Sori taki yu de getrow leki Kresten te den puru wan famiriman fu a gemeente
1. Sortu situwâsi kan de wan tesi gi a getrowfasi fu wan Kresten?
1 Furu tron memre fu famiri kan abi wan heri bun banti nanga makandra. Disi kan tyari wan tesi kon gi wan Kresten te den puru wan memre fu wan famiri fu a gemeente noso te wan famiriman hari ensrefi puru fu a gemeente. A famiriman disi kan de wan trowpatna, wan pikin, wan papa noso mama, noso wan tra krosibei famiriman (Mat. 10:37). Fa getrow Kresten musu handri nanga a famiriman disi? Yu musu handri na wan tra fasi nanga en efu a e tan ini yu osofamiri? Meki wi luku fosi san Bijbel e taki fu a tori disi. Wi sa luku den gronprakseri fu Bijbel di e fiti sosrefi gi den sma di den puru fu a gemeente, èn den sma di hari densrefi puru fu a gemeente.
2. Soleki fa Bijbel taki, dan fa Kresten musu handri nanga sma di puru fu a gemeente?
2 Fa wi musu handri nanga sma di den puru fu a gemeente: Gado Wortu e komanderi Kresten taki den no musu abi demakandra nanga wan sma di den puru fu a gemeente: „Unu no musu moksi unsrefi moro nanga iniwan sma di den ben kari wan brada, di de wan huruman noso wan sma di abi bigi-ai noso wan sma di e anbegi kruktugado noso wan skempiman noso wan drunguman noso wan bedrigiman, èn no nyan nanga so wan sma srefi. . . . Puru [na ogri] man na un mindri” (1 Kor. 5:11, 13). Den wortu fu Yesus di skrifi ini Mateyus 18:17 abi fu du nanga a tori disi tu: „Meki [a sma di den puru fu a gemeente] de leki wan man di de fu den nâsi èn leki wan belastingman.” Den arkiman fu Yesus ben sabi heri bun taki den Dyu fu a ten dati no ben abi demakandra srefisrefi nanga sma di no ben de Dyu, èn taki den no ben e moksi densrefi nanga belastingman, fu di den no ben man si den na ai kwetikweti. Sobun, Yesus ben taigi den bakaman fu en taki den no ben musu abi demakandra nanga sma di den puru fu a gemeente.—Luku De Wachttoren fu 1 december 1981, bladzijde 11-14.
3, 4. Sortu demakandra wi no musu abi srefisrefi nanga sma di puru fu a gemeente èn nanga sma di hari densrefi puru fu a gemeente?
3 Disi wani taki dati Kresten di de getrow no musu taki fu yeye afersi nanga iniwan sma di den puru fu a gemeente. Ma a wani taki moro leki dati. Gado Wortu e taki dati wi ’no musu nyan nanga so wan sma srefi’ (1 Kor. 5:11). Fu dati ede wi no sa abi prisiri demakandra tu nanga wan sma di den puru fu a gemeente. Wi no kan go koiri nanga so wan sma, noso go na wan fesa noso na wan futubal-plèi nanga so wan sma. Èn wi no man go bai sani nanga en na wenkri, noso go nanga en na wan kino, noso nyan makandra nanga en na oso noso na ini wan restaurant.
4 Ma wi kan taki nanga a sma di den puru fu a gemeente? Aladi Bijbel no taki fu ibri situwâsi, dan toku 2 Yohanes 10 e yepi wi fu frustan fa Yehovah e si na afersi disi: „Efu wan sma e kon na unu èn no e tyari a leri disi, dan noiti teki en na ini un oso noso no taigi en odi.” De Wachttoren fu 1 december 1981, bladzijde 19, e taki fu na afersi disi: „Efu wi e taigi wan sma odi nomo, dan dati kan nofo kaba fu bigin wan takimakandra èn fu kisi wan matifasi srefi nanga a sma te fu kaba. Wi ben sa wani bigin fu gi odi na wan sma di den puru fu a gemeente?”
5. Efu den puru wan sma fu a gemeente, dan san a sma disi e lasi?
5 Iya, a de neleki fa a srefi Wachttoren e taki na tapu bladzijde 25: „A tru tori de, taki efu wan Kresten e tan du sondu èn den musu puru en fu a gemeente, dan a e lasi furu. A e lasi a bun matifasi di a ben abi nanga Gado; . . . a no man abi switi demakandra moro nanga den brada nanga sisa, èn a fasi fa a ben abi demakandra nanga Kresten famiriman o kenki.”
6. A de so taki wan Kresten musu tapu nanga ala demakandra di a ben abi nanga wan famiriman di puru fu a gemeente èn di e tan ini a srefi oso? Tyari disi kon na krin.
