben sa abi fu wroko so wan wán yuru nanga 40 miniti nomo ibri dei fu doro 50 yuru a mun disi.
6 ¿Now di den yuru di den gewoon pionier musu doro, saka tu dan yu prakseri kaba fu go na ini a furuten diniwroko? Fu san ede yu e wakti te leki a bigi fakansi? ¡Now di a fosi pisi fu a yari pasa kaba, dan april ben sa de wan bun mun fu bigin! Efu yu no de seiker taki yu ben sa man doro den 70 yuru di den gewoon pionier musu doro, dan fu san ede yu no e du a yepi-pionierwroko na ini april èn poti 70 yuru leki a marki di yu wani doro? Efu yu si kaba taki yu man du en, dan kande yu ben sa firi moro furu now taki yu wani gi yu nen fu go du a gewoon pionierwroko tu so esi leki yu man.—Luku Bediening-buku, bladzijde 115, 116.
7 Teki Prati Dorodoro Leki wan Preikiman fu a Bun Nyunsu: Gi wi alamala, preikiman èn so srefi pionier, a trutru lobi di wi lobi Gado nanga a sma na wi sei e meki taki nanga wi heri sili wi e du ala san wi man du na ini a diniwroko gi Yehovah akruderi a situwâsi fu wi (Luk. 10:27). Na so wan fasi wi e sori taki „wi e wroko tranga èn e du tranga muiti, bika wi poti wi howpu tapu wan Gado di e libi, di de wan Frulusuman fu ala sortu sma, spesrutu fu den getrow wan” (1 Tim. 4:10). Dati na fu san ede wi musu fruwakti fu si taki ala sma sa teki prati na a yepi-pionierwroko na ini april, èn taki ibriwan sma sa abi wan prati dorodoro na a Kownukondre wroko.
8 Meki wi no frigiti a frumane fu Yesus: „A kotiwroko bigi, ma furu wrokoman no de. Fu dati ede, begi a Masra fu a kotiwroko fu seni wrokoman go na ini a kotiwroko fu en.” Wantewante baka di Yesus ben taigi dati, dan a ben kari den 12 apostel fu en kon èn a ben seni den go preiki (Mat. 9:37, 38; 10:1, 5, 7). So wan wán yari baka dati, baka di Yesus ben leri den 12 apostel na wan bun fasi fa fu du a preikiwroko, dan Yesus „ben teki seibitenti tra sma èn a ben seni den . . . go” èn a ben gi den, den srefi tirilin: „A kotiwroko bigi trutru . . . Begi a Masra fu a kotiwroko fu dati ede, fu a seni wrokoman go du a kotiwroko fu en” (Luk.10:1, 2). A Bijbel buku Tori fu den Apostel e fruteri fa Yehovah ben piki den begi dati. Na a ten fu a Pinksterfesa 33 G.T., a nomru fu disipel ben gro kon tron so wan 120. Dan baka makandra den ben doro heimarki fu 3000 nanga 5000 disipel (Tori. 1:15; 2:41; 4:4). Baka dati, „a nomru fu den disipel ben tan kon moro furu” (Tori. 6:7). ¡Na a srefi fasi, na ini a ten disi, wi musu tan begi a Masra fu ete moro Kownukondre preikiman! Soleki fa wi e begi, dan ibri gemeente preikiman musu sreka sani trutru fu teki prati na a diniwroko ibri mun.
