Preiki a boen njoensoe na ala presi
1 Den fosi kresten ben preiki a boen njoensoe na ala presi. Den ben abi so wan faja, taki na ini moro mendri leki 30 jari baka na opobaka foe Jesus Krestes, a Kownoekondre boskopoe ben „preiki na ala mekisani di de na ondro hemel”. — Kol. 1:23.
2 Den faja faja foetoeboi foe Jehovah na ini a ten disi abi a srefi marki, namkoe, foe miti ala sma di den kan miti nanga a Kownoekondre boen njoensoe. San kan jepi wi foe doro a marki disi? Moro nanga moro sma e wroko heri dei èn foeroe tron den no de na oso te wi e go na den. Te den no de na wroko, dan kande den e rèis, e go na wenkri foe bai sani, noso e feti na baka wan fasi foe ontspanning. Fa wi kan doro nanga a Kownoekondre boskopoe na den wan na mindri den di e froedini en? — Mat. 10:11.
3 Wan toe foe den wi e miti na a wrokopresi foe den. Son presi abi wan bisnis kontren pe foeroe sma de moro foeroe foe a dei. Na bigi foto, sma di e wroko na kontren pe soso fabrik, bisnis noso kantoro de, e kisi wan kotoigi — foeroe foe den foe a fosi leisi. Na a kaba foe den wiki, wan toe sma di wi ben miti na a joeroeten di den ben e wakti na parkeer presi, bushalte noso na wenkri, ben sori taki den abi a joisti jejefasi gi a boen njoensoe.
4 Moro nanga moro preikiman e doe spesroetoe moeiti foe gi kotoigi na poebliki presi, awansi pe den kan feni sma. Na ini a bigin, den Kotoigi disi ben draidrai èn senwe ben trobi den pikinso, foe di den ben gwenti foe preiki na moro formeel situwâsi, soleki oso foe oso. Fa den e firi now?
5 „A gi a diniwroko foe mi libi baka!”, wán brada di abi foeroe ondrofeni ini a velddienst bari taki. Wan trawan e taki toe: „A e meki mi tan poti prakseri na tapoe wán sani.” Wan moro owroe pionier e taki: „A e gi mi krakti na froestan sei, na skin sei èn na jejefasi, . . . èn mi e tan go na fesi ete.” Wan preikiman e taki dati now a miti foeroe sma di no ben taki nanga Jehovah Kotoigi noiti ete. So srefi jongoe sma e teki prati faja faja na ini a prisiri wroko disi. Wan jongoewan e taki foe ensrefi na a fasi disi: „A de wan prisiri sani, bika joe kan taki nanga so foeroe sma.” Wan trawan e taki: „Mi e prati moro boekoe leki oiti na fesi!” Ala disi e feni presi na ini gebied di wroko ala ten baka.
6 Opziener di e rèis e teki fesi: Foe di a Genootschap sabi taki „a fasi fa a grontapoe disi tan, e kenki”, meki no so langa pasa den ben gi rai taki opziener di e rèis moesoe fiti a velddienst schema foe den ala wiki na a gebied, so taki den kan miti someni sma leki a kan nanga a boen njoensoe (1 Kor. 7:31). Jari langa, den kring-opziener poti den wikidei mamanten aparti foe teki prati na ini na oso-foe-oso wroko, ala di den ben gebroiki den bakadina foe tjari gobaka èn foe hori oso-bijbelstudie. Na ini son kontren, a schema dati kan de praktis ete. Na ini tra kontren, den kan doe pikinso nomo kande te den e wroko oso foe oso na son wikidei mamanten. Na ini den kefal dati, den opziener di e rèis kan bosroiti taki a ben sa boen foe teki prati ini a wenkri-foe-wenkri wroko noso doe stratiwroko froekoe na ini a dei. Noso a kan seti sani gi pikin groepoe foe gi kotoigi na kontren pe wenkri de, pe kantoro de, na parkeer presi, noso na tra poebliki presi. Foe di preikiman e gebroiki a ten di den abi gi velddienst moro boen, meki den sa miti moro foeroe sma.
