Jehovah lobi sma di e gi nanga prisiri
„Meki ibriwan sma doe so leki a bosroiti ini en ati, no nanga tegoe noso na ondro dwengi, bika Gado lobi wan sma di e gi nanga prisiri.” — 2 KORENTESMA 9:7.
1. Fa Jehovah nanga Krestes ben de sma di e gi nanga prisiri?
JEHOVAH ben de a fosi sma di ben gi nanga prisiri. Nanga prisiri a ben gi libi na en wan enkri Manpikin èn ben gebroiki en foe meki den engel nanga a libisma famiri, kon a libi (Odo 8:30, 31; Kolosesma 1:13-17). Gado ben gi wi libi èn bro èn ala sani, so srefi alen foe hemel èn fatoe ten, foe foeroe wi ati nanga foeroe prisiri (Tori foe den Apostel 14:17; 17:25). Ija, Gado nanga en Manpikin, Jesus Krestes, de sma di e gi, nanga prisiri. Nanga prisiri den e gi, nanga wan jeje di no e prakseri ensrefi nomo. Jehovah ben lobi a grontapoe foe libisma so te, taki „a ben gi en wan enkri Manpikin, so taki ibriwan sma di sori bribi na en, no ben sa go pori ma ben sa abi têgo libi.” Èn sondro foe tegoe Jesus ’ben gi en sili leki wan loesoe-prijs gi foeroe sma.’ — Johanes 3:16; Mateus 20:28.
2. So leki fa Paulus e taki, dan sortoe giman Gado lobi?
2 Foetoeboi foe Gado èn Krestes moesoe de foe dati ede, sma di e gi nanga prisiri. Paulus ben gi tranga foe disi ini en di foe toe brifi gi den kresten na Korente, di a ben skrifi na a pisi ten foe 55 G.T. A de krin, taki Paulus ben sori go na friwani moni bijdrage di sma ben gi no na poebliki, spesroetoe foe jepi den kresten na Jerusalem nanga Judea di ben de na nowtoe, di a ben taki: „Meki ibriwan sma doe so leki a ben bosroiti ini en ati, no nanga tegoe noso na ondro dwengi, bika Gado lobi wan sma di e gi nanga prisiri” (2 Korentesma 9:7; Romesma 15:26; 1 Korentesma 16:1, 2; Galasiasma 2:10). Fa Gado pipel ben doe tapoe a grani foe gi? Èn san wi kan leri foe a rai foe Paulus ini a tori foe gi?
Ati di de klariklari e poesoe den
3. Na sortoe marki den Israèlsma ben gi jepi na a bow foe a tabernakel gi na anbegi foe Jehovah?
3 Ati di de klariklari e poesoe Gado pipel foe gi densrefi èn den sani di den abi, foe horibaka gi a prakseri foe Gado. Den Israèlsma foe Moses ten, foe eksempel, ben gi jepi nanga prisiri na a bow foe a tabernakel gi na anbegi foe Jehovah. Den ati foe son oema ben poesoe den foe meki titei foe krabita wiwiri, ala di son man ben dini leki wrokoman di ben wroko nanga den anoe. Nanga prisiri a pipel ben gi gowtoe, solfroe, oedoe, linnen, èn tra sani leki wan friwani „bijdrage gi Jehovah” (Exodus 35:4-35). Den ben lobi foe gi so te, taki den sani di den ben gi leki bijdrage „ben sori nofo gi ala a wroko di den ben moesoe doe, ija, moro leki san ben de fanowdoe.” — Exodus 36:4-7.
4. Nanga sortoe fasi foe denki David nanga trawan ben gi bijdrage na a tempel?
4 Hondrohondro jari a baka, kownoe David ben gi foeroe leki bijdrage gi a bow foe a tempel foe Jehovah di ben o bow nanga jepi foe en manpikin Salomo. Foe di David ’ben abi prisiri nanga na oso foe Gado’, a ben gi en „spesroetoe goedoe” foe gowtoe nanga solfroe. Kownoe, edeman èn trawan ’ben foeroe den anoe foe den nanga wan presenti gi Jehovah’. Nanga sortoe bakapisi? We, „a pipel ben sori taki den ben prisiri foe a gi foe friwani gi, bika nanga den heri ati den ben gi Jehovah friwani gi”! (1 Kroniki 29:3-9). Den ben de sma di ben gi nanga prisiri.
