Prati moro tijdschrift na ini yu diniwroko
1, 2. Fa A Waktitoren nanga Ontwaakt! abi krakti tapu a libi fu sma?
1 „Den moi fu leisi, den e kon na a yoisti ten, èn den e gi deki-ati.” „Den tijdschrift disi e gi deki-ati moro leki iniwan tra tijdschrift di mi leisi.” Den sani disi di leisiman na heri grontapu e taki, e sori krin fa den e feni A Waktitoren nanga Ontwaakt! Iya, den tijdschrift fu wi buweisi taki den na trutru warti yepisani fu miti „ala sortu sma” nanga a bun nyunsu.—1 Tim. 2:4.
2 Wan bisnisman ben kisi wan Ontwaakt! di ben e taki fu wan tori fu san a ben wani sabi moro. Bakaten, a ben leisi A Waktitoren di ben kon na doro makandra nanga na Ontwaakt! dati. A Waktitoren ben abi wan artikel na ini di meki taki a go ondrosuku a sani di a ben e bribi en heri libi langa, namku a Dri-wánfasi. A sani disi meki taki a ben wani sabi moro. Baka siksi mun a man disi teki dopu. Wan tra man ben e kisi den tijdschrift doronomo, ma noiti a no ben e leisi den. Na a tra sei, en wefi no ben wani miti den Kotoigi ma a ben e leisi den tijdschrift di den Kotoigi ben e gi en masra. A pramisi fu Bijbel di e taki fu wan paradijs na grontapu pe regtfardikisma wawan o de, ben naki na ati fu na uma disi. Baka wan pisi ten na uma disi, en manpikin, èn a sisa fu na uma, tron dinari fu Yehovah.
3. Fu san ede a moro bun te wi e pristeri A Waktitoren makandra nanga na Ontwaakt!?
3 Pristeri ala tu tijdschrift: Soleki fa den eksempre di wi ben luku kaba e sori, dan wi no sabi suma o leisi den tijdschrift fu wi èn wi no sabi sortu pisi tori o meki wan sma wani sabi moro (Preik. 11:6). Fu dati ede, a moro bun te wi e pristeri A Waktitoren makandra nanga na Ontwaakt!, aladi a de so furu tron taki wi e poti prakseri na wán tijdschrift nomo. Na ini son situwâsi a ben o bun fu pristeri difrenti Waktitoren nanga Ontwaakt! te wi de na wan sma.
4. Fa wi kan seti sani fu du a tijdschriftwroko?
4 A ben o de wan bun sani fu poti wan spesrutu dei na ini a wiki fu teki prati na a tijdschriftwroko. Na tapu a Kalender van Jehovah’s Getuigen 2005, ibri satra poti spesrutu fu du a tijdschriftwroko. A no de fu taki dati sani e difrenti na ini ibri kontren èn a situwâsi fu ibri sma de tra fasi, èn fu dati ede meki son sma e poti wan tra dei di den e gebroiki fu prati den tijdschrift fu wi. Yu abi wán dei na ini a wiki di yu e gebroiki fu du a tijdschriftwroko?
5. Sortu okasi wi kan teki fu prati den tijdschrift, èn san kan yepi wi fu prati den?
5 Poti marki gi yusrefi: Te wi e poti en leki marki fu prati wan spesrutu nomru fu tijdschrift, dan dati kan yepi wi fu prati moro tijdschrift. Yu abi sma pe yu e tyari den tijdschrift go doronomo? Yu e pristeri den tijdschrift na den sma di yu e miti na ini a preikiwroko? Yu kan pristeri den tijdschrift na ini a stratiwroko, na ini bisnis kontren, èn na presi pe furu sma de? Yu abi den tijdschrift te yu e go wan presi, te yu e bai sani, èn te yu e go miti sma? Teki ibri okasi di fiti fu yepi trawan kisi wini fu A Waktitoren nanga Ontwaakt!
6. Fa wi kan gebroiki den owru tijdschrift bun?
6 Wi kan poti en leki marki sosrefi fu prati den owru tijdschrift di wi abi ete. Srefi efu wi no prati den tijdschrift wan noso tu mun baka a datum di skrifi na tapu a tijdschrift, toku den sani di skrifi na ini, warti ete. Meki muiti fu prati den gi den sma di wani sabi moro. Milyunmilyun sma feni taki A Waktitoren nanga Ontwaakt! na tijdschrift di ’abi wan wortu na ini, di taki na a yoisti ten’ (Odo 25:11). Meki wi gebroiki den tijdschrift disi fu yepi milyunmilyun sma ete fu kon sabi Yehovah èn fu dini en.