Waka baka a sari-ati foe Gado ini a ten disi
„Meki wi fadon tangitangi na ini na anoe foe Jehovah, bika den sari-ati foe en de foeroe.” — 2 SAMUÈL 24:14.
1. Fa David ben firi foe na sari-ati foe Gado, èn foe san-ede?
ONDROFENI ben meki kownoe David kon sabi taki Jehovah abi sari-ati moro leki libisma. Nanga a froetrow taki den pasi foe Gado, ofoe foetoepasi, na den moro boenwan, dan David ben angri foe kon sabi den pasi foe Gado èn foe waka ini na waarheid foe Gado (1 Kroniki 21:13; Psalm 25:4, 5). Joe e firi a srefi fasi leki David?
2. Sortoe rai Jesus ben gi na ini Mateus 18:15-17 foe na fasi fa foe doe nanga serjoesoe sondoe?
2 Na Bijbel e gi wi inzicht ini a fasi fa Gado e denki, srefi foe afersi so leki san wi moesoe doe efoe wan sma e sondoe na wi. Jesus ben froeteri den apostel foe en, di bakaten ben sa de kresten owroeman: „Te joe brada doe wan sondoe, go tjari en fowtoe kon a krin a mindri joe nanga en wawan. Efoe a arki joe, dan joe wini joe brada.” Na fowtoe di de ini a tori djaso no ben de soso wan persoonlijk wiswasi doe ma wan serjoesoe sondoe, so leki bidrigi ofoe gongosa. Jesus ben taki, taki efoe na stap disi no e loesoe na afersi èn efoe kotoigi de, dan na sma di wan sma ben sondoe na en moesoe teki den go nanga en foe boeweisi taki wan fowtoe ben meki. A stap disi na a lastiwan foe soekoe jepi? Nôno. „Efoe [a sondari] no arki den, taki dan nanga a gemeente. Efoe a no arki na gemeente srefi, dan a moesoe de gi joe neleki wan sma foe den nâsi èn leki wan belastingman.” — Mateus 18:15-17.
3. San Jesus ben wani taki di a ben taki, taki wan sma di doe ogri èn di no abi berow moesoe de „leki wan sma foe den nâsi èn leki wan belastingman”?
3 Leki djoe den apostel ben sa froestan san a ben wani taki foe behandel wan sondari „leki wan sma foe den nâsi èn leki wan belastingman.” Djoe ben wai pasi gi demakandra nanga sma foe den nâsi, èn den ben wiswasi den djoe di ben wroko leki Romeini belastingman (Johanes 4:9; Tori foe den Apostel 10:28).a So boen Jesus ben gi den disipel na rai taki efoe na gemeente ben trowe wan sondari poeroe, den ben moesoe stòp foe abi demakandra nanga en. Ma fa dati e kroederi nanga a de di Jesus ben de nanga belastingman son leisi?
4. Nanga den wortoe foe Jesus na ini Mateus 18:17 ini prakseri, dan foe san-ede a ben kan boemoei nanga son belastingman nanga sondari?
4 Lukas 15:1 e taki: „Ala den belastingman nanga sondari ben tan kon na en foe arki en.” No ibri belastingman ofoe sondari ben de drape, ma „ala” wani taki foeroe. (Teki gersi Lukas 4:40.) Sortoe wan? Den wan di nanga prisiri ben wani foe kisi pardon foe den sondoe. Moro a fesi na boskopoe foe berow foe Johanes na Dopoeman ben hari sonwan foe den sma disi (Lukas 3:12; 7:29). So boen di trawan ben kon na Jesus, na preiki di a ben preiki gi den no ben de kontrari na rai foe en na ini Mateus 18:17. Loekoe taki ’foeroe belastingman nanga sondari [ben jere Jesus] èn den ben bigin waka na en baka’ (Markus 2:15). Disi no ben de sma di ben winsi foe go doro nanga wan takroe fasi foe libi èn di ben weigri ibri jepi. Na presi foe dati den ben jere na boskopoe foe Jesus èn dati ben naki na ati foe den. Srefi efoe den ben sondoe ete, ala di den, leki fa a sori, ben e proeberi foe tjari kenki kon, „na toemoesi boen herder” nanga jepi foe na preiki di a ben preiki gi den, ben waka baka en Tata di abi sari-ati. — Johanes 10:14.
