Gebroiki den tijdschrift foe wi na a moro boen fasi
1 Te joe e doro wan presi pe den e seri koranti, sigara, bromki, èn so moro fara, dan san joe e si? Tijdschrift. Te joe e doro na wan wenkri pe den e seri boekoe, dan san e hari joe prakseri? Tijdschrift. San na den sani di foeroe wan tas foe a man di e tjari brifi kon? Tijdschrift. So boen, sortoe sani moro foeroe sma e leisi? Tijdschrift. Ondrosoekoe ben sori taki 9 foe den 10 jongoesma foe 10 jari te kon miti 18 jari, èn a srefi nomroe foe bigisma, e leisi awansi wán tijdschrift wan moen. Den tijdschrift e hari a prakseri foe sma, foe di sma wani kisi bodoi tapoe ala sortoe sani.
2 Wi kan meki taki a Waktitoren nanga Ontwaakt! e hari a prakseri foe den opregti sma? Ija, WI kan doe dati te WISREFI e hori a Waktitoren nanga Ontwaakt! boen na prakseri. San kan jepi wi? Loekoe den rai disi:
◼ Leisi den tijdschrift: Wan opziener di e rèis ben meki wan verslag pe a ben skrifi taki 1 tapoe 3 preikiman nomo foe a kring pe a e waka, e leisi ibri uitgave foe A Waktitoren nanga Ontwaakt! foe a bigin te na a kaba. Joe e doe dati? Foe ibri artikel di joe e leisi, joe kan aksi joesrefi: ’Soema ben sa warderi a bodoi disi—wan mama, wan agnosticus, wan bisnisman, wan jongoesma?’ Na ini joe persoonlijk eksemplaar, joe kan marki wán noso toe penti di joe kan gebroiki te joe e pristeri a tijdschrift. Dan prakseri fa joe kan wiki a belangstelling gi a tori na ini wán noso toe sani di joe e taki.
◼ Teki wan fasti nomroe foe tijdschrift: Teki wan fasti nomroe foe ibri tijdschrift, taigi a brada di e loekoe a tori disi foe den tijdschrift, èn sorgoe taki a nomroe foe tijdschrift di joe teki na wan nomroe di joe kan gebroiki. Na a fasi disi, joe nanga joe osofamiri sa abi nofo tijdschrift ala ten baka.
◼ Poti wan spesroetoe dei na ini joe schema pe joe e doe tijdschrift wroko nomo: Foeroe gemeente teki wan spesroetoe dei foe gi kotoigi nanga den tijdschrift nomo. Joe kan horibaka gi a dei di a gemeente seti foe prati tijdschrift nomo? Efoe joe no kan doe dati, dan proeberi foe joesrefi gebroiki ibri tron baka, son ten foe joe preikiwroko foe prati tijdschrift na a kotoigiwroko na strati, èn so srefi na den tijdschriften route foe joe èn na a oso foe oso preikiwroko toe.
◼ Hori a „Waktitoren” nanga „Ontwaakt!” boen na prakseri: Tjari eksemplaar foe den tijdschrift te joe e koiri noso te joe e go bai wan toe sani. Pristeri den tijdschrift te joe e taki nanga kompe-wrokoman, birtisma, skoromati, noso skoromeester noso skoromisi. Wan trowpaar di foeroe leisi e rèis nanga opo-langi, e gebroiki wan penti foe den moro njoen tijdschrift foe bigin wan takimakandra nanga a sma di sidon sei den. Den ben abi foeroe moi ondrofenitori foe dati. Doronomo, son jongoesma e tjari artikel na ini den tijdschrift go na skoro foe san den e denki taki a sa hari a belangstelling foe den skoromeester noso skoromisi noso den tra studenti. Tjari wan toe tijdschrift nanga joe te joe e go gi wan sjatoe pisiten foe doe wan bisnis, èn pristeri den tijdschrift na den seriman baka te joe seti a bisnis tori foe joe. Foeroe foe wi e bai gasoline doronomo; foe san ede joe no e pristeri den tijdschrift na a sma di e wroko na a presi pe joe e bai a gasoline? Poti den tijdschrift na so wan fasi, taki joe kan teki den esi-esi te famiriman e fisiti joe, te joe e go nanga bus noso boto foe lanti, noso te joe e wakti na wan presi pe joe meki mofo nanga wan sma. Joesrefi kan prakseri foe tra okasi pe joe kan pristeri den tijdschrift?
