Wi musu tan de fayafaya na ini a diniwroko
1 Ibri yari sensi 1992, Yehovah Kotoigi na heri grontapu e wroko fayafaya moro leki wán milyard yuru fu preiki a Kownukondre èn fu meki disipel. Wi breiti srefisrefi taki wi ben man abi wan pikin prati na so wan tumusi moi wroko!—Mat. 28:19, 20.
2 A no de fu taki dati wi e gi Yehovah tangi èn taki wi e prèise en, fu di en na a Sma di e horibaka gi wi èn di e gi wi san wi abi fanowdu fu du wi diniwroko na ini den „muilek ten” disi (2 Tim. 3:1). San wi musu du efu wi wani tan teki prati fayafaya na a prenspari wroko disi?
3 Fu san ede wi musu de fayafaya: Fu di wi lobi Gado nanga tra sma, èn fu di wi wani du a wani fu Gado soleki fa wi ben pramisi di wi teki dopu, meki wi e du a Kownukondre diniwroko fu wi fayafaya (Mat. 22:37-39; 1 Yoh. 5:3). Lobi e meki taki wi no e denki wisrefi nomo, ma taki wi de klariklari fu du ala san wi man, so taki wi kan teki prati doronomo na a preikiwroko.—Luk. 9:23.
4 Du tranga muiti fu tan de fayafaya: Wi gensman Didibri e du ala san a man fu meki taki wi no de so fayafaya moro na ini a diniwroko. Wan tu fu den sani di Didibri e gebroiki fu broko wi saka, na sani soleki a mi-no-ke fasi fu sma na ini a kontren fu wi, nanga den sani fu a grontapu disi di kan puru wi prakseri fu wi diniwroko. Boiti dati, a e gebroiki den broko-ede fu na aladei libi, èn a broko-ede di wi abi fu wi eigi gosontu di e go na baka moro nanga moro.
5 Fu dati ede, wi musu meki tranga muiti fu tan de fayafaya. A de prenspari taki wi e kon kisi ’a lobi baka di wi ben abi biginbigin’. Dati wani taki dati wi musu leisi Gado Wortu, Bijbel doronomo, èn wi musu denki dipi fu dati tu. Boiti dati, wi musu gebroiki ala sani di Yehovah e gi wi nanga yepi fu „a getrow èn koni srafu”, fu tranga a bribi fu wi.—Openb. 2:4; Mat. 24:45; Ps. 119:97.
6 Soleki fa Bijbel profeititori e sori krin, dan a dei fu Yehovah te a o pori ala ogrisma, e kon krosibei gawgaw (2 Petr. 2:3; 3:10). Meki wi hori a sani disi bun na prakseri èn meki wi du tranga muiti fu tan de fayafaya na ini a diniwroko. Iya, meki wi teki prati doronomo na a Kownukondre preikiwroko èn a wroko fu meki disipel, soleki fa wi e du dati now na heri grontapu!