A moro prenspari wroko di de
1. San wi o du te wi abi trutru warderi gi a preikiwroko?
1 Fu san ede wi e kisi deki-ati doronomo fu gebroiki wi ten, wi krakti, nanga den sani wi abi na ini a preikiwroko? Bika nowan tra wroko prenspari moro a preikiwroko! Te wi e denki dipi o furu krakti a wroko disi abi, dan wi sa kisi wan moro tranga angri fu teki prati na a wroko disi di no o du noiti moro.—Tori. 20:24.
2. Fa a preikiwroko di wi e du e yepi fu meki a bigi nen fu Yehovah kon santa?
2 Yehovah en nen e kon santa: A preikiwroko e sori krin taki a Kownukondre fu Yehovah, pe Krestes Yesus na kownu, o puru ala libisma tirimakti èn a o lusu ala den problema di libisma abi (Mat. 6:9, 10). Yehovah e kisi grani leki a wan-enkri Sma di man frulusu wi fu siki nanga dede (Yes. 25:8; 33:24). Fu di wi e tyari Gado nen, meki tra sma kan gi en glori te den e si fa wi e tyari wisrefi na wan bun fasi èn te den e si a faya di wi abi (1 Petr. 2:12). A e gi wi prisiri fu meki a nen fu a Moro Hei Masra Yehovah bekènti na heri grontapu!—Ps. 83:18.
3. Sortu blesi den sma di e gi yesi na a Kownukondre boskopu, o kisi?
3 A preikiwroko e kibri sma libi: Yehovah „no wani nowan sma fu lasi libi, ma a wani taki ala sma musu kisi berow” (2 Petr. 3:9). Ma efu nowan sma leri den, dan fa sma o kon sabi san Yehovah feni bun èn san a no feni bun te a abi fu du nanga a fasi fa den e tyari densrefi? (Yona 4:11; Rom. 10:13-15) Te sma e gi yesi na a bun nyunsu èn te den e tapu nanga den ogri sani di den e du, dan a libi fu den e kon moro bun (Mika 4:1-4). Boiti dati, den e kon abi a moi howpu fu kisi têgo libi. Te wi e preiki èn e gi sma leri, dan dati o meki wi kisi frulusu èn sosrefi den sma di e arki wi (1 Tim. 4:16). Iya, wi abi wan tumusi bigi grani fu du a tumusi prenspari wroko disi!
4. Fu san ede wi musu teki prati fayafaya na a Kownukondre preikiwroko nanga a wroko fu meki disipel?
4 Heri esi, a bigi banawtu o tyari wan kaba kon na a ogri grontapu disi. Den sma di e anbegi Yehovah, o tan na libi. Fu dati ede, a preikiwroko nanga a wroko fu meki disipel, na a moro bun èn prenspari wroko di e du na ini a ten disi. Meki a de so taki a preikiwroko na a moro prenspari wroko na ini wi libi!—Mat. 6:33.