Preiki gi sma di e taki wan tra tongo
1. Te wi e preiki na ini a kontren fu wi, dan sortu okasi wi e kisi?
1 Yesus Krestes ben taki na fesi taki a bun nyunsu ben o preiki na heri grontapu „so taki sma fu ala kondre kan yere dati”. Ibri futuboi di e preiki èn e gi sma leri, sabi o prenspari den wortu dati de (Mat. 24:14; 28:19, 20). Te wi e preiki èn e meki disipel, dan wi e miti sma fu difrenti kondre, di e taki wan tra tongo. Den sma disi musu kisi na okasi tu fu yere a Kownukondre boskopu èn fu bosroiti efu den wani dini Gado, bifo a dei fu Yehovah kon di e meki sma frede (Mal. 3:18). Te wi e preiki na ini a kontren fu wi, dan san wi kan du fu yepi sma di e taki wan tra tongo?
2. Na sortu fasi wi e teki na eksempre fu Yehovah te wi e preiki gi sma di e taki wan tra tongo?
2 Si den sma di e taki wan tra tongo soleki fa Yehovah e si den: Neleki Yehovah, wi wani sori taki wi lobi ibri sma na ini a kontren pe wi e preiki. Fu man du dati, wi musu angri trutru fu yepi sma kon kisi soifri sabi fu a tru Gado, Yehovah, awinsi sortu tongo den e taki (Ps. 83:18; Tori. 10:34, 35). Aladi na a fosi presi wi e poti prakseri na den sma di e taki a tongo fu a gemeente pe wi e go, toku wi musu luku efu tra sma de na ini a kontren di e taki wan tra tongo. Boiti dati, wi musu suku okasi fu fruteri den a boskopu fu Gado Kownukondre. Efu wi no ben o poti prakseri na den wan di e taki wan tra tongo, dan dati no ben o kruderi nanga a wani fu Yehovah. Fu di Yehovah wani taki sma fu ala kondre musu yere a Kownukondre boskopu. Ma fa wi kan yepi sma di e taki wan tra tongo?
3. Sortu bun yepisani wi abi, èn fa wi kan sreka wisrefi fu gebroiki en?
3 Gebroiki a pikin buku Goed nieuws voor mensen uit alle landen: A pikin buku disi meki so taki wi kan gebroiki en te wi miti sma di e taki wan tra tongo. Ala ten yu musu abi a pikin buku disi na yu. Boiti dati, yu musu sabi fa fu wroko nanga en èn de srekasreka fu gebroiki en. Fu man feni sani gaw, yu kan marki den difrenti tongo di sma e taki na ini a kontren fu yu. Efu publikâsi de fu feni na ini den tongo disi, dan a ben o bun fu abi wan tu fu den, so taki yu kan pristeri dati gi a sma baka te a sma leisi a boskopu na ini a pikin buku.
4. Fa wi kan gebroiki a pikin buku Goed nieuws voor mensen uit alle landen na ini a preikiwroko?
4 Efu yu miti wan sma na ini a preikiwroko di e taki wan tra tongo, èn yu no sabi seiker sortu tongo a e taki, dan a fosi sani di yu kan du na fu sori en a kafti fu a buku. Go na a karta fu grontapu di de na a inisei kafti, sori go na yusrefi èn na a kondre pe yu e libi. Baka dati sori na ososma nanga yu anu taki yu ben o wani sabi sortu kondre a komoto èn sortu tongo a e taki. Baka te yu kon sabi sortu tongo a sma e taki, dan luku a bladzijde pe den tongo de di de fu feni na ini a pikin buku. Go na a bladzijde pe a tongo de di a sma e taki èn meki a sma poti prakseri na san skrifi nanga fatu letter na tapusei fu a bladzijde. Baka dati sori en taki yu ben o wani a leisi a boskopu dati. Baka te a kaba leisi, dan yu kan gi en wan traktaat na ini a tongo fu en noso sori en a greisi pisi, pe skrifi taki yu tyari wan publikâsi gi en na ini a tongo fu en. Dan sori go na den wortu „fa mi nen” di skrifi nanga fatu letter, èn taki krin san na yu nen. Baka dati sori go na den wortu „fa yu nen” di skrifi nanga fatu letter, èn wakti meki na ososma piki. Meki mofo nanga en fu drai go baka.
