Difrenti fasi fa wi kan preiki a bun nyunsu

YESUS KRESTES ben de wan fayafaya preikiman fu a bun nyunsu èn dati meki a de wan bun eksempre gi den bakaman fu en. A no ben e wakti fu sma kon na en, ma ensrefi ben e go na den. A ben e taki nanga den èn a ben e gi den leri na den oso èn na tra presi (Mat. 9:35; 13:36; Luk. 8:1). Yesus ben e taki nanga ibri sma di a miti, a ben gi leri na den disipel te den ben de den wawan na wan presi èn a ben taki tu nanga bigi grupu sma (Mark. 4:10-13; 6:35-44; Yoh. 3:2-21). A ben gebroiki ibri okasi fu gi sma deki-ati nanga howpu (Luk. 4:16-19). Srefi te a ben e rostu èn a ben kisi na okasi fu preiki, a ben e du dati (Mark. 6:30-34; Yoh. 4:4-34). Te wi e leisi den tori fu a diniwroko fu Yesus, dan dati e pusu wi fu teki na eksempre fu en neleki fa den apostel ben du dati.​—Mat. 4:19, 20; Luk. 5:27, 28; Yoh. 1:43-45.

² Meki wi go luku den difrenti okasi di Kresten abi na ini a ten disi fu teki prati na a wroko di Yesus Krestes bigin sowan 2000 yari pasa.

PREIKI OSO FU OSO

³ Leki Kotoigi fu Yehovah wi e frustan o prenspari a de fu preiki a bun nyunsu fu a Kownukondre oso fu oso. Fu di wi e du disi so furu, meki sma sabi wi leki preikiman di e waka oso fu oso. Den bun bakapisi fu na oso-fu-oso wroko e sori taki disi na a moro bun fasi fu tyari a boskopu gi milyunmilyun sma na ini wan syatu pisi ten (Mat. 11:19; 24:14). Na oso-fu-oso preikiwroko na wan bun fasi fu sori taki wi lobi Yehovah èn taki wi lobi tra sma.​—Mat. 22:34-40.

⁴ Ma toku Yehovah Kotoigi a no den fosiwan di bigin du na oso-fu-oso preikiwroko. Na apostel Paulus taki dati a ben e gi sma leri na den oso. A ben taigi den brada di ben e teki fesi na ini a gemeente fu Efeise fa a ben go nanga a diniwroko fu en. A taigi den: ’Sensi a fosi dei di mi poti futu na ini a distrikt Asia . . . mi no tapu fu fruteri unu ala sani di o tyari wini gi unu èn mi gi unu leri . . . oso fu oso.’ Na a fasi disi èn na tra fasi tu Paulus ’fruteri den Dyu nanga Grikisma finifini taki den musu abi berow, taki den musu teki Gado sei èn taki den musu bribi na ini wi Masra Yesus’ (Tori 20:18, 20, 21). Na a ten dati den grankownu fu Rome ben e gi sma deki-ati fu du afkodrei èn furu sma ben ’abi lespeki gi den gado’ fu den. Ma a ten ben doro taki den sma ben musu suku „a Gado di meki grontapu nanga ala sani na en tapu”, a Gado di ben e „taigi ala libisma na ala sei taki den musu abi berow”.​—Tori 17:22-31.

⁵ Now a de moro prenspari srefi fu fruteri sma a bun nyunsu. A kaba fu na ogri grontapu e kon krosibei esi-esi. Fu dati ede, wi e du ala san wi man fu du moro na ini a preikiwroko. Te wi e preiki oso fu oso, dan dati na a moro bun fasi fu suku den sma di e angri fu kon sabi a tru leri. Neleki fa na oso-fu-oso preikiwroko ben abi bun bakapisi na ini a ten fu Yesus nanga den apostel, na so a de tu na ini a ten disi.​—Mark. 13:10.

⁶ Yu e du ala san yu man na ini na oso-fu-oso preikiwroko? Efu dati de so, dan yu kan de seiker taki Yehovah e prisiri nanga yu (Esek. 9:11; Tori 20:35). Kande a no makriki gi yu fu preiki oso fu oso. A kan taki yu siki noso owru, noso yu e preiki na ini wan kontren pe furu sma no wani arki. Kande lanti tapu a wroko srefi. A kan tu taki yu e syen èn taki a muilek gi yu fu bigin wan takimakandra nanga sma di yu no sabi. Dati meki ibri leisi te yu de na ini na oso-fu-oso preikiwroko yu e frede. Ma no lasi-ati (Eks. 4:10-12). A situwâsi fu yu no e difrenti fu a di fu den brada nanga sisa fu yu na furu tra presi.

