Fa yu kan kon bun baka nanga Yehovah

IBRI yari, furu sma di de leki skapu, e drai kon baka na a Kresten gemeente. Prakseri nomo omeni ’prisiri de na hemel’ te so wan sma e drai kon baka (Luk. 15:7, 10). Efu yu drai kon baka na a gemeente, dan yu kan de seiker taki Yesus, den engel, nanga Yehovah srefi breiti fu si taki yu kon na ini a tru bribi baka. Ma aladi yu e pruberi fu kon bun baka nanga Yehovah, yu kan kisi problema. Sortu problema yu kan kisi èn san kan yepi yu?

SORTU PROBLEMA YU KAN KISI?

Furu sma kan firi brokosaka ete, awinsi den tron Yehovah Kotoigi baka. Kande yu e frustan fa Kownu David ben e firi. Aladi Yehovah ben gi en pardon fu den sondu fu en, toku a taki: „Den fowtu fu mi furu so te, taki mi no man tyari den” (Ps. 40:12; 65:3). Baka te wan sma drai kon baka na Yehovah, a kan abi konsensi fonfon, noso a kan firi syen omeni yari langa ete. Moro leki 20 yari baka di den ben puru Isabelle fu a gemeente, a tron wan Kotoigi baka.a A taki: „A ben muilek gi mi fu bribi taki Yehovah ben kan gi mi pardon.” Efu yu e firi brokosaka, dan a matifasi fu yu nanga Yehovah kan kon swaki baka (Odo 24:10). Du ala muiti fu no meki a sani dati pasa.

Son sma e frede taki den no o man du ala den sani di den musu du fu man tron wan mati fu Yehovah baka. Di Antoine tron wan Kotoigi baka, a taki: „Mi ben frigiti furu fu den sani di mi ben leri èn du na a ten di mi ben de wan Kotoigi ete.” Furu sma di e firi so, no e du ala san den man fu man tron wan bun mati fu Yehovah baka.

Kow taki dati wan sma seti en oso nanga ala sani soleki fa a lobi en. Ma dan wan bigi winti kon èn a pori a heri oso. A sma skin e hebi te a e prakseri omeni ten nanga muiti de fanowdu fu bow a oso baka. Na so a de tu efu yu du wan seryusu sondu di pori a matifasi fu yu nanga Yehovah. Kande yu skin e hebi te yu e prakseri ala a muiti di yu musu du fu kon bun baka nanga Yehovah. Ma no lasi-ati. Yepi de.

Yehovah taki: „Grantangi, meki wi seti sani kon reti baka” (Yes. 1:18). Yu du muiti kaba fu „seti sani kon reti baka”. Yehovah lobi yu fu di yu meki so furu muiti. Denki a tori disi: Fu di yu drai kon baka na Yehovah, meki a kan gebroiki yu leki eksempre fu sori taki Didibri na wan leiman.—Odo 27:11.

Fu di yu drai kon baka na Yehovah, meki yu kon moro krosibei fu en èn a e pramisi taki a o kon moro krosibei fu yu tu (Yak. 4:8). A bun taki trawan e si taki yu drai kon baka na a gemeente. Ma toku yu musu du moro. Yu musu tan du muiti fu kon abi moro lobi gi yu Papa nanga Mati, Yehovah. Fa yu kan du dati?

SANI DI YU KAN DU FU KON MORO KROSIBEI NA YEHOVAH

Pruberi fu du sani di yu sabi taki yu man du. Kande yu e memre den moro prenspari sani ete di abi fu du nanga Yehovah èn a pramisi fu en taki wi o libi na ini wan Paradijs. Ma now, yu musu kon abi a gwenti fu libi leki wan Kresten baka. Fu eksempre, yu musu kon abi a gwenti baka fu go na ini a preikiwroko, fu go na den konmakandra doronomo, èn yu musu kon gwenti yu brada nanga sisa tu. Kow go luku san yu kan du.

Kon abi a gwenti fu taki nanga Yehovah. Yu Papa e frustan taki te yu e tan prakseri a fowtu di yu meki, dan dati kan meki en muilek gi yu fu taki nanga en (Rom. 8:26). Toku yu musu „tan begi” èn yu musu taigi Yehovah taki yu wani de en mati trutru (Rom. 12:12). Andrej e memre: „Mi ben e firi syen èn mi konsensi ben e trobi mi doronomo. Ma ibri leisi baka te mi ben begi, dan mi ben e firi moro bun. Mi konsensi no ben e trobi mi moro.” Efu yu no sabi fu san yu musu begi, dan luku den begi fu Kownu David di a ben sori berow. Den begi dati de fu feni na ini Psalm 51 nanga 65.

Kon abi a gwenti fu studeri Bijbel. Disi o tranga yu bribi èn yu o kon abi moro lobi gi Yehovah (Ps. 19:7-11). Felipe e taki: „Fu di mi no ben gwenti studeri, meki mi kon swaki èn mi meki Yehovah fesi fadon. Mi no ben wani meki a srefi fowtu baka. Dati meki mi teki en leki wan gwenti fu studeri Bijbel.” Yu kan du dati tu. Efu yu no sabi san yu musu studeri, dan aksi wan lepi mati fu yepi yu.