7 Tori di wi kisi foe jere e sori taki opziener di e rèis, nanga so srefi den preikiman ben teki a kenki disi na wan heri boen fasi. Wan lo skin foe owroeman gi a kring-opziener wan kari foe leri wan toe preikiman fasi foe a wroko di moesoe kisi prakseri na ini a gemeente. A de wan jepi gi den preikiman disi foe go makandra nanga na opziener di e rèis te a e teki prati na wan foe den wroko disi. Den foe den sei baka, man leri trawan (2 Tim. 2:2). Leki wan bakapisi foe dati, dan den e miti moro sma now nanga a boen njoensoe.
8 A no de foe taki dati joe no abi foe wakti te leki a kring-opziener kon foe loekoe a gemeente foe proeberi wan toe foe den tra fasi disi foe preiki. Djaso difrenti idea de di joe e feni kande praktis na ini joe gebied:
9 Stratiwroko: ’Pe ala den sma de?’, na so wi e aksi wisrefi son tron te wi e go na wan wikidei mamanten na wan presi pe sma e libi, ma den no de na oso. Kande wan toe foe den e doe boskopoe gi trawan noso e go na wenkri foe bai sani. Joe proeberi foe miti den nanga stratiwroko? Te joe doe a pisi disi foe a diniwroko na wan joisti fasi, dan a kan abi boen bakapisi srefisrefi. Na presi foe tanapoe na wán presi nanga den tijdschrift, a moro boen foe go na den sma èn bigin nanga wan switi takimakandra. A no de fanowdoe foe gi kotoigi na ibri sma di e waka pasa. Taki nanga den sma di no e hasti densrefi, soleki den sma di e koiri loekoe wenkri, den sma di sidon na ini oto di parkeer noso sma di e wakti bus. Na a fosi presi, joe kan gi a sma gewoon wan switi odi èn wakti foe a gi wan piki. Efoe a sma wani taki, aksi fa a e denki foe wan tori di joe e denki taki a sa abi belangstelling gi dati kande.
10 Wan opziener di e rèis ben gi siksi preikiman a kari foe go nanga en nanga en wefi na stratiwroko. San ben de a bakapisi? „Wi ben abi wan toemoesi moi mamanten!”, a e froeteri. „Wi no ben abi a problema taki wi no feni sma na oso. Wi ben prati aititenti tijdschrift nanga foeroe traktaat. Wi ben abi difrenti takimakandra di gi deki-ati. Wan foe den preikiman, di foe a fosi leisi ben teki prati na stratiwroko, ben bari taki: ’Mi de jari langa na ini waarheid èn mi no ben sabi san mi ben e misi!’ Na a kaba foe a wiki, a bigi ipi tijdschrift foe a gemeente ben kon moro mendri.”
11 Di a srefi opziener di e rèis ben e wroko na ini a tra gemeente, a ben kon jere taki difrenti preikiman ben teki prati na stratiwroko wán mamanten froekoe, ma den ben abi soso pikinso boen bakapisi. Wán sisa ben taki nanga toe sma nomo na ini a heri pisi ten di a ben gi kotoigi, foe di ala den tra sma di a ben miti ben hasti densrefi go na wroko. Na opziener di e rèis ben gi a rai meki den alamala drai go baka na a srefi strati, pikinso moro lati foe a mamanten. Den ben doe dati èn den ben tan te leki 12 joeroe. A sisa di ben abi soso toe takimakandra moro froekoe mamanten, ben abi moro boen bakapisi di a ben drai go baka. A ben prati 31 tijdschrift nanga 15 brochure, ben kisi den nen nanga adres foe seibi sma, èn ben bigin nanga toe oso-bijbelstudie! Trawan na ini a groepoe ben abi den srefi bakapisi di e gi deki-ati.
