Nyun seti fu preiki pe furu sma de
1. Sortu eksempre den fosi yarihondro Kresten gi?
1 Den Kresten na ini a fosi yarihondro no ben e preiki oso fu oso nomo. Den ben e preiki na fesi ala sma (Tori 20:20). Fu eksempre, den ben preiki na a tempel pe den ben sabi taki furu sma ben o de (Tori 5:42). Di na apostel Paulus ben de na ini Ateine, a ben e preiki ibri dei gi den sma di ben de na wowoyo (Tori 17:17). Na ini a ten disi na oso-fu-oso preikiwroko na a moro prenspari fasi fa wi e prati a bun nyunsu. Ma wi e go tu na presi pe sma e wakti bus, na den presi pe sma e go koiri, den strati pe furu sma de èn na tra presi, fu di wi wani preiki gi sma na ala presi pe den de. Aladi wi e gi ala preikiman a deki-ati fu preiki na den presi pe furu sma de, toku furu fu wi o abi wan spesrutu okasi fu preiki na den presi disi. Tu spesrutu fasi de fa wi kan du dati.
2. Sortu spesrutu sani wi pruberi na ini november 2011?
2 Wan spesrutu fasi fu preiki gi furu sma: Soleki fa wi skrifi na tapu bladzijde 16 nanga 17 fu a Jaarboek 2013, dan na ini november 2011 wi ben pruberi wan spesrutu fasi fu preiki gi furu sma na ini a foto New York. Na den presi pe furu sma e waka tapu strati, wi ben e poti tafra nanga publikâsi di de na ini furu tongo. Wi poti den na so wan fasi taki den sma kan si den. Ibri dei dusundusun sma ben e waka pasa, soleki den sma di e tan na den presi pe Kotoigi no kan go preiki èn den sma di nofo tron no de na oso. Bun furu sma ben wani den publikâsi fu wi. Na ini wán mun nomo, 3797 tijdschrift nanga 7986 buku ben prati. Furu sma di ben e waka pasa, ben aksi wan Bijbelstudie. Fu di a moro prenspari marki di wi ben abi ben de fu bigin Bijbelstudie, meki den adres fu den sma di ben wani sabi moro ben seni go wantewante na a gemeente di ben kan yepi den moro fara.
3. Fa wi o orga a wroko disi na ini tra kondre?
3 Fu di a sani disi ben abi bun bakapisi, meki wi o du dati tu na heri grontapu na den kontren pe furu sma e tan. Na a bijkantoro fu wan kondre o taki na ini sortu kontren noso foto den o bigin nanga a wroko disi. Moro furu a o de den presi pe furu sma e kon fu teki wagi, noso pe furu kantoro de èn pe furu sma e waka pasa. A bijkantoro o meki kontakti nanga den gemeente di o du a wroko disi èn a bijkantoro o taigi den fa den musu du a wroko disi. Moro furu a o de so taki wi o gebroiki gewoon pionier nanga spesrutu pionier fu du a wroko disi, aladi na son presi den yepi-pionier kan yepi tu.
4. Fa wi e du a spesrutu preikiwroko disi?
4 Fa wi o du a preikiwroko disi: Den wan di o du a spesrutu wroko disi o tanapu na a tafra e wakti teleki wan sma kon na den. Te wan sma kon, dan yu e taigi en taki a kan teki wan publikâsi di a lobi. Efu a sma abi aksi, dan den pionier e gebroiki Bijbel fu piki na aksi fu en. Efu a teki wan publikâsi, dan a pionier no o taigi en taki a kan gi wan bijdrage. Ma efu a sma wani sabi pe wi e feni a moni fu du a wroko disi, dan den kan taigi en taki bijdrage kan seni go na wan fu den adres di skrifi na ini a publikâsi. Efu a kan, yu kan aksi a sma: „Yu wani meki wan sma kon na yu na oso?” Noso yu kan aksi en: „Boiti taki yu no abi fu pai gi a buku di yu teki, yu ben sabi taki wi kan studeri Bijbel nanga yu sondro taki yu abi fu pai?”
5. Sortu blesi a ben tyari kon gi wan trowpaar di den ben teki prati na a spesrutu preikiwroko disi?
5 A wroko disi tyari furu blesi kon. Wan trowpaar ben taki: „Te wi e tanapu na a tafra èn e si fa dusundusun sma e waka pasa ibri dei, dan dati e meki wi frustan moro bun o furu muiti e du fu preiki gi sma na heri grontapu. Te wi e si den furu sma disi, dan wi e denki fa Yehovah lobi ibri sma. Disi meki taki wi abi a fasti bosroiti fu meki a preikiwroko de a moro prenspari sani na ini wi libi. Wi e denki fa Yehovah e ondrosuku den ati fu ala den sma di e waka pasa na a tafra èn e suku den wan di warti fu yere a bun nyunsu. Wi e firi leki wi e wroko skinskin nanga den engel di e du a wroko disi tu.”
6. (a) Sortu spesrutu fasi fu du a preikiwroko den gemeente o orga, èn fa disi e difrenti fu a spesrutu preikiwroko di e du na den bigi foto? (b) Fa den gemeente kan wroko nanga makandra te den e du a preikiwroko na den presi pe furu sma de?