5. Fa den Israèlsma ben gi jepi na a troe anbegi na ini den foeroe jarihondro di ben pasa?
5 Ini den foeroe jarihondro di ben pasa, den Israèlsma ben kisi a grani foe hori baka gi a tabernakel, den baka ten tempel èn gi den dienst foe den priester nanga Leifisma drape. Ini den dei foe Nehemia, foe eksempel, den djoe ben teki a bosroiti foe gi bijdrage foe meki a troe anbegi kan tan, foe di den ben froestan taki den ben moesoe loekoe na oso foe Gado boen (Nehemia 10:32-39). Na a srefi fasi ini a ten disi, Jehovah Kotoigi nanga prisiri e gi friwani bijdrage foe bow èn ondrow konmakandra presi èn foe hori baka gi a troe anbegi.
6. Gi eksempel foe a gi di kresten ben gi nanga prisiri.
6 Den fositen kresten ben de sma di ben gi nanga prisiri. Gajus, foe eksempel, ben doe „wan getrow wroko”, foe di a ben lobi foe teki den sma na en oso, di ben rèis gi den afersi foe a Kownoekondre, neleki fa Jehovah Kotoigi e sori foe lobi foe teki den opziener di e rèis na den oso, di a Wachttoren-, Bijbel- en Traktaatgenootschap e seni go (3 Johanes 5-8). A e kostoe wan sani foe meki den brada disi e rèis go na den gemeente èn foe sori taki joe lobi foe teki den na joe oso, ma fa disi abi foeroe wini na jeje sei! — Romesma 1:11, 12.
7. Fa den Filipisma ben gebroiki den sani foe den na skin fasi?
7 Heri gemeente ben gebroiki den sani di den ben abi na skinfasi foe meki Kownoekondre afersi go na fesi. Paulus ben froeteri bribiman na Filipi, foe eksempel: „Srefi na ini Tesalonika joe ben seni wan sani gi den fanowdoe foe mi wan leisi so boen leki wan di foe toe leisi. No taki mi e soekoe a presenti serjoesoe, ma mi e soekoe serjoesoe a froktoe, di e meki a sani san oen abi tapoe oen rekening kon gro” (Filipisma 4:15-17). Den Filipisma ben gi nanga prisiri, ma sortoe sani ben meki den gi nanga prisiri?
San e meki sma gi nanga prisiri
8. Fa joe ben sa boeweisi taki Gado jeje e boeweigi en pipel foe de sma di e gi nanga prisiri?
8 Jehovah en santa jeje, noso wroko krakti, e boeweigi en pipel foe de sma di e gi nanga prisiri. Di den kresten foe Judea ben de ini nowtoe, a jeje foe Gado ben boeweigi tra bribiman foe jepi den na skinfasi. Foe gi kresten na Korente a deki-ati foe doe ala san den ben man doe foe gi den sortoe bijdrage disi, Paulus ben kari na eksempel foe den gemeente na Macedonia. Ala di den bribiman foe Macedonia ben ondrofeni froefolgoe èn pôtifasi, den ben sori brada lobi, foe di den ben gi moro leki san den ben man gi troetroe. Den ben begi srefi tangitangi foe den kisi a grani foe man gi! (2 Korentesma 8:1-5). Na afersi foe Gado no e anga nomo foe bijdrage foe den goedoeman (Jakobus 2:5). Den foetoeboi foe en di pôti na skinfasi èn di gi densrefi na en, ben de a moro prenspari jepi ini a gi foe moni gi a Kownoekondre preikiwroko (Mateus 24:14). Tokoe, den no e pina, foe di den lobi foe gi sma sani, bika sondro misi Gado e sorgoe gi den sani di en pipel abi fanowdoe ini a wroko disi, èn en jeje de a krakti a baka a go di a wroko moesoe go doro èn a gro kon moro bigi foe en.
