Wan brifi fu a Tiri Skin

Lobi brada nanga sisa,

„MEKI a no frudini bun-ati nanga a vrede fu Gado wi Tata èn fu Masra Yesus Krestes de nanga unu” (1 Kor. 1:3). Trutru, wi e angri fu si a dei pe ala libisani sa gi Yehovah a glori di a warti fu kisi! (Ps. 150:6) Aladi wi e wakti a bigi dei dati, wi e tan preiki a bun nyunsu fu Gado Kownukondre èn wi e tan meki disipel.

Now Yehovah e poti ala en prakseri na a preikiwroko di e du na heri grontapu (Mark. 13:10). Fu di wi sabi heri bun taki Yehovah e poti prakseri na a wroko disi, meki wi e begi en fu yepi wi fu du a wroko bun aladi wi hori na prakseri taki ibri sma abi na okasi fu kisi wini fu a seti fu a lusu-paiman (Openb. 14:6, 7, 14, 15). A tru taki wi e miti muilek situwâsi, ma wi breiti trutru taki ’a krakti fu hemel de na wi tapu’ so taki wi kan du a wroko disi!—Luk. 24:49.

A bun fu luku syatu baka fa a go na ini a yari di pasa, èn fu luku den sani di Yehovah du nanga yepi fu den getrow dinari fu en. Nanga yepi fu a santa yeye a pipel fu Gado ben man sori Kresten lobi èn na so wan fasi den no abi a bita-ati di sma na heri grontapu abi. A lobi disi ben de krin fu si na den kongres fu wi. Fu yuni te go miti december 2003, Kotoigi fu moro leki wán hondro kondre ben go na 32 internationaal kongres di ben hori na siksi difrenti pisi fu grontapu. Na den distrikt kongres nanga den internationaal kongres den ben interview zendeling, internationaal wrokoman, nanga sma di e dini na Bethel na ini tra kondre.

Na den kongres disi wi ben kisi den publikâsi ’Zie het goede land’ nanga Lessen van de Grote Onderwijzer (Teki leri fu a Bigi Leriman). Boiti dati, den brada ben meki bekènti taki wan nyun leribuku gi a Pionierskoro sa kon na doro na a kaba fu a dienstyari 2004. Biginbigin wan tu fu den pionier di e dini langa ten kaba sa go tapu a skoro makandra nanga den nyun pionier, ma te fu kaba ala den owru pionier disi sa kisi na okasi fu du dati.

Nanga yepi fu Gado, èn den bijdrage di sma ben gi nanga den heri ati, wi ben man bow furu Kownukondre zaal, spesrutu na ini kondre di no gudu so kefalek. Fu di moro sma na heri grontapu abi yeye nyanyan fanowdu, meki wi seti sani na ini furu kondre kaba fu meki den bijkantoro kon moro bigi. A brochure Njan Boen Foe Tégo Foe A Libi Na Grontapoe! de na ini 299 tongo, èn sowan 139 milyun fu a brochure disi tyari kon na doro kaba; 93 milyun fu a buku Sabi di e tjari joe go na têgo libi tyari kon na doro kaba na ini 161 tongo; èn moro leki 200 milyun fu a brochure San Gado e aksi foe wi? tyari kon na doro na ini 267 tongo.

Wi e gi ala den 258.845 sma di ben teki dopu na ini a dienstyari di pasa wan switi kon! Den sma disi du dati fu sori taki den gi den libi abra na Yehovah. Fu di yu e horibaka gi a Kownukondre fu Gado now, meki taki Satan kon kisi bita-ati nanga yu, ma na a tra sei yu kon tron wan fu den sma di e kisi spesrutu blesi nanga kibri fu Yehovah, aladi yu e lon a streilon di de na yu fesi (Hebr. 12:1, 2; Openb. 12:17). Iya, yu kan abi a dyaranti taki „a Sma di e kibri yu no e dyonko kwetikweti”.—Ps. 121:3.

A yaritekst fu 2004, „Tan na ai . . . De srekasreka”, na soifri gi a ten disi (Mat. 24:42, 44). Gado Wortu e taki dati Kresten na sma di e libi fu wan syatu pisi ten na ini a seti fu sani disi di de fu kisi pori (1 Petr. 2:11; 4:7). Fu dati ede wi musu tan na ai na yeye fasi, wi musu leri libi nanga den sani di wi abi fanowdu trutru, èn wi musu tan ondrosuku wi ati bun. „A bigi draak” wani swari wi, èn a wani meki wi kon tron wan pisi fu a seti fu sani fu en.—Openb. 12:9.

A de tumusi prenspari fu leisi Bijbel ibri dei efu wi wani tan na ai. A kan yepi wi fu meki a ’Iya fu wi tan Iya’ fu di wi gi wisrefi na Yehovah èn a sa yepi wi fu „hori fasti na a frutrow di wi ben abi na a bigin” (Yak. 5:12; Hebr. 3:14). Te wi e leisi Bijbel ala dei, dan dati sa yepi wi fu si o furu den markitiki fu grontapu e difrenti fu den markitiki fu Yehovah di noiti no e kenki (Mal. 3:6; 2 Tim. 3:1, 13). Sabi fu Bijbel e yepi wi fu no poti prakseri na den „leitori di sma e fruteri na wan koni fasi” èn a e yepi fu tan getrow na Yehovah.—2 Petr. 1:16; 3:11.

Papa nanga mama, san unu e du fu kweki den pikin fu unu na ini a trangaleri èn seryusu frumane fu Yehovah? Unu e yepi den fu poti marki gi densrefi na yeye fasi èn fu „tan na ai”? (Ef. 6:4) Unu e leri den pikin fu unu fu prakseri fu a tamara fu den neleki fa Yesus, a moro koniman di waka na grontapu, ben prakseri fu a tamara fu en? Yesus ben kan de a moro bun temreman, a ben kan meki den moro moi sani, noso a ben kan de a moro bun datra di oiti ben libi, ma na presi fu dati a ben poti prakseri soso na a furuten diniwroko. Meki na eksempre fu Yesus gi unu a deki-ati fu leri den pikin fu unu fu poti Kownukondre afersi na a fosi presi na ini den libi.

A getrow srafu-grupu, gi suma a Tiri Skin e teki presi, de nanga tangi na ati gi a „bigi ipi” fu di den e yepi wi fu du a frantwortu di wi abi fu ’preiki a bun nyunsu na heri grontapu, so taki ala kondre kan yere dati’ (Openb. 7:9; Mat. 24:14, 45). Lobiwan, unu kan abi a dyaranti taki Yehovah e memre „a wroko fu unu èn a lobi di unu ben sori gi a nen fu en, fu di unu ben dini den santawan èn e tan dini den” (Hebr. 6:10). Te unu e leisi na tapu a bladzijde di e kon now fu den span ondrofenitori nanga den bakapisi di unu ben abi fu di un wroko tranga na ini wánfasi, dan hori na prakseri taki unu ben abi wan prenspari prati na a preikiwroko di wi e du na heri grontapu.

Meki a de so taki unu e luku go na a tamara nanga frutrow, aladi unu e tan ’poti ala un prakseri na a pai di unu sa kisi’, èn no meki nowan libisma noso ogri yeye tapu unu fu kisi en (Hebr. 11:26; Kol. 2:18). Iya, frutrow tapu Yehovah, fu di unu sabi taki a sa yepi ala sma di lobi en fu kisi a trutru libi.—Yoh. 6:48-54.

Wi e gi unu a dyaranti taki wi e prisiri fu wroko makandra nanga unu fu gi Yehovah glori.

Un brada,

Tiri Skin fu Yehovah Kotoigi