⁷ Yesus ben pramisi den disipel fu en: „Unu o si taki mi o de nanga unu ala dei te na a kaba fu grontapu” (Mat. 28:20). A pramisi dati de wan deki-ati gi wi fu du a preikiwroko èn fu meki disipel. Wi e firi leki na apostel Paulus di taki: „Mi man du ala sani nanga yepi fu a sma di e gi mi krakti” (Fil. 4:13). Horibaka gi den sani di a gemeente seti fu du na oso-fu-oso preikiwroko. Te yu e wroko nanga trawan, dan yu o kisi deki-ati èn den o man yepi yu fu du a preikiwroko moro bun. Begi Yehovah, so taki noti no tapu yu fu du a preikiwroko. Du ala muiti fu wroko tranga leki wan preikiman fu a bun nyunsu.​—1 Yoh. 5:14.

⁸ Te yu e fruteri tra sma a bun nyunsu, dan dati o gi yu na okasi fu taigi den ’sani di abi fu du nanga a howpu fu yu’ (1 Petr. 3:15). Yu o kon si moro nanga moro taki wan bigi difrenti de na mindri den wan di e howpu tapu a Kownukondre èn den wan di no abi a howpu dati (Yes. 65:13, 14). Yu o prisiri fu di yu sabi taki yu gi yesi na a komando di Yesus gi fu ’meki wi leti skèin’. Kande yu o abi a grani fu yepi trawan fu kon sabi Yehovah nanga den tru leri di kan meki den kisi têgo libi.​—Mat. 5:16; Yoh. 17:3; 1 Tim. 4:16.

⁹ A gemeente seti sani fu du na oso-fu-oso preikiwroko na tapu satra nanga sonde èn na den mindriwiki dei. Na ini a kontren fu son gemeente pe a no makriki fu miti sma na oso te mamanten, den seti sani fu go preiki na mofoneti. Te den e preiki na bakadina noso na mofoneti, dan den e miti moro sma di wani arki leki te mamanten.

SUKU DEN WAN DI WARTI

¹⁰ Yesus ben taigi den disipel fu en fu „suku” den wan di warti (Mat. 10:11). Na oso-fu-oso preikiwroko no ben de a wan-enkri fasi fa Yesus ben suku den wan di ben wani kon sabi moro. A ben abi a gwenti fu preiki na ibri okasi pe a ben fiti fu du dati èn a ben e preiki oso fu oso (Luk. 8:1; Yoh. 4:7-15). Den apostel ben e preiki tu gi sma na difrenti presi.​—Tori 17:17; 28:16, 23, 30, 31.

¹¹ Na a srefi fasi wi na ini a ten disi wani fruteri a Kownukondre boskopu na ibri sma di wi e miti. Dati meki wi e suku fu meki disipel leki fa Yesus nanga den apostel ben e du dati. Boiti dati, wi e hori na prakseri taki sani e kenki na grontapu èn taki a situwâsi fu ibriwan fu den sma na ini a kontren fu wi de tra fasi (1 Kor. 7:31). Fu eksempre, son preikiman ben abi bun bakapisi di den go taki nanga sma na bisnis presi. Na ini furu kondre, preikiman ben abi bun bakapisi di den du stratiwroko, di den preiki na presi pe sma e go koiri, pe sma e parkeer wagi, noso na iniwan tra presi pe sma de. Son gemeente e poti tafra noso wagi nanga buku na wan presi na ini a kontren fu den. Son bijkantoro kan orga sani fu du spesrutu preikiwroko na ini bigi foto na presi pe furu sma de. Den kan gebroiki preikiman fu difrenti gemeente fu du disi. A bakapisi na taki den sma di wi no e miti na oso te wi e preiki na ini a birti fu den, kan yere a bun nyunsu na wan tra presi.

