Ondrofenitori fu a Jaarboek 2014
„Yehovah nanga den engel o de mi mati”
Mary abi 70 yari èn a e tan na ini Kenia. En heri libi a ben de na ini a Presbyter Kerki. Furu leisi a yepi fu piki moni gi a kerki èn a ben yepi srefi fu bow wan fu den kerki na ini a birti pe a e tan. Di wan fu den manpikin fu en tron wan Yehovah Kotoigi, dan a no ben lobi dati. Te a manpikin fu en ben e aksi en fu kon na den gemeente konmakandra, dan Mary no ben wani. A ben taki dati a no ben wani yere a Bijbel boskopu na ini Swahilitongo, ma a ben wani yere en na ini en eigi tongo. Dati na Kikuyutongo. Baka wan pisi ten Mary kisi wan kari fu go na wan kongres di ben o hori na ini Kikuyutongo èn a bosroiti fu go. Di a ben de na a kongres a ben sidon na a pisi pe den owrusma ben e sidon. Den sma na a kongres ben sori lobi nanga switifasi gi en èn dati ben naki en ati. Mary ben taki dati noiti den sma na ini en kerki ben sori so furu lobi gi en. A ben arki bun te den lezing ben hori èn a ben breiti nanga den sani di a ben yere na a kongres. Di sma aksi en fu studeri na Arki Gado-brochure, dan a ben wani dati.
Baka di a studeri wan tu mun, Mary bosroiti taki a ben wani tron wan Yehovah Kotoigi èn a gowe libi a Presbyter Kerki. Den fesiman fu a kerki ben ati bron srefisrefi. Dati meki den seni kari wan domri fu a mamafoto Nairobi fu kon taki nanga Mary. A domri pruberi fu dwengi en fu no gowe libi a kerki, ma Mary no kenki prakseri. A domri aksi en: „Pe yu o feni mati te yu gowe libi a kerki? Someni mati nanga birtisma fu yu den na ini a Presbyter Kerki.”
„Yehovah nanga den engel o de mi mati èn den Kotoigi o de mi mati tu”, Mary piki.
Di a domri si taki a no ben man meki Mary kenki prakseri, dan a gowe. Mary e go doro nanga a Bijbelstudie èn aladi a e libi fara fu a konmakandra presi, toku a e go na ala den Kresten konmakandra. No so langa pasa, di a no ben man teki bus fu go na konmakandra, a waka tu yuru langa na ini alen fu doro drape. Aladi den birtisma fu Mary e gens en, toku a abi a fasti bosroiti fu teki dopu.
„Yu de seiker taki na dya yu musu de?”
Wan uma fu Somalia di e tan na Sweden ben kisi wan kari fu go na wan konmakandra na a Kownukondre zaal èn a bosroiti fu go. Ma sani no waka bun di a go. Nowan sma no taki en odi ma den ben luku en nomo. Disi meki na uma firi fruferi. Wan sma di ben si dati aksi en: „Yu de seiker taki na dya yu musu de?”
„No, mi no denki”, na uma piki. Dan a gowe. Di na uma miti den Kotoigi di ben gi en wan kari, dan en ati ben e bron èn a taigi den taki noiti moro a o kon na wan konmakandra. Den Kotoigi ben aksi densrefi san ben kan pasa fu di den no ben si en na a Kownukondre zaal. Di den taki go doro den kon frustan taki sondro fu na uma sabi a ben go na wan kerki.
Den Kotoigi gi en deki-ati baka fu kon na a Kownukondre zaal. A taki dati a ben o go, ma a no ben o tan moro leki tin miniti efu den sma ben meki a firi fruferi. Di a go na ini a Kownukondre zaal, dan ala sma fu a gemeente kon taki en odi. A ben lobi dati so te taki a ben de a lasti sma di gowe baka a konmakandra. Sensi a dei dati a tan go na den konmakandra èn now a de wan dopu preikiman.