12 Te joe e feni wan sma di e sori belangstelling, dan proeberi foe kisi a nen foe a sma, en adres nanga en telefon nomroe. Na presi foe aksi en langalanga foe den bodoi, joe ben sa kan taki: „Mi ben prisiri foe abi a takimakandra disi nanga joe. Wan fasi de taki wi kan go doro nanga a takimakandra na wan tra ten?” Noso aksi: „Wan fasi de taki mi kan miti joe na joe oso?” Foeroe sma di wi ben miti na a fasi disi agri foe wi go baka na den. Sorgoe foe gi iniwan sma wan kari di ben sa wani kon na den konmakandra foe wi.
13 Efoe joe e taki nanga wan sma di abi belangstelling èn di e libi na ini a gebied foe wan tra gemeente, dan joe moesoe gi tra gemeente a bodoi, so taki den brada drape kan sorgoe gi a belangstelling moro fara. Stratiwroko ben sa de wan fasi foe prati a boen njoensoe nanga boen bakapisi na ini joe gebied? Efoe dati de so, dan loekoe na artikel baka „Feni sma di abi belangstelling, nanga jepi foe strati kotoigiwroko di sa abi boen bakapisi” na ini na uitgave foe juli 1994 foe Wi Kownoekondre Dienst. Baka dati, seti sani foe teki prati na stratiwroko na wan ten foe a dei di fiti, èn di sa meki taki joe man miti so foeroe sma leki a kan.
14 Gi kotoigi na bus: Na wán mamanten, wan lo pionier ben bosroiti foe gi kotoigi na sma di ben e wakti bus krosibei foe wan hei skoro foe a foto. Ala di den ben abi wan toe switi takimakandra, tokoe den ben abi wan problema. Na a joeroeten di a takimakandra ben bigin go boen, dan na a ten dati a bus ben kon èn ben meki a takimakandra kon na wan kaba wantronso. Den pionier ben loesoe a problema foe di den ben go na ini a bus èn ben go doro foe gi kotoigi na den sma na ini a bus ala di den e rèi pasa a foto. Te a bus ben doro a lasti halte, dan den pionier ben rèi gowe baka nanga a bus èn ben e gi kotoigi ala di den ben rèi nanga a bus. Baka te den ben go-kon wan toe leisi nanga a bus, den ben loekoe fa sani ben waka nanga a moeiti di den ben meki: Den ben prati moro leki 200 tijdschrift èn den ben bigin nanga siksi bijbelstudie. Wan toe sma ini a bus nanga prisiri ben gi na adres nanga telefon nomroe foe den, so taki den pionier ben kan fisiti den na oso. A tra wiki, den pionier ben go baka na a bushalte èn ben doe a srefi fasi leki den ben doe na fesi. Den ben prati 164 tijdschrift èn ben bigin nanga ete wan bijbelstudie. Na wán halte, wan sma ben kon na ini a bus èn ben teki a wan-enkri sidonpresi di ben de ete — sei wan pionier. A ben loekoe a brada èn ben taki nanga wan lafoe fesi: „Mi sabi, joe abi wan Waktitoren gi mi.”
15 Foeroe preikiman e gi kotoigi nanga boen bakapisi te den e rèis nanga bus, loko, noso opolani. Fa joe kan bigin wan takimakandra nanga wan sma di sidon na joe sei? Wán preikiman di abi 12 jari ben bigin leisi wan Ontwaakt! na ini a bus èn ben e howpoe foe wiki a gridi foe kon sabi sani foe wan tini oemapikin di ben sidon na en sei. A ben waka soleki fa a ben prakseri. Na oemapikin ben aksi en san a ben e leisi, èn a jongoe brada ben piki taki a ben e leisi foe a loesoe gi den problema di jongoe sma moesoe kakafoetoe gi den. A ben taki moro fara dati a ben kisi foeroe wini foe na artikel èn taki a ben kan jepi na oemapikin toe. Na oemapikin ben teki den tijdschrift nanga prisiri. Toe tra jongoewan ben jere a takimakandra foe den èn den ben aksi eksemplaar foe den tijdschrift toe. Tapoe dati a bus sjafeur rèi go na seisei foe a pasi èn ben aksi foe san ede so foeroe belangstelling ben de gi den tijdschrift disi. Di a ben kon sabi dati, ensrefi ben teki eksemplaar toe. A no de foe taki dati no wan foe den sani disi ben sa man efoe a jongoe preikiman no ben abi nofo tijdschrift foe prati gi ala sma di ben sori belangstelling!