Na gi foe pardon, wan kresten plekti
5. San na a fondamenti posisi foe Gado ini a tori foe a gi foe pardon?
5 Wi abi den waran pramisi disi foe na klari di wi Tata de klari foe gi pardon: „Efoe wi bekenti wi sondoe, dan en de kotrow èn regtfardiki foe gi wi pardon foe wi sondoe èn krin wi foe ala no-regtfardikifasi.” „Mi e skrifi joe den sani disi, foe joe no doe wan sondoe. Èn srefi, efoe wan sma doe wan sondoe, dan wi abi wan jepiman na a Tata, Jesus Krestes, wan regtfardikiwan” (1 Johanes 1:9; 2:1). Wan sma di sluit uit sa man kisi pardon?
6. Fa wan sma di sluit uit kan kisi pardon èn fa den kan teki en baka?
6 Ija. Na a ten di wan sma e sluit uit foe wan sondoe di a no abi berow foe en, dan den owroeman di e teki presi gi na gemeente e tjari kon a krin gi en taki a wan sani di kan foe a kon abi berow èn kisi na pardon foe Gado. A kan fisiti konmakandra na ini a Kownoekondrezaal, pe a kan jere bijbel leri di kan jepi en foe abi berow. (Teki gersi 1 Korente sma 14:23-25.) Baka wan pisiten a kan aksi foe den teki en baka ini a krin gemeente. Dan te owroeman e kon makandra nanga en, den sa proeberi foe kon sabi efoe a abi berow èn ben libi na sondoe fasi foe libi foe en (Mateus 18:18). Efoe dati de so, dan den kan teki en baka, akroederi na patron na ini 2 Korente sma 2:5-8. Efoe a de so taki a ben sluit uit foeroe jari, dan a sa moesoe meki boen tranga moeiti foe go na fesi. So srefi a abi kande boen foeroe jepi fanowdoe baka di den teki en baka foe bow na en bijbel sabi èn en warderi so taki a tron wan tranga kresten na jeje fasi.
Drai kon baka na Jehovah
7, 8. Sortoe patron Gado ben poti ini a tori foe na pipel foe en di ben de ini katibo?
7 Ma den owroeman mag teki densrefi na fosi stap foe go na wan sma di sluit uit? Ija. Na bijbel e sori taki sari-ati e sori no soso nanga wan negatief hori na baka foe strafoe ma foeroe tron nanga positief doe. Wi abi na eksempel foe Jehovah. Bifo a ben seni na pipel foe en di no ben de getrow go ini katibo, dan na wan profeiti fasi a ben hori na froewakti na den fesi taki den ben sa drai kon baka: „Memre den sani disi, o Jakob, èn joe, o Israèl, bika joe na mi dienstknekti. . . . Mi wani figi poeroe den pasa di joe pasa na wet neleki nanga wan wolkoe, èn den sondoe foe joe neleki nanga wan lo wolkoe. Drai kon baka na mi, bika mi wani bai joe baka.” — Jesaja 44:21, 22.
8 Baka dati, ala di den ben de ini katibo, Jehovah ben doe moro stap, foe handri na wan positief fasi. A ben seni profeiti, sma di e teki presi gi en, foe gi Israèl na kari foe ’soekoe en èn feni en’ (Jeremia 29:1, 10-14). Na ini Esekièl 34:16, a ben agersi ensrefi nanga wan herder èn den pipel foe na nâsi Israèl nanga skapoe di lasi: „Na wan di lasi mi sa soekoe, èn na wan di den jagi gowe mi sa tjari kon baka.” Na ini Jeremia 31:10 Jehovah so srefi ben gebroiki na prenki taki a ben de wan herder foe den Israèl sma. Nôno, a no ben prenki ensrefi leki wan herder di ben e wakti na a skapoe-pen foe na lasiwan kon baka; na presi foe dati a ben sori ensrefi leki wan herder di ben e soekoe den wan di lasi. Loekoe taki srefi ala di den sma ini algemeen no ben abi berow èn ben de ini katibo, Gado ben bigin doe moeiti foe meki den drai kon baka. Èn akroederi Maleaki 3:6, dan Gado no ben sa kenki na fasi foe handri foe en ini a kresten seti.
