Gebroiki Yu Ten na wan Warti Fasi
1 Ibriwan sma abi a srefi ten fu gebroiki ibri wiki. A pisi ten di wi e gebroiki fu prati a bun nyunsu warti spesrutu fu di wi e gebroiki a ten gi wan wroko fu kibri libi (Rom. 1:16). Wi e sori taki wi e warderi disi fu di wi e sreka wisrefi bun gi a diniwroko di seti, fu di wi e kon biten na den velddienst konmakandra, èn fu di wi e gowe wantewante fu go na a gebied. Wi wani preiki, na presi fu wakti na a velddienst konmakandra. Fu di Yehovah leri wi taki „gi ala sani wan fasti ten de”, dan wi musu gebroiki a ten di wi poti aparti gi a diniwroko na wan trutru warti fasi.—Preik. 3:1.
2 Gebroiki Yu Ten na wan Koni Fasi: Wi e kisi furu blesi te wi e hori fasti na wan schema di e gi wi pasi fu abi wan prati na a velddienst doronomo. A no de fu taki, dati den bun bakapisi di wi e kisi fu wi diniwroko musu de akruderi a ten di wi man gebroiki na ini a diniwroko. ¿Wi ben sa kan gi moro ten na a diniwroko, efu wi e tyari wan tu pikin kenki kon na den sani di wi e du ala dei? Fu eksempre, baka te wi du tijdschriftwroko na tapu satra, ¿wi ben sa kan gebroiki moro ten fu tyari wan tu gobaka? ¿Efu wi wroko wan pisi ten na ini a velddienst tapu sonde, dan wi ben kan gebroiki moro ten tu fu tyari gobaka noso fu hori wan bijbelstudie? ¿Wi ben sa kan du pikinso stratiwroko boiti na oso-fu-oso wroko fu wi? Na a fasi disi noso na tra fasi, wi ben sa kan meki wi diniwroko kon moro bun.
3 Te wi de na ini a diniwroko, dan efu wi no e luku bun, wi kan lasi warti ten. A no de fu taki, dati te a weer no de so bun, wan syatu rostu kan gi wi kowru-ati èn a kan yepi wi fu go doro. Ma wi musu abi wan balansi fasi, fu di a no ala ten den rostu disi de fanowdu.
4 Na ini den yari di pasa no so langa ete, a kon muilek moro nanga moro fu feni sma na den oso. Fu kakafutu gi a situwâsi disi, dan furu preikiman du na oso-fu-oso wroko fu den na wan tra ten fu a dei. Fu san ede yu no e pruberi fu gi kotoigi na lati bakadina noso na mofoneti?
5 A ben sa moro bun te wi no e taki nanga makandra ala di wi e du stratiwroko. Na presi fu dati, tanapu aparti fu makandra èn go na den sma fu bigin wan takimakandra nanga den. Na so fasi yu sa gebroiki yu ten moro bun èn yu sa kisi moro bigi prisiri fu a wroko.
6 Suku Okasi fu Gi Kotoigi: Di wan ososma ben taki dati a no ben abi belangstelling, dan wan Kotoigi ben aksi en efu wan tra sma ben de na ini na oso, nanga suma a ben sa kan taki. Disi ben meki taki a ben kan taki nanga a man fu na oso, di ben siki furu yari kaba èn di moro furu ben didon na tapu bedi. A howpu di de fu feni na ini Gado Wortu ben meki taki a ben wani libi baka. ¡No langa baka dati a ben opo fu en bedi, a ben fisiti den konmakandra na a Kownukondre zaal èn a ben prati a nyun howpu fu en nanga trawan!
7 Wan tini sisa ben gebroiki a rai di ben gi fu abi wan prati na a velddienst na a yuru bifo a Gemeente Bukustudie. Na a fosi doro, a ben miti wan umapikin di ben abi 13 yari di ben arki nanga furu belangstelling èn di ben teki buku. A tra dei na skoro, a yongu sisa ben si a srefi umapikin disi. Syatu baka dati, a ben aksi en fu studeri Bijbel nanga en, èn na umapikin ben agri.
8 Meki A Ten Di Yu E Gebroiki ini a Velddienst De Ten Di Abi Trutru Waarde: Na abi di wi abi wan prati na a velddienst doronomo e yepi wi fu gro na ini den bekwaamfasi fu wi fu pristeri a bun nyunsu. ¿Yu kan meki a koni di yu abi fu bigin wan takimakandra na a doro kon moro bun, fu di yu e gebroiki wan inleiding di abi moro bun bakapisi? ¿Yu ben kan tron wan moro koni leriman te yu e hori wan bijbelstudie? Efu yu e du dati, dan trutru yu sa man gebroiki a ten di yu e gi na a diniwroko na wan warti fasi èn yu sa man meki taki yu diniwroko abi moro bun bakapisi.—1 Tim. 4:16.
9 Fu di „a ten di tan abra kon syatu”, meki wi musu furu wi libi nanga Kresten wroko (1 Kor. 7:29). A moro prenspari sani di wi musu du na a fosi presi na taki wi musu poti ten aparti gi a preikiwroko. Meki wi abi wan gosontu èn fayafaya prati na ini a diniwroko. Ten na wan moi gudu di Yehovah gi wi. Gebroiki en ala ten na wan koni fasi èn na wan warti fasi.
[Faki na tapu bladzijde 4]
Poti Prakseri na den Rai Disi:
◼ Doro biten na den velddienst konmakandra.
◼ Efu a kan, dan hori den grupu fu gi kotoigi, pikin.
◼ No meki noti hori yu na baka fu doro na ini a gebied.
◼ Wroko na ini a gebied te moro furu fu den sma de na oso.
◼ Son leisi yu kan wroko yu wawan efu kefar no de.
◼ Tyari gobaka di de krosibei fu a gebied pe yu e wroko oso fu oso.
◼ Te trawan fu a grupu e tan langa na wan doro, dan go doro na ini a diniwroko.
◼ Efu a kan, dan tan moro langa leki wan yuru na ini a diniwroko.