Aksi di opo kon

◼ A ben o fiti fu hori wan bunkopu-seri, noso fu orga tra sani fu feni moni gi a gemeente?

Furu kerki grupu gwenti fu orga sani pe den e seri nyanyan, den e hori bunkopu-seri, noso tra fesadei, soso fu feni moni gi den kerki. Aladi furu sma kan feni den sani disi wan bun tori, toku den sani di den e orga na wan fasi fu begi sma moni. Yehovah Kotoigi no e suku moni na a fasi disi.

A di fu tu Watch Tower di kon na doro na ini augustus 1879, ben taki disi fu san ede wi no e begi moni soleki fa den kerki e du: „Wi e bribi taki YEHOVAH e horibaka gi ’Zion’s Watch Tower’, èn fu dati ede, noiti wi sa begi sma moni. Te Gado, a Sma di taki ’ala gowtu nanga solfru fu den bergi na fu mi’, no e horibaka gi a wroko moro, dan wi musu frustan taki a ten doro fu no tyari a tijdschrift disi kon na doro moro.”

Wi e tan hori wisrefi na a Bijbel gronprakseri: „Meki ibri sma gi soleki fa a bosroiti na ini en ati, ma a no musu du dati nanga krutukrutu, noso fu di sma dwengi en, bika Gado lobi a sma di e gi sani nanga prisiri” (2 Kor. 9:7). Na ini den Kownukondre zaal wi abi boksu fu gi bijdrage, so taki sma kan gi friwani bijdrage efu den wani du dati (2 Kow. 12:9). Wi no e begi sma fu gi bijdrage, èn sma no musu gi bijdrage nanga a prakseri fu kisi wan sani baka gi dati.