9. Fa den ben waka baka na eksempel foe Gado, ini a kresten gemeente?
9 Disi no e meki joe prakseri taki wan reide ben kan de foe bigin doe stap go na son sma di sluit uit èn di kande abi berow now? Memre taki na apostel Paulus ben gi rai foe poeroe na ogri man foe na gemeente foe Korente. Baka ten a ben gi na gemeente tranga foe sori na lobi foe den gi na man foe na berow ede di a ben abi èn di baka dati ben meki taki den ben teki en baka ini a gemeente. — 1 Korente sma 5:9-13; 2 Korente sma 2:5-11.
10. (a) Sortoe boeweigi foe ati moesoe de baka den moeiti foe miti son sma di sluit uit? (b) Foe san-ede kresten famiriman no ben sa de den wan di sa doe na fosi stap foe miti den?
10 Na encyclopedie di den ben sori tapoe en a fesi ben taki: ’Na fondamenti prakseri a baka excommunicatie (sluit uit) ben de foe kibri den markitiki foe na groepoe: „wan pikinso sroedeki e meki na heri deki kon soewa” (1 Kor. 5:6). Na sani disi di e boeweigi den, de krin ini moro foeroe foe den pisi foe bijbel nanga boekoe di den no teki leki wan pisi foe a bijbel, ma broko-ede gi na aparti sma, srefi baka di den ben poeroe, ben de na fondamenti foe na taki-go-taki-kon foe Paulus na ini 2 Kor. 2:7-10.’ (Wi e skrifi skoinsi.) So boen na sortoe broko-ede disi, a e taki foe ensrefi, na den owroeman foe na ipi moesoe sori dati ini a ten disi (Tori foe den Apostel 20:28; 1 Petrus 5:2). Fositen mati nanga famiriman ben kan howpoe taki a sma di ben sluit uit ben sa drai kon baka; ma foe di den abi respeki gi na komando na ini 1 Korente sma 5:11, den no abi demakandra nanga wan sma di poeroe foe na gemeente.b Den e libi dati na den herder di den poti, foe doe na fosi stap foe si efoe so wan sma wani foe drai kon baka.
11, 12. Nanga sortoe sma di sluit uit, srefi owroeman no ben sa wani foe go fisiti den, ma sortoe wan den ben kan fisiti?
11 A no ben sa fiti srefi gi owroeman foe doe na fosi stap go na son sma di sluit uit, so leki sma di fadon komoto a bribi, di ’e taki kron sani foe hari den disipel kon na den baka’. Den disi na ’falsi leriman di e proeberi foe tjari pori sekte kon èn foe soekoe wini foe na gemeente nanga falsi wortoe’ (Tori foe den Apostel 20:30; 2 Petrus 2:1, 3). Na bijbel so srefi no e gi no wan fondamenti foe go soekoe sma di sluit uit èn di lobi foe strei ofoe di fajafaja e gi deki-ati foe doe ogri. — 2 Tesalonika sma 2:3; 1 Timoteus 4:1; 2 Johanes 9-11; Judas 4, 11.
12 Ma foeroe sma di sluit uit no de so. Wan sma kan kaba nanga a serjoesoe ogridoe foe san a ben sluit uit. Wan trawan kande ben gebroiki tabaka, ofoe ini a ten di pasa kande a ben dringi sopi pasa marki, ma nownow a no e proeberi foe meki trawan doe ogri. Memre taki srefi bifo Israèl, di ben de ini katibo, ben drai kon baka na Gado, a ben seni sma di ben e teki presi gi en foe gi den tranga foe kon baka. Efoe Paulus ofoe den owroeman ini a gemeente foe Korente ben doe na fosi stap foe loekoe na man di sluit uit, na bijbel no e taki. Di na man dati ben abi berow èn ben tapoe nanga en hoeroedoe, Paulus ben gi na gemeente na ordroe foe teki en baka.