¹² Te wi e preiki na presi pe furu sma de èn wi miti sma di wani sabi moro fu Bijbel, dan wi kan gi den wan buku noso tijdschrift di e hari en prakseri. Yu kan gi en yu nen nanga telefon-nomru èn yu kan seti sani fu miti en baka. Yu kan sori en a website fu wi tu èn yu kan gi en na adres fu a moro krosibei konmakandra presi fu wi. Te yu e preiki na presi pe furu sma e waka pasa, dan dati na wan moi fasi fa yu kan du moro na ini yu diniwroko.

¹³ Ma toku a preiki di wi e preiki a bun nyunsu a no a wan-enkri sani di Kresten musu du na ini a ten disi. Efu yu wani yepi sma fu kon sabi den tru leri fu Bijbel di kan gi den libi, dan yu o abi fu go baka na den sma di wani sabi moro. Disi o yepi den fu tron lepi Kresten.

TYARI GOBAKA

¹⁴ Yesus ben taigi den bakaman fu en: „Unu sa de kotoigi fu mi . . . te na den moro farawe presi fu grontapu” (Tori 1:8). Ma a ben taigi den tu: „Fu dati ede, go na sma fu ala kondre èn meki den tron disipel. . . . Leri den fu du ala san mi taigi unu fu du” (Mat. 28:19, 20). Te wi e tyari gobaka, dan dati kan meki taki wi kisi moro prisiri na ini a diniwroko fu Yehovah. Furu tron a de so taki sma di arki yu a fosi leisi di yu fruteri den a bun nyunsu, e feni en bun taki yu kon baka na den wan tra leisi. Te yu go baka na den fu fruteri den tra Bijbel tori, dan yu abi na okasi fu meki a bribi di den abi na ini Gado kon moro tranga èn yu o man yepi den fu kon si taki den abi Gado fanowdu na ini den libi (Mat. 5:3). Efu yu sreka yusrefi bun èn yu e go baka na a sma na wan ten di bun gi en, dan kande yu o man bigin wan Bijbelstudie. Te yu luku en bun, dan na dati meki wi e tyari gobaka. Wi no e prani a siri fu den tru leri nomo, ma wi e gi en watra tu.​—1 Kor. 3:6.

¹⁵ A kan muilek gi son sma fu tyari gobaka. Kande yu sabi kaba fa fu taki syatu nanga wan sma fu a bun nyunsu èn yu e prisiri fu preiki na a fasi dati. Ma te yu e prakseri fu go baka na a sma fu taki moro fini nanga en fu Bijbel, dan kande yu e frede srefisrefi. Te yu sreka bun na fesi, dan yu no o frede moro. Meki muiti fu gebroiki den rai di wi e kisi na den mindriwiki konmakandra. Efu yu wani, yu kan aksi wan preikiman di abi moro ondrofeni fu go nanga yu.

HORI BIJBELSTUDIE

¹⁶ Wan leisi wan man di ben teki a Dyu bribi ben e leisi Gado Wortu. Di Filipus taki nanga a man, a aksi en: „Yu sabi san yu e leisi?” A man piki en: „We, fa mi ben sa sabi dati dan, efu nowan sma e leri mi?” Baka dati a Bijbel buku Tori fu den apostel kapitel aiti e fruteri wi taki Filipus gebroiki a tekst di a man ben e leisi fu bigin „fruteri en a bun nyunsu fu Yesus” (Tori 8:26-36). Wi no sabi o langa Filipus sidon taki nanga a man, ma a ben fruteri en a bun nyunsu na so wan fasi, taki a tron wan bribiman èn a aksi Filipus fu dopu en. Na so a tron wan disipel fu Yesus Krestes.

¹⁷ Na ini a ten disi wi e miti furu sma di no sabi a Bijbel so bun. Dati meki wi musu go baka na den wan tu leisi èn wi musu studeri finifini nanga den. Kande wi o abi fu studeri nanga den wan tu wiki, wan tu mun, wán yari noso moro langa srefi, so taki a bribi fu den kon tranga èn den man dopu. Ma a pasensi di yu e sori, nanga a lobi-ati fasi fa yu e yepi reti-ati sma fu tron disipel, o tyari blesi gi yu. A de neleki fa Yesus ben taki: „Wan sma sa de moro koloku te a e gi sani, leki te a e kisi sani.”​—Tori 20:35.

