Wan brifi fu a Tiri Skin
Wi lobi Kotoigi fu Yehovah:
A de wan bigi grani fu de wan pipel di e tyari a nen fu a moro Hei Masra, Yehovah! A nen dati e tan fu têgo, noiti wan kaba o kon na en, èn wi no kan teki en gersi nanga nowan tra nen. Na Yehovah gi wi a nen dati fu tyari, èn spesrutu sensi a yari 1931, sma kon sabi wi na a nen dati (Yes. 43:10). Wi e feni en wan grani fu meki sma kon sabi wi leki Yehovah Kotoigi.
Didibri e tan pruberi fu tapu sma fu kon sabi a nen fu Gado. Na ondro a tiri fu en, den pipel e tegu gi a nen fu Yehovah. Babilon a Bigiwan, a grontapumakti fu falsi bribi, no lobi a nen fu Gado kwetikweti èn den puru a nen dati na ini furu Bijbelvertaling. Na a tra sei, Yesus ben hori a nen fu en Tata hei, èn dati ben de a fosi sani di a kari na ini a begi di a leri den bakaman fu en. A ben taki: „Fu dati ede un musu begi so: ’Wi Tata na hemel, meki yu nen kon santa’” (Mat. 6:9). Bakaten, di a begi en Tata fayafaya, a taki: „Mi meki yu nen bekènti na den sma di yu puru na ini grontapu èn di yu gi mi” (Yoh. 17:6). Fu di wi wani teki a moi eksempre fu Yesus, meki moro leki iniwan ten bifo wi abi a fasti bosroiti fu meki Yehovah nen bekènti fayafaya na heri grontapu.
A yaritekst fu 2009 ben de: „Gi kotoigi dorodoro fu a bun nyunsu.” A tekst disi ben gi wi deki-ati fu du wi diniwroko dorodoro (Tori. 20:24). A no de fu taki dati Yehovah trutru blesi a muiti di wi meki na ini a dienstyari di pasa. Wan bigi kotoigiwroko di du na heri grontapu, gi glori nanga grani na a nen fu Yehovah. Wan nyun heimarki fu 7.313.173 preikiman e preiki gi sma. Den e gi leri tu na den reti-ati sma di e suku lusu gi den furu problema di den e kisi ibri dei. Na a Memrefesa fu a dede fu Krestes wi ben abi 18.168.323 sma. Disi e sori taki milyunmilyun sma de ete di kan kari Yehovah nen bifo a kaba fu na ogri sistema disi kon.
Solanga Yehovah e gi pasi ete, wi o tan preiki a bun nyunsu fu a Kownukondre fayafaya, fu di wi o du ala muiti di wi man fu miti sma na ini wi kontren (Mat. 24:14; Mark. 13:10). Awansi wi e preiki oso fu oso, na strati, nanga yepi fu brifi, nanga yepi fu telefon, noso te wi kisi na okasi, wi o du muiti fu meki Yehovah nen bekènti na so furu sma leki wi man. Boiti dati, wi o meki den kon sabi san na den sani di a o du.
Wi kan de seiker taki heri esi Yehovah o santa en nen (Esek. 36:23). A ten e kon krosibei esi-esi te ala den sma di e pori a nen fu en o kisi pori. A dei dati o de wan bigi dei gi ala den futuboi fu Yehovah di tan dini en, di meki sma kon sabi Yehovah en nen, èn di tan horibaka gi en leki a moro hei masra!
A lobi-ati fasi fa Yehovah e sorgu gi en pipel ben de krin fu si na a „Tan na ai!” Distrikt Kongres nanga Internationaal Kongres di hori na furu kondre na ini a yari 2009. Den kongres dati ben de prenspari, fu di den gi wi a deki-ati fu de na ai moro, bika a dei fu Yehovah de krosibei.—Mark. 13:37; 1 Tes. 5:1, 2, 4.
Yehovah du bun gi wi trutru, iya, a e meki wi ati prisiri. A e meki wi didon na ini wei pe furu grasi de èn a e tyari wi go na presi pe wi kan rostu èn pe furu watra de.—Ps. 23:1, 2; 100:2, 5.
Yu kan abi a dyaranti taki Yehovah sa tan blesi yu te yu tan abi furu fu du na ini a Kownukondre diniwroko na ini den mun di e kon!
Wi e seni ala wi brada nanga sisa wi Kresten lobi,
Un brada,
A Tiri Skin fu Yehovah Kotoigi