San wi kan du te wan ososma e taki wan tra tongo?
1. Fu san ede a de fanowdu moro nanga moro taki den gemeente musu wroko nanga makandra te a abi fu du nanga a kontren pe den e wroko?
1 A e pasa moro nanga moro, taki Kownukondre preikiman na heri grontapu e miti sma di e taki wan tra tongo. Den sma disi di wani sabi moro fu Bijbel, no e taki a tongo di den preikiman e taki na ini a gemeente. Fu man yepi den sma disi fu kon sabi moro fu Bijbel, furu bijkantoro feni en fanowdu fu seti grupu nanga gemeente di e taki den tongo dati. Fu di a kan de so taki sma e taki difrenti tongo na ini wan kontren, meki na ini a srefi kontren dati gemeente de di e preiki kande na ini den difrenti tongo dati. Fa den gemeente kan wroko nanga makandra so taki a preikiwroko kan du na wan fasi di fiti?—1 Kor. 14:33.
2. Te wi e preiki oso fu oso na ini a srefi kontren leki tra grupu noso gemeente di e taki wan tra tongo, dan fa wi kan sorgu taki wi e wroko bun nanga den?
2 Wroko bun nanga makandra: Te wan preikiman e du stratiwroko noso te a e gi kotoigi te a kisi na okasi, dan a kan taki nanga iniwan sma di a e miti. Disi wani taki tu dati a kan taki nanga den sma di e taki wan tra tongo, èn a kan gi den publikâsi di skrifi na ini a tongo di den wani leisi. Ma sani e waka tra fasi te a preikiman e go oso fu oso na ini kontren pe tra gemeente noso grupu di e taki wan tra tongo, e wroko tu. Te dati de so, dan a preikiman musu go na den oso fu den sma di e taki a srefi tongo leki a gemeente pe a e go. Te difrenti gemeente e preiki na ini a srefi kontren, dan a de prenspari fu skrifi soifri pe den musu wroko. Den dienst-opziener musu taki nanga makandra èn den musu seti sani bun so taki ala den gemeente kisi wini fu den seti dati (Odo 11:14). Ma te wan preikiman di de na ini na oso-fu-oso preikiwroko e miti wan sma di e taki wan tra tongo, èn te nowan gemeente de krosibei di e taki a tongo dati, dan a preikiman musu du muiti fu gi a sma kotoigi èn fu yepi en moro fara.
3. San wi musu du te preikiman fu wan grupu noso gemeente di e taki wan tra tongo, e wroko na ini a srefi kontren pe wi de?
3 Wi alamala e du a srefi wroko: Kon meki wi taki dati preikiman fu difrenti gemeente e preiki tapu a srefi dei, na ini a srefi birti. San den kan du? A no de fu taki dati wi leki Kresten lobi makandra awansi sortu tongo wi e taki. Disi sa meki taki wi alamala o broko wi ede trutru nanga den sani di den sma na ini a kontren abi fanowdu (Yoh. 13:34, 35). Fu dati ede, den brada di e teki fesi o sori taki den de klariklari fu fiti densrefi èn fu sori lobi te den o bosroiti efu wan grupu musu go wroko na wan tra kontren.—Yak. 3:17, 18.
4. Sortu profeititori e kon tru na ini a ten disi?
4 Bijbel taki na fesi dati sma fu difrenti tongo ben o yere a bun nyunsu (Openb. 14:6, 7). Te den gemeente noso grupu di e taki difrenti tongo e wroko bun nanga makandra, dan dati sa meki taki den no e go preiki na den srefi oso. Na so fasi, den kan preiki a bun nyunsu gi furu nyun sma èn sosrefi gi sma di e taki wan tra tongo.—Ef. 4:16.