Sori warderi gi a sari-ati fu Gado
1 Bifo Paulus tron wan Kresten, dan na wan ogri-ati fasi a ben e gens a Kresten bribi di ben panya na ala sei. Ma fu di Gado si taki Paulus ben e handri na so wan fasi fu di a no ben sabi san a Kresten bribi ben wani taki, meki Gado sori sari-ati gi Paulus. Yehovah ben sori bun-ati gi Paulus aladi a no ben frudini fu kisi dati. Paulus ben kisi a wroko fu preiki, èn a ben e warderi a wroko dati srefisrefi (Tori. 26:9-18; 1 Tim. 1:12-14). Fu di Paulus ben abi warderi gi a sari-ati di Yehovah sori en, meki a du ala san a man fu du a diniwroko fu en.—2 Kor. 12:15.
2 Fu di Gado abi sari-ati nanga wi sosrefi, meki a gi wi wan wroko fu du tu (2 Kor. 4:1). Neleki Paulus, wi kan sori tu taki wi e warderi a sari-ati di Gado sori wi, fu di wi e du ala san wi man fu yepi trawan fu go na fesi na yeye fasi. Wán fasi fa wi kan du disi, na te wi e bigin èn e hori bijbelstudie nanga sma.
3 Fa fu bigin bijbelstudie: Wán fasi fa wi kan bigin bijbelstudie, na fu tyari tijdschrift gi sma doronomo. Te wi e tyari tijdschrift gi den sma ibri tron baka, dan wi o kon sabi sortu broko-ede den abi. Baka wan pisi ten, wi kan gebroiki wan artikel na ini wan fu den tijdschrift fu bigin wan bijbelstudie nanga a San Gado e aksi-brochure. Te wi e go baka fu tyari tijdschrift gi na ososma, dan wi kan suku fu taki go doro fu a San Gado e aksi-brochure.
4 Wi musu begi èn meki muiti: Te wi e begi èn te wi e meki muiti fu du soleki fa wi begi, dan wi sa man du moro na ini a preikiwroko. Wan pionier sisa di ben abi wán bijbelstudie, ben aksi Yehovah na ini begi efu A ben man blesi en nanga moro bijbelstudie. A ben meki muiti tu fu du soleki fa a begi. A ben go sidon prakseri fa a ben e du en diniwroko èn a kon si taki a no ben e pristeri sma wan bijbelstudie te a ben e go baka na den. A bigin du disi èn syatu na baka a ben abi ete tu bijbelstudie.
5 Fu tru, wi abi wan bigi grani fu yepi sma kon sabi „a bun nyunsu fu a no-frudini bun-ati fu Gado”! (Tori 20:24) Meki wi abi warderi gi a sari-ati di Gado sori wi, èn meki dati pusu wi fu de fayafaya fu yepi trawan so taki den kan kisi wini fu a no-frudini bun-ati di Yehovah sori libisma.