Wi e dini a Gado di abi „furu sari-ati”

1. O ten yu kan taki dati wan sma abi sari-ati èn sortu tori e sori wi san na sari-ati?

NOFO TRON te wi e taki fu wan sma di abi sari-ati, dan wi e prakseri wan sma di abi switifasi, di e firi gi trawan, èn di lobi gi sma sani. Kande wi e prakseri a tori di Yesus ben fruteri fu wan Samaria man di ben sori sari-ati gi wan Dyu. Aladi a Samaria man ben de fu wan tra pipel, toku a ben „abi sari-ati nanga” wan Dyu di fufuruman ben ròs. A ben firi sari gi a Dyu di kisi mankeri. Dati meki a du muiti fu yepi en (Luk. 10:29-37). A tori disi e meki wi poti prakseri na wan moi fasi fu a Gado fu wi. Dati na sari-ati. Disi na wan fasi fa Gado e sori lobi èn ibri dei a e sori sari-ati gi wi na furu difrenti fasi.

2. San na wan tra fasi fa wan sma kan sori sari-ati?

² Wan sma kan sori sari-ati tu te a bosroiti fu no strafu wan trawan di musu kisi strafu. A no de fu taki dati Yehovah sori sari-ati gi wi na a fasi dati. A psalm skrifiman taki: „A no gi wi ala strafu di wi ben musu kisi gi den sondu fu wi” (Ps. 103:10). Ma son leisi Yehovah kan bosroiti fu gi wan sma di meki wan fowtu seryusu piri-ai.

3. Sortu aksi wi o luku?

³ Na ini na artikel disi wi o luku dri aksi: Fu san ede Yehovah e sori sari-ati gi sma? A kan taki wan sma e piri-ai gi wan trawan fu di a abi sari-ati nanga en? San kan yepi wi fu sori sari-ati? Meki wi luku fa Gado Wortu e piki den aksi disi.

FU SAN EDE YEHOVAH E SORI SARI-ATI

4. Fu san ede Yehovah e sori sari-ati gi sma?

⁴ Yehovah e sori sari-ati fu di a lobi sma. Na apostel Paulus ben skrifi taki Gado „abi bun furu sari-ati”. Paulus ben sori taki na sari-ati meki taki Gado gi den salfu futuboi fu en a howpu fu libi na hemel aladi den na sondusma (Ef. 2:4-7). Ma Yehovah no e sori sari-ati soso gi den salfuwan. A psalm skrifiman David ben taki: „Yehovah e du bun gi ala libisani èn a e sori sari-ati gi ala sani di a meki” (Ps. 145:9). Fu di Yehovah lobi sma, meki a e sori sari-ati gi den ibri leisi te a si taki a fiti fu du dati.

5. Fa a du kon taki Yesus sabi taki en Papa lobi sori sari-ati gi sma?

⁵ Yesus sabi heri bun taki Yehovah lobi sori sari-ati gi sma. Yehovah nanga Yesus ben de makandra na ini hemel dusundusun yari langa, fosi Yesus kon na grontapu (Odo 8:30, 31). Yesus si furu leisi fa en Papa ben sori sari-ati gi sondu libisma (Ps. 78:37-42). Di Yesus ben e gi sma leri, dan furu tron a ben e taki fu a moi fasi disi di en Papa abi.

6. Fa Yesus yepi wi fu frustan fa Yehovah e sori sari-ati gi sma?

⁶ Soleki fa wi ben si na ini na artikel fosi a wan disi, dan Yesus ben fruteri na agersitori fu a lasi manpikin fu meki wi frustan taki Yehovah lobi fu sori sari-ati gi sma trutru. A manpikin ben gowe libi oso èn a ben „frumorsu en gudu fu di a ben libi wan yayolibi” (Luk. 15:13). Bakaten a ben sari taki a ben libi so wan libi. Dati meki a sori sakafasi èn a drai go baka na oso. Fa en papa ben feni dati? A yongu man no ben abi fu wakti langa fu si san a papa ben o du. Yesus taki: „A [manpikin] ben de fara fu oso ete, di en papa si en. Ne a papa firi sari, a lon go brasa en boi èn a gi en wan switi bosi.” A papa no ben wisiwasi en manpikin. Na presi fu dati a sori sari-ati gi en manpikin, a gi en pardon, èn nanga prisiri a teki en baka na ini en osofamiri. A manpikin ben du seryusu sondu, ma fu di a ben sori berow, meki en papa gi en pardon. Na ini a moi agersitori disi a papa di sori sari-ati, na Yehovah. Yesus ben sori taki en Papa de klariklari fu gi sma pardon te den sori berow trutru.​—Luk. 15:17-24.