16 Gi kotoigi na park nanga parkeer presi: Foe gi kotoigi na park nanga parkeer presi, na wan toemoesi boen fasi foe miti sma. Joe proeberi foe gi kotoigi na a parkeer presi pe foeroe wenkri de? Ala ten teki wan toe momenti foe loekoe lontoe joe. Soekoe wan sma di no e hasti ensrefi noso di e wakti na ini wan oto di parkeer èn proeberi foe bigin nanga wan takimakandra na wan switi fasi. Efoe a takimakandra e go doro, dan tjari a Kownoekondre boskopoe kon ini a tori. Proeberi foe wroko joe wawan, ma nanga wan tra preikiman na ini a birti. No tjari wan bigi, deki tas noso no hari a prakseri foe sma gi a wroko foe joe na tra fasi. De nanga koni. A kan de moro boen foe tan soso wan sjatoe ten na wán parkeer presi èn dan go na wan trawan. Efoe wan sma no wani taki nanga joe, sori maniri fasi èn go joe pasi èn soekoe wan tra sma foe taki nanga en. Di wan brada ben gebroiki den fasi disi, a ben prati 90 tijdschrift ini wán moen di a ben e gi kotoigi na parkeer presi.
17 Son sma e go na wan park foe go rostoe; trawan e go drape foe prei wan prei noso foe pasa ten nanga den pikin foe den. Sondro foe boemoei nanga den aktiviteit foe den na wan fasi di no fiti, soekoe wan okasi foe gi kotoigi. Wan brada ben bigin wan takimakandra nanga a man di e sorgoe gi a gron foe wan park èn ben kon si taki a ben broko en ede nanga drug èn nanga a tamara foe den pikin foe en. Den ben bigin nanga wan oso-bijbelstudie èn a studie ben hori doronomo na ini a park.
18 Okasi preiki na kontren pe wenkri de: Ala di a no ala ten wi man preiki na wan formeel fasi na kontren pe wenkri de, tokoe wan toe preikiman e soekoe okasi foe preiki drape. Den e bigin wan switi takimakandra nanga tra sma di e kon drape. Te a sma sori belangstelling, dan na wan koni fasi den e pristeri wan traktaat noso wan tijdschrift èn e meki moeiti foe seti sani foe wan gobaka. Baka te den tan wan toe miniti ini wan presi, dan den e go doro na wan tra presi èn e bigin wan takimakandra nanga wan tra sma. A no de foe taki dati wi moesoe sorgoe taki wi no hari a prakseri foe sma sondro foe a de fanowdoe te wi e doe okasi preiki na a fasi disi.
19 Te joe e taki wan sma odi, dan bigin a takimakandra na wan switi fasi. Efoe a sma di e arki joe e piki, poti wan aksi, dan arki boen te a e taki. Abi belangstelling gi san a e taki. Sori taki joe e warderi a fasi fa a e denki foe sani. Agri nanga en pe a kan.
20 Wan sisa ben abi wan switi takimakandra nanga wan owroe oema foe di a ben taki foe a hei di a kostoe foe libi e kon hei. Na oema ben agri wantewante èn wan faja takimakandra ben de a bakapisi. A sisa ben man kisi a nen nanga adres foe na oema èn a ben go baka na en a srefi wiki dati.