9. Fa bribi, sabi èn lobi abi foe doe nanga a gi nanga prisiri?
9 Bribi, sabi, èn lobi e meki sma gi nanga prisiri. Paulus ben taki: „So leki fa oenoe [Korentesma] de pasa marki ini ala sani, ini bribi èn wortoe èn sabi èn ala serjoesoefasi èn ini a lobi disi foe wi gi oenoe, [na so oenoe moesoe] de so srefi pasa marki ini a switifasi disi foe gi. Mi no e taigi oenoe disi leki wan komando, ma nanga a serjoesoefasi foe trawan ini prakseri èn foe tesi a opregtifasi foe a lobi foe oenoe” (2 Korentesma 8:7, 8). Foe gi bijdrage gi den afersi foe Jehovah, spesroetoe te a sma di e gi no abi foeroe goedoe, e aksi bribi ini den seti foe Gado gi a ten di e kon. Kresten di abi sabi pasa marki wani foe dini den prakseri foe Jehovah, èn den sma di abi lobi pasa marki gi en nanga en pipel e gebroiki den sani di den abi nanga prisiri foe meki den belang foe en go a fesi.
10. San ede wi kan taki, dati na eksempel foe Jesus ben boeweigi kresten foe gi nanga prisiri?
10 Na eksempel foe Jesus e boeweigi kresten foe gi nanga prisiri. Baka di Paulus ben gi den Korentesma deki-ati foe gi foe di den abi lobi, a ben taki: „Oenoe sabi a no-froedini boen-ati foe wi Masra Jesus Krestes, taki en, ala di a ben goedoe, kon pôti foe oenoe ede, foe di oenoe ben sa kon goedoe nanga jepi foe a pôtifasi foe en” (2 Korentesma 8:9). Ala di Jesus ben goedoe na ini hemel moro leki iniwan tra manpikin foe Gado, a ben poeroe ala den sani disi na en tapoe èn ben teki libisma libi (Filipisma 2:5-8). Ma foe di Jesus ben kon pôti na a fasi disi pe a no ben prakseri ensrefi nomo, a ben jepi foe meki Jehovah nen kon santa èn ben gi en libi leki wan loesoe ofrandi gi a boen foe libisma di ben sa teki disi. Wi no moesoe gi nanga prisiri foe jepi trawan èn foe jepi meki Jehovah nen kon santa, neleki na eksempel foe Jesus?
11, 12. Fa a meki foe boen plan kan meki wi de sma di e gi nanga prisiri?
11 A meki foe boen plan e meki taki foe gi nanga prisiri man. Paulus ben taigi den Korentesma: „Meki ibri fosi dei foe a wiki ibriwan foe oenoe poti wan sani na wan sei na ini en eigi oso èn kibri en, so meni leki a kan, so taki a piki foe moni no e bigin te mi kon kaba” (1 Korentesma 16:1, 2). Na a srefi friwani fasi èn no na poebliki, sma di winsi foe gi bijdrage foe meki a Kownoekondrewroko go a fesi ini a ten disi, ben sa doe boen foe poti pikinso foe a moni di den e wroko na wan sei, gi a marki dati. Leki wan bakapisi foe so wan boen fasi foe meki plan, aparti Kotoigi, osofamiri, èn gemeente kan gi bijdrage foe meki a troe anbegi go a fesi.
12 Foe meki den plan foe gi bijdrage kon troe sa meki wi de nanga prisiri. So leki fa Jesus ben taki, „a de moro kolokoe foe gi, leki foe kisi sani” (Tori foe den Apostel 20:35). Dati ede den Korentesma ben kan meki a prisiri foe den kon moro bigi, foe di den ben waka baka a rai foe Paulus foe doe a plan foe den di den ben meki wan jari a fesi kaba, foe seni moni na Jerusalem. „Den e teki disi spesroetoe akroederi san wan sma abi no akroederi san wan sma no abi”, a ben taki. Te wan sma e gi bijdrage akroederi san a abi, wi moesoe warderi dati srefisrefi. Efoe wi e froetrow ini Gado, a kan meki sani kon a sèm, so taki den sma di abi foeroe, lobi foe gi sma sani èn no e froemorsoe, èn den sma di abi pikinso, no e mankeri so foeroe taki dati e swaki a krakti foe den èn a man di den man foe dini Gado. — 2 Korentesma 8:10-15.