13, 14. (a) San e sori taki son sma di sluit uit kan doe wan sani tapoe den fosi sari-ati stap, di doe foe go na den? (b) Fa na skin foe owroeman kan seti sani foe go miti den?
13 Ini ten di no pasa so langa kaba kefal ben de pe wan owroeman ben brems nanga wan sma di sluit uit.c Pe a ben fiti, na herder ben sori sjatoe tapoe den stap di moesoe doe foe den teki en baka. Sonwan foe den sma disi ben kon abi berow èn den ben teki den baka. Den sortoe prisiri bakapisi disi e sori taki joe kan abi sma di sluit uit ofoe di ben hari den srefi poeroe, di ben sa doe wan sani tapoe wan sari-ati fisiti di den herder ben tjari. Ma fa den owroeman ben sa kan behandel na afersi disi? No moro leki wan leisi wan jari na skin foe owroeman ben sa moesoe loekoe efoe den sortoe sma disi e libi na ini den kontren.d Den owroeman ben sa poti prakseri tapoe den wan di sluit uit moro leki wan jari kaba. Akroederi den omstandighèit, efoe a e fiti, den ben sa gi toe owroeman na wroko (wi e howpoe, man di sabi na situwâsi) foe fisiti so wan sma. No wan fisiti sa tjari na sma di e sori wan kritis èn kefarlek fasi ofoe di ben meki sma sabi taki den no wani kisi jepi. — Rome sma 16:17, 18; 1 Timoteus 1:20; 2 Timoteus 2:16-18.
14 Den toe herder ben sa kan bèl foe aksi foe kan tjari wan sjatoe fisiti, ofoe den ben kan go na den na wan ten di fiti. Na a fisiti den no abi foe de krasi ofoe kowroe ma den moesoe sori na wan waran fasi na sari-ati broko-ede foe den. Na presi foe loekoe baka na a owroe afersi, den ben kan taki foe bijbel tekst so leki Jesaja 1:18 nanga 55:6, 7 nanga Jakobus 5:20. Efoe na sma wani foe drai kon baka na a ipi foe Gado, dan nanga switifasi den ben kan tjari kon a krin sortoe stap a moesoe doe, so leki foe leisi na bijbel nanga poeblikâsi foe na Waktitoren-genootschap èn foe fisiti konmakandra na ini a Kownoekondrezaal.
15. San den owroeman, di e go miti nanga wan sma di sluit uit, moesoe hori na prakseri?
15 Den owroeman disi sa abi koni èn a man di den moesoe man foe si sani fanowdoe, foe kon sabi efoe wan marki de foe berow èn efoe wan tra fisiti ben sa de boen. A e taki foe ensrefi taki den moesoe hori na prakseri taki son sma di sluit uit noiti den sa ’meki [den] kon kisi berow baka’ (Hebrew sma 6:4-6; 2 Petrus 2:20-22). Baka na fisiti den toe sa gi wan sjatoe raport nanga mofo na a dienstkomte foe na gemeente. Den disi, foe den sei, sa froeteri den tori disi na a skin foe owroeman na a tra konmakandra foe den. Na sari-ati fosi stap di den owroeman ben doe ben sa sori na fasi fa Gado e si sani: „’Drai kon baka na mi, èn mi wani drai kon baka na oenoe’, Jehovah foe den legre taki.” — Maleaki 3:7.
Tra sari-ati jepi
16, 17. Fa wi moesoe si kresten famiriman foe wan sma di sluit uit?
16 Fa a de nanga den wan foe wi di no de owroeman èn di no ben sa doe so sortoe fosi stap na sma di sluit uit? San wi kan doe akroederi na seti disi èn foe waka baka Jehovah?
