Doe ala sani gi a glori foe Gado
1 Fa a e gi wi kowroe-ati foe abi demakandra nanga wi lobi brada nanga sisa! (1 Kor. 16:17, 18) Wi e doe disi tapoe den konmakandra, den spesroetoe-dei konmakandra, den kring-konmakandra, den kongres, èn na ini a velddienst. Wi abi demakandra toe na tra okasi, soleki te wi abi sma di e fisiti wi na oso. Te wi e doe disi, dan wi e sori a lobi di wi lobi foe teki sma na oso èn wi e gi makandra deki-ati (Rom. 12:13; 1 Petr. 4:9). Te wi e seti sani gi wan trowfesa, dan a boen foe hori a moi rai na prakseri di skrifi na ini De Wachttoren foe 15 juli 1984.
2 Sociaal afersi di orga: Efoe wi „e njan noso e dringi noso e doe wan tra sani”, wi moesoe „doe ala sani gi a glori foe Gado” (1 Kor. 10:31-33). Wan toe sma no e doe san a rai disi e taki, èn problema e tan kon bikasi den sociaal demakandra bigi toemoesi foe hori wan ai na tapoe den. Na ini son kefal, hondrohondro sma e kisi wan kari foe kon na wan bigi fesa di abi na ini en grontapoe prisiri toe. Son tron den e aksi den sma di e fisiti a fesa, foe bai wan karta foe fisiti a fesa noso foe pai wan tra pisi moni. Den sortoe demakandra disi e gersi sani foe grontapoe srefisrefi, èn a jeje foe grontapoe no de akroederi boen maniri nanga bijbel gronprakseri.—Rom. 13:13, 14; Ef. 5:15-20.
3 Wi kisi raport di e taki dati [na ini wan toe kondre] boen foeroe Kotoigi kon makandra na presi di den joeroe èn pe den meki prisiri di no boen èn di gersi di foe grontapoe èn pe den no man hori ai boen na tapoe san e pasa. Den srefi sortoe aktiviteit disi den ben hori na den hotel noso tra presi foe ontspanning èn den ben kari den sani disi „Jehovah Kotoigi” na a kaba foe a wiki. Foe di a moeilek foe hori wan ai na tapoe so wan bigi groepoe, dati meki problema e kon. A waka di sani no ben waka boen srefisrefi, a dringi di sma ben dringi toemoesi foeroe sopi, èn srefi a doe di sma ben doe seks hoeroedoe, ben de a bakapisi foe dati son leisi (Ef. 5:3, 4). Den demakandra disi, pe sma e tjari densrefi na so wan fasi, no e gi Gado glori. Na presi foe dati, den e tjari sjen kon tapoe a boen nen foe a gemeente èn den e meki trawan naki foetoe fadon.—1 Kor. 10:23, 24, 29.
4 Kresten e kisi a deki-ati foe sori a lobi foe teki trawan na oso, ma den moesoe poti krakti na tapoe a prati di den e prati sani na jejefasi nanga makandra (Rom. 1:11, 12). Te pikinpikin groepoe e kon makandra foe abi pikinso ontspanning, dan foeroetron dati moro boen. A Georganiseerd-boekoe e taki tapoe bladzijde 136 nanga 137: „Ten na ten, wan toe osofamiri kan kisi wan kari foe kon na wan oso foe abi kresten demakandra. . . . A de reidelek, taki den wan di e teki den sma na oso na ini den kefal dati, e feni taki den abi a frantiwortoe gi san e pasa. Nanga disi na prakseri, koni kresten si a koni foe skotoe a nomroe foe sma foe a groepoe nanga a ten di den e teki foe abi a demakandra.” Jesus ben sori taki no wan sortoe foe pranpran de fanowdoe te wi abi a marki foe gi wi mati deki-ati na jejefasi.—Luk. 10:40-42.
5 A de wan switi sani foe sori taki wi lobi foe teki wi kompe-kresten na oso. Ma, wan bigi difrenti de na mindri wan bescheiden demakandra na oso èn wan bigi fesa di e sori a jeje foe grontapoe na wan presi di joe joeroe. Te joe e gi trawan wan kari foe kon fisiti joe, dan joe moesoe de seiker taki joe man teki a frantiwortoe gi den sani di sa pasa.—Loekoe A Waktitoren foe 1 augustus 1992, bladzijde 26-29.
6 Troetroe, Jehovah blèsi wi nanga wan bradafasi di e gi wi kowroe-ati nanga deki-ati, di e boeweigi wi foe go doro nanga toemoesi boen wroko (Mat. 5:16; 1 Petr. 2:12). Foe di wi e sori bescheidenfasi èn foe di wi e sori taki wi reidelek na ini sociaal aktiviteit, dati meki ala ten wi sa gi wi Gado glori èn wi sa bow tra sma.—Rom. 15:2.