Aksi di opo kon
◼ Fu san ede den brada musu luku bun te a abi fu du nanga a seti taki sma kan arki a konmakandra nanga yepi fu telefon?
Son sma no man go na den gemeente konmakandra na a Kownukondre zaal fu wan pisi ten, fu di den siki noso fu di den de na ini wan tra muilek situwâsi. Furu gemeente seti sani gi den sma disi, so taki den kan arki a konmakandra na oso nanga yepi fu telefon. A seti disi e sori taki a gemeente lobi den wan disi trutru. Fu sorgu taki na soso den sma di trutru no man go na den konmakandra e gebroiki a seti disi, dan den brada musu luku bun fa den e seti sani èn den musu orga sani bun. Fu dati ede, den owruman di abi a frantwortu fu a seti disi, musu orga sani bun èn den musu sorgu taki „ala sani pasa na wan fasi di fiti èn soleki fa sani seti”.—1 Kor. 14:40.
Den owruman o sorgu taki na a fosi presi, den preikiman na ini a gemeente di abi wan seryusu siki, noso di no man komoto na oso fu wan tra reide ede, e gebroiki a seti disi. Wan preikiman di siki fu wan pisi ten, noso di kisi mankeri, noso wan Bijbelstudie di no man komoto na oso fu wan tra reide ede, kan gebroiki a seti disi tu. Boiti dati, den kan teri den sma disi leki sma di de na a konmakandra. Efu nofo telefon lin no de gi den wan di trutru abi a seti disi fanowdu, dan kande wan tra sani kan seti, soleki fu fanga a konmakandra na tapu cassette-lolo.
A no de fu taki dati nowan tra seti kan tyari moro wini kon gi wi leki te wisrefi de drape na den konmakandra. Den takimakandra di wi abi nanga wi brada nanga sisa, e meki taki wi man „gi makandra deki-ati” èn wi kan yepi den nyunwan fu si taki a prenspari fu de na den konmakandra. Te wi de na den konmakandra fu wi, dan wi e frustan den demonstrâsi moro bun, den owruman o man yepi wi moro bun, èn wi e ondrofeni a waran lobi fu wi brada nanga sisa. Baka di wan owru sisa ben kisi wan brasa di a ben e gowe fu a Kownukondre zaal, dan a taki: „Disi yu no man kisi na telefon!” Iya, na owru sisa disi ben abi leti di a taki dati.—Rom. 1:11, 12.
Na ini a fosi yarihondro, „noiti a pasa taki [Ana] no ben de na ini a tempel”. Neleki Ana, furu fu den owru brada nanga sisa fu wi na ini a ten disi, e go doronomo na den Kresten konmakandra, te a gosontu fu den nanga a situwâsi fu den e gi pasi fu du dati (Luk. 2:36, 37). Aladi den e gebroiki telefon fu arki den konmakandra te dati de fanowdu, toku den no e si dati leki wan tra fasi fa den kan de na a Kownukondre zaal. Wi wani teki na eksempre fu den. Fu dati ede, meki a de so taki wi e prisiri fu tan du muiti fu de na den konmakandra fu wi, te wi e anbegi a makti Gado fu wi, Yehovah.—Ps. 95:1-3, 6; 122:1.