Tron wan mati baka fu yu brada nanga sisa. Son sma di drai kon baka na a gemeente, e broko den ede taki trawan o denki takru fu den. Larissa ben taki: „Mi ben syen srefisrefi. Mi ben feni taki mi ben meki a fesi fu den brada nanga sisa fadon. Na so mi ben e firi wan heri pisi ten.” Yu kan de seiker taki den owruman nanga tra lepi brada nanga sisa de klariklari fu yepi yu fu kon abi wan tranga bribi baka. (Luku a faki „San owruman kan du?”) Den breiti taki yu drai kon baka èn den wani taki yu de koloku.—Odo 17:17.

San kan yepi yu fu kon gwenti den brada nanga sisa na ini a gemeente? Go nanga den na ini a preikiwroko èn na ala den konmakandra. Fa disi o yepi yu? Felix taki: „A gemeente ben e wakti mi fu drai kon baka. Mi ben e firi taki den lobi mi. Den alamala meki mi firi taki mi ben de wan fu den baka, taki Yehovah ben gi mi pardon, èn taki mi man tan dini Yehovah.”—Luku a faki „San yu kan du?”

NO GI ABRA!

Fu di yu e du muiti fu tron wan mati fu Yehovah baka, meki Satan o tan tyari problema kon fu swaki yu bribi (Luk. 4:13). Dati meki yu musu du ala san yu man fu tron wan moro bun mati fu Yehovah nownow.

Yehovah ben taki fu den skapu fu en: „Mi o go suku den wan di lasi. Den wan di panya go na ala sei, mi o tyari kon na wán. Te wan futu broko, dan mi o tai en. Mi o yepi den swakiwan” (Esek. 34:16). Yehovah yepi furu tra sma fu tron mati fu en baka. Yu kan de seiker taki a wani yepi yu fu kon moro krosibei na en.

San owruman kan du?

Owruman abi a prenspari frantwortu fu yepi preikiman di drai kon baka na a gemeente fu tron mati fu Yehovah baka. Luku wan tu sani di den kan du.

Meki den firi taki Yehovah nanga a gemeente lobi den. Na apostel Paulus ben sabi taki wan sma di drai kon baka kan „sari so te, taki a lasi-ati” (2 Kor. 2:7). So wan sma kan firi syen èn a kan firi brokosaka. Paulus ben taigi a gemeente: „Un musu gi en pardon nanga un heri ati èn un musu trowstu en.” Sma di drai kon baka na a gemeente musu firi taki Yehovah nanga den brada nanga sisa lobi den trutru. Te owruman abi a gwenti fu prèise den èn fu yepi den, dan dati kan meki taki den no lasi-ati.

Begi nanga den. „A fayafaya begi fu wan reti-ati sma abi furu krakti” (Yak. 5:16). Larissa, di wi ben taki fu en kaba, e taki: „Mi ben taigi den owruman san ben meki mi tweifri èn frede. Den begi gi mi. Na so mi kon frustan taki den owruman no ben e atibron nanga mi. Den ben wani yepi mi fu tron wan mati fu Yehovah baka.” Theo e taki: „A begi fu den owruman yepi mi fu si taki Yehovah lobi mi trutru èn taki a no e si den fowtu fu mi nomo, ma a e si den bun fu mi tu.”

Tron wan mati fu den. Sma di drai kon baka na Yehovah abi mati fanowdu na ini a gemeente. Wan owruman di nen Justin taki: „Gebroiki ibri okasi fu wroko makandra nanga den na ini a preikiwroko. A de fanowdu tu fu go luku den na den oso. A prenspari taki yu de wan mati fu den.” Wan tra owruman di nen Henry taki: „Efu sma na ini a gemeente e si taki den owruman e tron mati fu wan sma di drai kon baka, dan den srefi o wani du dati tu.”

Yepi den fu studeri. Wan lepi mati kan yepi wan sma di drai kon baka fu kon abi a gwenti fu studeri. Wan owruman di nen Darko e taki: „Te mi studeri èn mi feni wan moi sani, dan mi lobi fruteri den dati èn mi e sori den taki mi lobi studeri Bijbel trutru. Mi e seti sani tu fu studeri makandra nanga den.” Wan tra owruman di nen Clayton e taki: „Mi e gi den deki-ati fu suku Bijbeltori fu sma di ben ondrofeni den srefi sani leki den èn fu luku san den kan leri fu den tori dati.”

De wan bun skapuman. Sma di drai kon baka na Yehovah sabi den owruman leki krutuman. Ma now a prenspari taki den kon si den owruman leki skapuman tu (Yer. 23:4). De gaw fu arki den èn fu prèise den. Taki furu nanga den. Luku san wan owruman di nen Marcus e du te a e go luku den sortu sma disi. A taki: „Wi e leisi wan tekst nanga den èn wi e prèise den. Wi e taigi den tu taki wi breiti srefisrefi taki den du so furu muiti fu drai kon baka na a gemeente èn taki Yehovah breiti nanga a sani dati tu. Na a kaba fu a takimakandra wi e poti wan dei fu kon luku den baka.”

a Den nen na ini na artikel disi kenki.