Wan nyun fasi fu preiki na presi pe furu sma de
1. Sortu deki-ati den gemeente kisi di abi kontren pe furu sma e waka pasa?
1 Son gemeente abi presi na ini den kontren pe furu sma e waka pasa. Den gemeente disi kisi a deki-ati fu preiki na wan nyun fasi. Den kan poti buku na tapu wan tafra noso na tapu wan sortu wagi so taki den sma di e waka pasa kan si den. Efu den e gebroiki so wan wagi, dan awinsi wán preikiman musu tanapu noso sidon sei a wagi. Ma efu den e gebroiki wan tafra, dan tu preikiman musu de na a tafra dati. Den preikiman di o du a wroko disi musu sori switifasi, so taki sma o wani kon na den. Efu wan sma e tanapu e luku den sani di de fu si, dan wan fu den preikiman kan bigin taki nanga en. A kan aksi en: „Yu aksi yusrefi kaba san Bijbel e taki fu a tori disi?” Wán noso tu tra preikiman kan tanapu na ini a birti fu a tafra èn den kan preiki gi sma te den kisi na okasi.
2. Fruteri wan ondrofenitori di e sori o prenspari a de fu preiki na presi pe furu sma de.
2 A fasi disi fu preiki meki taki furu sma bigin studeri Bijbel. Wan studenti fu universiteit ben wani skrifi wan scriptie fu Yehovah Kotoigi. Ma a no ben man feni wan Kownukondre zaal. Wan wiki baka dati, a si wan fu den tafra di wi e gebroiki fu preiki pe furu sma de, na tapu a dyari fu a skoro. A bigin studeri Bijbel èn now a de wan dopu preikiman di e preiki na a srefi fasi dati tu.
3. Fa son preikiman e feni en fu preiki na a fasi disi?
3 Wan sisa di preiki na a fasi disi ben taki: „Son sma e kon na a tafra fu teki den nyun tijdschrift. Trawan no ben yere noiti fu Yehovah Kotoigi. Mi e si taki wi man miti furu sma te wi e preiki na a fasi disi.” Wan tra sisa ben taki: „A moi fu preiki na a nyun fasi disi fu di na den sma e waka kon na yu. Srefi sma di no wani sabi moro fu Bijbel e kon luku.”
4. Fu san ede a bun fu poti a tafra noso a wagi na a srefi presi èn na a srefi ten ibri wiki?
4 A bun fu poti a tafra noso a wagi na a srefi presi, na den srefi dei èn na a srefi ten ibri wiki. Disi o meki taki sma o kon gwenti fu si wi. Dan den no o syen fu waka kon na wi èn poti aksi gi wi, noso fu teki wan sani fu leisi. A gemeente fu yu sreka sani fu preiki na a fasi disi? Efu dati de so, dan kande yu kan teki prati na a moi wroko disi so taki yu kan „fruteri sma fu Gado Kownukondre na ala sei”.—Luk. 9:60.