WI KRESTEN LIBI
Wroko makandra fu preiki na ini kontren pe sma e taki difrenti tongo
Nofo tron sma wani arki a Kownukondre boskopu te den e yere en na ini den mamatongo. Kande na fu dati ede meki Yehovah seti sani, so taki na a Pinksterfesa fu a yari 33, den ’Dyu di ben e anbegi Gado èn di ben komopo fu ibri kondre na grontapu’, yere a bun nyunsu na ini den „eigi tongo”. A sani disi pasa aladi a kan taki den sma disi ben e taki Hebrewtongo noso Grikitongo (Tor 2:5, 8). Son leisi a de so taki na ini kontren pe sma e taki difrenti tongo, den difrenti gemeente di e hori konmakandra na ini den tongo disi, musu preiki na ini a srefi kontren. Ma den difrenti grupu preikiman no musu wroko a gebied na a srefi ten, fu di den sma na ini a kontren kan ati bron. Fa preikiman na ini den sortu gemeente dati kan wroko makandra sondro taki a sani dati pasa?
Taki nanga makandra (Odo 15:22): Den dienst-opziener musu taki nanga makandra fu luku san na a moro bun fasi fa den difrenti gemeente kan preiki a bun nyunsu na ini a kontren dati. Efu a gebied fu den no bigi, dan a kan taki den gemeente di e preiki na ini tra tongo aksi unu fu no go na den oso fu den sma di e taki a tongo dati. Ma son leisi den no man wroko a heri kontren fu di a bigi èn fu di den sma no e libi krosibei fu makandra. Te dati de so, dan a kan taki a gemeente dati aksi unu fu preiki gi ala sma ini a kontren èn fu gi den den adres fu den sma di wani sabi moro (od 93 ¶37). Noso kande den o aksi a gemeente fu yu fu yepi den fu feni sma di e taki a tongo di a gemeente fu den e taki, èn fu gi a gemeente na adres fu den sma dati (km 7/12 5, faki). No frigiti taki son leisi, sma e taki moro leki wán tongo na ini wan oso. Efu lantiwet de di e sori fa yu mag gebroiki den nen nanga adres fu sma, dan yu musu hori yusrefi na den wet dati.
Wroko makandra (Ef 4:16): Hori yusrefi na iniwan rai di yu kisi fu yu dienst-opziener. Yu e studeri Bijbel nanga wan sma di no gwenti taki a tongo di a gemeente fu yu e taki? Kande yu kan gi a studie na a gemeente noso grupu di e taki a tongo fu en. Disi kan yepi a studenti fu go na fesi moro esi.
Sreka yusrefi (Odo 15:28; 16:1): Efu a sma di yu e miti na ini a kontren fu yu e taki wan tra tongo, dan du muiti fu preiki a bun nyunsu gi en. Yu kan download difrenti Bijbelvertaling nanga felem tapu yu telefon noso tablet, so taki yu de srekasreka te yu e miti sma di e taki wan tra tongo. Yu kan gebroiki a JW Language app tu fu leri fa fu taki odi na ini den tongo dati.