7. Fa a fasi fa Yehovah e sori sari-ati e sori taki a abi furu koni?

⁷ Yehovah e sori sari-ati fu di a abi bun furu koni. Bijbel e taki dati „a koni fu hemel de soifri” èn a de „klariklari fu sori sari-ati èn fu du bun” (Yak. 3:17). Neleki wan lobi-ati papa, Yehovah sabi taki a bun gi den futuboi fu en te a e sori den sari-ati (Ps. 103:13; Yes. 49:15). Fu di Yehovah abi sari-ati gi a pipel fu en, meki a gi den wan moi howpu, awinsi den na sondusma. Sobun, a bigi koni fu Yehovah e meki taki a e sori sari-ati, solanga a e si taki a fiti fu du dati. Ma Yehovah sabi tu o ten a no musu sori sari-ati. A no fu di a abi sari-ati meki a o tapu en ai gi sondu. Awinsi sortu bosroiti Yehovah teki, ala ten den sani di a meki o kisi wini fu dati.

8. San musu pasa son leisi, èn fu san ede?

⁸ Kow taki dati wan futuboi fu Yehovah e sondu fu espresi. San wi musu du dan? Yehovah ben meki Paulus taigi a gemeente: „Un no musu bumui nanga” so wan sma (1 Kor. 5:11). Te wan sma sondu èn a no abi berow, dan den e puru en fu a gemeente. A sani disi de fanowdu fu kibri den brada nanga sisa di e tan gi yesi na Yehovah èn fu sori taki wi e hori wisrefi na den wet fu en. Ma son sma feni taki te den brada puru wan sma fu a gemeente, dan den no e sori sari-ati leki fa Yehovah e du dati. Ma a sani dati tru? Kow go luku.

NA SARI-ATI E MEKI DEN PURU WAN SMA FU A GEMEENTE?

9-10. Te yu e luku Hebrewsma 12:5, 6, dan fu san ede wi kan taki dati na sari-ati e meki taki den e puru wan sma fu a gemeente? Fruteri wan agersitori.

⁹ Te wi yere na wan konmakandra fu wi taki wan sma di wi sabi èn di wi lobi no de wan Kotoigi fu Yehovah moro, dan wi e firi sari trutru. Kande wi e aksi wisrefi efu a ben de fanowdu trutru fu puru a sma dati fu a gemeente. Ma na fu di den owruman abi sari-ati meki den puru a sma fu a gemeente? Iya. Efu yu no piri-ai gi wan sma di abi en fanowdu, dan dati no de wan koni sani. A no e sori taki yu abi sari-ati nanga en, noso taki yu lobi en (Odo 13:24). Wan sma kan kenki èn sori berow te den puru en fu a gemeente? Iya, a kan kenki. Furu brada nanga sisa di ben du wan seryusu sondu, taki dati na a puru di den puru den fu a gemeente yepi den fu kon si taki a fowtu di den meki na wan seryusu sani. A sani dati yepi den fu abi berow, fu kenki a libi fu den, èn fu drai kon baka na Yehovah.​—Leisi Hebrewsma 12:5, 6.

¹⁰ Kow luku wan agersitori. Wan skapuman si taki wan fu den skapu fu en e siki. A sabi taki a o man dresi a skapu disi, soso te a puru en na mindri den trawan. Ma skapu na meti di lobi fu de nanga makandra. Dati meki den no e firi switi te yu e poti den aparti. Ma yu ben o taki dati na ogri-ati a skapuman abi te a e puru a skapu na mindri den trawan? Nôno. A sabi taki efu a libi a siki skapu na mindri den trawan, dan den tra skapu o kon siki tu. Sobun, te a puru siki skapu na mindri den trawan, dan a e sorgu taki den trawan no e kon siki.​—Luku Lefitikus 13:3, 4.

11. (a) Fu san ede wi kan taki dati wan sma di den puru fu a gemeente de leki wan siki skapu? (b) San wan sma di den puru fu a gemeente mag du èn sortu yepi a kan kisi?

¹¹ Te den puru wan sma fu a gemeente, dan wi kan agersi a sma dati nanga a siki skapu. Wi kan taki dati a sma siki, fu di a du sani di meki taki en nanga Yehovah kon pori (Yak. 5:14). Neleki fa son siki sma kan panya a siki fu den gi trawan, na so wan sma di e du seryusu sondu kan meki taki trawan na ini a gemeente e du sani tu di no bun. Dati meki a de fanowdu son leisi fu puru so wan sma fu a gemeente. Na so Yehovah e sori lobi gi den sma na ini a gemeente di e tan gi yesi na en. A sma di den puru fu a gemeente kan kon frustan tu o seryusu a sondu fu en de, so taki a kan sori berow. So wan sma mag kon na den konmakandra ete pe a e kisi Bijbel leri, so taki a bribi fu en kon tranga baka. Boiti dati a mag kisi den buku nanga tijdschrift èn a mag luku sani tapu JW Broadcasting^®. Te den owruman si taki a e tyari kenki kon, dan den kan gi en rai ten na ten fu yepi en fu kon bun baka nanga Yehovah. Na so a kan tron wan Kotoigi fu Yehovah baka.b