9 Grantangi luku a mun april na tapu a Kalender van Jehovah’s Getuigen 2000 bun. ¿Fu di den fosi tu dei fu a mun na wan satra nanga wan sonde, dan yu kan sreka sani fu teki prati na a diniwroko a satra nanga a sonde dati, so taki yu e bigin fruku na ini a mun? ¿Yu man wroko makandra nanga a grupu fu a Gemeente Bukustudie fu yu fu horibaka gi ibri spesrutu dei di a gemeente poti na ini a mun disi fu du tijdschriftwroko? Èn fa a de te yu e gebroiki wán noso moro yuru ibri sonde na ini a diniwroko? ¿Yu kan seti sani so, taki yu kan teki prati wan tu leisi na a gi di wi e gi kotoigi na mofoneti? Èn no frigiti fu gebroiki ala den okasi di yu abi fu gi kotoigi na wan informeel fasi na wrokope, na skoro, noso te yu e du den tra sani di yu gwenti du ala dei. Poti wan marki na den dei di yu kan go na a velddienst pikinso, èn gebroiki a kalender fu memre omeni ten yu wroko na ini a mun.
10 April sa de wan yoisti ten gi ala sma di doro den markitiki èn di den owruman feni bun, fu bigin dini leki preikiman di no dopu ete. ¿Efu yu e studeri Bijbel nanga wan sma, dan a sma dati go na fesi nofo so taki a kan go na a fesiman opziener fu aksi en efu den wani luku efu a kan tron wan preikiman fu a bun nyunsu? ¿Efu yu abi pikin di no dopu ete, dan yu taki nanga den owruman fu a gro di den gro na yeye fasi? ¿Disi no ben o de wan bun ten gi den fu bigin nanga a preikiwroko?—Luku Bediening-buku, bladzijde 99-102.
11 Fu di wi wani pruberi fu meki april 2000 tron a moro bun mun di wi oiti ben abi, dan a de fanowdu taki wi alamala e teki prati na a diniwroko èn baka dati wi musu gi wi velddienstrapport na a kaba fu a mun. (Teki gersi Markus 6:30.) Wi musu gi den nyun preikiman di no dopu ete èn di fositron e teki prati na a velddienst deki-ati fu gi a bericht fu den biten. Te wi e du den sani di wi musu du, dan wi kan horibaka na wan bun fasi gi a dienstbericht fu april èn makandra nanga trawan wi kan bari wan bigi babari fu prèise Yehovah fu di wi e du muiti fu gi kotoigi.
12 Tyari Tra Sma Kon Nanga Yu na a Memrefesa: ¿Wi no ben sa prisiri fu si wan nyun heimarki fu sma di kon na a Memrefesa na ini 2000 fu memre a dede fu Krestes? ¡Iya! ¡Disi ben o wani taki dati moro furu sma leki iniwan ten na fesi ben kon makandra fu sori taki den e warderi a moro moi fasi fa Yehovah Gado nanga Yesus Krestes ben sori lobi fu a bun fu wi! (Yoh. 3:16; 15:1) Sreka awansi sortu sani di de fanowdu fu du, so taki noti sa tapu yu nanga yu osofamiri fu go na a Memrefesa.
13 Now na a ten tu fu bigin gi tra sma wan kari fu kon na a Memrefesa. Meki wan lijst fu ibri sma di yu ben wani taki a musu kon. Poti iniwan sma di ben studeri Bijbel na ini a ten di pasa, na tapu a lijst tu, den wan di e studeri nownowde, nanga ala den sma pe yu e tyari gobaka. Skrifi a nen tu fu den sma di yu sabi na wrokope, na skoro, èn na ini a birti, so srefi iniwan sma di yu e du bisnis nanga en. No frigiti fu kari tra sma di yu sabi èn den famiri fu yu. Baka te yu skrifi ala nen na tapu a lijst, dan bigin gi ibriwan fu den wan kari di komoto na a ati. Tyari kon na krin o ten èn pe a Memrefesa sa hori. Te 19 april e kon moro krosibei, dan gi den wan di de na tapu a lijst fu yu wan kari baka, fu di yusrefi e go na den noso fu di yu e bel den. Aksi den efu den wani kon nanga yu na a Memrefesa a neti dati.