¹⁸ A no de fu taki dati a o moro makriki gi yu fu hori wan Bijbelstudie nanga yepi fu wan fu den buku di meki spesrutu gi dati.Te yu e fiti den rai di wi e kisi na den mindriwiki konmakandra èn e wroko nanga leriman di abi ondrofeni, dan dati kan yepi yu fu hori Bijbelstudie di e go na fesi. Na a fasi disi yu o yepi sma fu tron disipel fu Yesus Krestes.

¹⁹ Efu yu abi yepi fanowdu fu bigin èn fu hori Bijbelstudie, dan yu no musu frede fu taki a tori disi nanga wan fu den owruman, noso nanga wan tra Kotoigi di abi bun bakapisi nanga den Bijbelstudie fu en. Den sani di kari na ini a Kresten libi nanga preikiwroko Studie-buku nanga den demo na a konmakandra dati o yepi yu tu. Frutrow tapu Yehovah èn fruteri en na ini begi taki yu wani wan Bijbelstudie (1 Yoh. 3:22). Sobun, meki muiti fu abi wan Bijbelstudie awinsi yu e studeri nanga yu osofamiri kaba. Te yu e hori Bijbelstudie, dan dati o yepi yu fu abi moro prisiri na ini a preikiwroko.

YEPI NYUN SMA FU KON NA INI NA ORGANISÂSI FU YEHOVAH

²⁰ Te wi e yepi sma fu kon sabi Yehovah Gado èn fu tron disipel fu Yesus Krestes, dan den e kon na ini a gemeente. Bijbelstudenti o go na fesi èn den o tron lepi sma te den kon sabi na organisâsi fu Yehovah èn te den e wroko makandra nanga na organisâsi dati. A prenspari fu leri den fa den kan du dati. Fu yepi wi, den brada meki spesrutu felem èn a brochure Suma e du a wani fu Yehovah na ini a ten disi? Den tori na ini kapitel fo fu a buku disi kan yepi yu tu.

²¹ Te yu e studeri Bijbel nanga wan sma, dan na a bigin kaba yu musu yepi en fu frustan taki Yehovah e gebroiki na organisâsi fu en fu du a preikiwroko na grontapu na ini a ten disi. Sori en san na a waarde fu den buku fu wi di e yepi sma fu frustan Bijbel. Fruteri en taki na sma di e dini Gado nanga den heri ati e yepi fu meki èn fu prati den buku disi na ala sei fu grontapu, sondro fu kisi pai. Gi den Bijbelstudenti fu yu a kari fu kon nanga yu na a Kownukondre zaal. Fruteri den fa wi e hori den konmakandra fu wi èn meki den kon sabi den brada nanga sisa drape. Yepi den fu kon sabi tra Kotoigi te unu de na den kring konmakandra nanga den kongres. Na den okasi disi èn na tra okasi den nyun sma disi kan si fa den futuboi fu Yehovah e sori lobi, a moro prenspari fasi fu tru Kresten (Yoh. 13:35). Te a sma di wani kon sabi moro e kisi moro warderi gi na organisâsi fu Yehovah, dan a o meki moro muiti fu kon krosibei na Yehovah.

GEBROIKI BUKU DI E TAKI FU BIJBEL

²² Den fosi Kresten ben kon tron fayafaya preikiman fu a Wortu fu Gado. Den ben e skrifi Bijbel abra gi densrefi, so taki den ben kan gebroiki dati fu studeri na oso, èn na ini a gemeente. Den ben e gi tra sma deki-ati tu fu gebroiki Gado Wortu. Den kopi di den ben e meki nanga anu, no ben de so furu èn fu dati ede den ben e si den leki warti sani (Kol. 4:16; 2 Tim. 2:15; 3:14-17; 4:13; 1 Petr. 1:1). Nanga yepi fu nyun masyin, Yehovah Kotoigi na ini a ten disi e meki hondrohondro milyun Bijbel nanga tra sani fu studeri Bijbel. Den e meki sani soleki traktaat, brochure, buku, nanga tijdschrift na ini hondrohondro tongo.

²³ Te yu e prati a bun nyunsu gi trawan, dan yu musu sorgu taki yu gebroiki den difrenti sani di Yehovah en organisâsi meki fu yepi wi fu studeri Bijbel nanga sma. Fu di yusrefi kisi furu wini di yu leisi èn studeri den buku fu Yehovah Kotoigi, meki yu o wani prati den nanga trawan.​—Hebr. 13:15, 16.