12. San owruman di abi lobi nanga sari-ati kan du te wan sma no e sori berow?

¹² A prenspari fu hori na prakseri taki den e puru wan sma fu a gemeente, soso te a no abi berow fu wan seryusu sondu di a du. Den owruman sabi taki den musu denki bun fosi den bosroiti fu puru wan sma fu a gemeente. Den sabi taki Yehovah e gi sma ’a strafu di den musu kisi’ (Yer. 30:11). Den owruman lobi den brada nanga sisa fu den èn den no wani du nowan sani di kan pori a matifasi di den brada nanga sisa abi nanga Yehovah. Ma fu di den lobi den èn fu di den abi sari-ati, meki a de fanowdu son leisi fu puru wan sma fu a gemeente fu wan pisi ten te a du wan sani di no bun.

13. Fu san ede den ben musu puru wan Kresten brada fu a gemeente na ini Korente?

¹³ Luku san na apostel Paulus du di wan sma na ini a gemeente Korente no ben sori berow. Wan Kresten brada na ini a gemeente dati ben e huru nanga a wefi en papa. Dati ben de wan bigi ogri! Paulus ben sabi taki Yehovah ben taigi den Israelsma fu owruten: „Efu wan man didon nanga a wefi fu en papa, dan a gi en papa syen. Un musu kiri den sma di didon nanga makandra” (Lef. 20:11). A no de fu taki dati Paulus no ben man taigi a gemeente taki den ben musu kiri a man disi. Ma a ben taigi den fu puru en fu a gemeente. A hurulibi fu a man disi ben abi krakti tapu den trawan na ini a gemeente, èn sonwan fu den no ben e si a sani disi leki wan seryusu sondu srefi!​—1 Kor. 5:1, 2, 13.

14. Fa Paulus sori sari-ati gi wan sma di den ben puru fu a gemeente na ini Korente èn fu san ede a du dati? (2 Korentesma 2:5-8, 11)

¹⁴ Baka wan pisi ten, Paulus yere taki a man disi ben tyari bigi kenki kon. A ben sori berow trutru. Aladi a man disi ben gi a gemeente syen, toku Paulus no ben wani strafu en tumusi hebi. A taigi den owruman: „Un musu gi en pardon nanga un heri ati èn un musu trowstu en.” Luku fu san ede Paulus taki disi. A taki: „So taki a sma dati no sari so te, taki a lasi-ati.” Paulus ben e sari a man disi di ben sori berow. A no ben wani taki a man sari so te, taki a no ben o du muiti moro fu kenki so taki Yehovah gi en pardon.​—Leisi 2 Korentesma 2:5-8, 11.

15. Fa owruman kan piri-ai gi wan sma èn sori sari-ati na a srefi ten?

¹⁵ Neleki Yehovah, den owruman lobi fu sori sari-ati te a sma sori truru berow. Ma te a de fanowdu, den o gi wan sma seryusu piri-ai tu. Te den owruman no e piri-ai gi wan sma di du wan sondu, dan a no sari-ati den e sori, ma na tapu den e tapu den ai gi sondu. Ma na owruman wawan musu sori sari-ati?

SAN KAN YEPI WI ALAMALA FU SORI SARI-ATI?

16. San Yehovah o du nanga den sma di no e sori sari-ati gi trawan, soleki fa Odo 21:13 e sori?

¹⁶ Ala Kresten e du muiti fu sori sari-ati neleki Yehovah. Fu san ede? Wan sani, na taki Yehovah no o arki den sma di no e sori sari-ati gi trawan.(Leisi Odo 21:13.) Wi alamala ben o wani taki Yehovah arki den begi fu wi. Dati meki wi e luku bun taki wi no e tron sma di no e firi gi trawan. Te wan Kresten de na nowtu, dan wi no e drai baka gi en. Na presi fu dati, wi de klariklari ala ten fu arki „te wan mofinawan e bari suku yepi”. Dati meki wi e du muiti fu gi yesi na a sani disi di Bijbel e leri wi: „Te wan sma no abi a gwenti fu gi trawan pardon, dan Gado no o abi sari-ati nanga a sma dati te a o krutu en” (Yak. 2:13). Efu wi abi sakafasi, dan wi o frustan o prenspari a de taki sma sori sari-ati gi wi. Te wi e hori disi na prakseri, dan wi o du moro muiti fu sori sari-ati tu gi trawan. Wi wani sori sari-ati spesrutu gi wan sma di sori berow èn di tron wan Kotoigi baka.