Sorgoe boen gi den sani di sma e gi
13. San ede den Korentesma ben kan abi froetrow ini a hori di Paulus ben e hori ai finifini den tapoe bijdrage di sma e gi?
13 Ala di Paulus ben hori ai tapoe a seti foe gi bijdrage, so taki den bribiman di ben de ini nowtoe ben kan kisi froelekti na skinfasi èn ben kan teki prati nanga moro krakti na a preikiwroko, dan tokoe no en, no den trawan ben teki wan sani foe na moni leki pai gi den wroko di den ben doe (2 Korentesma 8:16-24; 12:17, 18). Paulus ben wroko foe sorgoe gi en eigi fanowdoe na skinfasi na presi foe poti hebi na monisei tapoe iniwan gemeente (1 Korentesma 4:12; 2 Tesalonikasma 3:8). Di den Korentesma foe dati ede ben gi den presenti abra na en, dan den ben froetrow a moni na wan foetoeboi foe Gado di ben de foe froetrow èn di ben wroko tranga.
14. Sortoe nen a Waktitorengenootschap abi ini a gebroiki foe den bijdrage di sma e gi?
14 Foe sensi a bigin foe a organisâsi foe a Wachttoren-, Bijbel- en Traktaatgenootschap ini 1884, sma di e gi moni ben kisi a boeweisi taki a genootschap ben de wan froetrow tiriman, foe ala den bijdrage di sma e gi en foe a Kownoekondre wroko foe Jehovah. Ini akroederi nanga den reglementi foe a Genootschap den e soekoe foe sorgoe gi den moro bigi fanowdoe foe ala sma, a fanowdoe foe sani na jejefasi. Den e doe disi nanga bijbel boekoe èn a gi foe bijbel leri foe a fasi fa foe kisi froeloesoe. Na ini a ten disi, Jehovah e meki a tjari konmakandra foe sma di gersi skapoe go moro esi foe meki den kon ini en organisâsi di e kon moro bigi dei foe dei, èn a blesi foe en tapoe a koni gebroiki foe den bijdrage ini a Kownoekondre preikiwroko de wan krin boeweisi foe a feni di Gado e feni disi boen (Jesaja 60:8, 22). Wi de seiker taki a sa go doro foe boeweigi na ati foe sma di e gi nanga prisiri.
15. San ede a tijdschrift disi ten na ten e taki foe a gi di sma e gi bijdrage?
15 Ten na ten a Genootschap e gebroiki den kolom foe a tijdschrift disi foe poti a prakseri foe den leisiman tapoe a grani foe gi friwani bijdrage gi a Kownoekondre preikiwroko na a heri grontapoe. Disi a no taki a aksi wi e aksi moni, ma a de wan memre gi alasma di e angri foe gi jepi na „a santa wroko foe a boen njoensoe”, so leki Gado e meki sani waka boen gi den (Romesma 15:16; 3 Johanes 2). A Genootschap e gebroiki ala a moni di sma e gi leki bijdrage na a moro ekonomia fasi, so taki sma kan kon sabi Jehovah nen èn Kownoekondre. Nanga foeroe tangi den e teki èn e seni piki taki den kisi èn e gebroiki ala den bijdrage foe bradi a boen njoensoe foe Gado Kownoekondre. Na so fasi, foe eksempel, den e gi jepi na a zendingwroko na foeroe kondre, èn den e ondrow èn e meki drukkerij faciliteit di de prenspari gi a prati foe bijbel sabi, kon moro bigi. Moro fara, den e gebroiki bijdrage gi a wroko na heri grontapoe foe pai den kostoe di e kon hei moro nanga moro foe meki bijbel èn poeblikâsi di abi bijbeltori na ini èn so srefi cassette-lolo nanga video-cassette. Na den fasi disi sma di e prisiri foe gi e meki Kownoekondre afersi go a fesi.
