No meki a lobi fu yu kon kowru

1, 2. (a) Suma Yesus ben abi na prakseri di a ben taki den wortu di skrifi na Mateyus 24:12? (b) Fa a buku Tori fu den apostel e sori taki furu fu den fosi Kresten ben e sori lobi gi trawan? (Luku a prenki na a bigin fu na artikel.)

DI YESUS ben e fruteri den disipel fu en san ben o de a marki fu „a kaba fu a grontapu”, dan a taigi den taki wan fu den sani di ben o pasa, na taki „a lobi fu furu sma [ben] o kon kowru” (Mat. 24:3, 12). Na a fosi presi, den wortu disi ben abi fu du nanga den Dyu fu a fosi yarihondro di ben e taki dati den na a pipel fu Gado, ma den ben gi pasi taki a lobi di den ben abi gi Gado kon kowru.

² Ma na a ten dati, furu Kresten ben e wroko tranga fu „fruteri sma a bun nyunsu fu Yesus, a Krestes” èn den ben e sori lobi gi Gado, gi den Kresten brada nanga sisa èn gi sma di no ben abi a Kresten bribi (Tori 2:44-47; 5:42). Toku son Kresten fu a ten dati ben gi pasi taki a lobi fu den kon kowru.

3. San ben meki taki a lobi fu son Kresten ben kon kowru?

³ Yesus Krestes di ben kisi wan opobaka, ben taigi den Kresten na ini Efeise: „Mi si wan sani na yu di mi no feni bun. Mi si taki yu lasi a lobi di yu ben abi biginbigin” (Openb. 2:4). Fu san ede a ben taigi den dati? A kan taki den sma na den lontu di ben e libi soleki fa den ben e firi, ben kon abi krakti tapu den Kresten disi (Ef. 2:2, 3). Neleki fa a de na ini furu foto na ini a ten disi, na so sma ben e du wan lo ogri na ini a foto Efeise fu a fosi yarihondro. A foto disi ben de wan gudu foto èn den sma drape ben lobi diri sani èn den ben lobi meki prisiri. Fu di den sma disi ben e denki densrefi nomo, meki den no ben prakseri fu sori lobi gi trawan. Boiti dati, furu sma ben e libi wan yayo libi èn den ben e du wan lo fisti sani.

4. (a) Na sortu fasi a lobi fu sma kon kowru na ini a ten disi? (b) San na dri sani di wi o luku fu si fa a de nanga a lobi fu wi?

⁴ A profeititori di e sori taki a lobi fu sma ben o kon kowru, abi fu du tu nanga a ten fu wi. Moro nanga moro sma na ini a ten disi e lasi lobi gi Gado. Milyunmilyun sma drai baka gi en èn den e fruwakti taki libisma organisâsi o lusu den problema fu den. Dati meki furu sma di no e anbegi Yehovah Gado, no e sori lobi gi trawan. Ma soleki fa a situwâsi na ini a gemeente fu Efeise ben sori, tru Kresten na ini a ten disi ben kan denki tu taki den libi bun kaba èn den ben kan gi pasi taki a lobi fu den kon kowru. Dati meki ala ten wi musu luku bun fa a de nanga a lobi fu wi. Wi o luku dri sani: (1) A lobi di wi abi gi Yehovah, (2) a lobi di wi abi gi den tru tori fu Bijbel èn (3) a lobi di wi abi gi wi Kresten brada nanga sisa.

A LOBI DI WI ABI GI YEHOVAH

5. Fu san ede wi musu abi lobi gi Gado?

⁵ A srefi dei di Yesus ben warskow den disipel fu en taki a lobi fu sma ben o kon kowru, a ben sori sma tu sortu lobi na a moro prenspariwan. A ben taki: „’Yu musu lobi Yehovah yu Gado nanga yu heri ati, nanga yu heri libi, èn nanga yu heri frustan.’ Disi na a fosi èn a moro bigi komando” (Mat. 22:37, 38). Iya, te wi abi tranga lobi gi Gado, dan dati e yepi wi fu gi yesi na den wet fu en, a e yepi wi fu horidoro èn fu tegu gi san ogri. (Leisi Psalm 97: 10.) Ma Satan nanga a grontapu fu en e suku fu pori a lobi di wi abi gi Gado.