◼ Sreka joesrefi foe pristeri den tijdschrift sjatoe: Sreka joesrefi foe no taki foeroe sani, ma taki boen sani. De nanga faja. Proeberi foe doro na ati foe den sma. Taki spesroetoe sani. Teki wan sani di skrifi na ini wan foe den tijdschrift, teki wan toe wortoe nomo foe taki san skrifi drape, èn baka dati pristeri den tijdschrift. A moro boen fasi foe pristeri den tijdschrift, na te joe e poti wan aksi foe wan tori di kan wiki a belangstelling foe a sma èn baka dati sori go na wan artikel di e gi wan bijbel piki tapoe na aksi disi. Loekoe wan toe eksempre fa joe ben kan doe disi:
3 Efoe joe e poti krakti na tapoe wan artikel di e taki foe a gro di ogridoe e gro, dan joe ben sa kan aksi:
◼ „San sa de fanowdoe foe meki taki wi kan sribi te neti sondro taki wi ben sa abi foe frede ogridoe?” A kan taki na ososma no e si wan loesoe gi a tori disi èn taki sani no sa kon moro betre. Joe kan piki na ososma taki foeroe sma e denki na a srefi fasi fa en e denki èn joe kan taki moro fara, taki joe abi bodoi di a sa wani foe sabi. Dan sori go na wan penti di fiti na ini na artikel.
4 Te joe e pristeri wan artikel di e taki foe na osofamiri libi, dan kande joe ben sa kan taki:
◼ „Foeroe sma feni taki a de wan tjalensi troetroe foe seti a libi èn kweki wan osofamiri nojaso. Foeroe boekoe skrifi foe a pisi tori disi, ma srefi den sabiman no e agri nanga makandra foe a fasi fa den problema foe wi, moesoe loesoe. Wan presi de pe wi kan go foe feni tiri di wi kan froetrow?” Baka dati, sori go na wan spesroetoe komentaar na ini a tijdschrift di e sori tapoe a koni di de foe feni na ini bijbel.
5 Kande joe ben sa kan gebroiki a fasi disi foe bigin wan takimakandra te joe e sori wan artikel di e taki foe problema na sociaalsei:
◼ „Foeroe sma e ondrofeni hebi druk nojaso. Noiti Gado ben abi na prakseri taki wi ben moesoe libi na so wan fasi.” Baka dati, sori fa a materiaal na ini na artikel di abi en gron tapoe bijbel, kan jepi wi foe kakafoetoe gi den problema foe a libi now èn fa a kan gi wi howpoe gi wan troetroe loesoe di sa tan na ini a ten di e kon.
6 Fa a de nanga bijdrage? Foe meki den sma di e warderi a wroko, kon sabi fa den kan jepi, dan joe ben kan taki: „Den poeblikâsi foe wi, wi e pristeri gi wan pikin bijdrage gi a wroko foe wi na heri grontapoe.”
