AKSI FU LEISIMAN

A fiti taki Kresten papa nanga mama e sidon na den gemeente konmakandra nanga wan pikin fu den di puru fu a gemeente?

Te wan sma puru fu a gemeente èn a e kon na ini a Kownukondre zaal, dan wi no abi fu broko wi ede tumusi nanga a presi pe a e go sidon. Son Kresten papa nanga mama abi pikin di puru fu a gemeente èn di e libi ete na ini den oso. Na ini den Waktitoren den Kresten papa nanga mama disi kisi furu deki-ati fu tan studeri Bijbel nanga a pikin fu den di puru fu a gemeente, efu dati fiti. Na ini A Waktitoren fu 1 oktober 2001, bladzijde 16-18 wi ben gi wan tu rai di abi fu du nanga Kresten papa nanga mama di abi wan pikin na ini oso di puru fu a gemeente. A tijdschrift dati ben sori taki papa nanga mama kan studeri Bijbel srefi nanga so wan pikin di no de wan bigisma ete. Wi e howpu taki disi sa yepi a pikin fu kenki en libi.

Te wan pikin puru fu a gemeente, dan a no de wan problema efu a e sidon pî nanga en papa nanga mama na ini a Kownukondre zaal. A no de wan wèt taki wan sma di puru fu a gemeente musu sidon na bakasei fu a zaal. Sobun, a pikin kan sidon nanga en papa noso mama, awinsi pe den e sidon. Fu di a papa nanga mama abi a frantwortu fu gi a pikin leri fu Gado, meki den musu sorgu taki a e poti prakseri na den konmakandra. Fu dati ede a ben o moro bun kande efu a pikin e sidon nanga den, na presi fu sidon en wawan na wan tra presi.

Ma fa a de te a pikin di puru fu a gemeente, no e tan nanga en papa nanga mama moro? A kan sidon ete na sei en papa nanga mama na ini a zaal? Na ini a ten di pasa, A Waktitoren sori krin san na a yoisti fasi fa wan Kresten musu libi nanga wan famiri fu en di puru fu a gemeente èn di no e tan nanga den moro.a Ma te wan sma e sidon pî na sei en famiri aladi a puru fu a gemeente, dan disi no de a srefi leki te en famiri ben o suku okasi fu bumui nanga en aladi dati no de fanowdu. Efu den famiri di de Kotoigi abi a yoisti denki fu a sma di puru fu a gemeente èn den e meki muiti fu no bumui nanga en soleki fa Bijbel taki, dan nowan sma abi fu broko den ede nanga a tori disi.​—1 Kor. 5:11, 13; 2 Yoh. 11.

Sobun, a no abi trobi efu wan sma di puru fu a gemeente e sidon na sei wan famiri noso na sei wan tra sma na ini a Kownukondre zaal, solanga a e tyari ensrefi na wan fasi di fiti. Na ini son situwâsi problema kan opo kon te den e sori so wan sma taki a no musu sidon na son presi. Efu ala sma na ini a zaal, srefi den famiri fu a sma, e du san Bijbel e taki fu sma di puru fu a gemeente, èn disi no e trobi a konsensi fu den brada nanga sisa, dan wi no abi fu broko wi ede tumusi nanga pe son sma e sidon na den gemeente konmakandra.