²⁴ Moro nanga moro sma e go suku sani tapu Internet now. Dati meki wi no e meki buku nomo fu prati a bun nyunsu, ma a website jw.org na wan bun fasi fu du a wroko dati tu. Na ini hondrohondro tongo sma na heri grontapu kan gebroiki den computer fu leisi noso arki Bijbel nanga tra buku di e taki fu Bijbel. Den sma di no wani taki nanga wi noso di e libi na ini kontren pe den no man miti Yehovah Kotoigi so furu, kan gebroiki a website jw.org fu ondrosuku a bribi fu wi te den de na oso.

²⁵ Dati meki wi e taki fu a website jw.org na ibri okasi di wi e kisi. Efu wan ososma e aksi wi wan sani fu a bribi fu wi, dan wi kan gebroiki wi telefon noso wi tablet fu sori en a piki tapu jw.org. Efu wi miti wan sma di e taki wan tra tongo, a kan de Dofusma-tongo srefi, dan wi kan sori en fa a kan feni Bijbel nanga buku di e taki fu Bijbel na ini en tongo na tapu wi website. Furu preikiman gebroiki wan fu den felem na tapu a website fu bigin wan takimakandra fu Bijbel.

PREIKI NA IBRI OKASI DI YU KISI

²⁶ Yesus ben taigi den arkiman fu en: „Unu na a leti fu grontapu. . . . Meki un leti skèin gi sma tu. Dan den kan si den bun di unu e du èn den kan gi glori na un Tata di de na hemel” (Mat. 5:14-16). Den disipel ben teki na eksempre fu Yesus Krestes di ben taki: „Mi na a leti fu grontapu.” Dati meki den ben kan sori den srefi fasi leki Gado. Yesus gi wi wan bun eksempre fu di a ben meki „a leti di e gi libi” skèin gi a bun fu ala sma di ben wani arki.​—Yoh. 8:12.

²⁷ Na a srefi fasi na apostel Paulus na wan bun eksempre gi wi (1 Kor. 4:16; 11:1). Di a ben de na ini Ateine, dan a ben e preiki ibri dei te a ben de na wowoyo èn a ben e taki nanga ala sma di a ben e miti (Tori 17:17). Den Kresten na ini Filipi ben teki na eksempre fu en. Dati meki Paulus ben skrifi na ini wan brifi taki den ben „de leki sma di e skèin leti” na mindri den ogri sma fu a ten dati di ben e du kruktudu (Fil. 2:15). Wi na ini a ten disi kan meki den tru leri fu a Kownukondre skèin nanga yepi fu den sani di wi e taki èn nanga den sani di wi e du ibri tron te wi kisi na okasi fu fruteri sma a bun nyunsu. A no de fu taki dati a bun eksempre fu wi leki reti-ati sma di no e bedrigi trawan, kan yepi sma fu si taki wi de tra fasi leki a grontapu. Ma efu wi e fruteri den a bun nyunsu, dan den o kon frustan fu san ede wi de tra fasi.

²⁸ Furu Kotoigi fu Yehovah e taki fu a bun nyunsu nanga sma di den e miti na wrokope, na skoro, na ini bus, noso te den e du den aladei sani fu den. Te wi e go na wan presi, dan wi kan taki nanga den sma di de nanga wi na ini a srefi wagi, bus, boto, noso opolani. Wi musu suku okasi fu preiki te wi e taki nanga sma di wi e miti ala dei. Wi musu de srekasreka fu taki nanga sma na ibri okasi di fiti.

²⁹ Efu wi tan hori na prakseri taki ibri leisi te wi e prati a bun nyunsu, wi e prèise wi Mekiman èn wi e gi en nen grani, dan dati o gi wi deki-ati fu go doro. Na a srefi ten, wi o man yepi reti-ati sma fu kon sabi Yehovah, so taki den srefi kan dini en. Te den e du dati, dan den o abi a howpu fu kisi libi fu di den e bribi na ini Yesus Krestes. Yehovah e prisiri te wi e meki muiti fu preiki. A e si dati leki santa wroko di wi e du gi en.​—Hebr. 12:28; Openb. 7:9, 10.