17. Fa Kownu David sori taki a ben abi sari-ati trutru?

¹⁷ Eksempre na ini Bijbel kan yepi wi fu sori sari-ati èn fu no de sma di no e firi gi trawan. Luku na eksempre fu Kownu David. A ben lobi sori sari-ati gi trawan. Aladi Saul ben wani kiri David, toku David sori sari-ati gi a salfu kownu fu Gado èn noiti a suku fu pai ogri nanga ogri.​—1 Sam. 24:9-12, 18, 19.

18-19. Fruteri fu tu okasi pe David no ben wani sori sari-ati.

¹⁸ Ma a no ala ten David ben wani sori sari-ati. Fu eksempre, di na ogri-ati man Nabal ben wisiwasi David èn a no ben wani gi David nanga den man fu en nyanyan, dan David ati bron èn a ben wani kiri Nabal nanga ala den man na ini na oso fu en. Ma fu di Nabal en wefi Abigayil ben abi switifasi nanga pasensi, meki a tyari nyanyan gi David esi-esi. Na so David no kiri Nabal nanga den man fu en.​—1 Sam. 25:9-22, 32-35.

¹⁹ Wan tra leisi, a profeiti Natan ben fruteri David fu wan guduman di ben fufuru a skapu di wan pôtiman ben lobi so te. Nanga atibron David taki: „Neleki fa a de seiker taki Yehovah de na libi, na so a de seiker taki a man di du a sani disi musu dede!” (2 Sam. 12:1-6) David ben sabi san a Wet fu Moses ben e taki. A Wet ben e taki dati efu wan sma ben fufuru wan skapu, dan a ben musu gi fo skapu baka na presi fu a wán skapu (Eks. 22:1). Ma fu gi wan sma dedestrafu fu a sani dati? Dati ben hebi tumusi. Ma bakaten a ben kon na krin taki na wan agersitori Natan ben e fruteri fu yepi David frustan taki a ben du moro bigi ogri. Èn Yehovah ben sori moro sari-ati gi David leki san David ben o sori gi a sma di ben fufuru a skapu na ini na agersitori fu Natan.​—2 Sam. 12:7-13.

20. San wi kan leri fu na eksempre fu David?

²⁰ Luku taki di David ati bron, a bosroiti taki Nabal nanga ala den man na ini en oso ben musu dede. Bakaten, David ben taki dati a man na ini na agersitori fu Natan ben musu dede tu. Ma David ben de wan man di ben lobi sma. Sobun, fu san ede a ben wani taki a man na ini na agersitori fu Natan kisi so wan hebi strafu? Meki wi luku fa David ben e firi na a ten dati. Di Natan fruteri en na agersitori, dan David ben abi konsensi fonfon. Nofo tron wan sma di e krutu wan trawan sondro fu sori sari-ati, e sori taki a no e denki leki fa Yehovah e denki. Dati meki Yesus gi den bakaman fu en a seryusu warskow disi: „No krutu sma moro, so taki Gado no krutu unu. Bika na a fasi fa unu e krutu trawan, na a srefi fasi dati Gado sa krutu unu” (Mat. 7:1, 2). Fu dati ede, meki wi luku bun taki wi no e krutu sma tumusi hebi, èn meki wi du muiti fu abi „bun furu sari-ati” neleki wi Gado.

21-22. Na sortu fasi wi kan sori sari-ati gi trawan?

²¹ Sari-ati a no wan firi nomo. Wan sma di abi sari-ati e du muiti fu yepi trawan. Sobun, meki wi alamala luku fa wi kan yepi den sma na ini wi osofamiri, na ini wi gemeente, noso na ini a birti fu wi. Wi o si taki furu okasi de fu sori sari-ati. Efu wan sma abi trowstu fanowdu, dan wi kan du wan sani fu sori taki wi e prakseri en, wi kan gi en pikinso nyanyan, noso wi kan du wan tra sani gi en. Yu kan yepi sma tu di tron Kotoigi baka èn di abi mati fanowdu di o trowstu den noso gi den deki-ati. Boiti dati, wi kan fruteri sma a bun nyunsu tu fu trowstu den. Disi na wan fu den moro bun fasi fa wi kan sori sari-ati gi ala sma di wi e miti.​—Yob 29:12, 13; Rom. 10:14, 15; Yak. 1:27.

²² Te wi e poti prakseri na sma na den fasi disi, dan wi o si taki furu okasi de fu sori sari-ati gi trawan. Te wi e sori sari-ati gi trawan, dan wi hemel Papa, a Gado di abi „bun furu sari-ati”, o breiti srefisrefi.