7 Kotoigiwroko na strati, abi boen bakapisi: A ben de na ini na uitgave foe januari 1940 foe Informant (Wi Kownoekondre Dienst) taki gi a fosi leisi, preikiman ben kisi a deki-ati foe poti wan spesroetoe dei na ini a wiki na wan sei gi a kotoigiwroko na strati, ala di den e gebroiki den tijdschrift. Ten na ten joe e doe kotoigiwroko na strati? Efoe joe e doe so, dan a fasi fa joe e doe a kotoigiwroko dati abi boen bakapisi troetroe? Son sma si taki preikiman e tanapoe tapoe na oekoe foe strati pe foeroe sma e pasa, ala di den preikiman e takitaki nanga makandra èn na so wan fasi den preikiman no e si den foeroe sma di e pasa. Na presi foe den preikiman tanapoe sei makandra nanga den tijdschrift na ini den anoe, dan a ben sa moro boen foe tanapoe fara foe makandra èn waka go miti den sma di e waka pasa. Freimde sma kan stòp foe arki sjatoe efoe wán sma nomo e waka kon miti den, ma wan toe sma nomo sa go na wan groepoe di e takitaki nanga makandra. Sensi wi e hari a prakseri foe foeroe sma na tapoe strati, dati meki a de tranga fanowdoe taki wi sorgoe wisrefi boen èn weri krosi na wan bescheiden fasi soleki fa a fiti gi diniman foe Gado.—1 Tim. 2:9, 10.
8 Tijdschriften route: Ala di wi e wroko den gebied doronomo, tokoe den wan di abi wan tijdschriften route e prati foeroe tijdschrift. Tijdschriften route na wan toemoesi boen fonten foe jepi sma di ben sa kan bigin nanga wan oso-bijbelstudie.
9 Te joe e go ibri tron baka foe tjari den tijdschrift, dan joe sa si taki a waran nanga switifasi na mindri joe nanga na ososma, sa gro. O moro joe e kon sabi na ososma, o moro makriki a sa de gi joe foe taki foe bijbel tori nanga en. Disi kan meki taki joe e bigin wan oso-bijbelstudie di abi boen bakapisi. Na den gobaka pe joe e si taki den sma e warderi den tijdschrift troetroe, joe kan pristeri wan abonnement. Èn memre taki, ibri leisi te joe nanga na ososma miti, dan joe kan teri disi leki wan gobaka.
10 Doronomo wan sisa ben tjari tijdschrift gi wan oemasma di alaten ben teki den tijdschrift, ma tokoe a ben taki: „Mi no e bribi san joe e taigi mi.” Na wan tra gobaka, a sisa ben miti a masra na oso. Baka di a sisa taki switi nanga a masra, dan sani ben seti foe bigin wan bijbelstudie. A sisa ben tron mati nanga den dri manpikin di ben kon sidon na a studie toe. Te foe kaba, a mama nanga den boi foe en ben gi densrefi abra na Jehovah èn den ben teki dopoe. Nojaso, 35 sma foe a famiri dati teki a waarheid. Ala den sani disi pasa, foe di a sisa ben go baka na a tijdschriften route foe en!
11 Foeroe fasi de fa wan sma kan bigin wan tijdschriften route. Joe kan bigin wan tijdschriften route foe di joe e skrifi nomo pe joe ben prati den tijdschrift èn e seti sani foe go baka, baka toe wiki te joe abi den njoen tijdschrift. Wan fasi foe bigin wan tijdschriften route, na foe gebroiki a bodoi di skrifi na ondro na ede-prakseri „Na ini wi tra uitgave”. Te joe e go baka, dan taigi na ososma taki joe abi na artikel foe san joe ben taki a lasti leisi di joe ben kon. Noso, te joe e go baka, dan joe kan taki: „Di mi ben leisi na artikel disi, dan mi ben prakseri taki kande joe sa wani foe leisi en . . .” Baka dati, taki sjatoe foe na artikel èn pristeri a tijdschrift. Te joe kaba nanga a fisiti, dan skrifi feifi eenvoudig sani tapoe joe oso-foe-oso raport: (1) a nen foe na ososma, (2) na adres foe na ososma, (3) a dei di joe ben fisiti en, (4) den tijdschrift di joe libi na baka, nanga (5) den artikel foe san joe ben taki nanga na ososma. Son preikiman kweki boen tijdschriften route, èn den abi so wan 40 sma noso moro srefi, tapoe a lijst foe den!