21 Son gemeente abi bisnis kontren leki wan pisi foe a gebied di den kisi foe wroko. A brada di e sorgoe gi a gebied kan sreka spesroetoe karta foe den bisnis presi disi. Iniwan gebiedkarta foe oso pe sma e libi èn di abi bisnis kontren na ini, moesoe sori krin taki den no moesoe wroko den bisnis presi leki wan pisi foe a gebied. Na ini tra gebied, wi kan wroko bisnis presi makandra nanga den oso pe sma e libi. Den owroeman kan gi bekwaam preikiman a kari foe wroko den bisnis gebied doronomo, so taki den no poti a wenkri-foe-wenkri wroko na wan sei.
22 Efoe joe kisi a kari foe teki prati na a wroko disi èn noiti na fesi joe no ben doe en, dan wan boen fasi foe ’teki deki-ati’ na foe wroko wan toe moro pikin wenkri fosi; baka dati, te joe abi moro froetrow, wroko den moro bigi wenkri (1 Tes. 2:2). Te joe e wroko wenkri foe wenkri, weri krosi neleki te joe ben o go na wan konmakandra na a Kownoekondre zaal. Efoe a kan, go na ini a wenkri te sma no de di e wakti foe den jepi den. Aksi foe taki nanga a basi noso a sma di abi a frantiwortoe. Abi waran firi, èn san moro prenspari, hori en sjatoe. A no de fanowdoe foe aksi pardon taki joe kon froeferi en. Foeroe bisnis e poti prakseri na tapoe sma di e kon bai sani èn den e froewakti taki sani kan kon na mindri.
23 Baka te joe taki wan wenkriman odi, joe ben sa kan taki disi: „Bisnis-sma abi so wan druk schema taki pikinmoro noiti wi e feni den na oso, dati meki wi kon loekoe joe djaso na joe wenkri foe libi wan artikel gi joe na baka, di e poti sma na prakseri broki.” Baka dati, taki foe wan toe sani foe a njoen tijdschrift.
24 Noso joe ben sa kan proeberi disi te joe e taki nanga wan basi: „Wi kon si taki bisnis-sma e doe moeiti foe sabi den moro njoen tori noso sani di pasa. A moro njoen eksemplaar foe A Waktitoren (noso Ontwaakt!) e taki foe wan artikel di abi krakti na tapoe wi alamala.” Tjari kon na krin san na dati èn tapoe foe di joe e taki: „Wi de seiker taki joe sa njan boen foe en te joe leisi en.”
25 Efoe wrokoman de, èn a gersi taki a fiti, dan joe ben sa kan taki moro fara: „Joe ben o feni en ogri efoe mi ben gi a srefi sjatoe pristeri disi na den wrokoman foe joe?” Efoe a gi primisi, memre taki joe pramisi foe taki sjatoe, èn a basi sa froewakti taki joe hori joesrefi na joe wortoe. Efoe wan wrokoman wani go ini wan langa takimakandra, a ben sa moro boen foe go na den na den oso.
26 No so langa pasa, wan toe preikiman na ini wan pikin foto ben wroko makandra nanga a kring-opziener na ini a wenkri-foe-wenkri wroko. Wan toe foe den preikiman ben de nanga djompo-ati na ini a bigin, foe di noiti na fesi den ben doe a wroko; ma heri esi den ben de nanga korostoe ati èn ben bigin firi prisiri foe a wroko. Ini moro mendri leki wán joeroe, den ben taki nanga 37 sma èn ben prati 24 tijdschrift nanga 4 brochure. Wan brada ben taki dati te den e wroko ini wan moen oso foe oso leki fa den ben gwenti, den no ben sa man miti so foeroe sma leki den ben miti, di den ben wroko wenkri foe wenkri na ini a sjatoe ten dati.
27 Soekoe okasi foe preiki: Jesus no ben gi kotoigi soso na formeel situwâsi. A ben prati a boen njoensoe na ibri okasi di fiti (Mat. 9:9; Luk. 19:1-10; Joh. 4:6-15). Loekoe fa wan toe preikiman e soekoe okasi foe preiki.