17 So langa wan sma sluit uit ofoe hari ensrefi poeroe, wi moesoe waka baka na rai: „no de moro langa ini kompani foe wan sma, di den e kari wan brada èn di de wan hoeroeman ofoe wan gridiman ofoe wan sma di e dini kroektoe gado ofoe wan sma di e skempi ofoe wan droengoeman ofoe wan bidrigiman, èn foe no njan srefi nanga so wan sma” (1 Korente sma 5:11). Ma na bijbel markitiki disi no moesoe abi krakti tapoe na fasi fa wi e si kresten memre foe na famiri di e libi ini a srefi oso leki na sma di sluit uit. Fositen djoe ben opo doe sani so hebi kontrari den belastingman, taki a wani di den no ben wani si den na ai, ben bradi go srefi na den famiriman foe na belastingman. Jesus no ben feni dati boen. A ben taki, taki wan sondari di ben weigri jepi, den ben moesoe behandel „neleki wan sma foe den nâsi èn leki wan belastingman”; a no ben taki, taki sma ben moesoe behandel kresten memre foe na famiri na so fasi. — Mateus 18:17.
18, 19. San na son fasi fa wi kan sori wi kresten maniri na kotrow famiriman foe wan sma di sluit uit?
18 Wi moesoe gi jepi spesroetoe na den memre foe na famiri di de kotrow kresten. Den e ondrofeni pen kaba èn gens foe di den de na oso nanga wan sma di sluit uit èn di kande, foe taki en leti, e soekoe foe meki den lasi-ati foe de bezig nanga jeje sani. Kande a e feni en moro boen taki kresten sma no kon fisiti na oso; ofoe te den kon foe si den loyaal memre foe na famiri, kande a no abi boen maniri foe komoto a pasi gi den fisitiman. A ben kan hendri so srefi den moeiti foe na osofamiri foe go na ala kresten konmakandra nanga bigi konmakandra. (Teki gersi Mateus 23:13.) Kresten sma di abi lasi na so fasi, troetroe e froedini na sari-ati foe wi. — 2 Korente sma 1:3, 4.
19 Wan fasi fa wi kan sori lobi sari-ati na foe ’taki wortoe foe trowstoe’ èn foe abi takimakandra di e gi deki-ati nanga den sortoe kotrow wan disi ini na osofamiri (1 Tesalonika sma 5:14). So srefi toemoesi boen okasi de foe gi jepi bifo èn a baka konmakandra, te joe de ini a velddienst, ofoe te joe de makandra na tra ten. Wi no abi foe taki foe na sluit uit foe sma, ma wi kan taki foe foeroe sani di e bow wan sma (Odo 25:11; Kolose sma 1:2-4). Ala di den owroeman sa go doro foe gi den kresten sma ini a famiri herder sorgoe, wi kan si kande taki wi toe kan tjari fisiti sondro foe abi boemoei nanga na sma di sluit uit. Efoe a pasa taki na sma di sluit uit e kon na a doro te wi e tjari wan fisiti ofoe taki a e teki a telefon te wi e bèl, dan wi kan aksi eenvoudig foe na kresten famiriman di wi e soekoe. Son leisi den kresten memre foe na famiri kan man foe teki wan kari foe kon na wi oso foe abi demakandra. Na penti na disi: Den — jongoewan nanga owroewan — na wi kompe dienstknekti, lobi memre foe na gemeente foe Gado, di wi no moesoe libi den tan den wawan. — Psalm 10:14.
20, 21. Fa wi moesoe firi èn doe te den teki wan sma baka?
20 Wan tra kontren foe sori sari-ati e opo te den teki wan sma baka di den sluit uit. Den agersitori foe Jesus e poti krakti tapoe na prisiri na ini hemel te ’wán sondari abi berow’ (Lukas 15:7, 10). Paulus ben skrifi na den Korente sma ini a tori foe na man di ben sluit uit: ’Oenoe moesoe gi en pardon èn trowstoe na wan switi fasi, so taki na wan ofoe tra fasi na sari di so wan sma sari pasa marki, no e moro en. Foe dati-ede mi e froemane oenoe, foe oenoe sori taki oenoe lobi en’ (2 Korente sma 2:7, 8). Meki wi gebroiki na rai na wan froestan èn lobi fasi ini den dei nanga wiki baka te den teki wan sma baka.