12 Bisnis gebied: Den preikiman di e wroko na ini bisnis gebied, e prati foeroe tijdschrift. Joe proeberi foe wroko wenkri-foe-wenkri? Raport e sori taki na ini son gemeente, a gemeente no e doe so foeroe tapoe a pisi disi foe a diniwroko. Na a fosi presi, sonwan no e firi densrefi switi foe go taki nanga sma di e doe bisnis, ma baka di den doe dati wan toe leisi, dan den ben kon si taki a de wan span sani èn taki a e gi satisfaksi. Foe san ede joe no e aksi wan preikiman noso pionier di ondrofeni foeroe kaba tapoe a pisi kontren disi, foe jepi joe foe joe bigin?
13 Foeroe winimarki de te wan sma e wroko wenkri foe wenkri. Efoe wi e go na tapoe den ten te sma de na wroko, dan wi no kan taki dati wi no e miti sma! Foeroetron sma di e doe bisnis, na sma di abi boen maniri, srefi te den no abi wan spesroetoe belangstelling gi bijbel. Bigin froekoe na ini a dei; a kan, taki den sa warderi a fisiti moro. Baka di joe taki soema joe de, dan joe kan taki dati joe no e miti den sma di e doe bisnis so foeroe na oso. So boen, joe e fisiti den gi wan sjatoe pisiten nomo na den wroko presi foe pristeri den moro njoen A Waktitoren nanga Ontwaakt! Sori taki foeroe sma di e doe bisnis e warderi den tijdschrift foe wi, foe di den wani kisi den moro njoen bodoi foe den sani di e pasa na grontapoe ma den no abi foeroe ten foe leisi. Den tijdschrift e pristeri bodoi di e hari sma prakseri na wan njoen fasi foe si sani, sondro taki a e teki sei na ini wan spesroetoe relisi, politiek, noso bisnis afersi. Joe kan bigin wan tijdschriften route nanga den sma di abi belangstelling èn di joe miti na ini bisnis gebied.
14 Sreka oensrefi leki wan osofamiri: Joe kan poti pikinso ten na wan sei na a ten foe na osofamiri studie foe joe, foe taki sortoe artikel na ini den njoen tijdschrift sa fiti gi a gebied foe joe. Osofamiri memre—so srefi den pikin-nengre—kan teki prati na ini na oefen di den e oefen fa den sa pristeri den tijdschrift èn san den sa taki te sma e gens den, soleki te sma e taki: „Mi abi foeroe sani foe doe nownow”, „Wi abi wi eigi kerki”, noso „Mi no abi belangstelling”. Te a heri osofamiri e wroko boen nanga makandra, dan dati kan meki taki alamala kan abi wan prati dorodoro foe prati tijdschrift.
15 Den boekoestudie leider kan jepi: Efoe a kan, dan meki a dei di a gemeente seti foe prati tijdschrift no de na a Kownoekondre zaal, ma na den presi pe a Boekoe-studie e hori. Den sma di e teki fesi na a velddienst, moesoe sreka densrefi boen foe kan gi a groepoe spesroetoe rai. Disi kan de wan eksempre foe fa foe pristeri den tijdschrift èn sori go na wán noso toe penti foe den moro njoen tijdschrift di ben kan wiki a belangstelling foe den sma na ini a gebied. A kon di wi e kon makandra gi a velddienst—so srefi a prati di a sma di e teki fesi, e prati den brada nanga sisa gi a gebied—moesoe hori sjatoe, den no moesoe teki moro leki 10 noso 15 miniti. Den studie leider moesoe de seiker taki nofo gebied de foe wroko gi a pisi ten di den preikiman wani tan na ini a gebied.