6 Gemeente e orga sani fu du a preikiwroko pe furu sma de: Boiti a spesrutu preikiwroko di e du na bigi foto, wan nyun okasi de fu preiki pe furu sma de èn di den gemeente owruman e orga na ini a kontren fu den. Na a preikiwroko disi den preikiman e poti wan tafra na wan presi di de na ini a kontren di den kisi fu preiki èn pe furu sma e waka pasa. Disi no de a srefi leki a spesrutu preikiwroko di e du na ini den bigi foto di a bijkantoro e orga èn pe den e gebroiki pionier fu den gemeente fu preiki na den presi pe furu sma e waka pasa.—Luku a faki: „A de fanowdu fu wroko bun nanga makandra.”
7. Efu a kan, dan fa den owruman kan orga a spesrutu preikiwroko fu preiki na presi pe furu sma de na ini a kontren fu den?
7 Den owruman o luku efu presi de na ini a kontren fu den pe furu sma e waka pasa èn den o bosroiti efu a ben o bun fu orga a spesrutu preikiwroko disi. Den kan poti tafra nanga den publikâsi fu wi na den presi pe sma e wakti bus, na den pren, na den presi pe sma e go koiri, na den strati pe furu sma e waka, na den mall, na den presi pe sma e teki opolani. A bun te wi e poti wan tafra na a srefi presi, na den srefi dei èn na a srefi ten. Wi kon si taki a abi moro wini te yu e poti den tafra na den mall, na presi fu poti den na wan bigi wenkri nomo, fu di den sma di e go na den wenkri dati e waka go langalanga na ini a wenkri fu bai a sani di den wani. A ben o moro bun efu unu ben o poti wan pikin tafra di makriki fu puru, na den smara presi pe furu sma e waka. Na a website fu wi den owruman kan puru prenki fu A Waktitoren nanga Ontwaakt!, nanga a Bijbel leri-buku. Den prenki disi meki spesrutu fu gebroiki na a spesrutu preikiwroko disi. Luku den prenki na tapu bladzijde 6. Den preikiman di den owruman o gebroiki fu du a preikiwroko disi, o du en na a srefi fasi leki den wan di e du a spesrutu preikiwroko na ini den bigi foto. Dati meki den musu du a preikiwroko leki fa a dienst-opziener e taigi den fu du. Efu den kisi na adres fu wan sma di wani sabi moro, ma di no e tan na ini a kontren fu den, dan wantewante den musu skrifi a nen nanga na adres fu a sma èn gi dati na a sekretarsi.
8. Efu a gemeente no e orga sani fu du a spesrutu preikiwroko na den presi pe furu sma de, dan sortu okasi yu abi kande fu preiki na den presi pe furu sma e kon?
8 Yusrefi kan preiki na den presi pe furu sma de: Kande son gemeente no abi wan presi na ini a preikiwroko kontren fu den pe furu sma e waka èn dati meki den no o abi fu poti wan tafra nanga buku na den presi dati. Ma toku wi e gi den gemeente dati deki-ati fu preiki na den presi pe furu sma de. Wan mall de na ini a kontren fu unu, wan wowoyo, noso wan wenkri pe furu sma e kon? Wan presi de pe furu sma gwenti kon makandra? Sani e orga wanwan leisi na ini a yari pe furu sma e kon makandra, soleki beurs? Efu dati de so, dan toku yu kan preiki na den presi disi pe furu sma de.
9. Fu san ede wi musu de na ai fu preiki na ala presi pe wi kan miti sma?
9 Yehovah wani taki „ala sortu sma musu kisi frulusu èn taki den musu kon sabi a tru leri finifini” (1 Tim. 2:4). Fu dati ede wi e pruberi fu fruteri furu sma a Kownukondre boskopu fosi a kaba kon (Mat. 24:14). Na furu presi a no makriki fu miti den sma na oso. Ma toku wi kan taki nanga den te den no de na oso èn te den de na wan presi pe furu sma e kon. Kande na den presi disi wawan wi kan miti son sma di o kisi na okasi fu yere a bun nyunsu. Sobun, te wi e preiki gi sma na ala presi pe wi kan miti den, dan wi o man du wi wroko finifini.—2 Tim. 4:5.
[Faki na tapu bladzijde 5]
A de fanowdu fu wroko bun nanga makandra
Wi kon yere taki preikiman fu difrenti gemeente e du stratiwroko na a srefi strati, den srefi presi pe sma e teki wagi, èn na fesi den srefi wenkri. Preikiman fu difrenti gemeente e libi tijdschrift na den srefi kantoro èn den e preiki na a srefi presi pe sma e du bisnis. Son leisi bisnisman nanga sma di e tan na ini a birti no ben lobi a sani disi. Den ben atibron tu te furu preikiman no e preiki drape na a srefi ten. Fu dati ede a moro bun fu tan na ini a preikiwroko kontren fu a gemeente te yu e preiki na den presi disi pe furu sma e kon.
Efu preikiman wani du stratiwroko na ini a kontren fu wan tra gemeente, dan den musu taki fosi nanga a dienst-opziener fu a gemeente fu den. A dienst-opziener sa taki nanga a dienst-opziener fu a tra gemeente fu kisi primisi fosi den preikiman fu en gemeente kan go preiki drape. Efu wan tu gemeente di no e taki a srefi tongo e preiki na ini a srefi kontren, dan den dienst-opziener fu den musu taki bun nanga makandra so taki den no e meki den sma na ini a birti dati atibron. Te wi e wroko bun nanga makandra, dan ala sani e pasa „na wan fasi di fiti èn soleki fa sani seti”.—1 Kor. 14:40.
[Prenki na tapu bladzijde 6]
[Prenki na tapu bladzijde 6]