6. San e pasa fu di a lobi di sma abi gi Gado kon kowru?

⁶ A grontapu na wi lontu no abi a yoisti denki fu lobi. Na presi taki sma sori lobi gi a Mekiman, den „lobi densrefi nomo” (2 Tim. 3:2). A grontapu disi di Satan e tiri e gi sma deki-ati fu poti prakseri na „a lostu fu a skin, a lostu fu den ai èn a prodo di wan sma e prodo nanga den gudu di a abi” (1 Yoh. 2:16). Na apostel Paulus ben warskow den Kresten taki den no ben musu gi densrefi abra na den lostu fu a skin. A ben taigi den: „Te wan sma e poti prakseri na sani di a skin wani, dan a bakapisi fu dati na dede. . . . Te wan sma e poti prakseri na sani di a skin wani, dan en na wan feanti fu Gado” (Rom. 8:6, 7). Iya, den sma di gebroiki den libi fu feti baka gudu noso fu gi densrefi abra na den sekslostu fu den, kon si taki sani no waka soleki fa den ben denki èn den e sari srefisrefi.​—1 Kor. 6:18; 1 Tim. 6:9, 10.

7. Sortu sani kan pori a denki fu den bakaman fu Krestes na ini a ten disi?

⁷ Na ini son kondre, sma di no e bribi na ini Gado, sma di e tweifri efu Gado de trutru, èn sma di e bribi na ini na evolutie-leri e gi trawan deki-ati fu no lobi Gado noso fu no bribi taki a de trutru. Te wan sma e bribi na ini Gado, dan den e meki a gersi leki a sma dati gaw fu bribi ala sani, noso taki a don. Na a srefi ten, sma e prèise sabiman èn a sani disi e puru sma prakseri fu a Mekiman fu wi (Rom. 1:25). Efu wi e arki den leri fu den sma dati, dan dati kan meki wi drifi gowe fu Yehovah èn a lobi fu wi kan kon kowru.​—Hebr. 3:12.

8. (a) Sortu sani e meki taki furu fu den futuboi fu Yehovah e firi brokosaka? (b) Sortu dyaranti Psalm 136 e gi wi?

⁸ Te wi e firi brokosaka, dan dati kan swaki a bribi fu wi èn a kan meki taki a lobi di wi abi gi Gado kon kowru. Na ini na ogri sistema disi di Satan e tiri, wi alamala e firi brokosaka son leisi (1 Yoh. 5:19). Kande a libi kon hebi gi wi fu di wi kon owru, fu di wi e siki, noso fu di wi abi moni problema. Noso kande wi e firi leki wi no bun nofo, kande sani no waka soleki fa wi ben fruwakti, noso kande wi meki fowtu. Toku wi no musu gi pasi noiti taki den situwâsi noso den firi dati gi wi a denki taki Yehovah gowe libi wi. Na presi fu dati wi musu denki dipi fu wortu di e gi wi a dyaranti taki Yehovah lobi wi ala ten. Den sortu wortu dati de fu feni na Psalm 136:23, pe skrifi: „Di sma wisiwasi wi, a memre wi. En bun-ati de fu têgo.” Iya, Yehovah e tan sori lobi gi den futuboi fu en. Dati meki wi kan de seiker taki a e yere den „begi” fu wi èn taki a o piki den.​—Ps. 116:1; 136:24-26.

9. Fa Paulus ben man sorgu taki a lobi di a ben abi gi Gado no kon kowru?

⁹ Neleki a psalm skrifiman, Paulus ben kisi deki-ati di a ben denki dipi fu a fasi fa Yehovah ben e tan yepi en. Paulus ben skrifi: „Yehovah na mi yepiman. Mi no o frede. San libisma kan du mi?” (Hebr. 13:6) A tranga bribi disi di Paulus ben abi yepi en di a ben abi problema. A no gi pasi taki den problema fu en meki a lasi-ati. Fu taki en leti, di Paulus ben de na strafu-oso, a skrifi difrenti brifi fu gi den gemeente deki-ati (Ef. 4:1; Fil. 1:7; Fileim. 1). Iya, srefi di Paulus ben e kisi bun hebi tesi, a tan sori lobi gi Gado. Fa a du kon taki a ben man du dati? A tan suku yepi na „a Gado fu ala trowstu, di e trowstu wi te wi de na ini ala sortu banawtu” (2 Kor. 1:3, 4). Fa wi kan teki na eksempre fu Paulus di ben sorgu taki a lobi fu en no kon kowru?

