Gi wan Bun Kotoigi Nanga Telefon

¹ A marki di wi leki Yehovah Kotoigi wani doro, a no soso fu preiki a bun nyunsu ma so srefi fu doro ibriwan sma di wi man doro nanga a Kownukondre boskopu (Tori. 10:42; 20:24). Ala di na oso-fu-oso wroko e tan a moro prenspari fasi fu miti sma, toku wi e frustan taki wi no man miti ala sma nanga a fasi disi. So bun, fu kan ’du wi diniwroko dorodoro’, wi e gebroiki tra fasi — soleki a gi fu kotoigi nanga telefon tu — fu feni sma di yu kan teki gersi skapu.​—2 Tim. 4:5.

² Na son presi, sma e libi na ini oso di abi kefalek koni sistema fu fufuruman no kan kon na ini. A muilek fu miti sma na den presi disi te yu e wroko oso fu oso soleki fa wi gwenti. Srefi na ini den gebied pe wi man wroko oso fu oso, bun furu sma no de na oso. Ma furu preikiman abi bun bakapisi te den e bel den sma disi di e tan na den sortu presi disi. Wan mamanten na ini na oso-fu-oso wroko, wan trowpaar ben go na neigi oso, ma sma no ben de na oso. Baka di den go baka na a Kownukondre zaal, den luku na ini wan telefonbuku pe den strati kari fosi èn baka dati den nomru fu den sma. Den bel den nomru dati èn aiti fu den sma ben de na oso!

³ Yu e draidrai pikinso fu pruberi fu gi kotoigi nanga telefon na ini yu diniwroko? Wan brada e erken: „Mi no wani taki no wan sma musu bel mi na oso fu seri wan sani gi mi, so bun mi no ben lobi a fasi disi fu gi kotoigi.” Ma baka di a bel tu sma nomo, a ben taki: „Mi lobi a fasi disi fu gi kotoigi! Noiti mi no ben denki taki mi ben o lobi en, ma mi lobi en trutru! Sma no de nanga so furu broko-ede te den de na telefon, èn yu abi ala san yu abi fanowdu, krosibei fu yu. Disi na wan tumusi bun fasi fu gi kotoigi!” Wan sisa ben taki wan srefi sortu sani: „Mi no ben breiti srefisrefi fu gi kotoigi nanga telefon. Fu taigi yu leti, mi no ben wani du dati. Ma mi ben pruberi fu du en èn mi ben kon si taki a abi furu winimarki. Mi abi 37 gobaka fu di mi ben gi kotoigi nanga telefon èn mi abi moro studie leki mi man hori!” Efu yu wani pruberi fu gi kotoigi nanga telefon, dan yusrefi kan abi bun bakapisi tu.

⁴ Orga Sani fu Gi Kotoigi Nanga Telefon: A dienstopziener musu orga den sani fu a kotoigiwroko fu a gemeente. Efu wan tra sma de fanowdu fu yepi, dan a skin fu owruman kan poti wan tra owruman noso wan bekwaam dinari ini a diniwroko fu wroko skinskin makandra nanga en fu orga a gi di den gi kotoigi nanga telefon. A brada di e sorgu a gebied musu yepi tu, fu di na en o gi den brada gebied èn a sa skrifi soifri sortu gebied wroko. A kringopziener o wani sabi tu fa a e go nanga a programa.

⁵ Efu a gebied fu yu abi kontren pe yu no man go fu gi kotoigi oso fu oso, dan yu musu sreka gebied pe yu kan wroko nanga telefon. A brada di kisi a wroko sa skrifi ala den adres di musu poti kon na ini so wan gebied. Den gebied disi no musu bigi tumusi so taki den brada nanga sisa kan wroko dorodoro na ini den. Marki ala den gebied-karta disi di abi so wan kontren na den tapu fu di yu skrifi taki so wan kontren de fu gi kotoigi nanga telefon.

