Meki a Nen fu Yehovah Nanga den Sani Di A Du Bekènti
1 „Taki Yehovah tangi, kari en nen, meki sma kon sabi den sani di a du. . . . Meki na ati fu den wan di e suku Yehovah, prisiri” (Ps. 105:1, 3). A psalm skrifiman di skrifi den wortu disi, ben prisiri srefisrefi te a ben e fruteri tra sma fu Yehovah nanga ’den sani di a du’. Sortu sani? Sondro tweifri disi na den sani di abi fu du nanga a glori kownumakti fu Gado èn nanga „a bun nyunsu fu a frulusu di a e gi”.—Ps. 96:2, 3; 145:11, 12.
2 Now di wi e doro a pisi ten fu a Memrefesa fu a yari 2001, wi abi furu reide fu prisiri fu den sani di Yehovah du gi wi. Fa so? Sondro tweifri, na Avondmaal fu Masra na a moro bigi fesa fu a yari gi ala tru Kresten. Te yu e prakseri fu a marki fu a fesa noso a fasi fa a fesa e hori dan no wan tra okasi de so prenspari leki a fesa disi. Disi na wan ten gi wi alamala fu memre den sani di Yehovah nanga Yesus du so taki wi kan kisi frulusu. A no de fu fruwondru dati na ini a pisi ten fu a Memrefesa, wi e fruwakti taki moro wroko e du na ini a preikiwroko, te wi e meki „a bun nyunsu fu frulusu” bekènti!
3 Yu O De wan Yepipionier? Na ini april fu a yari di pasa, wan heimarki fu 629 sma ben du a yepi-pionierwroko. Wi kan meki taki moro wroko e du na ini a diniwroko na ini den mun maart nanga april, a yari disi? Maart abi feifi satra, april abi feifi sonde. Furu preikiman di abi wan furuten wroko kon si taki den man du a yepi-pionierwroko, te den e sreka sani fu wroko den satra nanga den sonde a heri dei. Wan yepipionier musu wroko so wan 12 yuru wan wiki, fu kan doro a markitiki fu 50 yuru wan mun. Luku den schema finifini di de fu feni na ini a faki tapu bladzijde 4. Yu o man gebroiki wan fu den na ini yu situwâsi? Efu dati no man, dan kande yu kan meki yu eigi schema fu kan du a yepi-pionierwroko na ini maart nanga april.
4 Nownow den owruman musu bigin fu wiki a faya fu den preikiman so taki den kan du moro fu horibaka gi a diniwroko. Na ini wán gemeente (na Amerkankondre) pe ala owruman nanga dinari ini a diniwroko ben du a yepi- pionierwroko a yari di pasa, 64 fu den 121 preikiman ben pionier na ini april! A ben de wan prisiri sani tu gi a gemeente fu si taki siksi preikiman di no dopu ete ben bigin go na ini a preikiwroko na ini maart nanga april. Fu tru, disi na a moro bun ten gi pikin-nengre nanga nyunwan fu aksi den owruman efu den doro den markitiki fu teki prati na a wroko fu gi kotoigi na publiki.
5 Moro Muiti E Tyari Blesi Kon: Den gemeente di e poti spesrutu marki di den wani doro èn di e du furu muiti, sa kisi furu blesi. Son gemeente kan gi spesrutu deki-ati fu wroko kontren pe den no e go so furu, fu di den e poti prakseri na difrenti fasi fu gi kotoigi, noso fu di den e poti prakseri na a gebroiki fu a telefon fu gi kotoigi. Disi na wan bun fasi fu taki nanga sma di no ben de na oso, noso sma di e libi na ini presi di muilek fu doro.
6 Wan sma musu meki taki wan takru gosontu noso na owru di a owru, tapu en fu du someni leki a man na ini a diniwroko? A no ala ten dati abi fu de so. Fu eksempre, wan owru sisa fu 86 yari, di abi kanker ben du a yepi-pionierwroko na ini april, ala di en futu ben sweri. Fu di a ben gi kotoigi nanga yepi fu telefon meki a ben man teki prati na a diniwroko dorodoro, so taki a ben prèise Yehovah moro furu. Disi ben meki taki ensrefi nanga a gemeente ben kisi deki-ati.
7 Sreka Yusrefi Bun gi a Memrefesa: A yari disi a Memrefesa o de 8 april. Fu di disi na wan sonde, meki moro furu sma o man kon. Wi kan abi a moro bigi nomru fu sma di kon oiti efu wi e du san wi musu du, èn dati na taki (1) wisrefi musu de drape èn (2) wi musu gi trawan wan kari fu kon hori a Memrefesa makandra nanga wi. Suma wi musu gi wan kari fu kon?