16 Sori taki joe e warderi den tijdschrift: Na artikel „Meki boen gebroiki foe A Waktitoren nanga Ontwaakt!” di ben kon na doro na ini a Wi Kownoekondre Dienst foe juli 1993, ben taki a prenspari sani disi: „A Waktitoren nanga Ontwaakt! no e lasi den waarde, srefi efoe ala no kaba pristeri na ini wan moen noso toe foe sensi a datum di den kon na doro. A boskopoe di den abi no e kon moro mendri prenspari nanga a pasa foe a ten, . . . Efoe joe meki den owroe tijdschrift e kon tron wan ipi èn noiti e gebroiki den, dan dati e sori taki wi no abi warderi gi den wrokosani disi. . . . Na presi foe poti den moro owroe nomroe a wan sei, èn frigiti den, a no ben sa de moro betre foe doe spesroetoe moeiti foe pristeri den na den sma di abi belangstelling?”
17 Nojaso foeroe opregti sma de di e soekoe waarheid. Den sani di skrifi na ini wan foe den tijdschrift kan de joisti san wan sma kan abi fanowdoe foe kon na ini waarheid! Jehovah gi wi wan span boskopoe foe wi meki bekènti, èn den tijdschrift foe wi e plèi wan prenspari ròl foe tjari a boskopoe disi gi tra sma. Joe sa hori den tijdschrift moro boen na prakseri foe prati den na ini a ten di e kon? Joe sa fiti wan toe foe den rai di joe kisi na ini na artikel disi, srefi na a kaba foe a wiki disi? Joe sa kisi foeroe blèsi efoe joe e doe so.
Praktis rai:
◼ Leisi den tijdschrift fosi joe pristeri den, èn sabi san skrifi na ini den artikel.
◼ Teki wan foe den artikel di kan hari a prakseri foe foeroe sma na ini a libimakandra foe joe.
◼ Sreka wan sani foe pristeri di sa kan hari wan lo sortoe sma, awansi na mansma, oemasma, noso jongoesma. Sori fa a tijdschrift abi foe doe nanga na ososma èn fa a heri osofamiri kan njan boen foe dati.
◼ Meki plan foe doe joe velddienst wroko te foeroe sma de na oso. Son gemeente e seti sani so taki den kan gi kotoigi te neti nanga den tijdschrift.
◼ Hori a sani di joe e pristeri sjatoe èn meki a de krin san joe wani taki nanga a pisi tori dati.
◼ No taki toemoesi gaw. Efoe a sma di e arki joe, no abi belangstelling, dan efoe joe taki moro esi, dan a no sa jepi joe foe wiki en belangstelling. No proeberi foe feti nanga joesrefi, èn gi na ososma na okasi foe taki san en e denki.
Pristeri den tijdschrift oso foe oso:
◼ Abi wan switi lafoe èn taki na wan switifasi.
◼ De nanga faja gi den tijdschrift.
◼ Taki safrisafri èn na so wan fasi taki sma kan froestan joe.
◼ Taki foe wán sani nomo; wiki a belangstelling sjatoe, èn sori a warti di a sani warti gi na ososma.
◼ Poti krakti na tapoe soso wán artikel.
◼ Taki foe soso wán tijdschrift, èn pristeri a tra tijdschrift leki wan tijdschrift di de makandra nanga a wan di joe ben taki foe en.
◼ Gi na ososma den tijdschrift na ini en anoe.
◼ Meki na ososma sabi taki joe wani kon baka.
◼ Tapoe na wan switi, positief fasi te a sma e weigri foe teki den tijdschrift.
◼ Skrifi tapoe na oso-foe-oso raport a nen foe ala den sma di ben abi belangstelling èn ala den presi pe joe ben prati tijdschrift.
Den okasi di de foe prati tijdschrift:
◼ Kotoigi oso-foe-oso
◼ Kotoigiwroko na strati
◼ Wroko wenkri-foe-wenkri
◼ Den tijdschriften route
◼ Gi kotoigi te neti
◼ Te joe e tjari gobaka
◼ Te joe e fisiti den sma di ben de bijbelstudenti fosi
◼ Te joe e koiri, te joe e bai sani
◼ Te joe e taki nanga famiriman, kompe-wrokoman, birtisma, skoromati, skoromeester noso skoromisi
◼ Te joe e go nanga bus noso boto foe lanti, te joe moesoe wakti na wan presi