No na ondro dwengi
16. Ala di foeroe foe den Kotoigi foe Jehovah goedoe na skinfasi, dan san ede tokoe wi e warderi den bijdrage foe den?
16 Moro foeroe foe den Kotoigi foe Jehovah no goedoe na skinfasi. Ala di den e gi wan pikin moni foe meki Kownoekondre afersi go a fesi, tokoe den bijdrage foe den wani taki wan sani. Di Jesus ben si wan pôti weduwe ben e trowe toe pikin pisimoni foe pikinso waarde na ini a tempel monikisi, a ben taki: „A weduwe disi, ala di a pôti, ben trowe moro na ini leki den alamala. Bika ala den sma disi [tra sma di ben gi bijdrage] ben trowe na ini foe san ben tan abra foe den, ma na oema disi ben gi foe san a ben mankeri ala san a ben abi foe tan na libi” (Lukas 21:1-4). Ala di a presenti foe en ben pikin, a ben de wan sma di ben gi nanga prisiri — èn den ben warderi a bijdrage foe en.
17, 18. San de na inibere foe den wortoe foe Paulus ini 2 Korentesma 9:7, èn san a Griki wortoe di den vertaal nanga „nanga prisiri” wani taki?
17 Ini a tori foe a wroko foe gi jepi foe den kresten foe Judea ede, Paulus ben taki: „Meki ibriwan sma doe so leki a ben bosroiti ini en ati, no nanga tegoe noso na ondro dwengi, bika Gado lobi wan sma di e gi nanga prisiri” (2 Korentesma 9:7). Na apostel ben sori kande na a pisi foe Odo 22:8 ini a Septuaginta vertaling, di e taki: „Gado e blesi wan sma di e gi nanga prisiri; èn sa poti gi en san a e mankeri na en wroko” (The Septuagint Bible, [A Septuaginta Bijbel] di den vertaal nanga jepi foe Charles Thomson). Paulus ben poti „lobi” ini a presi foe „blesi”, ma den e go makandra, bika wan heri ipi blesi de a bakapisi foe a lobi foe Gado.
18 A sma di e gi nanga prisiri kolokoe srefisrefi foe gi. Ija, foe a Griki wortoe di den vertaal nanga „nanga prisiri” na ini 2 Korentesma 9:7 den wortoe „bigi lafoe”, komoto! Baka di sabiman R. C. H. Lenski sori a tapoe disi, a ben taki: „Gado lobi a giman di no e broko en ede, di e prisiri èn di de kolokoe . . .[di] a bribi foe en de soso lafoe te wan tra okasi foe gi sani e miti en”. Wan sma nanga so wan prisiri jeje no e gi nanga tegoe noso na ondro dwengi ma na ati foe en de ini a gi foe en. Joe de netso nanga prisiri foe gi jepi na den Kownoekondre afersi?
19. Fa fositen kresten ben gi bijdrage?
19 Fositen kresten no ben meki preti foe piki moni pasa lontoe noso, foe di sma ben meki sma gi wan di foe tin pisi foe a moni foe den leki bijdrage gi kerki wroko. Na presi foe dati, den ben gi den bijdrage foe den krinkrin nanga friwani. Tertulianus, di ben teki bribi kon na a krestendom na wan sani foe 190 G.T., ben skrifi: „Ala di wi abi wi monikisi, dan tokoe a no wan moni di e pai foe kisi froeloesoe de na ini, so leki wan relisi di joe abi foe pai foe en. Na a alamoen dei [so leki a e sori wan tron wan moen] efoe wan sma wani dati, ibriwan sma e poti wan pikin bijdrage; ma soso te a de wan prisiri sani gi en, èn soso te a man doe dati; foe di dwengi no de; ala sani de nanga friwani.” — Apology, Kapitel XXXIX.
20, 21. San wan owroe uitgave foe a tijdschrift disi ben taki foe a grani foe gi jepi na den belang foe Gado na monisei, èn fa disi e fiti srefi now? (b) San e pasa te wi e gi grani na Jehovah nanga den warti sani foe wi?