A KONTREN PE WI E PREIKI

³⁰ Yehovah wani taki a Kownukondre boskopu musu preiki na heri grontapu na ini den foto èn na den boitipresi. Fu man du dati, den gemeente nanga den sma di e preiki na farawe presi e kisi wan kontren fu a bijkantoro pe den musu preiki (1 Kor. 14:40). Na so Gado ben seti sani na ini a ten fu den apostel (2 Kor. 10:13; Gal. 2:9). A Kownukondre wroko e gro esi-esi na ini den lasti dei disi. Wi o man du furu te den gemeente orga sani bun fu wroko a kontren fu den.

³¹ Na a dienst-opziener abi a frantwortu fu luku fa a gebied fu a gemeente e wroko. Wan dinari ini a diniwroko kan yepi en fu prati den gebied-karta. Wan gemeente abi tu sortu gebied: Wan fu den na pe wan preikiwroko grupu e wroko èn a trawan na gebied di wán preikiman kan kisi fu wroko. Efu wan gemeente no abi nofo gebied, dan den grupu-opziener o abi wan gebied pe a heri grupu fu den e preiki. Ma efu nofo gebied de, dan wan preikiman kan aksi fu kisi wan gebied pe ensrefi kan wroko.

³² Efu yu abi wan gebied gi yusrefi, dan yu o abi wan presi pe yu kan go preiki, te preikiwroko konmakandra no e hori, noso te a ben o muilek gi yu fu go wroko nanga a grupu. Fu eksempre, son preikiman abi wan gebied krosibei fu a presi pe den e wroko èn den e preiki drape te den abi pauze noso baka wroko. Son osofamiri abi wan gebied gi densrefi na ini a birti pe den e libi èn den e preiki drape te neti. Te yu abi wan gebied gi yusrefi di yu kan doro makriki, dan yu o man gebroiki a ten di yu abi fu preiki bun. Ma a no de fu taki dati den sma di de na a preikiwroko konmakandra kan kon wroko nanga yu tu na ini a gebied di yu kisi. Efu yu wani wan gebied gi yusrefi, dan yu kan aksi a brada di abi a frantwortu fu luku den gebied-karta.

³³ Awinsi wan grupu-opziener teki wan gebied gi en grupu fu wroko noso wan preikiman aksi wan gebied gi ensrefi, ala ten a sma di teki a gebied musu meki nofo muiti fu miti sma na ibri oso. Sani di seti fu wroko a gebied musu kruderi nanga den wet fu lanti. A grupu-opziener noso a preikiman di kisi wan gebied musu meki muiti fu wroko en na ini fo mun. Te a gebied kaba wroko, dan a preikiman musu taigi a brada di e sorgu gi a gebied. Na ini son situwâsi a grupu-opziener noso a preikiman kan hori a gebied èn a kan wroko en baka, noso a kan gi en na a brada di e sorgu gi a gebied.

³⁴ Te ala sma na ini a gemeente e wroko makandra, dan wi o man wroko a kontren finifini. Wi o man sorgu taki tu difrenti grupu fu preikiman no e wroko na ini a srefi gebied na a srefi ten, fu di dati kan meki den ososma mandi. Na a fasi disi wi e sori taki wi e hori den brada nanga sisa fu wi èn den sma na ini a kontren fu wi, na prakseri.

PREIKI GI SMA FU ALA TONGO

³⁵ Ala sma musu kon leri sabi Yehovah Gado nanga en Manpikin èn den musu leri sani fu a Kownukondre (Openb. 14:6, 7). Wi wani yepi sma fu ala tongo fu kari a nen fu Yehovah, so taki den kan kisi frulusu. Wi wani yepi den tu fu kisi den fasi di wan Kresten musu abi (Rom. 10:12, 13; Kol. 3:10, 11). Ma san na wan tu problema di wi e miti te wi e preiki na ini wan kontren pe sma e taki difrenti tongo? San wi kan du so taki den sma disi kan yere a Kownukondre boskopu na ini a tongo di den e frustan moro bun?​—Rom. 10:14.

³⁶ A gebied di ibri gemeente e kisi fu wroko abi fu du nanga a tongo di sma e taki na ini a kontren dati. Sobun, preikiman fu difrenti gemeente o preiki na ini kontren pe sma e taki difrenti tongo. Te dati de so, dan a bun te den preikiman fu ibri gemeente e preiki gi den sma di e taki a tongo di den srefi e taki èn te den e preiki soso gi den sma dati. Disi de so tu nanga den kari di wi e prati gi sma ala yari. Ma te preikiman e du stratiwroko noso e preiki na iniwan tra okasi, dan den kan taki nanga iniwan sma di den e miti èn den kan prati buku awinsi ini sortu tongo.

