No lasi a lobi di yu ben abi biginbigin
1 Yesus di kisi glori, ben gi rai na a fosi yarihondro gemeente na ini Efeise. A ben taki: „Mi si wan sani na yu di mi no feni bun, namku taki yu lasi a lobi di yu ben abi biginbigin” (Openb. 2:4). Soleki fa a ben sori, dan furu sma ben lasi a lobi di den ben abi gi Yehovah biginbigin. Di wi ben e leri sabi den tru tori fu Bijbel, wi kisi wan tranga lobi gi Gado èn gi tra sma, èn disi ben naki wi ati fu prati a nyun howpu fu wi nanga faya. San kan yepi wi fu no lasi a lobi di wi ben abi biginbigin èn fu no lasi a faya di wi ben abi gi a preikiwroko?
2 Studeri Bijbel èn go na den konmakandra: San ben meki taki wi kisi lobi gi Gado èn gi tra sma di wi bigin leri sabi den tru tori fu Bijbel? A no den sani di wi leri fu Yehovah di wi ben e studeri Bijbel? (1 Yoh. 4:16, 19) Fu dati ede, wi musu tan teki a soifri sabi, wi musu tan diki na ini „den dipi sani fu Gado”, so taki wi „kan sori lobi moro nanga moro”.—Fil. 1:9-11; 1 Kor. 2:10.
3 Na ini den lasti dei disi a kan de wan bigi tyalensi fu abi a gwenti fu studeri, fu di furu broko-ede de èn sani di kan puru wi prakseri (2 Tim. 3:1). Wi musu poti ten na wan sei fu teki a yeye nyanyan. A de tumusi prenspari tu fu go na den gemeente konmakandra doronomo, spesrutu te wi ’e si taki a dei e kon krosibei’.—Hebr. 10:24, 25.
4 A preikiwroko: Te wi e du a preikiwroko fayafaya, dan dati e yepi wi fu no lasi a lobi di wi ben abi gi Gado biginbigin. Te wi e preiki a bun nyunsu, dan wi e memre den moi pramisi fu Yehovah, èn disi e yepi wi fu tranga wi howpu èn fu tan lobi En. Efu wi wani leri sma den tru tori fu Bijbel, dan wi musu ondrosuku sani so taki wisrefi kan frustan den tori krin, èn disi sa tranga a bribi fu wi.—1 Tim. 4:15, 16.
5 Yehovah warti fu kisi ala sani, sosrefi a lobi fu wi (Openb. 4:11). Yu no musu gi pasi taki a lobi disi kon moro mendri. Meki a lobi di yu ben abi biginbigin tan tranga, fu di yu e studeri Bijbel fayafaya, fu di yu e go na den konmakandra doronomo, èn fu di yu e meki bekènti fayafaya den sani di yu lobi srefisrefi.—Rom. 10:10.