Feni sma di abi belangstelling, nanga jepi foe strati kotoigiwroko di sa abi boen bakapisi
1 Jesus ben leri den disipel foe en, foe soekoe sma di e froedini foe jere a Kownoekondre boen njoensoe (Mat. 10:11). Tokoe, ini foeroe kontren ini a ten disi, a e kon tron moro moeilek foe miti sma na den oso foe den. So boen, san wi kan doe foe miti sma di e froedini dati, di wi ben sa misi kande?
2 Strati kotoigiwroko kan de wan boen fasi foe feni sma di wi ben misi na a oso-foe-oso wroko. Wi kan doe strati kotoigiwroko na bushalte, krosibei foe oso pe sma no man go makriki na inisei, èn na tra presi pe sma e pasa te den e doe den aladei afersi foe den.
3 Te sma e taki foe strati kotoigiwroko, dan sonwan e frede. Den e draidrai kande foe abi wan prati ini a wroko dati, foe di den e sjen, noso foe di den e froewakti taki sma di ati e bron nanga a Kownoekondre boskopoe, no sa wani arki den. Den broko-ede disi moro foeroe na foe soso. Denwan di abi ondrofeni ini a wroko disi, e taki dati a no de moro moeilek leki a doro-foe-doro kotoigiwroko. Moro leki dati srefi, den ben kon si taki foeroe sma gwenti dati trawan e waka miti den na strati gi difrenti reide, èn sonwan wani foe taki noso foe arki moro leki den ben sa doe dati te wi ben sa naki na a doro foe den. So boen, efoe wi ’de sondro foe frede’, dan wi kan abi switi bakapisi di wi no ben froewakti. — 1 Tes. 2:2.
4 Fa wi kan doe a strati wroko, so taki wi kan abi moro boen bakapisi? A de prenspari foe sreka boen. Leisi den tijdschrift na fesi, èn teki wán noso toe penti foe taki, foe san joe e denki dati a sa wiki a belangstelling foe den sma di joe sa miti. Wan pristeri foe 30 seconde de nofo. Sensi a marki de foe miti trawan persoonlijk, dan wi moesoe tanapoe na wan presi pe nofo sma e pasa doronomo. Ala di a kan de wan boen sani foe abi wan tra preikiman krosibei, tokoe foeroe tron, a moro boen foe ibriwan wroko aparti. Preikiman di e tanapoe makandra, sa kan wani foe pasa a ten nanga a taki nanga makandra èn den no de na ai foe si denwan ini a poebliki di wani foe arki a Kownoekondre boskopoe.
5 Tanapoe na wán presi èn sori sma den tijdschrift nomo, no abi so boen bakapisi leki te joesrefi e waka go miti sma. Proeberi foe loekoe a sma na ini en ai. De nanga switifasi èn no draidrai, te joe e proeberi foe bigin wan takimakandra. Ini son kefal, a kan de so taki, joe moesoe waka nanga a sma, ala di joe e taki nanga en. Efoe a e gi jesi, dan pristeri den tijdschrift. Efoe a e weigri foe teki den tijdschrift, dan joe sa kan pristeri wan traktaat.
6 Ini moro foeroe kefal, a de moro boen foe sreka wan sjatoe pristeri di e poti wan aksi noso e taki wan sani, di sa wiki a belangstelling. Efoe a sma e gi piki tapoe wan boen fasi, dan proeberi foe kisi en nen, adres, nanga kande srefi a telefon nomroe foe en, so taki joe kan tan go baka na a sma foe kweki a belangstelling di a abi. Joe ben sa kan taki: „Efoe joe ben sa wani foe leri moro, dan mi ben sa prisiri foe fisiti joe na joe oso noso seti sani, so taki wan tra kotoigi kan doe dati.”
7 Wan owroeman di ben doe strati kotoigiwroko, ben waka miti wan oema èn a ben kon sabi taki na oema noiti ben abi na okasi foe taki nanga den Kotoigi na en oso. Na oema ben teki wan boekoe èn a ben agri foe wan sisa fisiti en na oso na wan ten di fiti. Wi seiker kan feni moro foeroe sma di e froedini dati èn wi kan jepi den, efoe wi e doe wi strati kotoigiwroko nanga boen bakapisi. — Tori. 17:17.