³⁷ Son leisi den gemeente di e taki wan tra tongo, no man go furu na den fara gebied. Dati meki den dienst-opziener fu den gemeente di e wroko a srefi kontren musu taki nanga makandra fu luku san na a moro bun fasi fu wroko a kontren. Disi o meki taki ala sma na ini a kontren o yere a Kownukondre boskopu èn a no o pasa taki preikiman fu difrenti gemeente e go na den srefi oso ini a gebied.​—Odo 15:22.

³⁸ San wi musu du te wi miti wan sma na ini a kontren fu wi di e taki wan tra tongo? Wi no musu denki dati den preikiman di e taki a tongo fu en o go na en. Son preikiman leri wan syatu takimakandra na ini wan tra tongo, so taki den kan taki nanga den sma ini a kontren fu den di e taki a tongo dati. Wi kan sori a sma fa a kan leisi noso download buku nanga tra sani na ini en tongo na a website fu wi, jw.org. Noso wi kan taigi en taki wi kan tyari buku gi en na ini a tongo di a e taki.

³⁹ Efu wan sma wani sabi moro, dan wi musu suku wan sma di e taki a tongo fu en fu yepi en go doro. Wi kan fruteri en tu pe konmakandra e hori na ini a tongo di a e taki. Efu a wani taki wan sma di e taki a tongo fu en kon na en, dan wi kan sori en fa a kan skrifi en nen, adres nanga tra sani na jw.org. A bijkantoro o meki muiti fu seti sani taki wan preikiman, wan grupu noso wan gemeente di de na ini a kontren fu en, kan yepi en moro fara.

⁴⁰ Wi musu tan go na a sma disi, solanga wan preikiman di e taki a tongo fu en no kon na en ete. Son leisi a bijkantoro o taigi den owruman taki den no feni nowan sma di e taki a tongo fu a sma. Te a sani disi e pasa, dan wi musu tan go na a sma dati. Efu a kan, dan wi musu studeri Bijbel nanga en. Wi kan gebroiki wan buku di de na ini a tongo fu en. Efu wi e gebroiki den prenki èn wi e meki a leisi den tekst di kari, dan a o frustan den prenspari leri fu Bijbel. Kande wan famiriman fu en di sabi a tongo fu en èn di sabi a tongo fu a kondre o wani vertaal gi en san yu e taki.

⁴¹ Fu man yepi a sma disi fu kon na ini na organisâsi fu Gado, dan wi musu gi en wan kari fu kon na den konmakandra fu wi, srefi efu a no o man frustan a programa bun. Te Bijbeltekst e kari, wi kan yepi en fu suku den na ini wan Bijbel di de na ini a tongo fu en. A demakandra nanga den trawan na ini a gemeente o gi en deki-ati èn a o yepi en fu go na fesi.

⁴² Pregroep: Wan pregroep na wan grupu preikiman di e preiki na ini wan tongo di de difrenti fu a tongo di a gemeente e taki, ma di no abi wan owruman noso dinari ini a diniwroko fu hori wan konmakandra ibri wiki na ini a tongo dati. A bijkantoro kan gi wan gemeente primisi fu tron a mama-gemeente fu so wan grupu efu:

1. (1) Wan bigi grupu sma di e taki wan tra tongo leki san den preikiman fu a gemeente e taki e libi na ini a kontren dati.

2. (2) Wan tu preikiman de di sabi taki a tongo noso di wani leri a tongo.

3. (3) Den owruman fu a gemeente de klariklari fu orga a preikiwroko na ini a tongo dati.

Efu den owruman fu wan gemeente wani sorgu gi wan pregroep, dan den musu taki nanga a kring-opziener. A kan taki a kring-opziener sabi tra gemeente di e pruberi fu preiki gi sma di e taki a tongo dati. A kan fruteri den owruman prenspari sani di o yepi den fu si sortu gemeente o man sorgu moro bun gi wan pregroep. Te den bosroiti sortu gemeente o sorgu gi a grupu, dan den owruman fu a gemeente dati musu seni wan brifi gi a bijkantoro pe den e aksi fu tron wan gemeente di e sorgu gi wan pregroep.