28 Wan toe kotoigi e meki en wan gwenti foe gi kotoigi na mama nanga papa di e wakti den pikin foe den krosibei foe a dromofo foe wan skoro. Foe di foeroe papa nanga mama e doro 20 miniti moro froekoe, dan ten de foe bigin wan takimakandra nanga den foe wan bijbel tori di e gi deki-ati.
29 Foeroe pionier sabi taki den moesoe miti sma di kande abi spesroetoe belangstelling ini wan spesroetoe tori di den tijdschrift foe wi e taki foe en. Foe eksempre, wan sisa ben abi boen bakapisi di a ben go na siksi skoro ini a gebied foe en gemeente nanga den artikel „Crisis op scholen” (Problema na skoro), di ben kon ini na Ontwaakt! foe 22 december 1995. A ben go so srefi na organisâsi di e doe maatschappelijk wroko nanga tijdschrift di e taki foe osofamiri libi nanga a meshandri di sma e meshandri pikin-nengre èn ben kisi a kari foe kon baka nanga njoen uitgave di e taki foe den srefi sortoe tori disi. A ben taki dati a fasi fa den sma, di e wroko na a kantoro di e jepi sma di no abi wroko, ben teki na Ontwaakt! foe 8 maart 1996, ben „bigi srefisrefi”.
30 Wan distrikt-opziener e froeteri taki en nanga en wefi e doe okasi preiki doronomo te den e go bai sani na wenkri. Den e go bai sani na wan ten te toemoesi foeroe sma no de na ini a wenkri, èn den sma di e kon bai sani e waka safrisafri go-kon na mindri den rèk, sondro foe hasti densrefi. Den e froeteri taki den ben abi foeroe toemoesi moi takimakandra.
31 Foeroe preikiman e froeteri foe boen bakapisi te den gi kotoigi na sma di kon wasi krosi na poebliki presi pe wasmasjin de. Den no e libi tijdschrift nomo na baka te no wan sma no de drape. A marki foe den na foe miti sma nanga a boen njoensoe, dati meki den e meki moeiti foe taki nanga den wan di e gebroiki den wasmasjin.
32 Na son presi, preikiman di den teki foe doe dati, kisi primisi foe gi kotoigi na opolani-gron. Son tron den ben abi a prisiri foe gi kotoigi na trakondre-sma di e rèis èn di e libi na kondre pe a pipel foe Jehovah no foeroe. Te den feni sma di abi belangstelling, dan den e pristeri wan traktaat noso den tijdschrift.
33 Span joesrefi foe preiki na ala presi: Libi akroederi a gi di wi gi wisrefi abra wani taki toe foe abi a firi taki a wroko foe wi foe preiki a Kownoekondre boskopoe de tranga fanowdoe. Te wi kan miti sma na wan ten di boen gi den, dan wi moesoe poti den sani di wisrefi wani, na wan sei, so taki „na ala fasi [wi] ben sa kan kibri wan toe sma”. Ala foetoeboi foe Jehovah di gi densrefi abra, wani foe man taki soleki fa na apostel Paulus ben taki: „Mi e doe ala sani foe a boen foe a boen njoensoe, so taki mi kan abi wan prati na en nanga trawan.” — 1 Kor. 9:22, 23.
34 Paulus ben skrifi moro fara: „Foe dati ede, nanga ala prisiri mi sa meki bigi foe den swaki fasi foe mi, so taki a krakti foe Krestes kan tan leki wan tenti na mi abra. . . . Bika te mi swaki, dan mi de tranga” (2 Kor. 12:9, 10). Nanga tra wortoe, no wan foe wi ben kan doe a wroko disi nanga wi eigi krakti. Wi moesoe aksi Jehovah na ini begi foe en makti santa jeje. Efoe wi aksi Gado na ini begi foe gi wi krakti, dan wi kan abi a froetrow taki a sa jere den begi foe wi. Dan a lobi di wi abi gi sma sa boeweigi wi foe soekoe okasi foe preiki a boen njoensoe gi den, awansi pe wi kan feni den. Foe san ede joe no e proeberi wán foe den rai di gi ini na inlegvel disi, na ini a wiki di e kon?