6 Efu a sma e tan ini na osofamiri: San disi wani taki gi den Kresten di e tan ini a srefi osofamiri nanga wan famiriman di puru fu a gemeente? A de so taki den no mag taki nanga en, noso taki den no mag nyan makandra nanga en? Den no mag abi demakandra nanga en te den e du den aladei sani fu den? De Wachttoren fu 15 april 1991 e taki ini a futuwortu na tapu bladzijde 22: „Efu den puru wan sma fu a gemeente èn a sma dati e tan ini wan Kresten osofamiri, dan a sma dati mag teki prati ete na den aladei afersi noso den sani di den e du ini na osofamiri.” Sobun, na den memre fu na osofamiri musu bosroiti efu a sma di puru fu a gemeente mag nyan makandra ete nanga den, noso na sortu osowroko di den e du a mag teki prati ete. Èn toku, den brada di abi demakandra nanga na osofamiri dati no musu kisi a firi taki sani e waka a srefi fasi neleki fa dati ben de bifo den ben puru a famiriman fu a gemeente.
7. Fa kenki e kon ini a fasi fa sma ben gwenti fu du sani makandra na oso di abi fu du nanga yeye afersi, te den puru wan memre fu na osofamiri fu a gemeente?
7 Toku, De Wachttoren fu 1 december 1981, bladzijde 22, e sori wi wan tra sani di abi fu du nanga a sma di puru fu a gemeente noso a sma di hari ensrefi puru fu a gemeente: „A sma disi koti puru na yeye fasi fu a gemeente èn sosrefi fu den famiriman fu en èn fu den memre fu en eigi osofamiri. . . . Disi wani taki dati wan kenki e kon ini a fasi fa den ben gwenti fu du sani makandra na oso di abi fu du nanga yeye afersi. Fu gi wan eksempre, efu den puru wan masra fu a gemeente, dan en wefi nanga den pikin fu en no sa feni en wan prisiri sani srefisrefi efu a e hori wan osofamiri-bijbelstudie nanga den. Èn den no sa prisiri tu efu a e teki fesi fu leisi Bijbel nanga den èn e begi nanga den. Efu a masra wani begi, soleki te na osofamiri o nyan nanga makandra, dan a abi a reti fu du dati na ini en eigi oso. Ma en wefi nanga den pikin fu en kan begi Gado sondro taki a masra yere den (Odo 28:9; Ps. 119:145, 146). Ma fa a de efu wan sma di e tan na oso ete èn di puru fu a gemeente wani sidon nanga a famiri te den e leisi Bijbel makandra noso te den e studeri Bijbel? Kande den trawan fu na osofamiri wani meki a sidon arki efu a no e pruberi fu gi den leri noso fu fruteri den san ensrefi e bribi.”
8. Sortu frantwortu Kresten papa nanga mama abi gi wan pikin fu den di no de wan bigisma ete, ma di puru fu a gemeente èn di e tan na oso ete?
8 Efu den puru wan pikin fu a gemeente di no de wan bigisma ete èn a pikin e tan na oso ete, dan a Kresten papa nanga mama fu en abi a frantwortu ete fu sorgu en. De Wachttoren fu 15 november 1988, bladzijde 20, e taki: „Neleki fa den sa tan gi a pikin nyanyan, krosi nanga wan tanpe, na so den musu gi en leri nanga trangaleri di e kruderi nanga Gado Wortu (Odo 6:20-22; 29:17). Fu dati ede, papa nanga mama di e sori lobi kan seti sani fu hori wan oso-bijbelstudie nanga a pikin fu den, srefi efu a puru fu a gemeente. Kande a sa kisi moro wini fu a rai di den e gi fu yepi en tyari kenki kon, efu den e studeri nanga en wawan. Noso den kan bosroiti taki a kan tan teki prati na a seti gi na osofamiri studie.”—Luku sosrefi A Waktitoren fu 1 oktober 2001, bladzijde 16, 17.
9. O furu demakandra wan Kresten kan abi nanga wan famiriman di den puru fu a gemeente èn di no e tan na oso moro?
9 Famiriman di no e tan ini na osofamiri: „A situwâsi de tra fasi efu a sma di puru fu a gemeente, noso di hari ensrefi puru fu a gemeente, na wan famiriman di no e tan ini na osofamiri èn di no e tan na oso”, na so De Wachttoren fu 15 april 1988, bladzijde 28 e taki. „Wan Kresten kan du muiti fu no miti srefisrefi kande nanga a famiriman di puru fu a gemeente. Srefi efu a Kresten musu miti nanga a famiriman dati fu du wan tu sani di abi fu du nanga famiri afersi, dan a sa miti nanga en soso te dati de trutru fanowdu.” Disi e kruderi nanga a komando di wi kisi fu Gado taki wi „no musu moksi unsrefi moro nanga iniwan sma” di e du sondu sondro fu sori berow (1 Kor. 5:11). Getrow Kresten musu du muiti fu no abi demakandra nanga so wan famiriman efu dati no de fanowdu, èn srefi efu den musu taki fu bisnis afersi nanga en, dan den sa du dati soso te dati de trutru fanowdu.—Luku sosrefi De Wachttoren fu 1 december 1981, bladzijde 23, 24.