⁶ Pe yu kan feni den telefon-nomru? Unu kan du spesrutu muiti fu skrifi a nen, a strati nanga na oso-nomru fu den sma di wi no man doro so makriki. Den bodoi disi kan yepi unu fu feni a telefon-nomru na ini wan telefonbuku.

⁷ Den owruman kan poti prakseri na a wroko disi fu di den e sreka sani so taki den wan di abi ondrofeni fu gi kotoigi nanga telefon kan leri trawan fa fu du dati, kande den kan gebroiki a programa Pionier E Yepi Trawan. Kande ten na ten unu kan gebroiki a pisi pe wi e taki fu „wan tu sani fu a gemeente” na a Diniwroko Konmakandra, fu yepi sma fu kisi moro wini te den e gi kotoigi na so wan fasi.

⁸ Te den owruman e go luku den malengriwan di no man gowe libi den oso noso den wan di musu de na bedi ala ten, noso den sikiwan, dan den kan hori na prakseri fu gi den wan disi deki-ati fu gi kotoigi nanga telefon. Kande na owruman kan bel wan tu sma ala di a preikiman e luku fa a e du dati. Dan a preikiman kan kisi na okasi fu bel wan sma tu. Furu sma di bigin fu preiki na a fasi disi, e teki wan tu miniti ibri dei fu du a wroko disi, èn den lobi en trutru.

⁹ Rai fu Abi Bun Bakapisi: Di Yesus ben seni den disipel fu en fu go preiki, dan a „ben seni den tu na tu” (Luk. 10:1). Fu san ede? A ben sabi taki te den e wroko makandra dan den o leri fu makandra èn den o gi makandra deki-ati. A srefi sani de so te wi e gi kotoigi nanga telefon. Fu di unu e wroko makandra, dan unu kan leri fu makandra, unu kan kenki prakseri fu den sani di unu doro, èn unu kan gi makandra rai gi a tra takimakandra. Srefi te wan fu unu e bel, unu kan yepi makandra fu feni den yoisti bodoi.

¹⁰ Efu yu wani denki moro bun èn hori yu prakseri na wan, dan yu musu sidon pe yu kan poti den sani di yu o gebroiki fu gi kotoigi, na fesi yu — Bijbel, a Redeneren-buku, a San Gado e aksi-brochure, tijdschrift nanga tra sani. Skrifi wan tu sani di yu kan taki fu den èn poti den papira na so wan fasi taki yu kan si den. De srekasreka fu skrifi ala sani soifri, so srefi a dei nanga a yuru fu a dei so taki yu o sabi o ten yu kan meki kontakti baka nanga den sma di wani sabi moro.

¹¹ Furutron sma de fersektiki te den e yere wan sten fu wan sma di den no sabi na a telefon. So bun, tan sori switifasi èn sabi san yu e taigi a sma. Na ososma kan yere yu sten nomo fu kon sabi efu yu opregti trutru. No fetifeti fu taki èn taki komoto na yu ati. No taki esi-esi, taki krin èn no taki tumusi safri so taki a sma no man yere yu. Gi na ososma na okasi fu taki. Gebroiki a heri nen fu yu, èn taki dati yu e libi na ini a birti. Wi no wani sma denki taki wi e bel den fu seri wan sani. Na presi fu taki dati yu e bel ala sma di e libi na wan spesrutu presi, taigi a sma taki yu e bel en.

¹² San fu Taki te Yu E Bel: Te yu e gi kotoigi nanga telefon, dan yu kan gebroiki furu fu den inleiding fu a brochure „Fa foe bigin èn go doro nanga bijbel takimakandra”. Yu kan taki: „Mi e bel yu fu di mi no man kon na yu fu kon taki langalanga nanga yu. Mi e bel fu di mi wani sabi fa yu e denki fu wan tumusi moi aksi.” Poti na aksi dan.