⁴³ Grupu: A bijkantoro kan gi wan gemeente primisi fu tron a mama-gemeente fu wan grupu efu:

1. (1) Nofo sma ini a kontren di e taki a tongo wani sabi moro fu Bijbel èn sani de di e sori taki a preikiwroko kan gro ini a tongo dati.

2. (2) Wan tu preikiman e taki a tongo noso den e leri a tongo.

3. (3) Wan owruman noso wan dinari ini a diniwroko musu de di man teki fesi. Ibri wiki a musu man hori wán noso moro konmakandra soleki wan Bijbel-lezing noso a Waktitoren-studie na ini a tongo dati.

Te den dri sani disi de so, dan den owruman fu a gemeente musu skrifi a bijkantoro wan brifi pe den e fruteri den finifini fu a tori èn pe den e aksi fu tron a mama-gemeente fu wan grupu. Na owruman noso a dinari di e teki fesi na ini a grupu o dini leki a „grupu-opziener” noso a „grupu-dinari” di abi a frantwortu fu sorgu gi a grupu.

⁴⁴ Baka te a grupu seti, den owruman fu a gemeente kan luku efu tra pisi fu den konmakandra kan hori tu èn omeni leisi den kan du dati na ini wán mun. Sani kan seti tu fu hori preikiwroko konmakandra gi a grupu dati. Ala sma na ini a grupu e wroko na ondro den owruman fu a gemeente di e sorgu a grupu. Den owruman o meki muiti fu teki koni bosroiti èn fu sorgu gi den sani di a grupu abi fanowdu. Te a kring-opziener e wroko nanga a grupu na ini a wiki di a de na ini a gemeente di e sorgu a grupu dati, dan a o seni wan syatu boskopu go na a bijkantoro fu fruteri den brada fa sani e go na ini a grupu èn sortu spesrutu sani a grupu abi fanowdu. Bakaten a grupu kan tron wan gemeente. Efu ala sma e wroko nanga den rai di na organisâsi e gi den, dan dati o prisiri Yehovah.​—1 Kor. 1:10; 3:5, 6.

PREIKI LEKI GRUPU

⁴⁵ Kresten di gi densrefi abra na Gado abi a frantwortu fu fruteri tra sma a bun nyunsu. Furu fasi de fa wi kan du disi, ma furu fu wi e prisiri fu man go na ini a preikiwroko makandra nanga trawan (Luk. 10:1). Fu dati ede a gemeente e hori preikiwroko konmakandra na tapu satra nanga sonde èn mindriwiki tu. Den fesadei na bun okasi fu go na ini a preikiwroko leki grupu, fu di furu brada nanga sisa no abi fu wroko na den dei dati. Na a Diniwroko Komte fu a gemeente e seti sani taki preikiwroko konmakandra e hori mamanten èn mofoneti na wan ten di bun gi den preikiman èn na presi di fiti gi dati.

⁴⁶ Te wi e preiki leki grupu, dan preikiman kan wroko nanga makandra èn den kan „gi makandra deki-ati” (Rom. 1:12). Den wan di no e preiki so langa ete e kisi yepi te den e wroko nanga preikiman di abi ondrofeni èn di sabi preiki bun. Na ini son kontren a de fanowdu fu meki tu noso moro preikiman wroko makandra. Srefi efu yu e seti sani fu wroko yu wawan na ini a kontren, toku a kan de wan deki-ati gi ala sma di de drape efu yu kon makandra fosi. Te yu sabi taki tra sma de na ini a preikiwroko tu na ini a kontren pe yu e wroko, dan dati de nofo kaba fu gi yu a deki-ati di yu abi fanowdu. Pionier nanga trawan no musu denki taki den musu go na ibri preikiwroko konmakandra di a gemeente seti, spesrutu efu den e hori den ibri dei. Ma ibri wiki den kan meki muiti fu horibaka gi awinsi wan tu fu den konmakandra dati.

⁴⁷ Meki a de so, taki wi alamala teki na eksempre di Yesus nanga den apostel gi wi! Wi kan abi a frutrow taki Yehovah o blesi wi te wi e du ala san wi man fu abi wan prati na a tumusi prenspari wroko disi fu preiki a bun nyunsu fu a Kownukondre.​—Luk. 9:57-62.