Wi man du san Yehovah e aksi fu wi
1. Nanga sortu firi wi abi fu du son leisi, èn fu san ede?
1 Te wi e hori wisrefi na den wet nanga den gronprakseri fu Yehovah, dan dati na a moro bun fasi fu libi na ini a ten disi èn den e yepi wi fu poti wan bun fondamenti gi wan têgo tamara (Ps. 19:7-11; 1 Tim. 6:19). Ma a grontapu fu Satan e gi wi furu problema. Wi eigi sondu skin e meki en moro hebi gi wi. Te wi e pruberi fu libi akruderi a Wortu fu Gado, dan son leisi wi kan firi leki wi no man tyari a bigi frantwortu disi (Ps. 40:12; 55:1-8). A kan taki wi e aksi wisrefi efu wi man du ala san Yehovah e aksi fu wi. San kan yepi wi fu no lasi ati te wi abi den firi disi?
2. Fa Yehovah e sori taki a no e aksi sani fu wi di wi no man du?
2 Den komando fu Yehovah no de wan hebi: Noiti Yehovah e aksi wan sani fu wi di wi no man du. Den komando fu en no de wan hebi, ma den de gi a bun fu wi (Deut. 10:12, 13; 1 Yoh. 5:3). Yehovah e hori na prakseri taki wi na swaki sma, èn „taki wi na doti” (Ps. 103:13, 14). Gado abi sari-ati èn fu dati ede a e warderi den tranga muiti di wi e meki fu dini en, awansi wi eigi situwâsi no e gi wi pasi fu du soleki fa wi wani (Lef. 5:7, 11; Mark. 14:8). A wani taki wi musu trowe den hebi fu wi na en tapu, èn a e gi wi a dyaranti taki a sa yepi wi fu tan getrow na en.—Ps. 55:22; 1 Kor. 10:13.
3. Fa Yehovah e gi wi a krakti fu horidoro?
3 Wi musu horidoro: Den tori di Bijbel e fruteri fu sma leki Elia, Yeremia, nanga Paulus, di ben hori den soifri retifasi, e sori wi fu san ede wi musu horidoro (Hebr. 10:36). Yehovah ben horibaka gi den di den ben kisi fu du nanga gens èn di den ben firi brokosaka (1 Kow. 19:14-18; Yer. 20:7-11; 2 Kor. 1:8-11). Wi e kisi deki-ati sosrefi te wi e si fa den brada fu wi na ini a ten disi e tan loyaal (1 Petr. 5:9). Te wi e prakseri dipi fu den eksempre disi, dan dati sa yepi wi fu no firi brokosaka.
4. Fu san ede a de prenspari fu hori den pramisi fu Gado na prakseri?
4 A howpu di den pramisi fu Gado e gi wi na „wan ankra gi a sili” (Hebr. 6:19). A howpu di Abraham nanga Sara ben abi ben pusu den fu du san Gado ben aksi fu den èn fu dati ede den gowe libi den oso fu go ’tan leki freimdesma na ini a kondre fu a pramisi’. A howpu di Moses ben abi, ben gi en a krakti fu tanapu kánkan èn sondro frede na ini a tru anbegi. A howpu di Yesus ben abi, ben gi en a krakti fu horidoro di a ben anga na a pina-udu (Hebr. 11:8-10, 13, 24-26; 12:2, 3). Efu wi e tan abi a tranga howpu fu si a nyun regtfardiki grontapu di Gado pramisi, dan dati sa yepi wi fu tan tanapu kánkan.—2 Petr. 3:11-13.
5. Fu san ede a kan gi wi deki-ati te wi e prakseri baka fu den okasi pe wi ben tan loyaal?
5 Te wi e prakseri baka fu den okasi di wi ben tan loyaal noso den okasi pe wi ben gi wisrefi dorodoro, èn di wi ben de sondro frede, dan dati kan gi wi krakti baka na ini a diniwroko fu wi (Hebr. 10:32-34). A e meki wi memre baka sortu prisiri wi e kisi te wi e du san Gado e aksi fu wi; te wi e dini en nanga wi heri sili.—Mat. 22:37.