20 Foe gi nanga friwani ben de ala ten wan gwenti a mindri Jehovah en disi ten foetoeboi. Ma sontron son sma no ben meki boen gebroiki foe a grani foe den foe horibaka gi na afersi foe Gado ini a gi foe bijdrage. Na ini februari 1883, foe eksempel, a tijdschrift disi ben taki: „Son sma abi someni moni plekti foe na boen foe trawan, taki a krakti foe den na monisei e kon moro swaki, foe di den e gi moro moni leki den man èn a moni foe den e kaba, èn foe dati ede a gebroiki di joe ben sa man gebroiki den e kon moro mendri; èn no soso dati, ma den sma di . . . no ben froestan a situwâsi so krin, ben de lasiman foe di den ben misi foe oefen a lobi foe gi sma sani.
21 Foe di a bigi ipi e lon kon na ini Jehovah organisâsi ini a ten disi, èn foe di a wroko foe Gado e kon moro bigi na Owstoe Europa èn tra kontren pe no so langa pasa a wroko ben tapoe, wan fanowdoe, di e gro dei foe dei, de foe meki den drukkerij nanga tra faciliteit kon moro bigi. Den moesoe druk moro bijbel nanga tra poeblikâsi. Foeroe theokratis projekt de a pasi e kon; ma sonwan foe den ben sa kan go moro esi efoe nofo moni ben de. A no de foe taki, dati wi abi a bribi taki Gado sa sorgoe foe san de fanowdoe, èn wi sabi taki den sma di e ’gi Jehovah grani nanga den warti sani foe den’ sa kisi blesi (Odo 3:9, 10). Ija, „a sma di e sai pasa marki sa koti pasa marki” toe. Jehovah sa ’meki wi kon goedoe gi ibri sortoe lobi foe gi sma sani’, èn a gi di wi e gi nanga prisiri sa sorgoe taki foeroe sma e taigi en tangi èn e prèise en. — 2 Korentesma 9:6-14.
Sori taki joe de grantangi gi den presenti di joe e kisi foe Gado
22, 23. (a) San na a fri presenti foe Gado di joe no man taki foe en? (b) San wi moesoe doe, foe di wi e warderi den presenti foe Gado?
22 Foe di na ati foe Paulus ben boeweigi en, ensrefi ben taki: „Mi e taki Gado tangi foe a fri presenti foe en di joe no man taki foe en” (2 Korentesma 9:15). Leki „wan soen-ofrandi” gi a sondoe foe den salfoe kresten èn gi den sma foe grontapoe, Jesus de a fondamenti èn a kanaal foe Jehovah fri presenti di joe no man taki foe en (1 Johanes 2:1, 2). A presenti dati na „Gado en no-froedini boen-ati di e pasa ala sani” di a ben sori en pipel na grontapoe nanga jepi foe Jesus Krestes, èn a de foeroe pasa marki gi a froeloesoe foe den èn gi Jehovah glori èn a poti kon reti foe en nen. — 2 Korentesma 9:14.
23 A dipi warderi foe wi e go na Jehovah foe a fri presenti foe en di joe no man taki foe en èn foeroe tra presenti na jejefasi èn na skinfasi. Ija, a boen-ati foe wi hemel Tata gi wi de so moi taki a e pasa a man di libisma man foe taki wortoe! Èn seiker a moesoe meki wi tron sma di e gi nanga prisiri. Nanga dipi warderi ini wi ati, meki wi doe so boen ala san wi man foe meki na afersi foe Jehovah, wi Gado, di lobi foe gi sma sani, go a fesi. En na a fosi èn moro prenspari Sma di e gi nanga prisiri!
Joe e memre disi ete?
◻ Ati di ben de klariklari ben poesoe a pipel foe Jehovah foe doe san?
◻ San e boeweigi sma foe gi nanga prisiri?
◻ Fa a Waktitorengenootschap e gebroiki ala bijdrage di a e kisi?
◻ Sortoe giman Gado lobi, èn fa wi moesoe sori taki wi de grantangi gi ala den foeroe presenti foe En?
[Prenki na tapoe bladzijde 28]
Di den Israèlsma ben bow a tabernakel den ben wroko tranga èn den ben lobi foe gi bijdrage gi Jehovah
[Prenki na tapoe bladzijde 31]
Den e warderi den bijdrage di sma e gi so leki di foe a pôti weduwe èn den wani taki wan sani