8 Luku den papira pe yu skrifi sani fu a preikiwroko gi yusrefi, fu kan feni den nen fu den wan di sori taki den wani sabi pikinso fu a waarheid, srefi efu yu no go luku den doronomo. Du ala san yu man fu go na ala den sortu sma disi nanga a karta fu gi den wan kari fu kon na a Memrefesa, tu noso dri wiki fosi a Memrefesa e hori. Efu yu man, dan aksi den sma di wani kon efu yu kan kon teki den fu poti den na a presi.
9 Na ini son gemeente, den brada nanga sisa no e gebroiki ala den karta di druk fu gi sma wan kari. Den gemeente sekretarsi musu sorgu taki ala sma kan kisi den karta disi biten fu prati den. Kande yu wani gebroiki wan pen noso wan skrifi masyin fu skrifi moi na ondrosei fu a karta o lati èn pe a Memrefesa o hori. Noso yu kan gi sma so srefi wan strooibiljet di e sori pe a Kownukondre zaal de, efu dati na a presi pe a Memrefesa fu yu gemeente o hori. Wi wani memre yu tu taki furutron, yusrefi musu gi na ososma a karta gi a Memrefesa.
10 Memre den Wan Di No E Preiki Moro: Na wan prisiri sani te wan bijbelstudenti e gi ensrefi abra na Yehovah èn e sori taki a du dati fu di a teki dopu na ini watra. Ma toku ibri yari, sonwan na wi mindri e tapu fu abi demakandra nanga wi, èn den no e fruteri trawan moro fu a nen fu Yehovah èn fu den sani di a du. Wi abi bun reide fu broko wi ede. Moro furu sma di no e preiki moro, no libi a waarheid. Ma a kan taki den tapu nanga a preikiwroko fu di den lasi-ati, fu den eigi problema ede, noso fu tra broko-ede na ini a libi (Mat. 13:20-22). Den wan di swaki na yeye fasi abi yepi fanowdu fu drai kon baka na a gemeente bifo Satan kisi den so taki den tron wan pisi fu a sistema fu en (1 Petr. 5:8). Na a pisi ten disi fu a Memrefesa, wi wani meki spesrutu muiti fu yepi ala sma di no e preiki moro ma di doro den markitiki, fu preiki a bun nyunsu baka.
11 A gemeente sekretarsi musu sori den bukustudie fesiman, suma na den wan na ini a grupu fu den di no e preiki moro. A Dienstkomte fu a gemeente o teki fesi fu seti sani, so taki skapuman kan go luku ala den wan di no e preiki moro. Efu den kon si taki a sma ben o kisi furu wini efu a e studeri Bijbel, dan a Dienstkomte musu taki suma na a moro bun sma fu hori a studie. Ala di a kan taki a no de fanowdu fu hori a studie wan langa pisi ten, toku a wan di poti fu hori a studie kan skrifi a ten, den gobaka, nanga a bijbelstudie.
12 April fu a yari di pasa, wan sisa di ben wroko oso fu oso ben pristeri wan yonkuman tijdschrift na strati. A ben fruteri taki en wefi na wan Kotoigi di no e preiki moro. A ben aksi pe a Kownukondre zaal de, èn a ben gi a sisa wan kari fu kon na en nanga en wefi. A bakapisi ben de taki a trowpaar ben kon na a konmakandra èn taki den ben feni en bun fu studeri Bijbel.
13 Sreka Yusrefi fu Du Moro! A psalm skrifiman di ben taki dati wi musu meki sma kon sabi a nen fu Yehovah nanga den sani di a du ben taki moro fara: „Singi gi en, meki poku gi en, denki dipi fu ala den wondru wroko fu en. Prèise en santa nen” (Ps. 105:2, 3). Meki wi sori taki wi e broko wi ede nanga a bigi nen fu Yehovah èn nanga en „wondruwroko” fu di wi e meki moro muiti na ini a diniwroko. Na so wan fasi wi e meki a pisi ten disi fu a Memrefesa kon de a moro bigi wan di wi ben abi oiti!
[Faki na tapu bladzijde 4]
Difrenti Schema fu Doro 12 Yuru wan Wiki fu Kan Du a Yepi-pionierwroko
Dei Yuru
Munde 1 2 − −
Tudewroko 1 − 3 −
Dridewroko 1 2 − 5
Fodewroko 1 − 3 −
Freida 1 2 − −
Satra 5 4 3 5
Sonde 2 2 3 2
Ala Nanga Ala: 12 12 12 12
Wan fu den schema disi o man yepi yu? Efu dati no de so, dan fu san ede yu no e meki yu eigi schema?