5. San wi musu du te wan sma di e taki wan tra tongo sori taki a wani sabi moro fu Bijbel?
5 Seti sani fu go baka: Wi musu meki ala muiti fu go baka na den wan di sori taki den wani kon sabi moro fu a Kownukondre boskopu, awinsi sortu tongo den e taki. Solanga wi si taki wan sma wani kon sabi moro fu Gado, nanga en Wortu, Bijbel, dan wi musu skrifi dati na tapu a papira Te bezoeken anderstalig adres (S-43) èn gi dati wantewante na a sekretarsi fu a gemeente. A brada disi o seni a papira disi go na a bijkantoro, so taki wan preikiman di e taki a tongo fu a sma, kan go na en. Baka dati, a bijkantoro o seni a papira disi gi a grupu di e taki a tongo disi. Te a grupu kisi a papira disi, dan den o go baka wantewante na a sma disi. A sekretarsi kan gi a dienst-opziener wan kopi fu a papira disi, so taki a kan sabi efu sma di e taki wan spesrutu tongo wani sabi moro. Wi musu gebroiki a papira disi, soso te a sma sori trutru taki a wani kon sabi moro.
6. Sortu frantwortu wi abi efu wi miti wan sma di e taki wan tra tongo?
6 Wan pisi ten kan pasa, fosi wan preikiman di e taki a tongo fu a sma tyari wan gobaka na en. Fu dati ede, fu man yepi a sma disi, dan a preikiman di skrifi a S-43 papira, kan tan tyari gobaka na a sma disi teleki wan preikiman di e taki a tongo fu a sma, go na en. Son tron a preikiman kan bigin studeri Bijbel nanga so wan sma. Ma na ini a pisi ten dati, fa wan preikiman kan feni publikâsi na ini a tongo fu a sma?
7. Sortu seti de di kan yepi wi fu feni publikâsi na ini a tongo fu den sma di wi kan miti?
7 Publikâsi na ini wan tra tongo: Den gemeente no musu abi wan heri ipi publikâsi na ini tra tongo. Ma efu a dienst-opziener kon si taki sma di e taki wan spesrutu tongo wani kon sabi moro, dan a kan bosroiti fu abi wan tu publikâsi na ini a tongo dati, so taki den preikiman kan gebroiki den. Efu a gemeente no abi publikâsi na ini a tongo dati, dan den kan seni aksi dati. A kan teki pikinso langa fosi den kisi den publikâsi dati. Fu dati ede, wan seti de fu druk wan tu publikâsi di de fu feni tapu Internet tapu a Website www.watchtower.org. A preikiman noso a sma di wani sabi moro, kan go makriki na den publikâsi disi di de na ini hondrohondro tongo. A no de fu taki dati disi na wan moi seti te wi e yepi wan sma di e taki wan tra tongo fu kon sabi moro fu Bijbel.