14 Soleki fa den tra tirilin fu a Genootschap e sori, dan a skin fu owruman sa du spesrutu muiti fu gi ala den inaktief preikiman na ini a gebied deki-ati fu kon na a Memrefesa (Mat. 18:12-14). Den owruman sa musu luku a brifi fu a Genootschap fu 2 februari 1999 baka. A sekretarsi fu a gemeente musu meki wan lijst fu ala preikiman di de inaktief, èn a dienstopziener sa gi owruman a toewijzing fu go luku den èn fu gi den wan kari fu kon na a Memrefesa. Kande den owruman kan yepi den inaktief sma disi fu tron aktief baka na ini a velddienst, srefi na ini april. Disi kan pasa fu di den owruman e tyari wan herder fisiti go na den sma disi so esi leki disi kan fu gi den deki-ati. Efu den e kisi wan kari fu teki prati na a velddienst nanga wan preikiman di abi furu ondrofeni, dan dati sa tranga den.
15 ¡Gi Sma Deki-ati fu Horibaka gi a Wroko na ini April! Den owruman, den dinari ini a diniwroko, nanga den osofamiri edeman sa musu wroko bun nanga makandra fu meki april 2000 tron a moro bun mun di wi oiti ben abi. Den owruman sa wroko tranga fu orga ala sani bun èn fu teki fesi (Hebr. 13:7). Sani musu sreka na wan bun fasi fu kan abi velddienst konmakandra na den wrokodei èn na den satra nanga sonde. Sani kan sreka fu hori ekstra velddienst konmakandra fu wroko lati bakadina nanga mofoneti. Wan heri schema fu ala den sani di sreka gi april musu poti na tapu a bord pe yu kan leisi tori fu a gemeente. Wan sma sa musu kisi a toewijzing fu sorgu gi ibri velddienst konmakandra di de na tapu a schema. Fu sorgu taki ibri grupu abi san den abi fanowdu, dan den sa musu kisi nofo gebied.
16 Na ini april wi sa pristeri den tijdschrift a Waktitoren nanga Ontwaakt! Efu yu wani opo wan oso-bijbelstudie, dan yu sa musu pristeri a San Gado e aksi-brochure na ala sma di e sori taki den abi belangstelling. Fu dati ede, furu tijdschrift nanga brochure musu de fu kisi.
17 Na a kaba fu a mun, ala bukustudie leider nanga den yepiman fu den wani gi ibriwan sma na ini a grupu fu den deki-ati kande fu gi wan velddienstrapport wantewante baka te a mun kaba. Kande den kan du disi sonde 30 april srefi. Dan te a sekretarsi e teri den rapport, èn a e si taki wan tu preikiman no gi a rapport fu den, dan a kan memre den na wan switifasi fu du dati bifo 6 mei, te a musu seni a gemeentebericht go na a Genootschap. A ben sa kan aksi den bukustudie leider fu yepi en fu taki nanga den preikiman.
18 A ten fu a Memrefesa na a moro prenspari ten fu a yari gi a pipel fu Gado. A musu de wan ten di wi alamala abi furu fu du na ini a diniwroko gi Yehovah. Na so a sa de te ala sma e teki prati na a wroko someni leki den man leki wan preikiman fu a bun nyunsu, te den wan di kan gi den nen fu du a yepi-pionierwroko trutru e du dati, èn te wi de fayafaya fu tyari tra sma kon nanga wi na a Memrefesa fu memre a dede fu Krestes. ¡Meki wi begi Yehovah fayafaya fu a blesi wi, ala di wi e du muiti fu meki april 2000 tron a moro bun mun di wi oiti ben abi, soso fu prèise Gado èn fu gi en glori!—Hebr. 13:15.
[Faki na tapu bladzijde 3]
Yepipionier
A Moro Bigi Heimarki fu Wi: 472
(April 1998)
[Faki na tapu bladzijde 4]
Preikiman Di Wi Abi Ala Nanga Ala
A Moro Bigi Heimarki fu Wi: 1978
(April 1999)
[Faki na tapu bladzijde 5]
Sma Di Ben De na a Memrefesa
A Moro Bigi Heimarki fu Wi: 5922
(1999)