10, 11. Sortu sani wan Kresten o luku finifini fosi a meki wan famiriman di puru fu a gemeente, froisi kon tan na ini en oso?
10 A srefi Wachttoren e poti prakseri na wan tra situwâsi di kan opo kon: „San fu du efu den puru wan krosibei famiriman fu a gemeente, soleki wan manpikin noso wan papa noso mama di no e tan na oso moro, èn bakaten a wani drai kon tan na oso baka? Na osofamiri kan bosroiti san den musu du te den luku a situwâsi. Fu gi wan eksempre, kande wan papa noso mama di den puru fu a gemeente e siki noso no man sorgu ensrefi moro na moni sei noso na skin sei. Kresten pikin abi a frantwortu fu yepi den papa nanga mama, soleki fa Bijbel e sori, èn a de a yoisti sani fu du dati (1 Tim. 5:8). . . . Den teki wan bosroiti baka te den luku wan tu sani, soleki san a papa noso mama abi fanowdu trutru, fa a e tyari ensrefi, èn a broko-ede di na edeman fu na osofamiri abi gi a yeye tanbun fu en osofamiri.”—De Wachttoren fu 1 december 1981, bladzijde 22, 23.
11 Te a abi fu du nanga wan pikin, dan a srefi artikel e taki: „Son leisi Kresten papa nanga mama ben bosroiti fu meki wan pikin fu den di puru fu a gemeente, drai kon baka na oso fu tan wan pisi ten, fu di a pikin kon siki na skin sei noso fu di a brokosaka srefisrefi. Ma awansi fa a no fa, papa nanga mama kan luku ibri situwâsi finifini. A de so taki a manpikin di puru fu a gemeente ben tan en wawan, èn now a no man du dati moro? Noso a prenspari reide fu di a wani drai kon tan na oso baka na fu di dati o de wan moro makriki fasi fu libi gi en? Fa a de nanga den gwenti nanga maniri fu en èn a fasi fa a e tyari ensrefi? A o tyari ’srudeki’ kon na oso?—Gal. 5:9.”
12. San na wan tu winimarki fu a seti fu puru sma fu a gemeente?
12 Getrowfasi na Yehovah e tyari wini kon: A e tyari wini kon te wi e wroko makandra nanga a seti fu Bijbel fu puru sma fu a gemeente èn fu no moksi wisrefi nanga sma di e du sondu sondro fu sori berow. Na so fasi a gemeente e tan krin èn sma man si soifri taki wi e hori wisrefi na den hei markitiki nanga gronprakseri fu Bijbel (1 Petr. 1:14-16). Efu wi e handri na a fasi dati, dan dati e kibri wi gi sani di kan pori wi (Gal. 5:7-9). Èn a sma di e du ogri abi na okasi fu kisi wini fu a trangaleri di den gi en, èn dati kan yepi en fu ’meki froktu fu vrede, namku regtfardikifasi’.—Hebr. 12:11.
13. Sortu kenki wan osofamiri ben tyari kon, èn san ben de a bakapisi fu dati?
13 Baka di wan brada nanga en sisa ben yere wan taki na wan kring konmakandra, dan den ben kon frustan taki den ben musu tyari kenki kon ini a fasi fa den ben e handri nanga a mama fu den. A mama ben e libi na wan tra presi èn den ben puru en fu a gemeente siksi yari na fesi. Wantronso baka a konmakandra, dan a man disi bel en mama, èn a ben taigi en taki en nanga en sisa lobi en. Ne a ben tyari kon na krin gi a mama taki den no man taki nanga en moro, boiti efu seryusu famiri afersi pasa fu san den musu taki. Syatu baka dati, en mama bigin go baka na den konmakandra èn te fu kaba den ben teki en baka ini a gemeente. A masra fu en di no ben de na bribi bigin studeri tu, èn bakaten a ben teki dopu.
14. Fu san ede wi musu horibaka getrow gi a seti pe den e puru sma fu a gemeente?
14 Efu wi e tan hori wisrefi getrow na a seti fu Bijbel fu puru sma fu a gemeente, dan dati e sori taki wi lobi Yehovah èn dati na wan piki na a sma di e spotu En (Odo 27:11). Na so fasi wi fu wi sei kan de seiker taki Yehovah sa blesi wi. Kownu David ben skrifi fu Yehovah: „Mi no sa gowe libi den komando fu en. Nanga wan sma di de [getrow], yu sa handri na wan [getrow] fasi.”—2 Sam. 22:23, 26.