8. Sortu frantwortu a gemeente abi fu yepi den sma di e taki wan tra tongo èn di wani kon sabi moro?
8 A frantwortu fu a gemeente: Son tron a kan taki furu sma di e taki wan tra tongo, e kon libi na ini wan kontren. Kande wan gemeente di e hori konmakandra na ini a tongo dati no de krosibei fu drape. Fu dati ede, den sma di wani sabi moro èn di e taki wan tra tongo, musu kisi kari fu kon na den konmakandra fu yu. Te wi e gi den sma disi wan switikon èn e sori taki wi wani kon sabi den, dan dati kan gi den deki-ati fu kon doronomo na den konmakandra. Na a bigin, a kan taki wi no man frustan makandra, fu di den e taki wan tra tongo noso fu di den abi wan tra kulturu. Ma nowan fu den sani disi kan tapu tru Kresten fu sori lobi na ini a gemeente fu Yehovah Kotoigi na heri grontapu (Sef. 3:9; Yoh. 13:35). Yu e taki wan tra tongo bun? Efu dati de so, èn yu wan tyari gobaka na sma na ini a tongo dati, dan grantangi taki nanga yu gemeente sekretarsi, so taki a kan meki a bijkantoro kon sabi dati. Disi kan de wan bigi yepi te a bijkantoro e suku preikiman fu tyari gobaka na sma di wani sabi moro.
9. O ten a kan de fanowdu taki preikiman e leri wan tra tongo, èn fa sani seti ini a tori disi?
9 Te sani seti fu leri taki wan tra tongo: Te yu e yepi den wan di e taki wan tra tongo, dan a moro bun fu gi den a deki-ati fu bigin fisiti wan gemeente di abi konmakandra na ini a tongo fu den, efu wan de di no fara tumusi. Ma te dati no kan, dan son preikiman kan bosroiti fu leri wan tra tongo, so taki den man gi moro bun yepi na den sma di e taki a tongo dati. Efu wan gemeente no de krosibei, èn a bijkantoro si taki a grupu fu sma di e taki a tongo dati bigi, dan den kan bosroiti fu seti sani so taki preikiman kan leri a tongo dati. Te dati de so, dan a bijkantoro e meki den gemeente na ini a birti kon sabi taki yepi de fanowdu, èn den sa meki bekènti taki preikiman kan leri a tongo dati. Den wan di e skrifi den nen fu go leri a tongo dati, musu abi a marki fu go dini na ini a grupu noso gemeente fu yepi den sma di e taki a tongo dati.
10. O ten wan grupu kan seti di e taki wan tra tongo, èn fa sani seti fu du dati?
10 Te wan grupu musu seti: Fu man seti wan grupu na ini wan spesrutu tongo, dan fo prenspari sani de fanowdu: (1) Furu sma di e taki a tongo dati musu wani sabi moro fu Bijbel. (2) Wan tu preikiman musu sabi a tongo dati, noso leri en. (3) Wan owruman noso dinari ini a diniwroko di abi ondrofeni, musu de di man teki fesi èn di kan hori awinsi wán konmakandra ibri wiki na ini a tongo dati. (4) Den owruman fu wan gemeente musu wani horibaka gi a grupu disi. Te den owruman si taki pikinmoro ala den sani disi de, dan den o skrifi a bijkantoro fu sani di abi fu du nanga a grupu disi. Boiti dati, den o aksi efu a bijkantoro kan poti na tapu papira taki a gemeente dati o horibaka gi wan grupu di e taki wan tra tongo. (Luku a Wi orga-buku, blz. 106, 107.) Na owruman noso dinari ini a diniwroko di abi a frantwortu fu teki fesi na ini a grupu, o de a „grupu-opziener” noso a „grupu-dinari”.
11. Fu san ede a de so wan bigi grani fu preiki gi sma na ini a kontren fu wi di e taki wan tra tongo?
11 Fu preiki gi sma di e taki wan tra tongo na ini a kontren fu wi, na wan prenspari pisi fu a preikiwroko di e du na heri grontapu. Na Eksempre fu wi, Yesus Krestes, ben seti a wroko disi. Meki a de so taki wi e teki prati fayafaya na a wroko disi èn si fa Yehovah sa tan seki den pipel èn tyari den wan kon na ini di warti gi en (Hag. 2:7). A e gi wi trutru prisiri fu teki prati dorodoro na a wroko disi! Meki a de so taki Yehovah blesi a muiti di wi alamala e du fu preiki gi sma na ini a kontren fu wi di e taki wan tra tongo, aladi wi e hori na prakseri ala ten taki awinsi sortu tongo sma e taki, na Gado e meki a sani gro!—1 Kor. 3:6-9.