Yu o de nanga faya neleki Yehovah nanga Yesus na a ten fu a Memrefesa?
1. San Yehovah Kotoigi e du na a ten fu a Memrefesa?
1 Yehovah de fayafaya fu du san a abi na prakseri, iya, a de nomonomo fu du den sani dati. Di Yesaya taki fu wan tu fu den blesi di Gado Kownukondre o tyari kon, dan a taki na ini Yesaya 9:7: „Yehovah di e tiri den legre o meki a sani disi pasa nomonomo.” Di a Manpikin fu Gado ben de na grontapu, a ben de fayafaya tu èn a sori dati di a du ala san a man gi a tru anbegi (Yoh. 2:13-17; 4:34). Ibri yari na a ten fu a Memrefesa, milyunmilyun preikiman na heri grontapu e meki muiti fu de fayafaya neleki Yehovah nanga Yesus. Dati meki den e du moro na ini a preikiwroko. Yu o du dati tu?
2. Te wi de fayafaya, dan san wi o bigin du na tapu 7 maart?
2 Kari sma gi a Memrefesa: Na tapu satra 7 maart wi o bigin kari sma fu kon na a Memrefesa. Sreka sani now fu du moro na ini a preikiwroko. Den gemeente o de fayafaya fu wroko a heri kontren fu den. Du ala san yu man fu kari den Bijbelstudie fu yu, den gobaka, den sma na wrokope, na skoro, nanga den famiriman fu yu. Yu kan gebroiki wan fu den papira fu gi den wan kari noso yu kan sori den tapu jw.org.
3. Fa wi kan du moro na ini a diniwroko na ini maart nanga april?
3 Yepi-pionierwroko: Te wi de fayafaya, dan wi o wani du moro tu na ini a diniwroko. A no de fu taki dati furu fu wi o man go na ini a yepi-pionierwroko na ini maart nanga april, fu di wi o man wroko 30 yuru na ini den mun dati. Te yu e hori na Osofamiri Anbegi noso te yu e studeri nanga yusrefi, dan begi fu a tori disi (Odo 15:22). Te yu de fayafaya fu du moro na a spesrutu ten disi, dan dati kan gi trawan deki-ati fu du a srefi. Efu yu e seti yu libi na so wan fasi taki yu kan du moro, dan yu o de fayafaya neleki Yesus.—Mark. 6:31-34.
4. Sortu blesi wi o kisi te wi de fayafaya neleki Yehovah nanga Yesus?
4 Te wi de fayafaya neleki Yehovah nanga Yesus na a ten fu a Memrefesa, dan wi o kisi furu blesi. Wi o man preiki gi furu sma na ini a kontren fu wi. Wi o de nanga prisiri èn wi o de koloku fu di wi sabi taki wi e dini Yehovah èn fu di wi e preiki gi trawan (Tori 20:35). Ma a moro prenspari sani na taki Gado nanga en Manpikin di de fayafaya, o breiti nanga wi.