Fa fu preiki na presi pe furu sma e waka pasa

Te wi e preiki na presi pe furu sma e waka pasa, wi e gebroiki wan wagi noso wan tafra nanga buku na tapu. A sani disi e meki taki furu reti-ati sma wani sabi moro fu Bijbel (Yoh. 6:44). Dati meki owruman kisi a deki-ati fu orga sani fu preiki na a fasi disi na ini a kontren fu a gemeente. Nofo tron a no de fanowdu fu aksi primisi fu lanti fu gebroiki a wagi, fu di a no e tan na wán presi. Ma efu a de so taki wi de na ini wan situwâsi di meki taki wi musu aksi primisi fu tanapu na wan presi, dan wi musu du dati. Suma den brada kan poti fu preiki na a fasi disi? Preikiman di abi a koni fu si sani krin, di e tyari densrefi na wan fasi di fiti èn di sabi fa fu taki bun nanga sma. Luku wan tu sani di o yepi preikiman fu abi moro bun bakapisi.

San yu musu du:

Sori switifasi èn de klariklari fu yepi den sma di e waka pasa. Son preikiman e lafu pikinso èn den e taki den sma odi. Efu wan sma e waka pasa èn a e luku den buku, dan yu kan taki: „Yu mag teki wan buku efu yu wani.”
Tanapu na ini a birti fu a wagi noso a tafra. Na son presi den preikiman abi bun bakapisi te den e tanapu krosibei fu a tafra noso wagi. Tra preikiman feni taki disi e meki den sma frede fu stop luku den buku. Dati meki den e tanapu pikinso moro fara èn den e wakti teleki wan sma e tan tanapu drape. Te wan sma e waka kon na a tafra noso wagi, dan pruberi fu taki nanga en. Kande yu kan aksi en: „Yu aksi yusrefi a sani disi kaba?”
Gebroiki Bijbel so furu leki yu man.
Efu wan sma teki wan fu den buku di wi e gebroiki fu studeri nanga sma soleki a Bijbel leri-buku, dan fruteri en fa wi e studeri nanga sma. Aksi a sma efu yu kan prei a felem Fu san ede wi musu studeri Bijbel? na tapu wan tablet noso cellulair gi en.
Aksi a sma en nen nanga adres noso telefon nomru efu a kan. Efu a sma no e libi na ini a kontren fu yu, dan yepi en fu skrifi na jw.org fa wi kan miti en, noso skrifi en nen na tapu a Nabezoek-papira (S-43) èn gi dati na a sekretarsi so esi leki yu man.