10. Fa wi kan sorgu taki a lobi di wi abi gi Yehovah no e kon kowru?

¹⁰ Paulus srefi e sori wi san na wan prenspari fasi fa wi kan sorgu taki a lobi di wi abi gi Yehovah no kon kowru. A ben skrifi gi den Kresten brada nanga sisa fu en: „Begi doronomo.” Bakaten a skrifi: „Tan begi” (1 Tes. 5:17; Rom. 12:12). Fu man abi wan bun matifasi nanga Gado, dan a prenspari taki wi e taki nanga en na ini begi (Ps. 86:3). Te wi e teki nofo ten fu fruteri Yehovah san de na tapu wi ati, dan wi o firi taki wi e kon moro krosibei na wi hemel Tata, „a sma di e arki begi” (Ps. 65:2). Boiti dati, te wi e si taki Yehovah e piki den begi fu wi, dan a lobi fu wi e kon moro tranga. Wi e kon frustan moro krin taki „Yehovah de krosibei fu ala den wan di e kari en” (Ps. 145:18). Te wi abi a frutrow taki Yehovah o tan horibaka gi wi, dan dati o yepi wi fu pasa tra tesi.

A LOBI DI WI ABI GI DEN TRU TORI FU BIJBEL

11, 12. Fa wi kan kon abi moro lobi gi den tru tori fu Bijbel?

¹¹ Wi leki Kresten lobi san tru èn wi e leri san tru na ini Gado Wortu. Yesus ben taigi en Papa na ini begi: „Yu wortu e taki san tru” (Yoh. 17:17). Sobun efu wi wani kon abi lobi gi den tru tori fu Bijbel, dan wi musu studeri Gado Wortu (Kol. 1:10). Ma a no nofo taki wi kon sabi sani nomo fu Gado. Luku fa a skrifiman fu Psalm 119 e yepi wi fu frustan san a wani taki fu lobi den tru tori fu Bijbel. (Leisi Psalm 119:97-100.) Wi e teki ten ibri dei fu denki dipi fu sani di wi e leisi na ini Bijbel? Wi o kon abi moro warderi gi den tru tori fu Bijbel te wi e denki dipi fa wi kan fiti den sani dati na ini wi libi.

¹² A psalm skrifiman ben taki moro fara: „Den sani di yu taki, switi gi a tapusei fu mi inimofo. Iya, den switi moro oni na ini mi mofo srefi!” (Ps. 119:103) Den Bijbel leri di wi e kisi fu na organisâsi fu Gado de leki switi nyanyan. Te wi e nyan switi nyanyan, dan wi e nyan nanga prisiri. Te a e gi wi prisiri fu studeri den tru leri fu Bijbel di de leki „switi wortu”, dan wi o man memre den sani disi moro makriki èn wi o man gebroiki den tu fu yepi trawan.​—Preik. 12:10.

13. San yepi Yeremia fu kon lobi den tru tori fu Bijbel èn sortu krakti den ben abi na en tapu?

¹³ A profeiti Yeremia ben lobi den tru tori fu Bijbel. Luku sortu krakti Gado Wortu ben abi tapu en ati. Bijbel e taki: „Di mi feni den wortu fu yu, mi nyan den. Dan mi ati bigin prisiri. Iya, mi e prisiri srefisrefi, bika mi e tyari a nen fu yu, Yehovah, a Gado di e tiri den legre” (Yer. 15:16). Na agersi fasi Yeremia ben nyan den sani di Gado ben taigi en fu di a ben e denki dipi fu den. Na so a kon abi trutru warderi gi a grani di a ben kisi fu tyari a nen fu Gado. Efu yu lobi Gado Wortu, dan yu o frustan taki a de wan bigi grani taki yu man tyari a nen fu Gado èn taki yu man preiki fu a Kownukondre na ini den lasti dei disi.

