Tijdschrift e bariwroko gi a kownoekondre
1 Leki Jehovah Kotoigi, sma sabi wi heri boen foe a fajafaja preikiwroko foe wi foe a Kownoekondre foe Gado. Den Waktitoren nanga Ontwaakt! tijdschrift di wi e prati e plèi wan prenspari ròl ini a jepi di den e jepi miljoenmiljoen sma foe leri den sani di Gado abi na prakseri. A boskopoe di den abi na troetroe boen njoensoe, foe di a e bariwroko gi a Kownoekondre foe Gado na hemel leki a wan-enkri howpoe gi a libisma famiri.
2 Den tijdschrift e taki foe den sani di sma troetroe abi fanowdoe — na emotioneel sei, na sociaal sei, èn na jejefasi. Ala di moreel markitiki èn markitiki na ini na osofamiri, na ala sei e kon moro takroe, A Waktitoren nanga Ontwaakt! e jepi sma foe meki a fasi fa den e libi kon moro betre, foe di den e sori sma fa foe gebroiki bijbel gronprakseri. A sa prisiri wi foe pristeri den tijdschrift na ini april nanga mei.
3 Den e hari a prakseri foe sma troetroe: A Waktitoren nanga Ontwaakt! de foe kisi na ini den tongo foe pikinmoro ala sma di e libi na grontapoe. Foe dati ede, sma sabi den tijdschrift foe wi heri boen. Djaso wan toe reide de foe san ede den e hari sma prakseri:
◼ Leki tijdschrift foe soifri retifasi nanga waarheid, den e sori krinkrin a difrenti na mindri boen nanga ogri.
◼ Den e gi a howpoe foe wan regtfardiki paradijs di sa kon, èn a abi en gron tapoe a pramisi foe Gado foe meki grontapoe kon na ondro a Kownoekondre tiri foe en.
◼ Den e gi foeroe difrenti tori di e kon na a joisti ten, èn den e hari a prakseri foe sma foe ala background nanga koeltoeroe.
◼ Den artikel no langabere, den e gi leri, den e gi soifri bodoi, èn den no e kroetoe sma sondro reide noso den no e meki skeki.
◼ Den prenki di abi krakti na tapoe sma, e meki den kisi belangstelling wantewante, èn a krin fasi fa den skrifi den sani, e meki taki den tijdschrift de makriki foe leisi.
4 Prati den foeroe: A prati di wi e prati tijdschrift nanga boen bakapisi e anga foe a sreka di wi e sreka wisrefi na wan fajafaja fasi gi den pristeri foe wi, fa wi e orga a ten foe wi èn fa wi e orga wi preikiwroko. Praktis rai ben gi na ini Wi Kownoekondre Dienst foe september 1995 nanga oktober 1996, èn a ben sa boen foe loekoe den baka èn foe gebroiki den.
5 Kon sabi den tijdschrift joesrefi: Te joe e leisi ibri uitgave, dan prakseri soema ben o warderi en foe abi wan. Loekoe spesroetoe penti noso tekst di joe kan kari na ini joe pristeri. Prakseri sortoe aksi joe ben sa kan poti foe bigin wan takimakandra èn foe wiki a belangstelling gi a tori.
6 Fiti a pristeri na a sma: Sreka wan makriki pristeri di joe kan fiti na wan mansma, wan oemasma, wan bigisma, noso wan jongoesma, awinsi a de wan sma di joe sabi boen noso wan freimdesma.
7 De alaten srekasreka foe pristeri A Waktitoren nanga Ontwaakt!: Foe di den tijdschrift e go makriki na ini wan tas noso wan saka, dan wi kan tjari eksemplaar nanga wi te wi e rèis noso te wi e go na wenkri foe bai sani. Pristeri den te joe e taki nanga famiriman, birtisma, sma di e wroko makandra nanga joe, skoromati, skoromeester noso skoromisi. Poti wán dei ini ibri wiki na wan sei, foe gi kotoigi nanga tijdschrift.
8 Sori warderi gi den tijdschrift: Noiti den e lasi a waarde foe den. A pasa di a ten e pasa no e meki taki a boskopoe di de na ini den tijdschrift, e kon de wan sani di no de so prenspari moro. A no de foe taki, dati efoe wi e doe spesroetoe moeiti foe prati ala den tijdschrift di wi e teki, dan den moro owroe eksemplaar no e kon tron wan ipi na tapoe wi boekoeplanga.
9 Stratiwroko abi boen bakapisi: Disi na wan foe den moro boen fasi foe pristeri den tijdschrift na wan bigi nomroe foe sma. Son preikiman e wroko tapoe den strati di druk tapoe difrenti ten ini wan dei te sma e go na wenkri foe bai sani.
10 Bisnis gebied e gi boen bakapisi: Te wi e gi kotoigi wenkri foe wenkri, wi no abi foeroe sma di no de na oso. Moro foeroe bisnis sma de nanga switifasi, èn foeroe foe den e teki den tijdschrift nanga prisiri. Poti prakseri tapoe artikel di joe kan gebroiki gi wan spesroetoe bisnis-presi di joe o fisiti.
11 Tijdschrift route e gi foeroe: Foe di den tijdschrift e kon na doro toe leisi na ini wan moen, dan a de joisti foe go baka na sma di e leisi den èn foe gi den a njoen uitgave. Wi moesoe meki gobaka doronomo, no wawan foe tjari den tijdschrift ma so srefi foe wiki a belangstelling foe a sma gi bijbel. Te wi abi tijdschrift route, dan dati kan meki taki den sma dati kan kon tron bijbelstudie.
12 Doe ala moeiti na ini april nanga mei: A Waktitoren nanga Ontwaakt! wini a froetrow foe miljoenmiljoen sma di abi warderi gi san den e leisi na ini den tijdschrift. Den e bariwroko gi a kownoekondre heri boen, èn foe dati ede wi moesoe abi den nanga wi èn pristeri den na ibri okasi. Meki april nanga mei sori foe de toemoesi boen moen foe prati tijdschrift!