Wi o studeri a Tan na ai! brochure

Den gemeente na heri grontapu sa studeri a Tan na ai!-brochure na a Gemeente Bukustudie na ini den wiki fu 23 mei te go miti 20 yuni 2005. Grantangi, gebroiki den aksi di e kon now fu sreka yusrefi èn fu hori a konmakandra disi. Na a studie yu musu leisi san skrifi na ini a brochure, èn efu nofo ten de, dan yu kan leisi den bijbeltekst di skrifi tu.

Wiki fu 23 mei

◼ Bladzijde 3, 4: Sortuwan fu den situwâsi di kari dyaso ben abi spesrutu krakti tapu a libi fu yu? San e sori yu taki yu no musu si den sani disi di e pasa leki sani di e pasa wanwan leisi na wan tu presi nomo?

◼ Bladzijde 5: San e gi yu na overtoigi taki Gado e broko en ede trutru nanga yu? Fa wi kan sori o furu wi lobi Gado èn den sani di a e du?

◼ Bladzijde 6-8: San den sani di e pasa nownow na grontapu wani taki, soleki fa Mateyus 24:1-8, 14 e sori? Soleki fa 2 Timoteyus 3:1-5 e sori, dan na ini sortu pisi ten wi e libi now? Wi e libi na ini den lasti dei fu sortu sani? San e overtoigi yu taki Bijbel na a Wortu fu Gado trutru? San na a Kownukondre di wi e preiki?

◼ Bladzijde 9, 10: Fu san ede wi musu poti seryusu prakseri na den bosroiti di wi e teki ibri dei èn na den sani di wi e poti na a fosi presi na ini wi libi? (Rom. 2:6; Gal. 6:7) Te yu e luku den aksi na tapu bladzijde 10, dan fu sortu bijbeltekst yu e prakseri di musu abi krakti tapu den sani di yu e du?

Wiki fu 30 mei

◼ Bladzijde 11: Fu san ede ibriwan fu wi musu poti prakseri na den aksi di skrifi na tapu a bladzijde disi? (1 Kor. 10:12; Ef. 6:10-18) Fa den piki di wi e gi tapu den aksi disi, e tyari kon na krin o seryusu wi e teki a rai di Yesus gi na ini Mateyus 24:44?

◼ Bladzijde 12-14: San na ’a yuru te Gado sa tyari krutu kon’ soleki fa Openbaring 14:6, 7 e taki? San a wani taki fu „frede Gado èn gi en glori”? San na Babilon a Bigiwan, èn san o pasa nanga en? San wi musu du now ini a tori fu Babilon a Bigiwan? Sortu tra sani abi fu du nanga a yuru fu krutu fu san Bijbel ben taki na fesi? Sortu krakti a abi tapu wi fu di wi no sabi „a dei noso a yuru” te Gado sa tyari a krutu kon, di a ben taki na fesi kaba? (Mat. 25:13)

◼ Bladzijde 15: San na a strei di abi fu du nanga suma abi a reti fu tiri hemel nanga grontapu, èn san ibriwan fu wi abi fu du nanga a tori disi?

◼ Bladzijde 16-19: San na den „nyun hemel” nanga a „nyun grontapu”? (2 Petr. 3:13) Suma e pramisi den sani disi? Sortu kenki den nyun hemel nanga a nyun grontapu sa tyari kon? A de so taki wisrefi sa kisi wini fu den kenki disi?

Wiki fu 6 yuni

◼ PBladzijde 20, 21: Sortu warskow fu lowe gowe, Yesus ben gi den fosi yarihondro bakaman fu en? (Luk. 21:20, 21) O ten den ben kan lowe gowe? Fu san ede a ben de prenspari gi den fu lowe gowe sondro fu draidrai? (Mat. 24:16-18, 21) Fu san ede furu sma no e poti prakseri na warskow? Fa dusundusun sma na ini China nanga den Filippijnen kisi wini fu di den ben poti prakseri na warskow di den ben kan frutrow? Fu san ede a de moro prenspari fu poti prakseri na a warskow di Bijbel e gi fu a kaba fu a disiten seti fu sani? Sortu frantwortu wi abi te wi e luku a tumusi prenspari ten disi na ini san wi e libi? (Odo 24:11, 12)

◼ Bladzijde 22, 23: Na ini 1974 na ini Australia, èn na ini 1985 na ini Kolombia, furu sma no poti prakseri na a warskow di ben sori taki wan rampu ben o pasa. Fu san ede den du dati èn san ben de a bakapisi fu dati? San yu denki taki yu ben o du te yu ben o yere den warskow dati, èn fu san ede yu ben o du dati? San kan sori efu wi ben o poti prakseri na a warskow na ini a ten fu Noa? Fu san ede sma ben wani libi na ini èn krosibei fu na owruten foto Sodom? Sortu wini wi kan kisi te wi e denki seryusu fu den sani di ben pasa na ini Sodom?

Wiki fu 13 yuni

◼ Bladzijde 24-27: Gebroiki den „aksi gi a studie disi” di skrifi na tapu bladzijde 27 fu a brochure.

Wiki fu 20 yuni

◼ Bladzijde 28-31: Gebroiki den „aksi gi a studie disi” di skrifi na tapu bladzijde 31 fu a brochure.

Te wi sa luku a brochure, dan dati sa yepi wi fu „tan na ai” èn fu sori taki wi de srekasreka. Meki wi sori nanga a fasi fa wi e du wi preikiwroko, dati wi feni taki den sani di den engel e meki bekènti, de tumusi prenspari, namku: „Frede Gado èn gi en glori, bika a yuru doro te a sa tyari krutu kon.”​—Mat. 24:42, 44; Openb. 14:7.