21 Na agersitori foe Jesus foe na manpikin di lasi e tjari wan kofar kon a fesi di wi moesoe wai pasi gi. Na bigi brada no ben prisiri foe na drai di na lasi manpikin ben drai kon baka, ma en ati ben bron. Meki wi no de so, foe di wi e kweki takroe firi foe wan ogri di doe ini a ten di pasa ofoe e mombi wan sma taki den teki en baka. Na presi foe dati, na marki foe wi na foe de leki na papa, di ben agersi na piki di Jehovah ben gi. Na papa ben prisiri taki den ben feni en manpikin di ben lasi ofoe taki a manpikin ben kon a libi di ben gersi leki a ben dede (Lukas 15:25-32). Akroederi disi, wi sa taki fri nanga a brada di den teki baka èn wi sa gi en deki-ati na tra fasi. Ija, wi moesoe tjari kon a krin taki wi e sori sari-ati, neleki fa wi Tata di e gi pardon èn di abi sari-ati e doe disi. — Mateus 5:7.
22. San de ini a tori te wi e waka baka Jehovah Gado?
22 No wan enkri tweifri de taki efoe wi wani foe waka baka wi Gado, wi moesoe sori sari-ati akroederi den komando foe en nanga en retidoe. Na psalm skrifiman ben skrifi foe en na a fasi disi: „Jehovah abi boen-atifasi nanga sari-ati, a no e kisi atibron esi-esi èn a bigi ini lobi-boenfasi. Jehovah de boen gi ala sma, èn den sari-ati foe en de tapoe ala en wroko” (Psalm 145:8, 9). Fa a de wan lobi patron foe kresten sma waka baka dati!
[Foetoewortoe]
a „Na djoe pipel foe Palestina ben wiswasi spesroetoe den belastingman foe difrenti reidi ede: (1) den ben tjari moni kon makandra gi na freimde tirimakti di ben teki na kondre foe Israèl abra, èn na so fasi dan, no langalanga, den ben gi jepi na a sjen situwâsi disi; (2) den ben abi na takroe-nen foe de sondro konsensi, ben e gro kon goedoe foe na lasi di trawan foe den eigi pipel ben lasi; èn (3) na wroko foe den ben meki den miti doronomo nanga heiden sma, san ben meki den kon doti akroederi den kerkigwenti. Na wiswasi di sma ben wiswasi belastingman, sma e feni na ini a N[joen] T[estamenti] so boen leki den boekoe foe den rabi . . . Akroederi na lastiwan dan sma no ben moesoe wani si na ai srefi na famiri foe na belastingman.” — The International Standard Bible Encyclopedia.
b Efoe ini wan kresten osofamiri wan famiriman de di sluit uit, dan na sma disi moesoe de wan pisi ete foe na kowôn aladei boemoei nanga aktiviteit foe na oso. Disi ben sa kan abi na ini taki a de drape te den e loekoe jeje materiaal leki wan famiri. — Loekoe Na Waktitoren foe 15 november 1988, bladzijde 9, 10.
c Loekoe Jariboekoe foe Jehovah Kotoigi 1991 (Bakratongo), bladzijde 53, 54.
d Efoe wan kotoigi e kon sabi, ini a oso-foe-oso preikiwroko ofoe na wan tra fasi, taki wan sma di sluit uit e libi na ini a kontren, dan a moesoe gi na tori dati na den owroeman.
Joe ben si den penti disi?
◻ Fa djoe ben behandel belasting man nanga sondari, ma foe san-ede Jesus ben boemoei nanga son wan foe den?
◻ Sortoe bijbel fondamenti de gi den fosi sari-ati stap, di doe foe go na den foeroe sma di lasi?
◻ Fa den skin foe owroeman kan doe den sortoe fosi stap disi, èn na soema?
◻ Fa wi moesoe sori sari-ati na sma di den teki baka èn na den famiriman foe sma di sluit uit?
[Faki na tapoe bladzijde 29]
Wan sma di wan leisi ben de wan pisi foe Gado krin nanga prisiri gemeente ma di sluit uit now ofoe hari ensrefi poeroe, no abi foe tan ini so wan situwâsi. Na presi foe dati, na sma dati kan sori berow èn a kan doe na fosi stap foe taki nanga den owroeman foe na gemeente. Na pasi foe kon baka opo.
[Sma di abi a reti foe a prenki na tapoe bladzijde 30, 31]
Garo Nalbandian