Wan brifi fu a Tiri Skin
„MEKI Gado wi Tata, èn sosrefi Masra Yesus Krestes sori unu no-frudini bun-ati, èn meki a vrede fu den de nanga unu.” Disi na a odi di Paulus ben seni gi den gemeente na ini den brifi fu en. Den wortu dati e sori heri bun san wi e winsi gi unu alamala.—Ef. 1:2.
Wi de nanga tangi trutru gi a no-frudini bun-ati di Yehovah e sori wi nanga yepi fu a frulusu-ofrandi fu Krestes Yesus! A lusu-paiman dati e meki taki Gado feni wi bun. Wisrefi noiti ben o man meki taki Gado feni wi bun, awinsi o furu wi e studeri Bijbel, awinsi o furu wi e preiki, noso awinsi sortu tra bun wroko wi e du. Nownow wi e kisi pardon fu wi sondu, èn na ini a ten di e kon wi sa kisi têgo libi. Den sani disi no de wan pai gi den wroko di wi e du, ma wi e kisi den leki wan kado di e sori a no-frudini bun-ati di Yehovah e gi nanga yepi fu Yesus Krestes.—Rom. 11:6.
Paulus ben skrifi tra Kresten brada nanga sisa: „Wi e begi unu . . . fu no meki a no-frudini bun-ati fu Gado de fu soso. Bika a e taki: ’Na wan ten di mi feni bun, mi yere yu, èn na wan dei fu frulusu, mi yepi yu.’ Luku! Disi na a ten di mi feni bun spesrutu. Luku! Disi na a dei fu frulusu sma.” Fosi Yerusalem kisi pori na ini a fosi yarihondro, dan wan ’ten ben de di Gado ben feni bun’. Opregtisma di ben lobi Yehovah, ben kisi frulusu na yeye fasi. Te fu kaba, disi meki taki ala den getrow sma ben kan tan na libi, fu di den lowe komoto na ini Yerusalem bifo a kisi pori na ini a yari 70 G.T.—2 Kor. 6:1, 2.
Now wi e libi tu na ini ’wan ten di Gado feni bun’ èn na ini a ’dei pe Gado e frulusu sma’. Den wan di Yehovah teki leki den futuboi fu en èn di e kisi frulusu na yeye fasi, abi a howpu fu pasa „a bigi dei fu Yehovah” libilibi, èn a dei dati de krosibei now.—Sef. 1:14.
Fu di a dei fu Yehovah de krosibei, meki wi abi wan bigi frantwortu. Wi musu warskow sma taki a dei fu Yehovah e kon, èn wi musu yepi opregtisma fu kisi wini fu a no-frudini bun-ati fu Yehovah, so taki den kan kisi frulusu tu. Paulus ben frustan o seryusu a frantwortu disi de. A ben skrifi: „Fu tru, helu fu mi efu mi no preiki a bun nyunsu!” A ben sori tu fa a ben e firi, di a taki: „Mi abi wan paiman na den Grikisma èn na den wan di no de Grikisma, sosrefi na den koni sma èn na den sma di no kisi leri. Dati meki mi e angri fu preiki a bun nyunsu.”—1 Kor. 9:16; Rom. 1:14, 15.
Yehovah o aksi wi frantwortu efu wi no e warskow sma. Wi sabi taki Yehovah ben taigi a profeiti Esekièl: „Manpikin fu libisma, leki wan waktiman mi meki yu gi na a oso fu Israel, èn yu musu yere fu mi mofo wan wortu èn yu musu warskow den gi mi. Te mi taigi wan ogri sma: ’Yu sa dede seiker’, èn yu no e warskow en trutru èn no e taki trutru fu warskow na ogrisma gi na ogri fasi fu en fu hori en na libi, dan en, fu di a ogri, a sa dede na ini en sondu, ma en brudu mi sa aksi baka fu yu eigi anu.”—Esek. 3:17, 18.
Den lasti dei disi muilek fu pasa. A no makriki fu prati wi ten na so wan fasi, taki wi kan du den afersi fu wi di abi fu du nanga wi osofamiri, wi wroko, wi gemeente, èn a preikiwroko. Boiti dati, furu fu unu e siki, e firi brokosaka. Sonwan fu unu kon owru èn e kisi gens srefi. Furu fu unu „musu tyari hebi lai”. Wi wani fu unu sabi taki wi e firi gi unu, neleki fa Yesus ben firi gi sma. A taki: „Un kon na mi, un alamala di musu wroko hebi èn di musu tyari hebi lai, èn mi sa gi unu krakti baka” (Mat. 11:28). Wi e prèise ibriwan fu unu di e du muiti fu tan dini Yehovah na wan getrow fasi, awansi sortu tyalensi unu e kisi.
Na heri grontapu, 4762 sma e teki dopu ibri wiki, fu di unu e wroko fayafaya fu preiki èn fu gi leri, èn fu di Yehovah e blesi a wroko fu unu. Na ini a dienstyari di pasa, 1375 nyun gemeente seti. A nyun buku di nen San Bijbel e leri wi trutru?, de fu feni kaba na ini 120 tongo. Wi e howpu èn e begi taki a nyun buku disi sa yepi milyunmilyun sma fu kisi wini fu a no-frudini bun-ati èn a vrede fu Yehovah, na ini a ’dei disi pe Gado e frulusu sma’.
Unu kan abi a dyaranti taki a Tiri Skin lobi unu èn taki wi e begi gi unu. Wi e taigi unu tangi tu taki unu begi gi unu.
Un brada,
A Tiri Skin fu Yehovah Kotoigi