Gebroiki yu ten bun na ini a preikiwroko
Na ini a dienstyari fu 2014, Yehovah Kotoigi preiki 1.945.487.604 yuru. Disi e sori krin taki wi abi furu fu du na ini a diniwroko fu Yehovah (Ps. 110:3; 1 Kor. 15:58). Fu di „a ten di tan abra kon syatu”, meki wi musu gebroiki a ten fu wi moro bun fu miti moro sma na ini a preikiwroko.—1 Kor. 7:29.
Te wi wani gebroiki wi ten bun, dan wi musu fiti wisrefi na a situwâsi fu a kontren. Fu eksempre, efu yu de na ini a preikiwroko wán yuru noso moro langa sondro fu miti wan sma, dan kande yu kan preiki na wan tra ten so taki yu kan taki nanga moro sma. Na ini ibri kontren a situwâsi de tra fasi. Ma den rai di e kon now kan yepi yu fu gebroiki yu ten moro bun so taki a no gersi leki yu „e naki winti”.—1 Kor. 9:26.
Preiki oso fu oso: Furu yari langa, preikiman gwenti bigin a dei nanga na oso-fu-oso preikiwroko. Ma fu di furu sma e wroko deiten, meki a ben o bun fu du na oso-fu-oso preikiwroko bakadina noso mofoneti te moro sma de na oso èn te den no abi so furu fu du. Wi kan abi moro bun bakapisi te wi e du stratiwroko noso te wi e preiki na ini bisnis kontren na deiten.
Spesrutu preikiwroko na presi pe furu sma de: Te wi e preiki na a fasi disi, dan wi musu poti tafra noso wagi nanga buku na tapu, na presi pe furu sma e waka pasa na ini a kontren fu wi gemeente. (Luku Wi Kownukondre diniwroko fu yuli 2013 blz. 5.) Efu furu sma no e pasa moro na ini a kontren pe wi e preiki na a fasi disi, dan a Diniwroko Komte fu a gemeente kan bosroiti fu poti a tafra noso a wagi na wan tra presi pe moro sma e pasa.
Gobaka nanga Bijbelstudie: Efu yu no e miti furu sma na wan spesrutu ten, dan kande yu kan seti yu schema so taki yu kan tyari gobaka noso hori Bijbelstudie na den ten dati. Fu eksempre, efu yu e du na oso-fu-oso preikiwroko satra mamanten èn yu e miti furu sma, dan yu kan hori yu Bijbelstudie bakadina noso mofoneti. Te preikiman e tyari gobaka, dan kande den kan seti sani fu go na den Bijbelstudie fu den di e libi na ini a srefi kontren. Na so unu o man gebroiki un ten moro bun na ini a preikiwroko.
A tru taki wi kan teri wi yuru ibri leisi te wi de na ini a preikiwroko. Ma wi o abi moro prisiri te wi man taki nanga moro sma. Efu yu si taki yu no e miti furu sma na wan spesrutu ten, dan pruberi fu preiki na wan tra fasi. Begi Yehovah, „a Masra fu a kotiwroko”, fu yepi yu so taki yu kan gebroiki yu ten moro bun na ini a preikiwroko!—Mat. 9:38.