¹³ Yu kan gebroiki a fosi pristeri na ondro na edeprakseri „Takroedoe/De Sondro Kefar” na a fasi disi: „Hallo. Mi na _____. Mi e libi na ini a birti. Mi wani gi yu a dyaranti taki mi no bel fu seri wan sani gi yu èn mi no e ondrosuku no wan sani. Mi bel fu di mi e broko mi ede nanga a pisi tori fu libi sondro kefar. Furu takrudu e pasa na a kontren fu wi èn dati abi krakti na tapu wi libi. Yu e denki taki wan ten o kon pe ala sma o man waka neti yuru na strati sondro fu frede? [Gi a sma na okasi fu piki.] Meki mi leisi gi yu san Gado pramisi fu du.”

¹⁴ Trawan ben man pristeri sma wantewante wan oso-bijbelstudie na a telefon. Yu kan sori sma fa a studie e go na ini wan tu miniti nomo. Aksi a sma efu yu no kan kon na en oso fu go doro nanga a studie. Efu a sma e draidrai fu piki yu, dan aksi en efu a wani go doro nanga a studie te yu bel en wan tra dei.

¹⁵ Te yu e tapu nanga wan takimakandra, dan abi wan sani na prakseri di o meki taki yu kan fisiti a sma na en oso noso taki yu kan seni wan publikâsi gi en. Efu a sma e draidrai pikinso fu taigi yu pe a e tan, dan aksi efu yu no kan bel en baka. Kande yu sa musu bel en wan tu leisi, bifo a o kari yu fu kon na en oso.

¹⁶ Yu Musu Bigin Du wan Sani: Wan sisa fu 15 yari ben bigin en mamanten diniwroko fu di a ben bel wan sma. A ben taki nanga wan uma di ben wani teki a Sabi-buku. Di a sisa ben tyari a buku na a oso fu a sma, dan na uma ben wani sabi fa a yongu sisa disi ben feni en telefon-nomru, fu di a no ben skrifi na ini no wan telefonbuku. We, sondro a sisa sabi, a ben drai wan fowtu nomru! Na uma ben wani wan studie èn now a de wan preikiman di no dopu.

¹⁷ Wan sisa ben kisi wan telefon-gebied ma a no ben wroko en dri wiki langa bika a ben frede. San ben gi en a deki-ati fu bigin? A ben memre wan artikel fu na Ontwaakt! fu 22 yanuari 1997, di nen „Wanneer ik zwak ben, dan ben ik krachtig” (Te Mi Swaki, dan Mi Tranga). Na artikel ben e taki fu wan Kotoigi di e preiki nanga telefon ala di a no ben de gosontu. A sisa ben taki: „Mi ben begi Yehovah fu aksi en fu a tranga mi. Mi ben aksi en fu gi mi den yoisti wortu fu taki nanga sma.” San ben de a bakapisi di a ben gi kotoigi nanga telefon a fosi dei? A e taki: „Yehovah piki mi begi. Den sma ben arki mi, èn mi ben sreka sani fu tyari wan gobaka.” Baka ten a sisa ben feni wan bijbelstudie fu di a ben gi kotoigi nanga telefon. A e taki moro fara: „Yehovah leri mi ete wan leisi fu frutrow na en tapu èn no tapu misrefi.”​—Odo 3:5.

¹⁸ A fruteri di wi e fruteri a waarheid nanga telefon kon tron wan bun fasi fu preiki a bun nyunsu. Sreka yusrefi bun, èn gi kotoigi nanga yu heri ati. No lasi-ati efu sma no wani arki den fosi leisi te yu bel. Begi Yehovah fu a sori yu san fu du, èn arki san trawan di e preiki na a moi fasi disi, e taki. Meki a de so taki wi e du wi diniwroko dorodoro na wan seryusu fasi, fu di wi no wani dyompo no wan sma na ini wi gebied.​—Rom. 10:13, 14.