14. Fa wi kan kon abi moro lobi gi den tru tori fu Bijbel?

¹⁴ Boiti taki wi e leisi Bijbel nanga den tra buku fu wi, na sortu tra fasi wi kan kon abi moro lobi gi den tru tori fu Bijbel? Wi kan kon abi moro lobi gi den tru tori fu Bijbel te wi e go na den gemeente konmakandra doronomo. Ibri wiki wi e studeri Bijbel nanga yepi fu A Waktitoren, èn disi na wan prenspari fasi fa wi e kisi leri. Efu wi wani kisi wini fu a Waktitoren-studie, dan wi musu sreka bun ibri leisi. Wan fasi fa wi kan du dati, na te wi e luku ibriwan fu den Bijbeltekst di kari. Wi kan download A Waktitoren komoto fu a jw.org website, noso wi kan luku en na tapu a JW Library app pe a de fu feni na ini furu difrenti tongo. Son cellulair noso tablet e gi wi okasi fu luku den tekst fu ibri studie-artikel moro makriki. Ma awinsi san wi e gebroiki fu sreka wisrefi, te wi e leisi den tekst disi èn te wi e denki dipi fu den, dan dati o yepi wi fu kon abi moro lobi gi den tru tori fu Bijbel.​—Leisi Psalm 1:2.

A LOBI DI WI ABI GI WI BRADA NANGA SISA

15, 16. (a) San Yesus ben taigi wi fu du, soleki fa Yohanes 13:34, 35 e sori? (b) San a lobi di wi abi gi wi brada nanga sisa abi fu du nanga a lobi di wi abi gi Gado nanga Bijbel?

¹⁵ A lasti neti di Yesus ben de na grontapu, a taigi den disipel fu en: „Mi e gi unu wan nyun komando, taki un musu lobi makandra. Neleki fa mi lobi unu, na so un musu lobi makandra tu. Na a fasi disi ala sma o sabi taki unu na mi disipel, te unu lobi makandra.”​—Yoh. 13:34, 35.

¹⁶ A lobi di wi abi gi wi Kresten brada nanga sisa abi fu du nanga a lobi di wi abi gi Yehovah. Fu taki en leti, wi no kan lobi Yehovah efu wi no lobi wi brada nanga sisa. Na apostel Yohanes ben skrifi: „A sma di no lobi en brada di a man si, no man lobi Gado di a no man si” (1 Yoh. 4:20). Boiti dati, a lobi di wi abi gi Yehovah èn gi den Kresten brada nanga sisa fu wi abi fu du tu nanga a lobi di wi abi gi Bijbel. Fu san ede? Fu di a lobi di wi abi gi Bijbel e meki taki wi e gi yesi na den wet fu Gado, taki wi lobi Gado, èn taki wi lobi wi brada nanga sisa.​—1 Petr. 1:22; 1 Yoh. 4:21.

17. San na wan tu fasi fa wi kan sori lobi?

¹⁷ Leisi 1 Tesalonikasma 4:9, 10. San na wan tu fasi fa wi kan sori lobi na ini a gemeente? Kande wan owru brada noso sisa abi wan sma fanowdu fu rèi en go na den Kresten konmakandra. Kande wan sisa di en masra dede kaba, abi yepi fanowdu fu di wan tu sani broko na en oso (Yak. 1:27). Awansi na yongusma noso owrusma, Kresten brada nanga sisa di e firi brokosaka noso di e kisi fu du nanga tra tesi abi yepi fanowdu èn den musu kisi deki-ati nanga trowstu (Odo 12:25; Kol. 4:11). Wi e sori taki wi lobi wi brada nanga sisa te wi e taki èn te wi e du sani di e sori taki wi e broko wi ede trutru nanga „den wan di abi a srefi bribi leki wi”.​—Gal. 6:10.

18. San o yepi wi fu lusu pikinpikin trobi di wi abi nanga wi brada nanga sisa?

¹⁸ Bijbel ben taki dati na ini „den lasti dei” fu na ogri sistema disi, furu sma ben o denki densrefi nomo èn den ben o gridi (2 Tim. 3:1, 2). Dati meki wi leki Kresten musu wroko tranga fu kon abi moro lobi gi Gado, gi den tru tori fu Bijbel èn gi makandra. A tru taki ten na ten wi o kisi pikinpikin trobi nanga wi brada nanga sisa. Ma a de wan blesi trutru gi ala sma na ini a gemeente te a lobi di wi abi gi makandra e gi wi deki-ati fu lusu iniwan problema na wan switi fasi (Ef. 4:32; Kol. 3:14). Sobun, meki wi no gi pasi noiti taki a lobi fu wi e kon kowru! Na presi fu dati, meki wi tan abi tranga lobi gi Yehovah, gi a Wortu fu en èn gi wi brada nanga sisa.